The Guardian

Mae'r Guardian yn adrodd am arbrawf posib yn defnyddio patsys nicotîn i geisio taclo Covid-19.

Daw'r cynllun gan feddygon yn Ysbyty Brenhinol Morgannwg yn dilyn profion gan wyddonwyr yn Ffrainc.

Cliciwch yma i ddarllen y stori'n llawn, dolen allanol.

Mae 'na gynnydd wedi bod yn nifer yr oedolion sydd yn dysgu Cymraeg yn ystod y cyfnodo gyfyngiadau cymdeithasol, medd un ganolfan iaith.

Dywed y Ganolfan Dysgu Cymraeg Genedlaethol fod dros 8,000 o ddysgwyr newydd wedi dechrau cyrsiau Cymraeg arlein ers cychwyn y pandemig.

Mae 1,300 o'r rhain yn cynnwys pobl sydd yn dilyn cyrsiau sy'n gyfuniad o wersi gyda thiwtoriaid dros gyswllt fideo ac astudio unigol.

Un sydd wedi bod yn dilyn cwrs newydd ydy Cheryl George o Bontypridd.

"Mae dysgu Cymraeg wedi bod ar fy rhestr o bethau i'w wneud ers amser maith. Fe wnes i drio o'r blaen ond fe gymerodd gwaith a fy mywyd drosodd," meddai.

"Gan fy mod ar gyfnod ffyrlo o'r gwaith, mae gen i'r rhodd o amser. Fe weles i fod y cwrs yma arlein a meddwl ei fod yn berffaith. Roeddwn i chydig yn nerfus a phryderus gan ei fod arlein - sut fyddai'n gweithio?

"Roedd y sesiwn Zoom gyntaf yn wych! Rwy'n edrych ymlaen at y naw wythnos nesaf a thu hwnt ac i ddatblygu fy ngwybodaeth am yr iaith."

Pobl yn Llundain yn dechrau gweld "cryfder" datganoli yn sgil y pandemig, medd y Prif Weinidog.

Mae'r map uchod yn dangos bod byrddau iechyd y de ddwyrain a'r gogledd wedi gweld y nifer uchaf o farwolaethau Covid-19 hyd yn hyn.

Mae'r graff isod hefyd yn dangos y tuedd dros yr wythnosau diwethaf, wrth i nifer y marwolaethau gwympo'n raddol ers canol Ebrill.

Iechyd Cyhoeddus Cymru

Mae Iechyd Cyhoeddus Cymru wedi cyhoeddi eu bod wedi cofnodi 4 yn rhagor o farwolaethau o bobl gyda coronafeirws.

Mae cyfanswm y meirw bellach yn 1,207.

Cafodd 101 o achosion newydd o Covid-19 eu cofnodi yng Nghymru, sy'n golygu bod 12,404 o bobl yma wedi profi'n bositif am yr haint.

Mae Iechyd Cyhoeddus Cymru yn cydnabod bod y gwir ffigyrau yn debyg o fod yn llawer uwch yn y ddau achos.

Twitter

Mae nifer o glybiau golff ar draws Cymru wedi cael yr hawl i ail-agor eto heddiw - ond nid dyma fydd yr achos yng Ngheredigion medd Golwg360.

Dywed y cyngor fod y chwe chwrs golff yn yr ardal yn mynd i fod ar gau tan 1 Mehefin, er mwyn cyfyngu ar deithiau yn wyneb y pandemig.

Y clybiau fydd yn parhau ar gau ydi Clwb Golff Aberystwyth, Clwb Golff Borth ac Ynyslas, Clwb Golff Cilgwyn, Clwb Golff Cwmrhydneuadd, Clwb Golff Penrhos, a Chlwb Golff Aberteifi.

Heddlu Gogledd Cymru

Mae'r heddlu'n dechrau ymgyrch newydd heddiw gan atgoffa gyrwyr y byddant yn gweithredu yn erbyn rhai sy'n goryrru.

Llywodraeth Cymru

Mae Mark Drakeford wedi gwadu fod Cymru'n "dal i fyny" gyda Lloegr o ran profi holl breswylwyr a staff cartrefi gofal.

Dywedodd fod gweinidog iechyd Lloegr Matt Hancock wedi gwneud cyhoeddiad am brofion "ar ddydd Gwener yr wythnos ddiwethaf".

Ar 28 Ebrill dywedodd Mr Hancock fod "unrhyw un sydd yn byw neu weithio mewn cartref gofal yn gallu cael gafael ar fynediad i brawf, petai ganddyn nhw symptomau neu beidio".

Yn ystod y gynhadledd i'r wasg ddyddiol, dywedodd Mr Drakeford fod hyn yn golygu fod preswylwyr "yn gallu gofyn am brawf os oedden nhw am gael un" - ond nid oedd hyn yn golygu fod pob preswyliwr a staff yn cael prawf.

Ddydd Gwener fe ddywedodd Mr Hancock y byddai pawb mewn cartrefi gofal yn Lloegr yn cael prawf hyd yn oed os nad oedden nhw'n dangos symptomau.

Ddydd Sadwrn fe gyhoeddodd Llywodraeth Cymru y byddai profion yn cael eu hymestyn i breswylwyr cartrefi gofal a'u staff yma.

Dywedodd Mr Drakeford fod na wahaniaeth sylfaenol rhwng cyhoeddiad Llywodraeth Cymru ddydd Sadwrn a chyhoeddiad Matt Hancock at 28 Ebrill:

"Ni fydd yn dibynnu, fel gwnaeth polisi Lloegr, ar geisiadau'n dod i mewn. Mae hyn yn newid sylweddol mewn polisi ac mae'n newid yn Lloegr a Chymru.

"Mae'n bolisi maen nhw wedi ei gael mewn lle ers ddydd Gwener, a pholisi yr ydym wedi ei osod ers dydd Sadwrn."

BBC Cymru Fyw

Mae prif weinidog yr Alban wedi cyhoeddi y gall y cyfyngiadau cymdeithasol yn y wlad ddechrau gael eu llacio o 28 Mai ymlaen.

Fe allai'r llacio olygu fod pobl yn cael cyfarfod eraill tu allan i'w cartrefi medd Nicola Sturgeon, ac fe fydd mwy o weithgarddau awyr agored yn cael eu caniatau hefyd.

Llywodraeth Cymru

Cyn troi at y cwestiynau, dywedodd Mr Drakeford y byddai'r llywodraeth yn ystyried dirwyon unwaith eto yn sgil tystiolaeth newydd gan yr heddluoedd.

Wrth ateb cwestiwn gan y BBC, dywedodd y byddai'n edrych ar y wybodaeth sydd wedi dod i law heddiw, ond ei fod eisiau sicrhau bod y dirwyon yn "gymesur".

Dywedodd y byddai'n fodlon cynyddu'r dirwyon os ydy'r dystiolaeth yn "cefnogi'r achos dros wneud hynny".

Llywodraeth Cymru

Mae Mr Drakeford hefyd yn rhoi diweddariad ar ôl siarad gyda heddluoedd Cymru heddiw.

Mae'n dweud bod lefelau traffig yn parhau'n llawer is na'r arfer, a bod nifer y dirwyon sydd wedi eu rhoi wedi haneru ers gŵyl y banc.

Er hynny, mae'n dweud bod adroddiadau o bobl yn tagu neu boeri ar heddweision wrth iddyn nhw wneud eu gwaith yn ei bryderu'n fawr.

Llywodraeth Cymru

Y prif weinidog sy'n siarad yng nghynhadledd Llywodraeth Cymru heddiw.

Wrth nodi dechrau wythnos ymwybyddiaeth iechyd meddwl, mae Mark Drakeford yn dweud ei bod hi'n bwysig i ni gyd ystyried ein hiechyd meddwl yn ystod y cyfnod yma.

Yn ogystal â niwed Covid-19 ei hun, mae Mr Drakeford yn dweud bod angen sicrhau nad yw'r mesurau i daclo'r feirws yn cael effeithiau gormodol ar yr economi, addysg ein plant a'n hiechyd meddwl.

Mae'n dweud bod £3.75m ychwanegol ar gael heddiw i gefnogi iechyd meddwl mewn ysgolion, gan gynnwys cefnogaeth newydd i blant dan 11 oed.

Twitter

Mae heriau mawr ar y gorwel i deulu Karen MacIntyre Huws sy'n ynysu ers naw wythnos

Dyma flas o'r arlwy ar Dros Ginio gyda Dewi Llwyd nes ymlaen. Y rhaglen yn dechrau am 13:00.

Cyngor Sir Penfro

Mae Cyngor Sir Penfro wedi cyhoeddi y bydd yn rhaid i'r cyhoedd archebu amseroedd arbennig wrth fynd â sbwriel i chwe chanolfan ailgylchu'r sir yn y dyfodol.

Fe fydd y canolfannau'n ailagor ar ddydd Mawrth 26 Mai, ac fe fydd cyfle i archebu amser o ddydd Mercher 9 Mai ymlaen.

Dywed y cyngor y bydd yn rhaid i'r cyhoedd gadw at reolau ymbellhau caeth yn y canolfannau pan fyddant yn ailagor.

Yr wythnos diwethaf cafodd y cynghorau sir ganiatâd gan y llywodraeth i baratoi i agor canolfannau ailgylchu.

Twitter

Mae'n teimlo'n bell yn ôl ers i ni glywed y neges am bwysgrwydd golchi ein dwylo am y tro cyntaf wrth i'r pandemig ymledu ym mis Mawrth.

Ond mae prif swyddog meddygol Cymru Dr Frank Atherton yn ailategu pwysigrwydd golchi dwylo unwaith eto heddiw, gan fod gwneud hyn yn hanfodol i atal y feirws rhag lledaenu.

Mae pedwar prif swyddog meddygol y DU yn cynghori pobl sydd wedi dangos symptomau o fethu ag arogli neu flasu i hunan ynysu.

Dywed y prif swyddogion, yn cynnwys Dr Frank Atherton, prif swyddog meddygol Cymru, y dylai pobl hunan ynysu os ydynt yn dangos symptomau o ddioddef o anosmia - sef colli neu newid yn y gallu i arogli.

Fe all hefyd effeithio ar allu unigolion i flasu, gan fod cysylltiad agos rhwng blasu ag arogli.

Mewn datganiad ar y cyd, dywedodd y swyddogion: "Rydym wedi bod yn monitro'r data newydd a'r dystiolaeth yn agos, ac yn dilyn ystyriaeth drylwyr rydym yn ddigon hyderus i awgrymu'r mesur newydd hwn.

"Dylai unigolion eraill o fewn cartref yr unigolyn sy'n dangos symptomau hunan ynysu am 14 niwrnod hefyd, fel rhan o'r canllawiau presennol.

"Dylai'r unigolyn hefyd aros adref am saith niwrnod neu hirach os ydynt yn parhau i ddangos symptomau heblaw am dagu neu golli'r gallu i flasu neu arogli."

Twitter

Mae na ganllaw ar gael yn Gymraeg ar y we i bobl sy'n profi gofid a gor-bryder yn yn ystod argyfwng Covid-19.

Ffrwyth llafur gwefan Meddwl.org ac adran y Gymraeg Prifysgol Aberystwyth yw'r canllaw newydd.

Urdd Gobaith Cymru

Mae angen sicrhau nad ydy'r gwersi a ddaw yn sgil argyfwng coronafeirws yn cael eu hanghofio - dyna ydy neges pobl ifanc Cymru.

Fel rhan o Neges Heddwch ac Ewyllys Da yr Urdd eleni, mae'r mudiad ieuenctid yn galw ar arweinwyr y byd i fynd i'r afael â "beiau mawr byd modern".

Un sydd wedi bod yn gweithio ar y neges eleni ydy Caitlin Kelly, newyddiadurwr ac ymgyrchydd o Lundain.

Dywedodd: "Mae'n anodd i bobl ifanc ar hyn o bryd, maent yn dioddef yn fwy o dlodi a chaledi achos yr ynysu."

"Mae'r neges felly yn symbol o undod pwysig ar y foment."