Mae rhai yn teimlo'r pwysau yn barod ...

Leigh Halfpenny yn rhoi Cymru yn ôl ar y blaen ychydig cyn yr egwyl. 

Y gêm yn ôl yn hanner Iwerddon. Cymru yn pwyso ac yn llwyddo i gael cic gosb. Mae yna hefyd gerdyn melyn i Sexton am ladd y bêl.

Ffynhonnell y llun, Getty Images

Cefnogaeth i George North gan gyn chwaraewr rhyngwladol Lloegr, Will Carling, ar ôl wythnos anodd i'r Cymro. 

Y sgorfwrdd yn brysur. Cymru yn troseddu, ac Iwerddon yn ôl ar y blaen ar ôl cic gosb arall. Paddy Jackson yn anelu'n gywir gan fod Sexton wedi ei anafu. 

Bethan Clement
Gohebydd Chwaraeon BBC Cymru

"Dadlwytho gwych gan Scott Williams, 'da Webb a Halfpenny yn chware'u rhan yn berffaith!

"A North mor benderfynol yn croesi am gais cynta'r gêm! Sgiliau gwych gan Gymru - braf iawn gweld! Rhagor plîs!"

Y bêl yn mynd drwy'r dwylo'n gyflym. George North yn ei derbyn ac yn croesi am gais. 

Ffynhonnell y llun, Getty Images

Rhediadau cryf yn gyntaf gan Liam Williams ac yna gan George North yn rhoi hyder i Gymru. 

Cymru dan bwysau yn y munudau cyntaf. Ond cic gosb i Iwerddon ar ôl i Gymru droseddu a Sexton yn eu rhoi ar y blaen.  

Y dyfarnwr Wayne Barnes o Loegr yn chwythu'r chwiban ar gyfer dechrau'r gêm.

Cic gan Dan Biggar a'r chwarae yn dechrau.

Barod i fynd... Mae'r timau ar y cae, a'r anthem gyntaf - Ireland's Call - wedi atseinio.   A chyda Hen Wlad Fy Nhadau wedi ei chanu, dyma ni'n barod i fynd

Bethan Clement
Gohebydd Chwaraeon BBC Cymru

"Ma' 'na lawer o bwyse ar y chwaraewyr heno - pwyse falle nad yw'r garfan hon yn gyfarwydd ag e. 

"Ond gyment wyf am weld y tîm yn chwarae'n dda heno, ennill sy' bwysica' wy'n meddwl, gyda Chwpan y Byd rownd y gornel. C'mon Cymru!"  

Gyda'r gêm yn dechrau'n hwyrach heno a phob tocyn i'r stadiwm wedi ei werthu mae tafarndai'r brifddinas wedi bod yn brysur iawn cyn y gêm.

Ffynhonnell y llun, Getty Images

BBC Camp Lawn

Mae hi'n bosib gwrando ar sylwebaeth fyw Radio Cymru o'r gêm ar ein llif byw trwy glicio ar eicon y rhaglen uchod.

Y tîm sylwebu heddiw yw Cennydd Davies a chyn-chwaraewyr Cymru, Emyr Lewis a Jamie Robinson.

Ar ôl i Rob Howley gyhoeddi tîm Cymru i wynebu Iwerddon, Gohebydd Chwaraeon BBC Cymru Cennydd Davies fu'n dadansoddi'r dewis.

Mae hyfforddwr Iwerddon, Joe Schmidt hefyd wedi penderfynu yn erbyn gwneud unrhyw newidiadau i'r tîm i herio Cymru heddiw.

Yr unig newid i'r garfan wnaeth drechu Ffrainc bythefnos yn ôl yw'r asgellwr Tommy Bowe yn cymryd lle Andrew Trimble ar y fainc.

Ffynhonnell y llun, Getty Images

Dyma'r 15 fydd yn herio Cymru heddiw:

Rob Kearney; Keith Earls, Garry Ringrose, Robbie Henshaw, Simon Zebo; Jonathan Sexton, Conor Murray; Jack McGrath, Rory Best (c), Tadhg Furlong, Donnacha Ryan, Devin Toner, CJ Stander, Sean O'Brien. Jamie Heaslip.

Eilyddion:  Niall Scannell, Cian Healy, John Ryan, Iain Henderson, Peter O'Mahony, Kieran Marmion, Paddy Jackson, Tommy Bowe.

Bethan Clement
Gohebydd Chwaraeon BBC Cymru

Ein sylwebydd ni heddiw yw Gohebydd Chwaraeon BBC Cymru, Bethan Clement:

"......Hmm. 'Na shwt wy'n teimlo ar hyn o bryd cyn y gêm heno! Digon fflat â bod yn onest. Ma'r holl adroddiadau a sylwadau negyddol ar wefannau cymdeithasol yn ddigon i neud dyn droi bant! 

"Byddai'n dal i deimlo cyffro cyn gwylio Cymru'n chware - dyw'r teimlad 'na ddim yn mynd i ddiflannu - ond dy' ni ddim mewn undod ar hyn o bryd nagyn ni! 

"Wy yn becso am heno - bydd y chwaraewyr, yr union rai gollodd yn erbyn yr Alban, yn sicr moyn 'neud yn iawn am y canlyniad yna. 

"Ond allai'm gweud bo' fi 'di clywed na gweld dim ers y gêm yn Murrayfield sy'n neud i feddwl y bydd Cymru'n fuddugoliaethus heno! Dyw 'nghwpan i ddim yn hanner llawn heno mae arna'i ofn!"

Dyw hyfforddwr Cymru Rob Howley ddim wedi gwneud unrhyw newidiadau i'r garfan o 23 i herio Iwerddon heno.

Mae Howley wedi penderfynu yn erbyn cyflwyno wynebau newydd, er i union yr un tîm gael eu trechu gan Yr Alban yn Murrayfield bythefnos yn ôl.

Ffynhonnell y llun, Getty Images

Dyma'r tîm yn llawn:  

Leigh Halfpenny; George North, Jonathan Davies, Scott Williams, Liam Williams; Dan Biggar, Rhys Webb; Rob Evans, Ken Owens, Tomas Francis, Jake Ball, Alun Wyn Jones (c), Sam Warburton, Justin Tipuric, Ross Moriarty.

Eilyddion:  Scott Baldwin, Nicky Smith, Samson Lee, Luke Charteris, Taulupe Faletau, Gareth Davies, Sam Davies, Jamie Roberts.

Mae gwir angen buddugoliaeth ar Gymru heno. 

Pe bai nhw'n colli hwn fyddai'r tro cyntaf i Gymru golli tair yn olynol ers pencampwriaeth 2010.  

Ffynhonnell y llun, EPA

Efallai bod gobeithion o ennill y bencampwriaeth ar ben, ond mae'r ddwy gêm sy'n weddill yn bwysig iawn os yw Cymru am osgoi llithro allan o'r wyth uchaf yn netholion y byd.

Bydd y chwaraewyr yn awyddus i greu argraff hefyd yn dilyn y feirniadaeth yn dilyn y canlyniad siomedig yn erbyn Yr Alban.

Iwerddon sy'n cael eu croesawu i Stadiwm Principality heddiw, gyda gobeithion y Gwyddelod o ennill y bencampwriaeth yn dal yn fyw.

Ai dyna fydd yr achos ymhen dwy awr? Arhoswch gyda ni i weld!

Ffynhonnell y llun, Getty Images