Y Prifardd Llion Jones, un a fagwyd yn Abergele, yw awdur y cywydd croeso a dyma ddetholiad:

Daeth i’r henfro hon

awr i hwylio gorwelion,

awr gŵyl i danio’r golau,

awr rhoi’r tir i ni to’r iau

i roi hyder ar waith,

i roi ynni i’r heniaith.

Iaith y pridd ac iaith y prom

y mae hi’n fwrlwm ynom,

draw ar rwydwaith direidi

hon yw iaith ein Snapchat ni,

iaith nodau o dannau dur

a’r iaith sydd yn y ‘sgrythur.

Ffynhonnell y llun, Canolfan Bedwyr

BBC Radio Cymru

Neges gan griw Radio Cymru!

Mae Radio Cymru angen eich help chi i ddathlu y 'Steddfod gyntaf ers 2019.

Ry’ ni angen i chi ddanfon lluniau ohonoch chi (neu’ch plant, neu’ch anifeiliaid anwes!) gyda Mistar Urdd, fel mae Shelley a Rhydian yn 'neud yn fan hyn!

E-bostiwch eich lluniau i: shelleyarhydian@bbc.co.uk neu rhowch nhw ar gyfrif facebook Radio Cymru.

Bydd fideo arbennig yn cael ei greu ar ddiwedd wythnos y ‘Steddfod.

Mae'r Maes wedi prysuro erbyn hyn - ymhlith yr ymwelwyr mae Madi o Landderfel ac Owi o Lanuwchllyn, oedd yn wên o glust i glust amser cinio.

Mae Ysgol Plascrug, Aberystwyth yn enillwyr cyson yn Adran Dysgwyr Eisteddfod Genedlaethol yr Urdd.

Nhw heddiw oedd yn fuddugol yn y gystadleuaeth Ymgom i Ddysgwyr Blwyddyn 6 ac Iau ac yng nghystadleuaeth y gân actol i ddysgwyr.

Ffynhonnell y llun, Twitter @YsgolPlascrug

Mae’r ddwy yma o Ynys Môn wedi canfod ffordd dda o ddelio gyda’r glaw a chadw eu dwylo yn rhydd.

“Mae’n od bod yng nghanol pobl eto,” meddai Lisa Jones, o’r Fali.

“Mae’n teimlo’n wahanol – does 'na’m canolbwynt heb prif bafiliwn, ond mae’n neis achos mae’r plant yn dal i gael y cyfle i gystadlu,” meddai Lowri Carlisle o Gaergybi.

Dawnswyr Adran Penrhyd o Ddwyrain Myrddin enillodd y gystadleuaeth Dawns Werin Bl.4 ac iau ac roedden nhw wrth eu bodd.

Ysgol Gymraeg Llwyncelyn oedd yn ail ac roedd Ysgol y Dderwen yn drydydd.

Roedd yna gryn gyffro wedi i Mari Lovgreen gyhoeddi mai cerddorfa Ysgol Bontnewydd oedd yn fuddugol!

Mae Gethin, Dafydd a Garin o Ddolgellau wedi dod draw i Ddinbych i gystadlu yn y dawnsio gwerin ac wrth eu bodd!

Cerddorfa Ysgol Bontnewydd oedd yn fuddugol yn y gystadleuaeth Cerddorfa/Band Bl. 6 ac Iau gydag ysgol Llanfairpwll yn ail ac Ysgol Gymraeg Aberystwyth yn drydydd.

Ffynhonnell y llun, Twitter @YsgolGymraeg

Tri phafiliwn ddim yn ddigon? Roedd Annest, 6, wrth ei bodd yn yr Arddorfa amser cinio.

Eisteddfodwyr ddydd Llun yn ffafrio bwyd traddodiadol neu giw llai!

Dim cymaint yn ciwio am fwyd Caribïaidd hyd yma!

Wel does dim un 'Steddfod yn gyflawn heb ginio da ar y maes.

Ac ydi mae'r ciwio wedi dechrau!

Un o'r llefydd mwya' poblogaidd yw'r lle aros am ganlyniadau.

Gwen o Ysgol y Cregiau oedd y llefarydd gorau ym marn beirniaid Llefaru Unigol Bl. 2 ac iau.

Efa o Ysgol Garth Olwg oedd yn ail

ac roedd Nanw o Ysgol Gynradd Aberaeron yn drydydd.

Dyma rai o ddisgyblion Ysgol Llannerch-y-medd, Ynys Môn, ar y bws fore Llun - yn gyffrous i gystadlu a chael dychwelyd i'r ffair!

Roedd yna dwr o bobl yn disgwyl canlyniad Blwyddyn 2 ac iau a'r enillydd oedd Gwenllian o Ysgol Gymraeg Gwenllian, Dwyrain Myrddin.

Roedd yna lwyddiant hefyd i Gruffudd o Adran Tref y Gelli -fe oedd yn ail ac roedd Jac o Ysgol Pontrobert yn drydydd.

Ydych chi am gystadlu? Mae yna her isod.

Grŵp Cerys o Ysgol Llanfair Dyffryn Clwyd sydd wedi ennill y ddawns werin Bl.6 ac iau.

Roedd Ysgol Cwm Banwy yn ail a Grŵp Anni o Ysgol Llanfair Dyffryn Clwyd yn drydydd.

Mae ap yr Eisteddfod yn ap cynhwysfawr sy’n rhoi’r canlyniadau diweddaraf ynghyd â gwybodaeth ddefnyddiol am y maes, teithio, tocynnau ayyb.

Gallwch ei lawrlwytho‘n uniongyrchol i’ch ffôn.

BBC Radio Cymru

Mae Radio Cymru yn falch i fod nôl yn Eisteddfod yr Urdd.

Bydd @FfionEmyr, dolen allanol ar y maes bob dydd, ac mi gewch chi holl hwyl y 'Steddfod gyda hi, Shelley a Rhydian, Caryl, ac Ifan Jones Evans.

Mae rhai o ymwelwyr ifanca'r ŵyl yn sicrhau bod digon o liw i'w weld er gwaetha'r cymylau - dyma'r chwiorydd Elan a Myfi o Nebo ger Llanrwst, ac Elsi o Landrillo yn y canol.

Unawd Blwyddyn 2 ac iau oedd un o'r cystadlaethau cyntaf bore 'ma am 9.

Roedd disgwyl i 19 i berfformio yn y Pafiliwn Coch.

Tybed i ble ro'n nhw am fynd wedyn? Fan hyn falle?

Mae prif weithredwr yr Urdd, Sian Lewis, yn dweud bod teimlad o "ryddhad mawr" fod yr ŵyl o'r diwedd wedi agor ei drysau ar ôl yr holl baratoi.

Ond er bod y maes yn ôl ar ei ffurf draddodiadol, mae'n gyffrous i weld yr ymateb i'r datblygiadau newydd.

"Mae'n bwysig bod ni fel yr Urdd yn esblygu i ofynion ein cwsmeriaid ni," meddai.

Ychwanegodd fod gobeithion yn uchel y bydd mynediad am ddim i'r maes yn helpu i ddenu cynulleidfaoedd newydd hefyd.

"Mae'n bwysig bod ni fel sefydliad Cymraeg yn denu'r di-Gymraeg a dysgwyr i mewn hefyd, ac yn sicrhau bod nhw'n cael profiad positif o glywed y Gymraeg fel iaith fyw."