Llywodraeth Cymru wedi colli cyfle i wneud newid mawr i wasanaethau cyhoeddus gyda'i chyllideb eleni, yn ôl y gwrthbleidiau.

A dyna'r cyfan o'r Siambr am heddiw.

Bydd Senedd Fyw yn dychwelyd fory.

Mae ACau yn cymeradwyo egwyddorion cyffredinol y Mesur Anifeiliaid Gwyllt a Syrcasau (Cymru) - cam cyntaf y broses ddeddfu.

Ffynhonnell y llun, AFP/GETTY IMAGES

Yn gyffredinol, mae pedwar cyfnod yn y broses ar gyfer ystyried Mesur Cyhoeddus, sef:

• Cyfnod 1 - pwyllgor yn ystyried egwyddorion cyffredinol y Mesur a'r Cynulliad yn cytuno ar yr egwyddorion cyffredinol hynny;

• Cyfnod 2 - pwyllgor yn ystyried y Mesur ac unrhyw welliannau a gyflwynwyd i’r Mesur hwnnw yn fanwl;

• Cyfnod 3 - y Cynulliad yn ystyried y Mesur ac unrhyw welliannau a gyflwynwyd i’r Mesur hwnnw yn fanwl;

• Cyfnod 4 - pleidlais gan y Cynulliad i basio testun terfynol y Mesur.

Mae llefarydd y Ceidwadwyr Janet Finch-Saunders a Llyr Gruffydd o Blaid Cymru yn cadarnhau cefnogaeth eu pleidiau i egwyddorion cyffredinol y mesur a fyddai'n gwahardd defnyddio anifeiliaid gwyllt mewn syrcasau teithiol yng Nghymru.

Mae Mike Hedges, Cadeirydd Pwyllgor Newid Hinsawdd, Amgylchedd a Materion Gwledig yn cyflwyno'r adroddiad.

Mae'n egluro bod y "Pwyllgor yn unfrydol yn ei gefnogaeth barhaus i les pob anifail.

"Fodd bynnag, nid ydym wedi gallu dod i farn unfrydol ynghylch p’un a ddylai’r Mesur hwn symud yn ei flaen.

"Mae mwyafrif o aelodau’r Pwyllgor yn cefnogi egwyddorion cyffredinol y Mesur. Rydym yn argymell bod y Cynulliad yn cefnogi egwyddorion cyffredinol y Mesur."

Dywed Gweinidog Materion Gwledig Llywodraeth Cymru, Lesley Griffiths, y dylai anifeiliaid gwyllt gael eu trin gyda pharch a "nid eu hecsbloetio ar gyfer dibenion adloniant".

Dywed bod y gyfraith newydd wedi cael cefnogaeth lwyr mewn ymgynghoriad diweddar - ymgynghoriad a dderbyniodd dros 6,500 o atebion.

Ar hyn o bryd nid oes syrcasau yng Nghymru yn defnyddio anifeiliaid gwyllt, ond mae syrcasau o wledydd eraill yn ymweld, a gallant ddefnyddio anifeiliaid gwyllt yn gyfreithlon yn eu perfformiadau.

Yn Lloegr, mae dwy syrcas deithiol yn defnyddio anifeiliaid gwyllt: Circus Mondao a Peter Jolly’s Circus.

Mae’r ddwy yn ymweld â Chymru yn rheolaidd.

Yn ôl Adran yr Amgylchedd, Bwyd a Materion Gwledig (DEFRA) Llywodraeth y DU, ar ddiwedd 2017, roedd gan y syrcasau hyn gyfanswm o 19 o anifeiliaid gwyllt.

Yr eitem olaf heddiw yw Dadl ar Egwyddorion Cyffredinol y Mesur Anifeiliaid Gwyllt a Syrcasau (Cymru).

Amcan polisi’r Mesur yw gwahardd y defnydd o anifeiliaid gwyllt mewn syrcasau teithiol yng Nghymru.

Mae’r Mesur yn ceisio’i gwneud yn drosedd defnyddio anifail gwyllt (fel y’i diffinnir yn y Mesur) mewn syrcas deithiol.

Caiff anifail gwyllt ei ddefnyddio os yw’n perfformio neu’n cael ei arddangos.

Byddai’r drosedd yn cael ei chyflawni gan y person sy’n weithredwr (fel y’i diffinnir yn y Mesur) y syrcas deithiol os yw’n defnyddio neu’n caniatáu i berson arall ddefnyddio anifail gwyllt yn y syrcas deithiol. Mae person sy’n euog o drosedd o’r fath yn agored ar euogfarn ddiannod i ddirwy.

Ni fydd y Mesur yn effeithio ar y defnydd o anifeiliaid wedi’u domestigeiddio mewn syrcasau teithiol, nac yn atal defnyddio anifeiliaid gwyllt ar gyfer adloniant mewn lleoliadau eraill, gan gynnwys syrcasau sefydlog.

Ffynhonnell y llun, Getty Images

Mae ACau yn cymeradwyo Rheoliadau Cynlluniau Gostyngiadau'r Dreth Gyngor, dolen allanol (Gofynion Rhagnodedig a'r Cynllun Diofyn) (Cymru) (Diwygio) 2020

Cynlluniau Gostyngiadau'r Dreth Gyngor yw'r dulliau a ddefnyddir gan awdurdodau lleol i roi cymorth i aelwydydd ar incwm isel er mwyn iddynt dalu'r dreth gyngor.

Mae’r rheoliadau hyn yn diwygio Rheoliadau Cynlluniau Gostyngiadau’r Dreth Gyngor a Gofynion Rhagnodedig (Cymru) 2013 a Rheoliadau Cynlluniau Gostyngiadau’r Dreth Gyngor (Cynllun Diofyn) (Cymru) 2013.

Maent yn uwchraddio rhai ffigurau a ddefnyddir i gyfrifo hawl ymgeisydd i ostyngiad o dan Gynllun Gostyngiadau'r Dreth Gyngor, a lefel y gostyngiad sy’n dilyn. Maent hefyd yn gwneud rhai diwygiadau technegol a chanlyniadol.

Mae'r Rheoliadau'n gwneud diwygiadau sy'n ganlyniadol i Reoliadau Partneriaeth Sifil (Cyplau o Wahanol Ryw) 2019 a chyfres o reoliadau a fydd yn gweithredu darpariaeth yn Neddf Profedigaeth Rhiant (Absenoldeb a Thâl) 2018.

Ffynhonnell y llun, Getty Images

Nesaf datganiad gan Weinidog y Gymraeg a Chysylltiadau Rhyngwladol Eluned Morgan: Y Wybodaeth Ddiweddaraf am Bolisi Masnach.

Mae'r Gweinidog yn dweud mai'r blaenoriaethau yn yr wythnosau nesaf fydd bwrw ymlaen â’r gwaith o sefydlu dulliau rhynglywodraethol ffurfiol a sicrhau rôl glir i Lywodraeth Cymru mewn negodiadau yn y dyfodol.

"Fel rhan o hyn," medd Eluned Morgan, "byddaf yn mynnu tryloywder ym mholisi masnach y Deyrnas Unedig, gan ddechrau drwy gytuno ar fandadau negodi ar draws y Deyrnas Unedig a’u cyhoeddi.

"Byddaf yn parhau i ddadlau o blaid blaenoriaethu ein perthynas fasnach â’r Undeb Ewropeaidd, gan edrych ar y cyfleoedd y bydd cytundebau masnach y dyfodol yn eu cynnig i fusnesau a defnyddwyr yng Nghymru."

Mae arweinydd Plaid Brexit Mark Reckless yn dweud nad yw pobl am glywed cwynion gan Lywodraeth Cymru am lywodraeth y DU ond yn hytrach maent am wybod sut mae Llywodraeth Cymru yn gweithredu y pwerau sydd yn ei meddiant.

Ar ran Plaid Cymru dywed Rhun ap Iorwerth nad oes "dychymyg nac arloesedd" i'w gweld yn y gyllideb.

Mae'n canolbwyntio ar iechyd a chyllido llywodraeth leol - a ddylai, meddai, gydweithio lawer yn nes gyda'i gilydd - a newid hinsawdd.

Mae'r Ceidwadwr Darren Millar yn disgrifio'r gyllideb fel "cyfle wedi'i golli... lle roedd cyfle i fod yn radical a blaengar fe lynoch at gyllideb sydd wedi'i harbrofi ac wedi methu yn y gorffennol."

Ymhlith ei feirniadaeth mae cael gwared â chynllun ffordd liniaru'r M4 a cholledion Maes Awyr Caerdydd - safle a ddylai gael ei drosglwyddo'n ôl i'r sector breifat, meddai.

Yr eitem nesaf yw "Dadl ar Ddatganiad: Cyllideb Ddrafft 2020-21".

Cyfanswm cyllideb Llywodraeth Cymru ar gyfer y flwyddyn yw dros £17 biliwn.

Mae'r Gweinidog Cyllid Rebecca Evans yn tynnu sylw at y cynnydd o £340m i'r GIG, arian newydd i ymateb i argyfwng hinsawdd a buddsoddiad pellach yng ngwasanaethau iechyd meddwl.

Ffynhonnell y llun, MikhailMishchenko/Getty Images

Yr eitem nesaf yw'r Datganiad a Chyhoeddiad Busnes.

Mae'r Trefnydd Rebecca Evans yn amlinellu busnes y Cynulliad yn y dyfodol ac yn ymateb i geisiadau ACau.

Nesaf Cwestiynau i'r Cwnsler Cyffredinol a'r Gweinidog Brexit Jeremy Miles.

Mae'r Ceidwadwr David Melding yn gofyn pa drafodaethau y mae'r Cwnsler Cyffredinol wedi'u cael gyda swyddogion eraill y gyfraith yn y DU ar ffyrdd o gryfhau Undeb Prydain Fawr a Gogledd Iwerddon?

Mae Mr Melding a Mr Miles yn edrych ymlaen at ganlyniad adolygiad sy'n cael ei gadeirio gan yr Arglwydd Dunlop, cyn-weinidog yn Swyddfa'r Alban.

Bwriad yr adolygiad yw sicrhau bod pob strwythur oddi fewn i lywodraeth y DU - gan gynnwys adrannau llywodraeth - yn cydweithio er mwyn sicrhau bod datganoli yn gweithio.

• Adolygiad llywodraeth i 'ystyried pwerau Swyddfa Cymru'

Mae Angela Burns ar ran y Ceidwadwyr yn cyfeirio at y pwysau sy'n wynebu y GIG yng Nghymru.

Daw ei sylw wedi i Bwrdd Iechyd Hywel Dda orfod canslo llawdriniaethau oedd wedi cael eu trefnu.

Dywed Mr Drakeford bod y pythefnos diwethaf wedi bod "yn hynod brysur a heriol ond bod y system yn wydn".

Mae arweinydd Plaid Brexit, Mark Reckless, yn gofyn a yw'n edifar gan y prif weinidog ei fod wedi dewis gamblo i strwythuro ail refferendwm.

Dywed y prif weinidog ei bod yn bwysig dangos bod Cymru ar ei hennill o fod y tu mewn i'r UE tra bod posibilrwydd y gallai refferendwm gael ei gynnal.

Mar Mr Reckless yn gofyn ymhellach ai bwriad y prif weinidog yw pleidleisio yn erbyn Brexit pan mae'r mater yn dod ger bron y cynulliad.

Mae Mark Drakeford yn dweud nad yw'r mesur "mewn man" lle dylai'r cynulliad ei gymeradwyo.

Mae arweinydd Plaid Cymru, Adam Price, yn cyfeirio at fideo diwedd blwyddyn gan y prif weinidog oedd yn nodi bod 480 cartref y flwyddyn yn cael eu codi.

Mae Mr Price yn gofyn faint o'r rhai hynny sy'n rhai fforddiadwy.

Dywed y prif weinidog bod ei lywodraeth wedi ymrwymo i godi 20,000 o dai fforddiadwy yn ystod tymor presennol y cynulliad.

Dywed Mr Price i Lywodraeth Cymru adeiladu llai o gartrefi y llynedd o'i gymharu â'r tair blynedd diwethaf.