Ceidwadwyr Cymreig

Wrth sôn am y cyhoeddiad am becyn cymorth ar gyfer y sector ffermio llaeth yng Nghymru, dywedodd Andrew RT Davies AS, llefarydd y Ceidwadwyr Cymreig ar faterion gwledig, ei fod yn "well hwyr na hwyrach”.

“Ond mae’r cyhoeddiad heddiw yn brin o unrhyw fanylion go iawn," ychwanegodd.

“Pwy, er enghraifft, fydd yn 'ffermwr cymwys'? Dyma'r math o fanylion sydd eu hangen i dawelu meddwl ffermwyr gweithgar, sy'n rheoli un o'r sectorau diwydiant allweddol yng Nghymru.

“Mae angen sicrhau bod yr arian hwn ar gael ar unwaith i sicrhau nad yw ein sector amaethyddol hanfodol yn dioddef mwy o ddifrod.”

Mae NFU Cymru wedi croesawu cyhoeddiad Llywodraeth Cymru.

Prif Weinidog Cymru'n cydnabod fod ymestyn y cyfyngiadau yn cael effaith ar les meddyliol pobl.

Beth yw'r newidiadau i'r cyfyngiadau?

Mae caniatâd i ganolfannau garddio ailagor yng Nghymru o 11 Mai wedi i Lywodraeth Cymru lacio rhai o'r cyfyngiadau ar adael ein cartrefi.

Mae gweddill y cyfyngiadau yn parhau mewn grym, ond mae hawl bellach i fynd i ymarfer corff tu allan fwy nag unwaith y dydd, ar yr amod eich bod yn aros yn lleol.

Am fwy o atebion i'ch cwestiynau, cliciwch yma.

Ffynhonnell y llun, Getty Images

BBC Radio Wales

Mae Comisiynydd Heddlu a Throsedd Gogledd Cymru, Arfon Jones, wedi dweud fod angen mwy o eglurder o amgylch ymweld â chanolfan arddio, ac a oes modd ystyried hynny yn “deithio hanfodol”.

Roedd yn cyfeirio at newidiadau mewn cyfyngiadau yng Nghymru a fydd, o ddydd Llun ymlaen, yn gweld rhai canolfannau garddio yn cael ailagor.

“Roeddwn i bob amser o dan yr argraff, os oeddech chi'n mynd i deithio, roedd yn rhaid i chi gael esgus rhesymol i wneud hynny,” meddai wrth BBC Radio Wales.

“Mae'n ymddangos ychydig yn groes i'w gilydd. Ydy hi’n hanfodol mynd i ganolfan arddio? Ond, yn amlwg, os ydyn nhw'n eu hagor, yna byddwn yn gobeithio y bydd Llywodraeth Cymru - pan fyddan nhw'n cyhoeddi canllawiau ynghylch y newidiadau i ddeddfwriaeth - yn egluro hynny inni,” meddai Mr Jones.

Neges gan neb llai na'r cyn-chwaraewr rhyngwladol, Robbie Savage, yn annog pobl i gadw draw o ogledd Cymru.

Mae'n dweud y bydd "croeso cynnes" i ymwelwyr fwynhau prydferthwch y gogledd pan fydd pethau'n dychwelyd i ryw fath o "normalrwydd".

Llywodraeth Cymru

Mae gweinidog materion gwledig Cymru wedi cyhoeddi cyllid heddiw ar gyfer y ffermwyr llaeth yng Nghymru sydd wedi dioddef waethaf yn sgil coronafeirws.

Dywed Llywodraeth Cymru fod y sector llaeth wedi teimlo effaith y pandemig byd-eang "ar unwaith, o ganlyniad i gau y sectorau gwasanaethau bwyd a lletygarwch".

Cadarnhaodd Lesley Griffiths y bydd gan ffermwyr llaeth cymwys sydd wedi colli mwy na 25% o’u hincwm ym mis Ebrill ac wedi hynny ym mis Mai hawl i hyd at £10,000, i dalu am 70% o’r incwm y maen nhw wedi ei golli.

"Bydd hyn yn helpu i sicrhau y gallant barhau i weithredu heb gael effaith ar les anifeiliaid a’r amgylchedd," meddai datganiad.

Bydd rhagor o fanylion am y cynllun yn cael eu cyhoeddi’n fuan.

Mae heddluoedd ar draws Cymru yn annog y cyhoedd i lynu at y canllawiau ar benwythnos Gŵyl y Banc.

Daw hyn yn sgil cyhoeddiad Llywodraeth Cymru ddoe, a ddywedodd y bydd pobl yn cael ymarfer corff tu allan fwy nag unwaith y dydd, a bydd rhai llyfrgelloedd a chanolfannau ailgylchu a garddio yn ailagor o ddydd Llun ymlaen.

Mae'r heddlu yn rhybuddio y bydd eu presenoldeb yn amlwg gydol penwythnos Gŵyl y Banc ac os bydd angen fe fyddan nhw'n gweithredu os oes rhywun yn mynd yn groes i'r canllawiau.

Darllenwch ein stori'n llawn yma.

Diolch i chi am ymuno â ni bore ma ar ddydd Sadwrn, 9 Mai. Byddwch yn cael y newyddion diweddaraf am y pandemig yma drwy gydol y dydd.

Byddwn yma tan tua 17:00 felly arhoswch efo ni tan hynny, neu dewch yn ôl atom ni bob hyn a hyn.