Ar ddiwrnod barddoniaeth y byd mae Barddas wedi bod yn annog pobl i rannu eu hoff gerdd - mae dewis Aneirin Karadog sef cerdd gan Dic Jones yn gorffen yn hynod o obeithiol.

Llywodraeth Cymru

Mae'r Prif Weinidog, Mark Drakeford, newydd drydar neges yn ystod y munudau diwethaf.

Byrdwn ei neges yw bod yn rhaid aros adre er mwyn lleihau'r pwysau ar y Gwasanaeth Iechyd.

Dylai pobl roi unrhyw densiynau i'r naill ochr a bod yn fwy caredig i'w gilydd tra bo achosion coronafeirws yn gorfodi teuluoedd i dreulio mwy o amser gyda'i gilydd yn eu cartrefi, medd elusen cwnsela perthynas.

Mae'r cyfan wedi gadael pobl i deimlo eu bod wedi colli rheolaeth ar eu bywydau, medd Dr Rachel Davies, cynghorydd gyda Relate Cymru, ond mae'n dweud bod yna bethau allan nhw wneud i wella'r sefyllfa.

"Perthnasau fydd yn eich cael chi drwyddi," meddai. "Bydd bod yn garedig i'n gilydd yn ein helpu i ymdopi'n well."

Ffynhonnell y llun, Getty Images

Roedd hi'n eithaf prysur ar draeth y Greig-ddu ym Morfa Bychan ddydd Sadwrn.

Ffynhonnell y llun, bbc

Cyngor Ynys Môn

Mae Arweinydd Cyngor Sir Ynys Môn, y Cynghorydd Llinos Medi, wedi annog twristiaid ac ymwelwyr i gadw draw o'r Ynys hyd nes bod yr argyfwng Coronafeirws drosodd.

Wrth gyfrannu £310m y flwyddyn a chynnal 4,000 o swyddi, mae twristiaeth yn un o brif sylfeini economi Ynys Môn.

Dywedodd y Cynghorydd Llinos Medi, “Wnes i erioed feddwl y byddwn i’n cyfleu’r fath neges, ond yn ystod amser mor gythryblus, does dim dewis heblaw annog ymwelwyr a thwristiaid, gan gynnwys y rhai sy’n berchen ar ail gartrefi, i gadw draw o’r Ynys - a hynny ar unwaith.

"Mae’n rhaid i ni i gyd chwarae ein rhan, ac i beidio teithio oni bai ei fod yn hanfodol, er mwyn mynd i’r afael â’r argyfwng cenedlaethol yma.”

Apeliodd hefyd ar y diwydiant twristiaeth i helpu i leihau cyswllt cymdeithasol a galwodd ar barciau carafanau a busnesau Gwely a Brecwast i gau er mwyn cyfyngu ar ledaeniad y clefyd a lleihau'r pwysau ar wasanaethau lleol a'r Gwasanaeth Iechyd.

BBC Cymru Fyw

Yn dilyn sylwadau Prif Ysgrifennydd y Trysorlys, Stephen Barclay, fod helpu pobl hunangyflogedig yn "weithredol anodd" ac y byddid yn edrych eto ar y mater wythnos nesaf, dywedodd Ysgrifennydd Cyffredinol Undeb Prospect bod yn rhaid i'r llywodraeth ddeffro i bryderon pobl sy'n gweithio'n llawrydd neu sy'n hunangyflogedig.

"Mae'r bobl llawrydd ry'n yn eu cynrychioli fel undeb yn haeddu yr un gefnogaeth ag y mae'r llywodraeth wedi ei roi i fusnesau - sef 80% o gyflog i weithwyr na sy'n gallu gweithio oherwydd yr haint.

"Rhaid gweithredu nawr."

Mae Undeb Prospect yn cynrychioli degau o bobl sy'n gweithio yn llawrydd ym meysydd ynni, gwasanaethau plant, darlledu a diddanu.

Cynulliad Cenedlaethol Cymru

Bydd y Cynulliad yn cwrdd ddydd Mawrth (Mawrth 24) er mwyn ystyried Memorandwm Cydsyniad Deddfwriaethol (LCM) sy’n ymwneud â Mesur Coronofeirws sydd ger bron Senedd y DU.

Daw hyn yn sgîl cais gan y Prif Weinidog i’r Llywydd, sydd wedi cytuno i newid trefniadau busnes yr wythnos i ddod.

Yn ogystal â’r Memorandwm, mae’r busnes yn cynnwys yr hyn oedd wedi ei glustnodi ar gyfer dwy sesiwn gefn wrth gefn o’r Cyfarfod Llawn ar ddydd Mercher.

Mewn llythyr at aelodau, gofynnodd y Llywydd i unrhyw un ohonynt ei hysbysu os nad oes modd iddynt fynychu’r Busnes oherwydd salwch neu hunan-ynysu er mwyn ystyried yr agweddau iechyd cyhoeddus megis cadw pellter Cymdeithasol yn y Siambr.

Mae’r Pwyllgor Busnes yn ystyried yr opsiynau o gynnal parhad Busnes Cynulliad sydd yn allweddol yn yr wythnosau sydd i ddod - gan gyd-bwyso gallu’r Cynulliad i ddeddfu a chraffu materion yn ymwneud â COVID-19 gydag ystyriaethau iechyd cyhoeddus.

Mae pentre gwyliau Bluestone yn Sir Benfro wedi cyhoeddi y byddan nhw'n cau o ddydd Llun, 23 Mawrth tan 27 Ebrill, 2020.

Iechyd Cyhoeddus Cymru

Mae Iechyd Cyhoeddus Cymru wedi cadarnhau bod 280 achos o haint coronafeirws yng Nghymru bellach.

Dywedodd Dr Chris Williams:

"Mae 89 achos newydd o Covid 19 yng Nghymru ac mae'r nifer bellach yn 280 er bod y nifer go iawn yn debygol o fod yn uwch.

"Yn seiliedig ar asesiad risg gofalus bydd pobl sy'n gweithio wyneb yn wyneb â chleifion yn cael eu profi.

"Wrth i fwy o bobl gael eu profi bydd canllawiau pellach ar bwy sy'n gymwys i gael prawf.

"Mae'n bwysig bod y cyhoedd yn dilyn ein cynghorion."

Mae tri o bobl, oedd wedi eu profi'n bositif,wedi marw o'r haint yng Nghymru.

Heddlu Dyfed Powys

Dywed Comisiynydd Heddlu a Throsedd Dyfed-Powys Dafydd Llywelyn fod angen i'r llywodraeth ystyried yr heddlu wrth flaenoriaethu profion ar gyfer coronafeirws.

Mewn trydar dywedodd fod dwsinau o'r llu yn hunan ynysu ac felly yn absennol o'u gwaith.

Ledled y byd mae dros 11,000 wedi marw o'r feirws, gyda 270,000 wedi profi'n bositif

Ddydd Gwener bu farw 627 o bobl yn yr Eidal, hwn yw'r nifer uchaf ers dechrau'r argyfwng yno.

Mae llywodraethau'r Eidal, Sbaen a Ffrainc wedi cyflwyno mesurau llym sy'n cyfyngu ar allu pobl i gymysgu.

Mae nifer o fyrddau iechyd, bellach, yn cyfyngu ar oriau ymweld neu wedi gwahardd ymweld ag ysbyty.

Er mwyn diogelu cleifion, staff a'r cyhoedd mae nifer o fyrddau iechyd yn gweithredu polisïau ymweld newydd.

I rai mae haint coronafeirws wedi dod â hanes ffliw diwedd y Rhyfel Byd yn fyw.

BBC Cymru Fyw

Mae AS Dwyfor Meirionnydd, Liz Saville Roberts, wedi ysgrifennu at Ysgrifennydd Iechyd y DU, Matt Hancock, i fynegi ei phryderon am "dwf cynyddol y boblogaeth mewn ardaleodd gwledig wrth i bobl geisio dianc rhag haint coronafeirws."

Yn ôl arweinydd seneddol Plaid Cymru, mae pobl wedi dod i aros i dai haf yn ei hetholaeth yng ngogledd Cymru ar adeg lle maen nhw fel arfer yn wag.

"Mae hynny yn cynyddu'r pwysau ar y gwasanaethau iechyd yng Nghymru," meddai mewn llythyr.

Ffynhonnell y llun, Getty Images

BBC Radio Cymru

Golygydd Radio Cymru, Rhuanedd Richards, yn egluro sut fydd amserlen Radio Cymru yn newid er mwyn ymestyn y gwasanaeth newyddion yn ystod haint coronafeirws.

BBC Cymru Fyw

Mae 5,000 o lythyron, medd y Gweinidog Iechyd, wedi eu hanfon at weithwyr iechyd sydd wedi ymddeol yn y tair blynedd diwethaf.

Mae'r llythyr yn gofyn iddynt ailgofrestru gyda'u cyrff priodol er mwyn cael dychwelyd i weithio i GIG Cymru.

BBC Cymru Fyw

Mae'r Gweinidog Iechyd, Vaughan Gething, yn dweud bod 800 o brofion haint coronafeirws yn cael eu cynnal bob dydd ar hyn o bryd.

Erbyn dechrau Ebrill bydd y nifer yn cynyddu i 6,000 y dydd ac wythnos wedi hynny bydd 8,000 y dydd yn cael eu profi.

BBC Cymru Fyw

Wrth roi'r wybodaeth ddiweddaraf i'r wasg fore Sadwrn, Vaughan Gething, yn ychwanegu y bydd myfyrwyr meddygaeth blwyddyn olaf ynghyd â nyrsys a bydwragedd yn cael eu galw i weithio i'r Gwasanaeth Iechyd yng Nghymru ac fe fyddant yn cael eu talu am y gwaith.

Mae e hefyd yn annog gweithwyr iechyd proffesiynol a gweithwyr gofal cymdeithasol, sydd wedi ymddeol, i ddychwelyd i'r gwaith.

Bydd fferyllfeydd yn cael agor awr yn hwyrach a chau awr yn gynt ac yn cael cau am ddwy awr amser cinio er mwyn ail-lenwi'r silffoedd.

Mae Ysgrifennydd Iechyd Cymru, Vaughan Gething, yn dweud y bydd gan weithwyr gofal cymdeithasol fynediad i offer amddiffyn personol.