Taro'r Post
BBC Radio Cymru

Dyna ni am y tro ar ein llif byw - diolch am ymuno gyda ni.

Gallwch barhau i ddarllen y newyddion diweddaraf am gyhoeddiad Wylfa Newydd ar dudalen Cymru Fyw yn ystod y dydd.

Bydd mwy o drafod hefyd ar raglen Taro'r Post heddiw, ac fe fydd gan Garry Owen yr ymateb diweddaraf o Ynys Môn am 13:00.

Llywodraeth Cymru

Mae penderfyniad Hitachi i atal y gwaith yn destun pryder ar gyfer gogledd Cymru a'r DU yn gyffredinol, yn ôl Prif Weinidog Cymru, Mark Drakeford.

BBC Cymru Fyw

Mae Carwyn Jones yn 19 oed ac o Lannerch-y-medd ar Ynys Môn, ac mae'n dweud bod "llawer o resymau pam y dylwn i fod yn ddiolchgar am Wylfa" gan fod ei dad a'i daid wedi gweithio yn y diwydiant niwclear ar yr ynys.

Ond er hynny, mae'n dweud ei fod yn "bryder mawr" bod ail atomfa yn parhau dan ystyriaeth.

"Wrth feddwl am drychinebau megis Chernobyl a Fukushima, mae'r posibiliadau o hynny'n digwydd ar yr ynys yn cronni yng nghefn fy mhen yn aml iawn.

"Mae sefyllfa'r Gymraeg yn ardal yr Wylfa a'r cyffiniau wedi gostwng yn sylweddol, ac mae pryder mawr gen i am ddyfodol yr iaith ar yr ynys yn y dyfodol."

BBC Cymru Fyw

Mae llywydd a phrif weithredwr Hitachi fodd bynnag wedi mynnu nad oedd Brexit yn ffactor ym mhenderfyniad y cwmni i atal gwaith ar Wylfa Newydd.

Dywedodd Toshiaki Higashihara nad oedd y cwmni wedi gallu sicrhau buddsoddwyr eraill ar gyfer y prosiect er mwyn rhannu'r risg ariannol.

"Does dim cysylltiad rhwng y penderfyniad rydyn ni wedi ei gymryd a'r ansicrwydd ynghylch Brexit. Dydy hynny heb ddylanwadu ar ein penderfyniad," meddai.

Democratiaid Rhyddfrydol

Mae arweinydd y Democratiaid Rhyddfrydol yng Nghymru, Jane Dodds, hefyd o'r farn bod cyhoeddiad Wylfa yn newyddion ofnadwy i bobl Ynys Môn.

"Mae'r atomfa i fod i ddarparu miloedd o swyddi a chyfrannu at ein hymdrech i ddefnyddio llai o danwyddau ffosil," meddai.

"Mae'n dystiolaeth bellach o'r pydru araf sy'n digwydd i economi'r DU yn sgil Brexit."

Post Cyntaf
BBC Radio Cymru

Yn gynharach bu rhaglen y Post Cyntaf yn casglu barn rhai o ddisgyblion Ysgol Syr Thomas Jones yn Amlwch, sydd ychydig filltiroedd o safle Wylfa.

“Dwi’n meddwl fod Wylfa yn syniad arbennig i’r ardal," meddai Elen.

"Byddai'n dod â swyddi gwahanol nid yn unig i ddynion ond i ferched. Mae’n rhoi Sir Fôn ar y map.”

Barn wahanol oedd gan Eve: “Mae angen mwy o ymchwil i ynni niwclear – does gennym ni ddim ffordd o gael gwared ar y gwastraff.

“Dwi yn erbyn ar y cyfan, ond dwi’n meddwl fod o’n dda cael swyddi yn yr ardal.”

BBC Cymru Fyw

Un arall sydd ddim eisiau gweld yr atomfa newydd yn cael ei chodi yw'r Parchedig Emlyn Richards o Gemaes, un o sylfaenwyr grŵp ymgyrchu PAWB.

Serch hynny mae'n dweud mai “tristwch” yn hytrach na gorfoledd yw ei brif emosiwn heddiw.

“Mae’r gair ansicrwydd wedi hongian o gwmpas yma," meddai.

“’Swn i’n licio gofyn i’r ddau gyngor faint sydd wedi ei wario yma? Nid ateb i ddiweithdra Môn yw dod a 9,000 i dawelwch cefn gwlad yr ynys.

“Technoleg ddoe ydy niwclear.”

Plaid Werdd Cymru

Mae dirprwy arweinydd y Blaid Werdd yng Nghymru a Lloegr, Amelia Womack, wedi croesawu'r newyddion gan honni ei fod yn dangos bod "oes ynni niwclear bellach wedi darfod".

"Erbyn hyn mae yna sawl math o ynni adnewyddol sydd yn lanach, yn rhatach, yn fwy effeithlon a ddim hanner mor debygol o gael effaith dinistriol ar yr amgylchedd," meddai.

"Nawr yw'r amser i Lywodraeth San Steffan fuddsoddi yng nghynllun Morlyn Abertawe a phrosiectau eraill fyddai'n diogelu dyfodol ynni glân Cymru."

Ffynhonnell y llun, TLP

Twitter

Mae'r ymateb ar y cyfryngau cymdeithasol yn parhau i ddod - gyda phryder ynghylch y camau nesaf yn amlwg ar flaen meddyliau pobl.

Steffan Messenger
Gohebydd Amgylchedd BBC Cymru

Mae'n gohebydd amgylchedd ni, Steffan Messenger, wedi bod yn edrych ar rai o'r pryderon allai fod wedi arwain at y penderfyniad i ohirio'r cynllun - a holi beth nesaf i Wylfa.

"Roedd dod o hyd i fuddsoddwyr i dalu am y gost o adeiladu'r atomfa - oedd yn 2018 wedi dyblu yn ôl rhai adroddiadau i £20bn - yn ymddangos fel petai'n gam yn rhy bell," meddai.

"Ac roedd trafodaethau â Llywodraeth y DU ynglŷn â'r pris fyddai'n rhaid ei dalu am drydan o'r safle yn dal i fethu a sicrhau unrhyw ymrwymiadau clir.

"Mae adroddiadau hefyd bod ansicrwydd yn sgil Brexit, a phryderon cynyddol ynglŷn ag ynni niwclear yn Japan yn dilyn trychineb Fukushima yn 2011 wedi chwarae'u rhan.

"Ac yn y cyfamser, mae cost technolegau ynni adnewyddadwy wedi parhau i syrthio, gan wneud i ynni niwclear ymddangos yn llai a llai dymunol."

Ffynhonnell y llun, Getty Images

Cyngor Ynys Môn

Mae Arweinydd Cyngor Ynys Môn, Llinos Medi, wedi dweud ei bod wedi siomi o glywed y cyhoeddiad ar Wylfa Newydd.

"Mae’r Cyngor yn parhau i weithio’n agos gyda Gweinidog Llywodraeth Cymru, Ken Skates, er mwyn pwyso ar Lywodraeth y DU i sicrhau bod yr oediad yma’n cael ei oresgyn fel ein bod yn llwyddo i greu’r swyddi o safon a’r cyfleoedd i fusnesau, sydd wir eu hangen, am flynyddoedd i ddod.

“Er hyn, fy mhryder pennaf yw’r effaith gaiff y penderfyniad yma ar ddynion a merched lleol sydd â’u gwaith dan fygythiad nawr oherwydd yr oediad, yn enwedig y rhai sydd wedi eu lleoli ar safle Wylfa Newydd yng ngogledd yr ynys."

Plaid Cymru

Mae'n rhaid i lywodraethau Cymru a'r DU ymateb ar frys i gyhoeddiad Hitachi yn ôl AC Ynys Môn, Rhun ap Iorwerth.

"Mae'n rhaid i ni edrych ar sut i symud yn ein blaenau wedi'r cyhoeddiad," meddai.

"Mae'n rhaid i Lywodraeth y DU ddangos eu bod nhw o ddifrif am gefnogi Wylfa. Nid yw eu gweithredoedd hyd yn hyn wedi arwain at rhyw lawer."

Dywedodd ei fod eisoes wedi gwthio am ymateb ar frys gan Lywodraeth Cymru.

"Wrth gyflwyno cwestiwn yn y Cynulliad ddoe, fe wnes i ddadlau o blaid buddsoddi mewn sgiliau, isadeiledd a denu cyfleoedd economaidd newydd i Ynys Môn.

"Er bod prosiectau cyffrous eraill ar Ynys Môn... mae maint cynllun Wylfa, gyda dros 800 o swyddi yn y fantol, yn golygu y byddai bwlch enfawr os yw'r ataliad yma yn un hir dymor."

Steffan Messenger
Gohebydd Amgylchedd BBC Cymru

Rydyn ni'n deall mai tua 40 o staff sydd yn cael eu cyflogi'n uniongyrchol gan Horizon ar y safle yn Ynys Môn.

BBC Cymru Fyw

Mae Ysgrifennydd Cymru, Alun Cairns wedi dweud ei fod yn parhau i gefnogi datblygiad niwclear yng ngogledd Cymru er gwaethaf cyhoeddiad Hitachi heddiw.

"Nid yw'r cyhoeddiad heddiw yn golygu diwedd ar gyfer cyfleoedd yn Wylfa," meddai.

"Mae pawb yn parhau i weld potensial yn y safle ac mae Llywodraeth y DU yn barod i drafod yr opsiynau ar gyfer Hitachi neu bartneriaid eraill i gyflenwi niwclear newydd yng ngogledd Cymru."

Dywedodd fod cefnogaeth Llywodraeth y DU i'r diwydiant niwclear yn y gogledd yn ychwanegol i'r £120m sydd wedi'i ymrwymo i Fargen Dwf Gogledd Cymru.

Twitter

Mae'r ymateb cymhleth i'r cyhoeddiad heddiw yn cael ei adlewyrchu ar y cyfryngau cymdeithasol.

Yn gymysg ag amheuaeth ynglŷn ag ynni niwclear mae pryder ynghylch y dyfodol i economi a swyddi pobl ar yr ynys.

Unite

Mae'r cyhoeddiad bod Hitachi yn atal gwaith ar Wylfa Newydd yn "newyddion ofnadwy" i economi Cymru, ac i'r gogledd orllewin yn enwedig.

Dyna ymateb ysgrifennydd rhanbarthol undeb Unite, Peter Hughes, sy'n credu ei fod yn "ergyd enfawr" i obeithion rhai o'r cymunedau sydd fwyaf mewn angen.

"Er mai penderfyniad Hitachi yw hyn yn y pen draw, mae'n rhaid i Lywodraeth y DU dderbyn rhywfaint o'r bai," meddai.

Ceidwadwyr Cymreig

Mae'r AC Ceidwadol Andrew RT Davies wedi galw ar Brif Weinidog Cymru, Mark Drakeford i ategu ei gefnogaeth i'r diwydiant niwclear yn dilyn y cyhoeddiad heddiw.

Cafodd Mr Drakeford ei feirniadu yn ystod ymgyrch arweinyddol Llafur Cymru yn dilyn honiadau ei fod wedi gwneud sylwadau yn cwestiynu budd ynni niwclear.

"Mae angen iddo ddatgan ei gefnogaeth yn gyhoeddus achos ar ddiwedd y dydd, pobl gogledd Cymru fydd ar eu colled os oes teimlad nad oes cefnogaeth gan Lywodraeth Cymru," meddai Mr Davies.

Ychwanegodd: "Mae angen i'r prif weinidog chwifio'r faner dros ein diwydiant niwclear os oes gan Wylfa unrhyw siawns o ddigwydd."

Ffynhonnell y llun, Getty Images

BBC Cymru Fyw

Nid pawb sydd wedi eu siomi gyda'r cyhoeddiad heddiw gan Hitachi. Mae grŵp Pobl Atal Wylfa B (PAWB) wedi bod yn ymgyrchu yn erbyn cael atomfa niwclear arall ar Ynys Môn ers blynyddoedd.

Mewn datganiad heddiw fe ddywedodd y mudiad fod y cyhoeddiad yn "rhyddhad i bob un ohonom sy'n poeni am ddyfodol ein hynys, ein gwlad, ein hiaith, yr amgylchedd ac yn wir am ynni adnewyddadwy".

"Mae dros ddegawd wedi ei wastraffu ar Wylfa, ac ychydig iawn o gynllunio economaidd amgen wedi digwydd," meddai'r grŵp.

"Addawyd swyddi i'n pobl ifanc ar seiliau simsan. Difethwyd tir da i greu isadeiledd i gefnogi'r diwydiant.

"Bellach, mae'n bryd i wleidyddion a swyddogion llywodraethau'r Deyrnas Gyfunol, Llywodraeth Cymru ac Ynys Môn syrthio ar eu bai."

BBC Cymru Fyw

Mae Derec Owen, cadeirydd Cyngor Cymuned Llanbadrig, yn un o'r rheiny sy'n pryderu am effaith gohirio'r cynllun.

"Bydd o'n goblyn o glec i bobl yn yr ardal. Y broblem efo melinau gwynt ydy tydi o ddim yn creu lot o waith," meddai yn gynharach ar y Post Cyntaf.

"Gyda Wylfa mi fuasai o wedi creu 800 o swyddi. Lle arall gewch chi 800 o swyddi yng ngogledd Môn neu ogledd Cymru?

Mae hwn yn un o gynlluniau mwyaf gorllewin Ewrop. Mae'n bryd i'r llywodraeth ymyrryd."

Llywodraeth Cymru

Ddoe fe ddywedodd Gweinidog yr Economi, Ken Skates ei fod yn gobeithio na fyddai cynllun Wylfa Newydd yn cael ei atal.

Dywedodd Mr Skates y byddai'n cyfarfod ag arweinydd Cyngor Môn i drafod camau pellach wedi cyhoeddiad Hitachi.

Ychwanegodd y gweinidog fod aros am fuddsoddwr arall neu i Lywodraeth y DU fuddsoddi ymhellach a gwladoli'r fenter yn opsiynau posib.

"Os caiff y prosiect ei atal, yna mae'n rhaid i ni ddechrau gweithio'n syth ar hyd y llywodraethau a gydag awdurdodau lleol a gyda'r gymuned fusnes i sicrhau bod yna gyfleoedd gwaith yn y tymor byr wrth i ni chwilio am fuddsoddwr newydd," meddai.