Iechyd Cyhoeddus Cymru

Mae Iechyd Cyhoeddus Cymru wedi cadarnhau saith marwolaeth arall yng Nghymru o bobl gyda Covid-19, gan ddod â'r cyfanswm i 1,254.

Mae hyn yn is na'r cyfanswm diweddaraf o 1,852 gafodd ei roi gan y Swyddfa Ystadegau yn gynharach yr wythnos hon, sydd yn cynnwys pob achos ble mae Covid-19 wedi ei grybwyll ar y dystysgrif marwolaeth.

Mae nifer y bobl sydd wedi cael prawf positif am yr haint hefyd wedi codi o 138, a bellach yn 12,984.

Twitter

Twitter

Mae El J Gales wedi trydar llun o arwydd sydd wedi ymddangos mewn sawl siop ym Mhorthmadog ar ddechrau Gŵyl y Banc.

Mae'r arwydd yn gofyn i gwsmeriaid ddangos prawf eu bod yn byw yn lleol neu ni fydd y siopau yn eu gweini.

Daw hyn wrth i reolau'n gwahardd pobl rhag teithio o achos Covid-19 barhau mewn grym yma yng Nghymru, er fod y rheol teithio wedi ei llacio rhywfaint yn Lloegr.

Twitter

A hithau'n benwythnos Gŵyl y Banc, gyda chyfyngiadau teithio coronafeirws yn parhau mewn grym, mae nifer o gyrff cyhoeddus yng Nghymru'n awyddus i rannu'r neges i ymwelwyr nad oes dim wedi newid yma hyd yn hyn.

Dyma'r neges o'r gorllewin heddiw.

Llywodraeth Cymru

Wrth ymateb i gwestiwn ar y "pwysau" i lacio rhai o'r cyfyngiadau, dywedodd Mr Drakeford ei fod yn cydnabod hynny.

Dywedodd bod pawb yn teimlo effaith y cyfyngiadau, ond mai diogelwch ydy'r peth pwysicaf.

Dywedodd: "Ni fyddwn yn gweithredu unrhyw beth yng Nghymru all danseilio'r neges o ddiogelwch."

Llywodraeth Cymru

Wrth ymateb i gwestiwn am ymchwiliad rhaglen BBC Wales Investigates i'r diffyg profion Covid-19 mewn cartrefi gofal, dywedodd Mark Drakeford fod tystiolaeth fel yr hyn a welwyd ar y rhaglen yn ei wneud yn fwy penderfynol nag erioed i fynd i'r afael ag unrhyw broblemau sydd yn codi o fewn y drefn o brofi cleifion am yr haint.

Llywodraeth Cymru

Ychwanegodd Mr Drakeford y byddai'r gwaith o olrhain pobl sydd wedi cael y feirws yn dechrau dros y penwythnos.

Y bwriad ydy canfod y pobl y mae'r rhai sydd wedi cael y feirws wedi bod mewn cysylltiad â nhw i geisio atal lledaeniad.

Dywedodd y byddai tua 60 o weithwyr yn dechrau'r cynllun prawf dros y penwythnos.

Gallai gormod o newid, yn rhy sydyn, beryglu'r gwaith da sydd wedi ei wneud i atal lledaeniad y coronafeirws, yn ôl y prif weinidog.

Dywedodd Mark Drakeford bod y profion sy'n cael eu datblygu ar hyn o bryd yn cynnig gobaith, "ond y dyfodol ydy hynny".

Unwaith eto fe ofynnodd Mr Drakeford i bobl aros adref dros y penwythnos, gan atgoffa pobl o'r dirwyon uwch sydd wedi eu cyflwyno yn ddiweddar.

Fe fydd y gynhadledd ddyddiol i'r wasg yn dechrau am 12:30.

Twitter

Mae'r tenor Trystan Griffiths wedi bod yn canu i ddangos ei werthfawrogiad am waith gweithwyr y Gwasanaeth Iechyd tu allan i'w dŷ yng Nghaerdydd bob nos Iau ers sawl wythnos bellach.

Mae ei berfformiadau wedi cael cryn sylw ar y cyfryngau cymdeithasol, ac erbyn neithiwr roedd dau griw camera gwahanol yn aros tu allan i'w ffilmio.

O glywed ei berfformiad o Myfanwy, does dim syndod ei fod wedi ennyn y fath ddiddordeb.

Cyngor Rhondda Cynon Taf

Mae Cyngor Rhondda Cynon Taf yn dweud fod canolfannau ailgylchu'r awdurdod yn hynod brysur heddiw, gyda 250 o geir wedi defnyddio gwasanaethau dros wyth safle.

O ganlyniad mae'r cyngor yn galw ar bobl i ddefnyddio'r canolfannau dim ond os nad oes modd iddyn nhw gadw eitemau'n ddiogel yn eu cartrefi am y tro.

Dywed y cyngor mai dim ond pobl sydd angen gwaredu deunyddiau peryglus ddylai fynd i'r canolfannau ailgylchu ar hyn o bryd.

Mae'r camau diogelwch priodol o ymbellhau'n gymdeithasol yn cael eu dilyn ar yr wyth safle medd swyddogion, ac ni ddylai neb ruthro i ailgylchu os nad oes gwir angen gwneud hynny.

Mae ceisiadau am fudd-dal credyd cynhwysol wedi cynyddu o 120,000 yng Nghymru ers dechrau pandemig Covid-19, yn ôl ffigyrau newydd.

Clywodd Pwyllgor Materion Cymreig San Steffan bod 122,160 o geisiadau yng Nghymru ers 1 Mawrth.

Mae cadeirydd y pwyllgor, Stephen Crabb AS, wedi galw'r nifer yn "bryderus iawn" gan ddangos bod "degau o filoedd o bobl dros Gymru yn profi trafferth ariannol wrth i effaith economaidd y cyfnod cloi ddod i'r amlwg".

Twitter

Twitter

Mae perchnogion sw Borth Wild Animal Kingdom yn y canolbarth yn pryderu am ei dyfodol o ganlyniad i bandemig coronafeirws.

Dywed Tracy a Dean Tweedy y bydd yn rhaid ail-gartrefu rhai anifeiliaid neu hyd yn oed ddifa rhai yn y pen draw, os na ddaw achubiaeth ariannol.

Dywed y ddau fod y dyfodol yn ansicr iawn ar y funud gyda nifer o staff ar gynllun ffyrlo'r llywodraeth.

Mae'r safle wedi derbyn grant argyfwng o £25,000 ond bellach nid oes llawer o'r arian yma ar ôl.

Mae'r sw wedi bod yn y newyddion yn ddiweddar wedi i Mr a Mrs Tweedy gael eu gorfodi i gau rhannau o'r safle oedd yn cadw'r anifeiliaid peryclaf ym mis Ionawr.

Roedd Cyngor Ceredigion wedi eu gorfodi i wneud hyn gan nad oedd digon o staff ar y safle wedi eu trwyddedu i ddefnyddio drylliau.

Fe ail-agorodd y safle i gyd heblaw am gorlan y llewod ym mis Chwefror, ond mae'r safle wedi bod ar gau ers dechrau'r pandemig.

Twitter

Mae'r cyfnod dan glo wedi ysbrydoli nifer fawr o bobl i fod yn greadigol, ac un sydd wedi defnyddio'r pofiad i greu barddoniaeth ydy Annes Glynn.

Twitter

Mae'r Mudiad Meithrin wedi cyhoeddi y bydd cyfle i blant ifanc ymuno yng ngweithgareddau Clybiau Meithrin y sefydliad dros y we o ddechrau mis Mehefin ymlaen.

Mae BBC Cymru wedi cyhoeddi partneriaeth gyda'r Eisteddfod Genedlaethol i gynnal gŵyl tri diwrnod o hyd, fydd yn "llwyfan i oreuon y genedl", a chyfle i "ddarganfod a phrofi talent newydd Cymru".

Bydd Gŵyl AmGen yn digwydd dros benwythnos hir rhwng 30 Gorffennaf a 2 Awst - a gobaith y trefnwyr yw y bydd yn llenwi'r bwlch y mae Eisteddfod Ceredigion yn ei adael eleni.

Dywedodd Rhuanedd Richards, Golygydd BBC Radio Cymru a BBC Cymru Fyw: "Fe fydd hi'n Faes B, pafiliwn a phabell lên ond yn bennaf oll fe fydd yn ganolbwynt ac yn gyrchfan i wrandawyr o bob cwr o'r byd i ymgynnull a mwynhau arlwy o raglenni amrywiol o'r 'stafell fyw."