Crynodeb

  • Charles III wedi gwneud ei ymweliad cyntaf â Chymru fel Brenin, gyda'r Frenhines Gydweddog Camilla

  • Bu'r ddau yn mynychu gwasanaeth yng Nghadeirlan Llandaf, cyn i'r Brenin gwrdd â'r dorf tu allan

  • Ar ymweliad â Bae Caerdydd bu'n annerch y Senedd yn Gymraeg wrth dderbyn Cynnig o Gydymdeimlad

  • Bu'r pâr Brenhinol yn cwrdd â'r dorf eto yn dilyn derbyniad yng Nghastell Caerdydd

  • Roedd torf fawr oedd yn gefnogol wedi ymgasglu tu allan, ond protestwyr yno hefyd

  • Daw wedi marwolaeth Brenhines Elizabeth II yn 96 oed

Y diweddaraf yn fyw

  1. Ffyrdd ynghau ar draws y brifddinas

    Bydd nifer o ffyrdd ar gau yn ystod yr ymweliad brenhinol, ac fe fydd mesurau diogelwch llym mewn grym.

    Mae yna gynllun wrth gefn hefyd i gau ardal ehangach i gerbydau os fydd yna dorfeydd mawr.

    Dywed Cyngor Caerdydd eu bod wedi trefnu nifer "sylweddol" o stiwardiaid i gydweithio â swyddogion heddlu fel rhan o'r cynlluniau sydd hefyd yn cynnwys Llywodraeth Cymru a Heddlu De Cymru.

    Mae'r cyngor hefyd yn cynghori pobl i ddefnyddio trafnidiaeth gyhoeddus yn hytrach na cheisio gyrru a pharcio yng nghanol y ddinas.

    Mae Trafnidiaeth Cymru yn rhagweld y bydd gwasanaethau trên yn brysur iawn, ac yn annog pobl i ganiatáu mwy o amser i deithio ac i gadw golwg ar y sefyllfa ddiweddaraf.

    Cau ffyrdd canol Caerdydd

    Yn ogystal â'r cyfyngiadau yng nghanol y ddinas, bydd rhai ffyrdd hefyd ynghau yng Ngerddi Sophia, yn Llandaf ac yn y Bae.

    Mae'r manylion yn llawn i'w gweld ar wefan Cyngor Caerdydd.

  2. Ciw hir i geisio gweld y Brenin yn y castell

    Dyma'r ciw i fynd mewn i'r castell - lleoliad olaf ymweliad y Brenin a'r Frenhines Gydweddog - am tua 09:30 heddiw.

    2,000 o bobl fydd yn cael mynd i mewn i'r castell, felly mae nifer eisoes wedi bod yn ciwio ers sawl awr.

    Ciw y tu allan i Gastell Caerdydd i weld y Brenin

  3. Craig Duggan: Trefn y dydd

    Mae'n gohebwyr ar draws y brifddinas.

    Yn Llandaf ar ein rhan mae Craig Duggan.

    Craig Duggan yn esbonio beth fydd yn digwydd yng Nghadeirlan Llandaf heddiw.

  4. Ble fydd y Brenin a'r Frenhines Gydweddog yn mynd?

    Tri lleoliad o amgylch y brifddinas, Caerdydd sydd ar yr amserlen i'r Brenin Charles III heddiw.

    Yn gyntaf, bydd y Brenin a'r Frenhines Gydweddog yn bresennol mewn gwasanaeth o fyfyrdodau a gweddïau dros y Frenhines Elizabeth II yng Nghadeirlan Llandaf.

    Fe fyddan nhw wedyn yn mynd i'r Senedd ym Mae Caerdydd i dderbyn Cynnig o Gydymdeimlad.

    Y lleoliad olaf i'r pâr brenhinol ymweld ag o fydd Castell Caerdydd. Dywed Cyngor Caerdydd y byddan nhw'n cwrdd ag aelodau'r cyhoedd ar dir y castell, ond mae yna rybudd i ddisgwyl ciwiau hir, gyda phobl yn cael mynediad ar sail y cyntaf i'r felin.

    Camilla a CharlesGetty Images

  5. Y diweddaraf wrth i'r Brenin ddod i Gymru

    Mae'n ddiwrnod hanesyddol wrth i Charles III ddod i Gymru fel Brenin am y tro cyntaf ac yn gwmni iddo mae ei wraig, y Frenhines Gydweddog.

    Fe'i cyhoeddwyd yn frenin wedi i'w fam, Y Frenhines Elizabeth II, farw yn Balmoral wythnos ddiwethaf.

    Fe fydd y Brenin a'r Frenhines Gydweddog yn mynd i dri lleoliad yn y brifddinas ac yno hefyd mae'n gohebwyr.

    Croeso aton ni.

    Y brenin a'r frenhines gydweddogReuters