Mae ffigyrau sydd wedi eu cyhoeddi gan Gyngor Cenedlaethol Penaethiaid yr Heddlu yn dangos mai Heddlu Dyfed-Powys sydd wedi cyflwyno'r nifer uchaf o ddirwyon i bobl am dorri rheolau Covid-19.

Hyd at 11 Mai, cafodd 417 o hysbysiadau cosb benodedig - Fixed Penalty Notices - eu cyflwyno i bobl gan Heddlu Dyfed-Powys, sydd dros hanner nifer y dirwyon ar hyd a lled Cymru o 799.

Fe gyflwynodd Heddlu De Cymru 157 o ddirwyon, cafodd 143 dirwy eu cyflwyno gan Heddlu'r Gogledd, 71 gan Heddlu Gwent, a 11 gan Heddlu Trafnidiaeth Prydeinig.

Mae eich clwb golff lleol yn un o'r llefydd all fod yn agor eto heddiw ar ôl i glybiau gael gwybod eu bod yn cael croesawu "aelodau lleol" unwaith eto.

Dywedodd rheolwr Clwb Golff Castell Morlais ger Merthyr Tudful ei fod yn disgwyl diwrnod prysur.

"Rydyn ni'n ei gadw i aelodau yn unig, i chwarae yn unigol, ac rydyn ni wedi lleihau faint o bethau allan nhw ddod i gysylltiad â nhw ar y cwrs," meddai Barney Curnock.

Ond ychwanegodd ei fod yn "grêt i fod ar agor eto".

Ffynhonnell y llun, Getty Images

Fe fydd yr achos rheithgor cyntaf yn cael ei gynnal yn Llys y Goron Caerdydd ddydd Llun ers i gyfyngiadau cymdeithasol ddod i rym.

Fe fydd yr achos yn cael ei gynnal mewn dau lys gwahanol o fewn y prif adeilad i gydymffurfio gyda rheolau llym cadw pellter.

Mae'r llys yng Nghaerdydd yn un o lond dwrn o lysoedd drwy'r DU sydd yn ail-ymgynnull, er mwyn dechrau ar y gwaith o gynnal 37,000 o achosion llys sydd wedi eu gohirio o achos y pandemig yng Nghymru a Lloegr.

Twitter

Ydych chi wedi talu am wyliau yr haf hwn, ond yn ansicr am eich hawliau os nad yw'n bosib teithio o achos y pandemig?

Fe fu Alison Farrar o Safonau Masnach Cymru'n trafod eich hawliau ar Newyddion S4C.

Mae rhai athrawon cyflenwi sy'n cael eu cyflogi gan gynghorau yn ganolog yn honni eu bod wedi cael eu gadael heb unrhyw gyflog na chefnogaeth ers i ysgolion gau.

Mae'r rhan fwyaf o athrawon cyflenwi yn cael eu cyflogi gan asiantaethau, sy'n golygu eu bod yn gymwys i fod yn weithwyr ar gennad yn unol â chynlluniau Llywodraeth y DU.

Ond mae nifer o gynghorau sir y gogledd yn cyflogi athrawon cyflenwi yn ganolog, ac yn ôl undebau dyw nifer ohonynt ddim yn cael cyflog.

Dywed undeb athrawon UCAC eu bod yn siomedig nad yw pob cyngor yn trin athrawon cyflenwi "ag urddas".

Twitter

Peidiwch a theithio os nad yw'r daith yn un hanfodol....

Ar ôl penwythnos braf arall yng Nghymru, mae'r darlun gan Heddlu Gogledd Cymru'n debyg mewn rhannau eraill hefyd.

Mae comisiynwyr heddlu wedi galw am gynyddu'r dirwyon i bobl sy'n torri'r rheolau, a dywedodd Mark Drakeford ar BBC Radio Cymru ddydd Llun bod y dirwyon yn cael eu trafod yn gyson gyda'r heddluoedd.

Dywedodd bod ei lywodraeth yn "gweithio'n galed i gael y neges 'na drosto [yn Lloegr]" ond ei fod o ac arweinwyr Yr Alban a Gogledd Iwerddon wedi galw ar Boris Johnson i sicrhau bod cyhoeddiadau am Loegr yn unig yn cael eu hegluro.

"Mae'n bwysig hefyd i Lywodraeth y DU i fod yn glir gyda phobl pan yn dweud bod pobl Lloegr yn gallu teithio, yn Lloegr mae hynny."

Heddlu Gogledd Cymru

Bu'n rhaid i Heddlu'r Gogledd ddirwyo nifer o ymwelwyr am dorri rheolau Covid-19 dros y penwythnos.

Dywed y llu fod 26 o ymwelwyr wedi eu gorchymyn i adael ardal y Bermo ddydd Sadwrn, ac fe gafodd pedwar o ddynion eu herlyn a'u gorchymyn i ddychwelyd i ardal Manceinion ar ôl gyrru i'r Bala mewn tri cherbyd.

Cafodd 11 o bobl eraill o Fanceinion, oedd wedi teithio i Ynys Lawd ym Môn hefyd eu herlyn a'u hebrwng adref o Gaergybi medd yr heddlu.

Roedd yr 11 yn aelodau o'r un teulu yn teithio mewn tri cherbyd gwahanol.

Ffynhonnell y llun, Getty Images

Fe wnaeth Mark Drakeford hefyd drafod y penderfyniad dros y penwythnos i newid y polisi ar brofi mewn cartrefi gofal.

Bydd staff a phreswylwyr yn cael eu profi bellach, wedi'r newid polisi.

Dywedodd y prif weinidog bod pwyllgor meddygol Sage yn "dweud mai nawr yw'r amser i newid y polisi".

"Y'n ni'n mynd yn ôl y wyddoniaeth, nôl ym mis Ebrill o'dd y cyngor yn dweud bod e ddim yn werth e, nawr mae'r sefyllfa wedi newid, y wyddoniaeth wedi newid, y cyngor wedi newid, a ni'n newid y system yng Nghymru."

Mae Prif Weinidog Cymru, Mark Drakeford, hefyd wedi bod yn trafod profion y bore 'ma.

Wrth siarad ar BBC Radio Cymru, dywedodd Mr Drakeford ei fod wedi ymuno â'r system Brydeinig gan fod "y sefyllfa wedi newid, ac y'n ni nawr yn bwrw 'mlaen at y cam nesaf yn y system profi".

Dywedodd y byddai profion yn cael eu cynnal yn y gymuned, ac yn canolbwyntio'n fwy ar "dracio, olrhain a diogelu, ac i wneud hynny mae angen mwy o brofion".

Er hynny, gwrthododd bod datblygu system i Gymru wedi bod yn wastraff amser, gan ddweud nad oedd y system Brydeinig yn "gweithio i ni" ar y dechrau.

Mae profion ar gyfer Covid-19 yn cael sylw heddiw, ar ôl i arbenigwr alw am gydweithio agos rhwng gwledydd y DU wrth ymateb i'r argyfwng.

Dywedodd yr Athro Sian Griffiths, fu'n flaenllaw yn ymchwiliad Hong Kong i haint SARS, bod angen i'r DU gydweithio er mwyn gallu cystadlu'n rhyngwladol am brofion.

Yn y cyfamser mae Llywodraeth Cymru wedi penderfynu ymuno yng nghynllun y DU ar gyfer archebu profion ar gyfer gweithwyr allweddol.

Dywedodd gweinidog iechyd Cymru nad oes angen system ar wahan i Gymru bellach.

Bore da a chroeso i'n llif byw ar 18 Mai, ble gewch chi'r newyddion diweddaraf am haint y coronafeirws yn ystod y dydd.