Mae ysgrifennydd clwb beicio yn y gogledd wedi anfon llythyr at y Prif Weinidog – Mark Drakeford - ar ol iddo gyhoeddi canllawiau newydd yn dweud na ddylai neb seiclo yn bell o'u cartrefi.

Yn y llythyr, mae Dafydd Hughes o Glwb Beicio Egni yng Nghaernarfon yn dweud bod y canllawiau newydd yn warthus.

Yn ôl llywodraeth Cymru dyw seiclo'n bell o'r ty ddim yn cael ei ystyried yn esgus rhesymol dros adael cartref.

Dwedodd llefarydd ar ran llywodraeth Cymru, “Mae’r canllawiau’n nodi’n glir y caniateir beicio i’r gwaith, ac mewn gwirionedd rydym am annog pobl i deithio mewn ffyrdd sydd o fudd i’w hiechyd a’r amgylchedd. Ond ar adeg pan mae ein gwasanaethau brys dan bwysau enfawr, mae'n bwysig bod pobl yn cymryd pa gamau bynnag y gallan nhw i leihau'r risg o ddamweiniau ac ymarfer corff mor agos i'w cartref â phosib.”

Yn ôl adroddiad ym mhapur y Daily Telegraph, mae carcharorion yn Abertawe ar fin dechrau cynhyrchu offer diogelwch personol ar gyfer gweithwyr iechyd rheng flaen am lai na phris y farchnad.

Dywed y papur fod wyth carchar categori B a C yn rhan o'r ymdrech i arbed arian i'r gwasanaeth iechyd.

Bydd y carchardai'n cynhyrchu dillad gwaith 'scrubs' ar gyfer gweithwyr iechyd am o gwmpas £5 - £15 yw'r pris ar hyn o bryd ar y farchnad agored gyda'r galw cynyddol am yr offer.

Bydd y carcharorion hefyd yn cynhyrchu fisorau a bagiau 'scrubs', gan dderbyn y cyflog arferol o £12.50 yr wythnos.

Casgliad newydd o adnoddau dysgu cyfrwng Cymraeg wedi ei lansio yn gynt na'r disgwyl i ymateb i ynysu Covid-19.

Mae'r gwaith yn parhau i greu canolfan brofi arall ar faes sioe Caerfyrddin.

Bydd yr uned yn weithredol erbyn dydd Iau, a bydd modd cael prawf wrth yrru drwy'r ganolfan.

Mae canolfannau 'gyrru drwodd' eisoes wedi eu sefydlu yng Nghasnewydd a Chaerdydd, ac mae cynlluniau am un yn y gogledd hefyd.

Post Cyntaf
BBC Radio Cymru

Wrth i ymchwil awgrymu y gallai Cymru ddiodde'r ergyd economaidd waethaf oherwydd coronafeirws, mae academydd blaenllaw'n dweud ei fod "yn poeni am yr hyn fydd yn digwydd dros y ddwy, tair blynedd nesa'."

Dywedodd yr Athro Dylan Jones Evans o Brifysgol De Cymruwrth raglen Post Cyntaf: "O edrych ar rai o ystadegau'r wythnos ddiwethaf, er enghraifft, mae canolfan ymchwil ym Mhrifysgol Southampton wedi edrych ar 800 o drefi ym Mhrydain... ro'dd yna 15 tref o Gymru yn y 30 tref fyddai'n cael yr ergyd fwyaf ar ôl argyfwng Covid-19, a'r rhan fwyaf yn y cymoedd.

"Mae yna ymchwil arall o Brifysgol Warwick ar fusnesau bach yn dangos bod mwy o gwmnïau wedi cau yng Nghymru'r flwyddyn ddiwethaf nag unrhyw ran arall o Brydain, a llawer llai o fusnesau newydd yn dechrau.

"Beth ydy'n ni yn weld ydy bod rhannau tlotaf Prydain ble mae'r argyfwng mwyaf ar hyn o bryd o'i gymharu â llefydd fel Llundain a De Ddwyrain Prydain."

Mewn cyfnod mor ddigynsail, mae'n hawdd anghofio nad Covid-19 yw'r unig salwch.

Dyna fwrdwn neges Bwrdd Iechyd Betsi Cadwaladr heddiw...

Mae pawb yn diolch i weithwyr iechyd a gofal yn eu ffordd eu hunain....

Ystadegau Cymru

Mae Llywodraeth Cymru wedi cynnal arolwg barn am y dulliau o daclo coronafeirws yma, ac mae'r canlyniadau wedi'u cyhoeddi heddiw.

Ymhlith y rhai mwyaf trawiadol, mae'r mwyafrif o bobl ymatebodd i'r arolwg yn cefnogi gosod trefi neu ddinasoedd cyfan dan gwarantin pe byddai angen gwneud hynny.

Mae'r gymuned Fwslimaidd yng Nghonwy wedi ateb apêl gan Gomisiynydd Heddlu'r Gogledd, Arfon Jones, am gefnogaeth i fanciau bwyd yn ystod yr argyfwng coronafeirws.

Mae Cymdeithas Fwslimaidd Conwy wedi rhoi dau lwyth o fwyd i fanciau bwyd yn Abergele, Penmaenmawr, Llanfairfechan, Conwy, Bae Colwyn a Bae Cinmel.

Mae pobl ifanc yn fwy tebygol o deimlo'n unig yn ystod yr argyfwng na phobl hŷn, yn ôl arolwg.

Ychwanegodd Mr Johnson mai dyma'r cyfnod o risg mwyaf wrth geisio taclo coronafeirws.

Apeliodd ar bobl i beido colli amynedd gyda'r cyfyngiadau a rheolau sydd mewn grym.

Mae prif weinidog i DU, Boris Johnson wedi bod yn siarad o Downing Street yn y munudau diwethaf.

Dywedodd mai coronafeirws yw'r her unigol fwyaf i wynebu'r DU ers y rhyfel.

Ychwanegodd bod arwyddion bod y "llanw'n dechrau troi" yn y frwydr yn erbyn Covid-19, ond "nid dyma'r amser i lacio'r cyfyngiadau".

BBC Cymru Wales

Traffig Cymru

BBC Radio Wales

Mae Prif Swyddog Meddygol Cymru, Dr Frank Atherton, wedi bod yn siarad ar BBC Radio Wales am y cyhoeddiad ddydd Gwener bod achosion o farwolaeth gyda coronafeirws heb gael eu hadrodd yn gywir gan Fwrdd Iechyd Betsi Cadwaladr yn y gogledd.

"Pan ddechreuodd y pandemig fe wnaethon ni gyflwyno system gyfrifiadurol newydd i fyrddau iechyd adrodd am farwolaethau er mwyn casglu'r ffigyrau a rhoi rhi cywir.

"Penderfynodd Betsi Cadwaladr i beidio defnyddio'r system yna ond i ddefnyddio un gwahanol. Dyna pam mae'r gwall yma wedi ymddangos yn y broses, ond mae bellach wedi ei gywiro.

"Mae Iechyd Cyhoeddus Cymru a Betsi Cadwaladr yn paratoi adroddiad llawn am yr hyn ddigwyddodd."

Pryder nad yw cwmnïau yn fodlon talu er bod deiliaid y polisi'n mynnu eu bod yn gymwys am arian.

BBC Radio Wales

Mae Comisiynydd Heddlu a Throsedd Gogledd Cymru, Arfon Jones, wedi bod yn siarad ar BBC Radio Wales y bore 'ma wedi i rhai pobl gael eu dal yn teithio o Lundain i Eryri dros y penwythnos.

Dywedodd: "Fe gewch chi rhai sy'n trio'u lwc bob tro. Fe gafon nhw'u stopio a chael eu cosbi.

"A yw £60 yn ddigon o gosb i atal pobl sy'n teithio o Lundain... dwn i ddim."

Roedd yn bryderus hefyd y gallai cyfyngiadau gael eu codi cyn Wyl y Banc ar 8 Mai, ac ychwanegodd:

"Rwy'n bryderus na ddylen ni godi cyfyngiadau cyn hynny oherwydd bydd hynny'n rhoi pwysau anferthol ar blismona."

Heddlu Gogledd Cymru

Mae Heddlu'r Gogledd yn dweud eu bod wedi atal nifer o bobl oedd wedi ceisio teithio i'r gogledd dros y penwythnos gan gynnwys criw o 10 o bobl oedd wedi teithio o Lundain i gerdded yn Eryri.

Fe gafon nhw'u stopio ar yr A5 ger Bethesda a'u gyrru adref a'u cosbi am dorri rheolau Covid-19.

Roedd dyn arall wedi teithio o Cumbria i Lanberis yn oriau man y bore a cherdded i fyny'r Wyddfa cyn cael ei herio gan berson oedd wedi gweld ei car yn y pentref.

Dywedodd yr heddlu: "Bu'r dyn yn enllibus tuag at y person a'i heriodd, ac yn amlwg yn credu nad oedd y rheolau'n berthnasol iddo fo.

"Cafodd ei gar ei atal ar yr A55 tua'r dwyrain ac fe gafodd ei gosbi.

"Ry'n ni'n gwaredu weithiau!"

Post Cyntaf
BBC Radio Cymru

Teulu'n wynebu'r coronafeirws mewn carafán wrth i waith trwsio ar ôl llifogydd gael ei atal am fisoedd.