Oriel luniau: Difrod Storm Dennis
- Cyhoeddwyd
Dros yr wythnos ddiwethaf mae cymunedau ar draws Cymru wedi bod yn dygymod ag effaith Storm Dennis.
Fe welodd rhannau o dde Cymru lifogydd sylweddol y penwythnos diwethaf gyda Heddlu De Cymru yn cyhoeddi "digwyddiad difrifol". Y gred yw bod gwerth mis o law wedi disgyn mewn cyfnod o 48 awr yn unig.
Daeth y dinistr wythnos yn unig wedi i Storm Ciara hefyd greu difrod ar hyd a lled Cymru.
Mae'r lluniau yma'n dangos grym y storm ddiweddaraf a dygnwch y cymunedau gafodd eu heffeithio.
Achub un o drigolion Nantgarw a'i chi ar ôl i'r afon Taf orlifo yn sgîl Storm Dennis
Gardd gefn dan ddŵr yng Nghwmbach, Rhondda Cynon Taf, brynhawn Sadwrn, 15 Chwefror
Glaw Storm Dennis yn achosi i'r afon Taf orlifo ym Mhontypridd a'r tai ar Stryd Sion dan ddŵr
Achub pobl a'u cŵn yn Nantgarw
Clwb bowlio yn Ffynnon Taf, i'r gogledd o Gaerdydd
Tŷ dan ddŵr yn Nantgarw
Ymateb Alun Thomas, Newyddion BBC Radio Cymru
"Mae'r Taf yn afon nwyfus
Ofnadw o gynhyrfus"
Golygydd Materion Cymreig BBC Cymru, Vaughan Roderick, atgoffodd ni ar Twitter fore Sul o un o Dribannau Morgannwg yn cyfeirio at rym afon Taf.
Doedd dim angen atgoffa trigolion Pontypridd, Trefforest, Nantgarw a Ffynnon Taf o hynny, wrth iddyn nhw orfod dygymod ag effaith storm Dennis. Fe gododd yr afon i'w lefel ucha' erioed, gan lifo i gartrefi a busnesau.
Ar un adeg ddechrau'r wythnos, roedd dros hanner cant o fusnesau a sefydliadau ynghau ynghanol tref Pontypridd. Erbyn diwedd yr wythnos, roedd rhai o'r rheini wedi llwyddo i ail-agor - i eraill mae maint y difrod yn golygu bydd yn cymryd rhai misoedd i ddod yn ôl ar eu traed.
Ond er y difrod, mae'r wythnos hon hefyd wedi gweld ymdrechion aruthrol gan y gymuned i adfer y sefyllfa.
Erbyn bore Llun, roedd prif stryd Pontypridd yn ferw gwyllt o glirio, gyda loriau yn cludo sgipiau niferus mewn a mas o ganol y dref, wrth i'r gwaith glanhau ddechrau. Fe dyrrodd gwirfoddolwyr o bob cyfeiriad i helpu - i frwsio a chario, i gynnig paned a bwyd. Ac roedd yr arian yn llifo hefyd - mae sawl apêl wedi'u sefydlu arlein, a miloedd wedi cyrraedd y coffrau.
Efallai bod yr afon nwyfus wedi cael y gorau o bobl Pontypridd am gyfnod y penwythnos diwetha', ond mae'r ymdrechion i gael y dref yn ôl ar ei thraed wedi hen ddechrau.
Roedd modd canŵio ar y cae pêl-droed yma yng Nghwmbrân wedi'r llifogydd
Gwasanaethau brys De Cymru yn achub pobl o'u cartrefi yn Nhrefynwy
Mae'r arwydd yma yn dweud y cyfan - mewn maes parcio ceir yn Nhrefynwy
Yng Nghrughywel, cafwyd y llifogydd gwaethaf mewn 40 mlynedd ar ôl i afon Wysg orlifo a dinistrio cartrefi a busnesau. Bu pont y dref ar gau am ddyddiau ar ôl i ran ohoni gael ei difrodi gan lif y dŵr
Help llaw i fynd drwy strydoedd Aberpennar
Wedi'r dilyw... Rachel Cox yn gweld y difrod i'w chartref yn Nantgarw
Mwd tu fewn i gar yn Nantgarw wedi i'r dŵr gilio
Tirlithriad ym Mhendyrus, y Rhondda. Roedd yr awdurdodau yn archwilio tomeni glo yn y dyffryn wedi'r storm
Ar ôl i'r dŵr gilio, fe ddechreuodd y gwaith budur o glirio'r mwd a'r llanast - fel yma ym Mhontypridd
Rhoddion i'r rhai sydd wedi eu heffeithio gan y llifogydd yng nghanolfan gymunedol y Trallwn, Pontypridd
Yr ymateb yn Ffynnon Taf wedi i'r gwasanaethau brys alw am ddeunyddiau i helpu y rhai a oedd wedi dioddef yn sgîl y storm
Hefyd o ddiddordeb: