Dyna ni am heddiw - diolch yn fawr i chi am ddilyn ein llif byw o Fae Caerdydd.

Heddiw fe wnaeth miloedd o amaethwyr deithio i'r brifddinas i wrthwynebu newidiadau sylweddol, sy'n "anymarferol" ym marn yr undebau.

Dywedodd Heddlu De Cymru fod "tua 3,000" o bobl yn rhan o'r dorf y tu allan i'r Senedd.

Yn ôl y Gweinidog Materion Gwledig, Lesley Griffiths: "Rydym ond yn gallu llwyddo mewn partneriaeth, mae wir angen i ni gydweithio, a dyna rydym yn gwneud."

Mae'r stori yn parhau i ddatblygu ac mae modd cael y diweddaraf drwy ddarllen ein prif stori ni yma.

Yn y cyfamser, gwyliwch y fideo isod i gael blas o'r hyn ddigwyddodd heddiw. Diolch eto am ddilyn a hwyl fawr.

Heddlu De Cymru

Mae protest ym Mae Caerdydd wedi dod i ben yn heddychlon gyda mân aflonyddwch i'r cyhoedd, meddai Heddlu'r De.

Dywed y llu fod tua 3,000 o bobl y tu allan i’r Senedd ddydd Mercher.

Dywedodd yr Uwcharolygydd Esyr Jones: "Mae Heddlu De Cymru'n parchu'r hawl i brotestio'n heddychlon, ac yn dilyn trafodaeth gyda'r trefnwyr fe lwyddon ni i sicrhau bod y brotest yn digwydd yn ddiogel, yn gyfreithlon gyda chyn lleied â phosib o darfu ar y cyhoedd yn gyffredinol.

"Mae dod â thractorau a cherbydau amaethyddol eraill i mewn i amgylchedd dinas prysur yn peri risg i ddiogelwch defnyddwyr eraill y ffordd ac o bosib yn cyfyngu ar symudiadau gwasanaethau brys.

"Fodd bynnag, gan weithio gyda threfnwyr y brotest a Chyngor Caerdydd, cafodd man cadw addas ei adnabod a fyddai'n golygu nad oedd fawr o darfu neu oedi ar lwybrau o amgylch Bae Caerdydd ac ar draws rhwydwaith ffyrdd ehangach de Cymru."

Oriel luniau o'r miloedd aeth i Fae Caerdydd i wrthwynebu newidiadau sylweddol i gymorthdaliadau amaeth.

"Mae hwn am ein dyfodol ni," dywedodd Mali, 16 oed.

"'Da ni wedi cael ein magu a fo. Dyna 'da ni isio cario 'mlaen.

"Ar y funud 'da ni methu rili gweld y dyfodol", dyna farn Ela, sy'n 15 oed.

Ychwanegodd Lisa, sy' hefyd yn 16 oed, ei bod wedi cael ei magu i fod yn ffarmwraig a dywedodd y gallai gynlluniau newydd y llywodraeth fygwth hynny.

"Mae o am stopio fel 'na a dylse fo ddim bod," meddai Lisa.

Ffermwyr gyda'u placardiau yn cerdded heibio geiriau'r bardd Gwyneth Lewis ar Ganolfan y Mileniwm yn gynharach heddiw

Ffynhonnell y llun, Christopher Furlong/Getty

Elliw Gwawr
Gohebydd Gwleidyddol BBC Cymru

Mae'r drafodaeth nawr wedi symud y tu fewn i'r Senedd, wrth i'r gweinidog materion gwledig Lesley Griffiths wynebu cwestiynau aelodau.

Mae hi wedi'i chyhuddo o gam "sinigaidd" gan lefarydd materion gwledig y ceidwadwyr, Sam Kurtz, yn sgil y cyhoeddiad ddoe y bydden nhw'n adolygu rhai o'u polisïau amaeth.

Dywedodd Mr Kurtz ei fod wedi cymryd "protest fawr a chryfder teimlad mewn cymunedau gwledig i newid pethau".

Dywedodd Llyr Gruffydd, llefarydd materion gwledig Plaid Cymru bod rhaid i Ms Griffiths ddod â ffermwyr efo hi ar y siwrne yma.

"Heb ffermwyr yn cymryd rhan yn y cynllun yma, ni fydd yna unrhyw un i sicrhau'r canlyniadau y mae pawb yn eu rhannu" o ran taclo newid hinsawdd.

Dywedodd y gweinidog nad oedd unrhyw beth wedi'i benderfynu eto a'i bod hi eisiau cynllun yn y pendraw y bydd "pob ffarmwr eisiau bod yn rhan ohono".

Roedd Iwan Davies (dde yn y llun) o ardal Glasfryn yn pwysleisio effaith araith Nigel Owens ar ei emosiynau.

"O ran y siaradwyr, roedd araith Nigel Owens yn tynnu blew o 'ngwar i, oedd o'n emosiynol iawn.

"Y neges bwysig ydy bod ni yn cynhyrchu bwyd yn gynaliadwy, a 'dan ni angen cael ein cydnabod am hynna.

"Mae'r gwaith yn cael ei 'neud yn barod," meddai.

Roedd Ifan Davies o Dregaron wedi teithio i Gaerdydd ar gyfer y brotest.

"Roedd 'na siaradwyr da heddiw ar draws y sbectrwm amaeth, gwleidyddol, â'r [elusen] DPJ," meddai.

"Ac roedd e'n brotest hollol heddychlon, sy'n glod i ni fel diwydiant, bod ni 'di bihafio gyda chymaint o urddas.

"Gobeithio bod nhw'n mynd i wrando, ond o'n i'n siomedig bod neb o Lafur 'di dod allan."

Roedd y Prif Weinidog, Mark Drakeford ym Mrwsel heddiw.

Ar ddiwedd yr areithiau fe ganodd y dorf yr anthem genedlaethol, ond gydag un addasiad ar y diwedd: "O bydded i gefn gwlad barhau."

Gwyliwch y fideo isod:

Mae ffermwyr sy'n protestio wedi troi priffordd sydd fel arfer yn brysur yng Nghaerdydd yn faes parcio.

Iolo Cheung
Gohebydd Cymru Fyw ym Mae Caerdydd

Dyma yw "awr dywyllaf" amaeth yng Nghymru, yn ôl un siaradwr.

Pan mae'n crybwyll enwau Mark Drakeford a'r Gweinidiog Amaeth Lesley Griffiths, mae 'na fwio ymhlith rhai.

Mae'n "warthus", meddai'r dyn, bod hi dal ddim yn glir beth yw dyfodol taliadau amaeth bron i wyth mlynedd ers Brexit.

Yn sgil rhyfeloedd rhyngwladol ar hyn o bryd, mae angen mwy nag erioed i fod yn hunan-gynhaliol o ran bwyd.

Ffynhonnell y llun, Getty Images

"Ein tir ni ydi o, a ni sy'n cynhyrchu'r bwyd," meddai'r ffermwr o Lanfairfechan, Gareth Wyn Jones, wrth y dorf.

"Mae wedi bod yn fis anodd i fi, nes i bron gerdded i ffwrdd, ond rhaid i ni aros yn gryf.

"'Dan ni isio ffarmio sy'n gynaliadwy, yn amgylcheddol, ac yn fforddiadwy."

Llywodraeth Cymru

Mae'r Gweinidog dros Faterion Gwledig, Lesley Griffiths AS wedi ymateb i'r cyhuddiadau nad oes gan y Llywodraeth Lafur ddealltwriaeth o gefn gwlad.

"Dwi wedi gorfod dysgu llawer am y maes yn sydyn, ond dwi wedi llwyddo i ennyn dealltwriaeth helaeth o'r maes amaethyddiaeth yn fy swydd," meddai.

"Rydym ond yn gallu llwyddo mewn partneriaeth, mae wir angen i ni gydweithio, a dyna rydym yn gwneud.

"Rydym yn gweithio'n agos gyda'r Undebau ac maen nhw'n hapus gyda strwythur y cynllun.

"Dwi'n meddwl mai'r rheswm inni wneud y cyhoeddiad ddoe oedd er mwyn tynnu ychydig o stêm o'r sefyllfa."

Ychwanegodd Ms Griffiths mai'r "ffermwyr yw'r bobl gorau i'n helpu" er mwyn cyflawni targedau uchelgeisiol ar gyfer coetir newydd.

Elliw Gwawr
Gohebydd Gwleidyddol BBC Cymru ym Mae Caerdydd

Iolo Cheung
Gohebydd Cymru Fyw ym Mae Caerdydd

Mae'r dorf nawr yn clywed gan fwy o ffermwyr, gan gynnwys Stuart Williams, a gollodd 600 o wartheg dros dair blynedd oherwydd profion TB.

Mae'n dweud fod ei fywoliaeth a'i iechyd meddwl wedi cael ei chwalu "gan y polisi mwyaf hurt erioed i gael ei greu".

"Y diwrnod aeth y fuwch olaf, fe gollodd fy nhad ei waith bywyd, fe gollais i fy mreuddwydion, ac fe gollodd fy mhlant eu dyfodol," meddai.

Ffynhonnell y llun, Getty Images

Mae'r dorf nawr yn clywed gan filfeddyg sy'n dweud nad yw'r diciâu "yn mynd i ffwrdd" yng Nghymru.

"Ac eto mae Llywodraeth Cymru'n dweud wrtho ni bod y sefyllfa'n gwella," meddai.

Cynnydd ym mhoblogaeth y moch daear yw'r broblem, meddai.

"Does dim un ohonon ni eisiau gweld moch daear yn diflannu'n llwyr," meddai.

"Ond mae angen rheoli'r boblogaeth mewn ffordd iach."

Mae'r cyn-ddyfarnwr rygbi, Nigel Owens, sydd nawr yn ffermwr, wedi bod yn siarad o flaen y dorf.

"Yn 2015, cefais y fraint fawr o ddyfarnu rownd derfynol Cwpan y Byd yn Twickenham - eiliad balchaf fy ngyrfa," meddai.

"Ond heddiw rydw i hyd yn oed yn fwy balch o ddod i siarad o flaen pobl dda, weddus.

"Mae'n anrhydedd cael bod yma i siarad ac i'ch cefnogi heddiw fel cyd-ffermwr."

Ffynhonnell y llun, PA Media

Ychwanegodd: "Does dim modd cael bwyd ar y bwrdd heb ffermwyr."

Mae'n ychwanegu bod ffermwyr wedi protestio a chodi eu llais hyd yma mewn modd "heddychlon a chydag integrity".

"Dyna pam mae'r rhan fwyaf o bobl Cymru yn eich cefnogi chi," meddai.

Heddlu De Cymru

Mae'r heddlu yn amcangyfrif mai tua 2,500 o brotestwyr sydd yma ar hyn o bryd.

Ond mae disgwyl i fwy o bobl gyrraedd - mae nifer o fysiau wedi'u dal ar yr A470.

"'Da ni yma i brotestio a 'da ni yma i fod yn heddychlon wrth 'neud hynny a throsglwyddo neges," meddai Alun Elidyr.

Ychwanegodd y ffermwr a'r cyflwynydd teledu fod amaethwyr yn benderfynol nad ydyn nhw am darfu ar fywydau cwsmeriaid a threthdalwyr yn y broses.

Iolo Cheung
Gohebydd Cymru Fyw ym Mae Caerdydd

Mae Wyn Evans, ffermwr gwartheg a defaid o Geredigion, yn croesawu'r dorf, ac yn dweud y dylai'r diwydiant fod yn "falch" o'r ymgyrch hyd yma.

Mae 26 o fysus dal ar y ffordd, meddai, gan ofyn am gymeradwyaeth hefyd i'r rheiny sydd adref yn wyna a methu bod yma heddiw.

Mae hefyd yn pwysleisio mai'r rheswm maen nhw ym Mae Caerdydd heddiw yw oherwydd mai dyma "ganolbwynt democratiaeth yng Nghymru, lle mae'r penderfyniadau yn cael eu gwneud".

Mae hynny’n denu ychydig o fwio o fewn y dorf, ond mae Mr Jones yn ychwanegu: "Brwydr ffermwyr yw hwn, a'r diwydiant amaeth - a neb arall."

Iolo Cheung
Gohebydd Cymru Fyw ym Mae Caerdydd

Mae rhai o arweinwyr undebau amaeth Cymru yn annerch y dorf.

"Ein swydd ni nawr yw ceisio gweithio gyda Llywodraeth Cymru i ddod o hyd i atebion," meddai Ian Rickman o Undeb Amaethwyr Cymru.

"Mae'r gefnogaeth ni'n ei gael yn bwydo mewn i'r economi wledig.

"A ni'n falch o fwydo'r genedl - dyma 'dan ni yma i wneud."

Ychwanegodd Abi Reader o NFU Cymru bod angen sefyll gyda'n gilydd i gyrraedd sefyllfa o sero net.

Mae'r sylw yna'n denu ambell i waedd yn anghytuno - mae'n amlwg bod 'na elfennau o'r dorf sydd ddim yn cydweld â'r neges yna.

Dros Frecwast
BBC Radio Cymru

Fe wnaeth criw o Gorwen gychwyn am Gaerdydd ben bore Mercher.

Un oedd ar y bws oedd Buddug Eidda o Glanrafon. Dywedodd: "Sa 'dan ni'n mynd lawr 'na i ddweud be 'da ni'n feddwl 'dyn nhw ddim am gael y neges."

Fe ddywedodd bod y ffermwyr yn teimlo'n "ddig".

"'Dan ni ddim isho neud be ma' nhw [y Llywodraeth] yn gofyn i ni 'neud, achos da ni'n rhoi fyny tir da, ffrwythlon i be' ma' nhw eisiau," meddai.

Ychwanegodd: "Dydyn nhw ddim yn gwrando arnon ni, mae'n syml."

Dywedodd Gwyn Edwards o Fetws Gwerful Goch bod y brotest heddiw yn fwy na gwrthwynebu'r Cynllun Ffermio Cynaliadawy.

"Mae hyn yn fwy na dim ond am y polisi SFS a be' sy'n mynd ymlaen ar y funud.

"Mae'n berwi ers blynyddoedd - mae'r rheolau sydd yn cael eu rhoi i ni yn cynyddu o flwyddyn i flwyddyn.

"Mae'r gwaith papur, mae'rrecords- popeth ar ben sy' gynnon ni'n barod a digon yw digon.

"'Dan ni wedi cael llond bol ac mae amryw o'n cenhedlaeth ni yn dod yn nes at oed ymddeol... mae'n rhaid i ni wneud hyn er mwyn y genhedlaeth nesa'," ychwanegodd Mr Edwards.