Bydd modd i ysgolion yng Nghymru roi talebau archfarchnad gwerth £19.50 yr wythnos i ddisgyblion sy'n hawlio cinio am ddim.

Yn Lloegr, y cyfanswm wythnosol fydd ar gael mewn talebau yw £15.00.

Tra bod plant yn aros adref o'r ysgol yn ystod y pandemig, mae Llywodraeth Cymru yn cynghori ysgolion ag awdurdodau lleol i brynu cardiau rhodd neu dalebau arlein o archfarchnadoedd neu siopau lleol.

Gwerth y talebau fydd £3.90 y pen bob dydd, ac fe fydd modd i ysgolion a chynghorau hawlio ad-daliad gan y llywodraeth.

Twitter

Mae'r Swyddfa Ystadegau Gwladol wedi dechrau cofnodi nifer y marwolaethau lle cafodd coronafeirws ei grybwyll ar dystysgrifau marwolaethau am y tro cyntaf, a hynny yn wythnosol.

Mae'r ystadegau yn dangos marwolaethau yn ôl oedran, rhyw a lleoliad y marwolaethau yng Nghymru a Lloegr.

BBC Radio Cymru

Mae mam i ddynes ifanc sydd wedi bod ym Mheriw ers tua mis wedi dweud wrth raglen y Post Cyntaf ar BBC Radio Cymru ei bod yn hedfan adref y bore 'ma.

Dywedodd Sian Cartwright fod ei merch Casi o Ddinbych wedi gadael y wlad am hanner nos neithiwr, yn dilyn ymgyrch gan deuluoedd yn y DU i sicrhau fod y llywodraeth yn eu cynorthwyo i deithio adref.

Dywedodd Siân Cartwright: “Diolch i’r holl ymgyrchu sydd wedi bod yn ddiweddar mae Casi rhyw dair awr o Lundain ar ei ffordd adre. Mae hi ar yr awyren fel ‘da’n ni’n siarad dwi wedi bod yn dilyn y ‘flight tracker’ ers rhyw hanner nos neithiwr ac o’r diwedd mae hi a ar ei ffordd adre.

"Ond mae 'na bobl dal yn Cusco, mae 'na 10 o bobl mewn hostel yn Cusco’n dal i aros i ddod adre fel miloedd o bobl ar draws y byd.

"Mi ges i e-bost neithiwr tua 11 gan fy Aelod Seneddol Dr James Davies yn dweud bod 'na bobl yn India, y Philipinau, Seland Newydd ac Awstralia yn dal i aros i ddod adre felly mae hi yn sefyllfa ofnadwy i’r teuluoedd."

Ychwanegodd: "Dwi’n gobeithio y bydd hi yn glanio o gwmpas amser cinio. Ac wedyn dwi ddim yn gwybod beth fydd y broses, a fydd yn rhaid iddi hunan ynysu? Dwi yn gobeithio y daw hi adre yn fuan."

Ffynhonnell y llun, Casi Cartwright

Prifysgol Bangor

Ag hithau'n gyfnod o bwysau ar bawb yn ystod y pandemig presennol, mae Prifysgol Bangor wedi hysbysebu ymarferion sydd ar gael i fyfyrio er mwyn cael ychydig o seibiant.

Iechyd Cyhoeddus Cymru

Mae Iechyd Cyhoeddus Cymru yn galw ar ysmygwyr i roi'r gorau iddi yn wyneb pandemig Covid-19, gan y gallai achub eu bywydau.

Dywed y sefydliad fod ysgyfaint ysmygwyr yn llai effeithiol na rhai pobl sydd ddim yn ysmygu, ac mae smocio yn niweidio celloedd sydd yn amddiffyn y trwyn a'r llwybrau anadlu o fewn y gwddf.

Mae ysmygwyr hefyd yn cyffwrdd eu hwynebau'n amlach wrth godi sigarets i'w cegau, tra bo eraill yn dioddef gyda chyflyrau iechyd sydd wedi deillio o ysmygu'n barod.

Dywed Iechyd Cyhoeddus Cymru fod cannoedd o bobl wedi cysylltu gyda'u llinell gymorth sydd yn cynnig cyngor ar sut i roi'r gorau i ysmygu ers dechrau'r pandemig coronafeirws.

golwg360

Mae golwg360 yn adrodd fod Cyngor Sir Gaerfyrddin yn chwilio am fwy o weithwyr yn ystod y pandemig coronafeirws. Mae'r awdurdod ymysg nfer o gyrff cyhoeddus sydd yn galw am gymorth a gweithwyr ychwanegol.

Mae Undeb yr Annibynwyr Cymraeg wedi atgoffa addolwyr na ddylen nhw ymweld â mynwentydd ar Sul y Blodau, y Sul hwn, gan nad yw hi'n "gyfnod arferol."

Mewn neges ar y we mae'r Undeb, sy'n cynnwys tua 400 o gapeli ledled Cymru, yn sôn am bwysigrwydd y traddodiad o deithio i fynwentydd er mwyn gosod blodau a "chadw'r cof am ein hanwyliaid yn fyw" ond yn pwysleisio na ddylid gwneud hyn eleni.

Mae Ffred a Meinir Ffransis bellach yn ôl adref yn Llanfihangel-ar-arth ar ôl bod yn gaeth ym Mheriw am bythefnos oherwydd y pandemig.

Fe laniodd y cwpl o Sir Gaerfyrddin ym maes awyr Heathrow fore Llun.

Mari Grug
Gohebydd BBC Cymru

Mae pryder ynglŷn â diffyg sgiliau petai ffermwyr yn cael eu taro'n wael gan haint coronafeirws.

Yn cael eu categoreiddio fel gweithwyr allweddol, mae'r diwydiant yn un hollbwysig i gynnal y gadwyn fwyd.

Wrth i brisiau llaeth a chig ostwng, y diwydiant bwytai ddymchwel, ac arferion prynu cwsmeriaid newid, mae'n gyfnod hynod heriol i'r diwydiant.

Darllewnch y stori'n llawn yma.

Mae 'na nifer o bobl wedi bod yn cyhoeddi lluniau o eifr yng nghanol tref Llandudno ar y cyfryngau cymdeithasol y bore 'ma.

Geifr o ben y Gogarth yw'r rhai sydd bellach yn cerdded o gwmpas y dref - gan nad oes ceir na phobl i'w dychryn draw yn ystod y cyfnod o ymbellhau cymdeithasol.

Ffynhonnell y llun, Lansdowne House

Ffynhonnell y llun, Lansdowne House

Mae coronafeirws yn bygwth gobeithion merch naw oed o gael triniaeth ar gyfer math prin o diwmor ar yr ymennydd.

Cafodd Eva o Wrecsam ddiagnosis o'r cyflwr DIPG Ddydd Calan.

Roedd ei rhieni Paul Slapa a Carran Williams wedi llwyddo i gasglu rhan helaeth o'r £250,000 sydd ei angen ar gyfer y driniaeth yn yr Unol Daleithiau ond mae'r haint nawr yn peryglu eu gobeithion.

Ffynhonnell y llun, Llun teulu

Aled Hughes
BBC Radio Cymru

'Stiwdio' Aled Hughes bore 'ma braidd yn anghonfensiynol...

Gwrandewch ar ei raglen foreol ar Radio Cymru.

BBC Radio Wales

Ar raglen Breakfast ar Radio Wales bore 'ma mae Angela Mutlow, prif swyddog Cyngor Iechyd Cymunedol Aneurin Bevan yn dweud bod yna "waith gwych" yn cael ei wneud ar y cyfan.

"Maen nhw yn gwneud popeth posib i gefnogi ein cymunedau yng Ngwent ar hyn o bryd," meddai.

Ond fe ychwanegodd: "Fy mhryder fwyaf yw ble mae hyn i gyd yn mynd... pa mor uchel eith y ffigyrau? Wrth edrych ar y niferoedd a'r uchafswm ar draws y byd, dim sefyllfa Gwent yw hwn - mae hyn yn ddigwyddiad iechyd byd eang.

"Mae'r niferoedd yn uchel yn y fan yma nawr, ond bydd hyn yn lledu ar draws Cymru. Y flaenoriaeth nawr yw rheoli'r pandemig."

Eisteddfod Genedlaethol Cymru

Ffynhonnell y llun, Eisteddfod

Mae cystadleuwyr llenyddol yr Eisteddfod Genedlaethol yn gwybod bod disgwyl i gyfansoddiadau'r brifwyl gyrraedd y swyddfa erbyn 1 Ebrill a dydy eleni ddim yn eithriad er bod yr eisteddfod wedi ei gohirio.

Mewn cylchlythyr, dywed swyddogion y brifwyl eu bod wedi "penderfynu casglu pob cais ynghyd a'u cadw dan glo am flwyddyn cyn eu hanfon at y beirniaid ym mis Ebrill 2021".

Mae dyddiau cau'r prif gystadlaethau rhyddiaith eisoes wedi bod a'r beirniaid wedi bod wrthi yn darllen ers yr hydref.

Ond mae'r Eisteddfod yn dweud nad oes achos i boeni os nad oes modd i bobl anfon eu cyfansoddiadau drwy'r post - gan bod modd gwneud hynny yn ddigidol dros y we.

Am fwy o wybodaeth, cliciwch yma i fynd i wefan y Steddfod., dolen allanol

Y chwaraewr pêl-rwyd rhyngwladol, Nia Jones yn rhannu neges gan gymydog. Digon i wneud rhywun yn ddagreuol...

Post Cyntaf
BBC Radio Cymru

03703 500 500 neu post.cyntaf@bbc.co.uk yw'r ffordd i gysylltu gyda'r criw bore 'ma eto rhwng 8:30 a 9:00 ar Radio Cymru gyda'ch sylw neu gwestiwn i'r meddyg Dr Dyfan Jones.

• Llywodraeth Cymru yn cyhuddo cwmni Tesco o roi pwysau er mwyn gwyrdroi penderfyniad ar drethi busnes
• Undeb yr Annibynwyr Cymraeg wedi atgoffa addolwyr na ddylen nhw ymweld â mynwentydd ar Sul y Blodau
• Pryder ynglŷn â diffyg sgiliau petai ffermwyr yn cael eu taro'n wael gan yr haint

Bore da a diolch i chi am ymuno â'r llif byw dyddiol ar Cymru Fyw.

Byddwn ni'n dod â'r diweddaraf i chi ar effaith y pandemig coronafeirws ar Gymru a thu hwnt drwy gydol y dydd.