Wales Online

Mae Wales Online wedi bod yn siarad gyda phobl sydd yn byw ar y ffin rhwng Cymru a Lloegr. , dolen allanolMae'r trigolion maen nhw wedi holi yn dweud bod y rheolau yn gymysglyd.

Mae Cassie Stephens yn byw yng Nghasnewydd ond yn teithio i'w gwaith yn Lloegr ac yn dweud nad yw hi'n siŵr beth mae fod i wneud.

Ar hyn o bryd mae'n gorfod cerdded i'w gwaith o Gas-gwent am nad oes llawer o drafnidiaeth gyhoeddus.

golwg360

Mae ymchwil gan Brifysgol Caerdydd yn sôn am y manteision o ddefnyddio uwchsain er mwyn monitro'r difrod sydd wedi ei wneud ar yr ysgyfaint os yw claf wedi cael y feirws, dolen allanol.

Fel arfer mae uwchsain yn cael ei ddefnyddio ar gyfer cleifion beichiog ac anafiadau cyhyrol.

Nawr mae’r brifysgol wedi cyhoeddi tystiolaeth a chanllawiau cynnar ar y defnydd o uwchsain medd Golwg360 a mae'r ymchwil yn cael ei ddefnyddio ar draws y byd.

BBC Wales News

Mae'r pandemig wedi gadael ei ôl ar bobl ifanc. Yn eu plith mae Jared Thomas o Dde Cymru sydd fel arfer yn torri coed. Ond yn sgil y feirws does dim galw am ei waith.

Pan ddigwyddodd yr argyfwng economaidd dwytha fe aeth graddedigion i chwilio am waith yn y sector manwerthu, teithio a gwestai medd y felin drafod Resolution Foundation.

Ond nawr mae'r sectorau hynny ar gau gan adael llai o opsiynau i bobl.

Mae'r corff yn annog llywodraeth y DU i gynnig mwy o gefnogaeth ariannol i'r rhai sy'n gadael ysgol ac eisiau swyddi lle maent yn cael eu hyfforddi tra'n gweithio.

Ffynhonnell y llun, Jared Thomas

Mae Heddlu'r Gogledd wedi ategu'r neges na ddylai pobl deithio i Eryri.

Daw'r neges yn sgil sylw gan wefan sy'n boblogaidd ymysg cerddwyr sy'n dangos cynnydd mawr mewn diddordeb ers i gyfyngiadau gael eu llacio yn Lloegr.

Roedd hynny wedi eu harwain i feddwl y byddai llawer yn ceisio teithio i Eryri cyn hir.

BBC Radio Cymru

Yn ôl Ffederasiwn y Busnesau Bach Cymru, mae ail-agor busnesau yn mynd i fod yn gostus i nifer.

Ar y Post Cyntaf dywedodd ei llefarydd Llŷr ap Gareth: "Yr alwad ydy, pan ddaw hi yn amser i ail agor busnesau - ac mae nifer wedi cau dros gyfnod eithaf hir bellach heb incwm - bydd angen i'r busnesau hyn allu addasu i gyfyngiadau pellter cymdeithasol.

"I nifer, mae hyn yn mynd i fod yn dipyn o sialens, mae staff yn mynd i fod angen ail-ddysgu sut i wneud pethau. Ryda'n ni felly yn galw am grant felly i helpu busnesau i allu addasu.

"Mae sawl busnes yn mynd i gael trafferth cyflwyno'r cyfyngiadau a sicrhau incwm i allu gwneud bywoliaeth. Mae angen i bobl allu hyfforddi ar gyfer y newidiadau a dod 'nôl i ryw fath o normalrwydd newydd, bydd angen rhyw fath o amserlen fras."

BBC Radio Cymru

Bu Comisiynydd Heddlu a Throsedd De Cymru, Alun Michael ar y Post Cyntaf ar Radio Cymru heddiw a dywedodd:

"Pan roedd Boris Johnson yn siarad nos Sul wnaeth e ddim ei gwneud hi'n glir bod llawer o'r hyn oedd yn ei gyhoeddi yn berthnasol i Loegr ac nid i Gymru.

"Ond ers hynny dwi'n meddwl bod y dadlau yn y wasg wedi ei gwneud hi yn glir bod y sefyllfa yng Nghymru ar Alban yn wahanol i Loegr.

"Roedd Mark Drakeford a'r Alban yn awyddus iawn i gadw mewn 'lock step' i bawb fyd yr un ffordd. Dewis Bris Johnson oedd hi i wneud pethau yn wahanol ac mae hyn wedi creu problemau.

"Y neges sy'n rhaid i ni gyfleu ydy na all bobl deithio yma i hamddena. Rydan ni wedi siarad efo'r Comisiynwyr yn Lloegr i ddweud hyn hefyd. Mae'r rheolau yn wahanol."

BBC Radio Wales

Roedd Prif Swyddog Meddygol Cymru, Dr Frank Atherton yn siarad ar Radio Wales y bore 'ma, gan egluro'r penderfyniad i beidio gorfodi pobl Cymru i wisgo mygydau pan allan yn gyhoeddus.

Dywedodd Dr Atherton nad oedd am i ddiwylliant o gywilyddio pobl am beidio gwisgo mwgwd ddatblygu - Cymru yw'r unig wlad yn y DU i beidio argymell eu gwisgo.

Ychwanegodd bod buddion gwisgo mwgwd wedi eu gorbwysleisio, a bod rhai anfanteision hefyd.

Roedd yn dadlau bod hylendid sylfaenol ac ymbellhau cymdeithasol yn gallu gwneud mwy o wahaniaeth na gwisgo mwgwd, ond dywedodd: "Fy nghyngor i yw y gall pobl eu defnyddio os ydyn nhw'n dymuno gwneud hynny, ond na ddylen nhw fod yn orfodol"

Bwrdd Iechyd Prifysgol Betsi Cadwaladr

Mae Bwrdd Iechyd Prifysgol Betsi Cadwaladr wedi bod yn gweithio gyda meddygon teulu ardal Arfon i sefydlu canolfannau asesu er mwyn ceisio rheoli triniaeth cleifion gyda symptomau Covid-19 yn y gymuned.

Bydd y ganolfan ddiweddaraf yn agor yr wythnos yma yn y stadiwm sy'n cael ei ddefnyddio gan Glwb Pêl-droed Dinas Bangor er mwyn asesu cleifion yr ardal.

Ni fydd profion coronafeirws ar gael yno, a dim ond cleifion sydd wedi gwneud apwyntiad fydd yn cael eu gweld gan feddygon fel Dr Catrin Elis Williams a Dr Nia Hughes (sydd yn y llun).

Ffynhonnell y llun, Bwrdd Iechyd Betsi Cadwaladr

Twitter

Daeth criw o weithwyr y Gwasanaeth Iechyd at ei gilydd i recordio fersiwn Zoom o glasur Simon and Garfunkel - Bridge Over Troubled Water - ar gyfer Ysbyty'r Enfys ar safle Venue Cymru yn Llandudno.

Mae sawl un wedi canol y fersiwn... gan gynnwys neb llai na'r cyfansoddwr, Paul Simon!

Cais hefyd am gynllun twristiaeth i helpu cwmnïau oroesi ar ôl colli busnes gwanwyn a haf eleni.

Fe wnaeth economi'r DU grebachu'n gyflymach nag unrhyw adeg ers y cwymp ariannol yn 2007 yn chwarter cyntaf eleni oherwydd coronafeirws.

Dywedodd y Swyddfa Ystadegau Gwladol bod yr economi wedi crebachu o 2% yn y tri mis hyd at Mawrth 2020, a hynny'n dilyn dim twf yn chwarter olaf 2019.

Mae arbenigwyr yn disgwyl cwymp pellach yn ail chwarter y flwyddyn cyn i'r economi ddechrau adfywio.

BBC Radio Wales

Wrth siarad ar Radio Wales y bore 'ma, dywedodd Prif Gwnstabl Heddlu Gwent fod y gwahaniaeth yn y negeseuon rhwng Cymru a Lloegr yn gwneud gwaith yr heddlu'n anoddach.

Dywedodd Pam Kelly: "Mae'n rhoi mwy o heriau i ni yn sicr, ond nid brwydr rhwng Cymru a Lloegr neu rhwng deddfau gwahanol yw hyn, ond brwydr yn erbyn y feirws.

"Yr hyn yr ydym yn gwneud yw apelio ar bobl i ddefnyddio synnwyr cyffredin, ac fe fyddwn ni'n sicrhau bod eu hymddygiad yn unol gyda beth yr ydym yn ei ddweud yma yng Nghymru - arhoswch adre, arhoswch yn ddiogel, arhoswch yn lleol ac achubwch fywydau."

BBC Cymru Fyw

Croeso i'n llif byw ar fore Mercher, 13 Mai.

Yma y cewch chi'r holl bytiau o newyddion diweddaraf am coronafeirws yng Nghymru a thu hwnt, gan gynnwys y gynhadledd newyddion ddyddiol gan Llywodraeth Cymru a'r ffigyrau diweddaraf.

Arhoswch gyda ni tan tua 18:00... bore da i chi!