Gall tua 20% o bobl Cymru sydd wedi'u heintio â Covid-19 fod yn ei gario heb fod â symptomau, yn ôl gwyddonwyr ym Mhrifysgol Bangor.

Mae tîm dan arweiniad yr Athro Davey Jones o'r Ysgol Gwyddorau Naturiol wedi bod yn cofnodi'r feirws trwy'r system trin carthion, yn y gobaith o allu adnabod rhybuddion cynnar cyn y don nesaf o achosion.

Hyd yma, meddai, mae nifer y gronynnau Covid-19 yn y carthion mewn dŵr gwastraff "yn wirioneddol uchel yng ngogledd-ddwyrain Cymru a'r de-ddwyrain, sy'n awgrymu bod nifer fawr o achosion ar hyn o bryd".

Ond mae'r niferoedd "yn wirioneddol isel" mewn rhannau eraill o ogledd Cymru, "sy'n awgrymu bod bron dim Covid-19 o blith y boblogaeth."

Ceidwadwyr Cymreig

Yn dilyn adroddiadau ddydd Llun y bydd cwmni GE Aviation – sydd â chanolfan trwsio a chynnal yn Nantgarw – yn ystyried cwtogi ar nifer eu staff ar draws y byd, dywedodd llefarydd y Ceidwadwyr ar yr economi, Russell George AC: "Mae hwn yn amlwg yn newyddion pryderus i holl weithwyr yr uned yn Ne Cymru.

"Mae'r cyhoeddiad diweddaraf yma yn dangos pa mor galed mae'r pandemig yn cael ei deimlo ym mhob diwydiant, hyd yn oed rhai allweddol strategol fel GE MRO yng Nghymru."

Ffynhonnell y llun, Cynulliad Cenedlaethol Cymru

Mae dynes sy'n aros am brawf serfigol pellach wedi i'r un diwethaf amlygu celloedd abnormal yn ofni y gallai gohirio profion yn ystod y pandemig coronafeirws arwain at achosion canser ddim yn cael diagnosis.

Cafodd Katherine Parr, 48 o Wrecsam, brawf arferol ym Mawrth 2019 ac yn ôl ei llythyr canlyniadau gan Sgrinio Serfigol Cymru roedd angen iddi gael apwyntiad arall mewn 12 mis.

Ond mae meddygfa Ms Parr wedi dweud wrthi fod y profion wedi eu canslo ar ddechrau'r argyfwng Covid-19.

Dywed Iechyd Cyhoeddus Cymru eu bod yn ceisio datrys y sefyllfa wrth i'r argyfwng fynd rhagddo.

Fe allwch chi ddarllen mwy ar y stori yma ar ein hafan.

Ffynhonnell y llun, Katherine Parr

Mae nifer y marwolaethau'n ymwneud â coronafeirws o amgylch y byd wedi pasio 250,000, yn ôl Prifysgol Johns Hopkins, sy'n tracio'r feirws.

Yr Unol Daleithiau sydd â'r nifer fwyaf o farwolaethau - bron i 69,000 - gyda'r Eidal wedi cofnodi mwy na 29,000 a'r DU wedi colli dros 28,000.

Ond mae cymariaethau yn gymhleth oherwydd y ffyrdd gwahanol mae gwledydd yn adrodd ffigyrau.

Mae pryder hefyd fod diffyn profi mewn nifer o wledydd hefyd yn cuddio gwir effaith y feirws.

Ffynhonnell y llun, Getty Images

BBC Radio Wales

Fe allai Llywodraeth Cymru ddefnyddio ap ffôn symudol i dracio'r feirws, yn ôl y Prif Weinidog Mark Drakeford.

Mae'r ap yn cael ei dreialu ar Ynys Wyth yn ne Lloegr o heddiw ymlaen.

Dywedodd Mr Drakeford wrth BBC Radio Wales fod "manteision" i'w ddefnyddio, ond bod angen datrys problemau fel rhannu data personol.

Dywedodd Prif Swyddog meddygol Cymru, Dr Frank Atherton ddoe y byddai'r cyhoedd yn "fodlon colli ychydig o'u rhyddid" er mwyn taclo'r feirws.

Ffynhonnell y llun, GIG

Mae cynllun yn cael ei ddatgelu heddiw er mwyn sicrhau bod presgripsiynau yn cyrraedd y rheiny sy'n hunan ynysu rhag coronafeirws.

Nod y trefniadau yw cefnogi fferyllfeydd a meddygon, gyda gwirfoddolwyr yn gyrru presgripsiynau i bobl sydd â neb arall i'w nôl.

Mae gwirfoddolwyr wedi cael eu recriwtio gan Lywodraeth Cymru a'r Groes Goch.

Mae 650 o fferyllfeydd a 400 o wirfoddolwyr eisoes wedi cofrestru i fod yn rhan o'r cynllun newydd.

Ffynhonnell y llun, Getty Images

Mae elusen sy'n helpu pobl ifanc sydd â risg o ladd eu hunain wedi dweud bod 90% o'u hymholiadau ar hyn o bryd gan bobl sy'n poeni am effaith coronafeirws ar fywydau pobl.

Dywed Papyrus fod cynnydd "cymharol fach" hefyd yn y nifer o bobl sydd wedi cysylltu â nhw.

Yn ôl pennaeth yr elusen yng Nghymru, Kate Heneghan, mae coronafeirws yn effeithio ar ein bywydau mewn sawl ffordd.

"'Dan ni'n gweld pobl yn rhannu gofidiau am golli incwm, y potensial o golli swyddi a'r pryder o golli'u cartrefi, a myfyrwyr yn poeni am arholiadau ac ansicrwydd am eu dyfodol academaidd," meddai.

Ffynhonnell y llun, Getty Images

BBC Wales News

Byddai angen tua 30,000 o brofion Covid-19 pob dydd pe bai GIG Cymru'n dechrau profi pawb sydd â symptomau, yn ôl adroddiad cyfrinachol.

Dywedodd Llywodraeth Cymru mai drafft o strategaeth ydy'r ddogfen, a'u bod yn gweithio gyda'u partneriaid yr wythnos hon ar sut i'w gyflawni.

Yn ôl llefarydd Plaid Cymru ar iechyd, Rhun ap Iorwerth, mae'r ddogfen yn cynnwys "yr un faint o gwestiynnau ag atebion".

Ffynhonnell y llun, Getty Images

Mae arweinydd Cyngor Gwynedd yn dweud fod yr awdurdod wedi colli hyd at £9m o incwm hyd yma oherwydd yr argyfwng.

Yn ôl Dyfrig Siencyn, bydd rhai cynghorau'n wynebu problemau ariannol difrifol, yn sgil colledion incwm o tua £170m ledled Cymru yn ystod y tri mis diwethaf.

Mae'r colledion yn dod oherwydd diflaniad incwm o feysydd parcio, canolfannau hamdden a nifer o ffioedd eraill yn sgil y cyfyngiadau.

Mae Cyngor Gwynedd yn dweud y gallai eu colledion incwm yn y pen draw fod hyd at £20m.

"Mae 'na rai cynghorau'n sicr yn wynebu sefyllfa o fethu gosod cyllideb os na chawn ni rhyw ad-daliad gan y Llywodraeth," meddai Mr Siencyn.

Bydd coronafeirws yn "dod yn ôl â dialedd" pe bai'r cyfyngiadau'n cael eu llacio'n rhy gyflym, yn ôl prif ymgynghorydd gwyddonol Llywodraeth Cymru dros iechyd.

Dywedodd Dr Rob Orford fod angen cymryd "camau gofalus iawn".

Hefyd fe ddywedodd y bydd cyfathrebu'r cynllun yn effeithiol i'r cyhoedd yn allweddol, ac y gallai plant fod ymhlith y cyntaf i weld newidiadau.

Byddai angen i fesurau gwyliadwriaeth fod ar waith hefyd i fonitro lledaeniad y clefyd.

Mae modd darllen mwy ar y stori hon ar ein hafan.

Croeso i'n llif byw ar ddydd Mawrth, 5 Mai yma ar BBC Cymru Fyw.

Gydol y dydd, fe gewch chi'r holl bytiau newyddion diweddaraf am yr argyfwng coronafeirws yng Nghymru a thu hwnt.

Bore da iawn i chi gyd.