Llywodraeth Cymru

Dywedodd Mr Drakeford na fyddai Llywodraeth Cymru yn gorfodi gwisgo mwgwd mewn siopau, ond y bydd rhai busnesau yn gofyn i bobl eu gwisgo.

Ychwanegodd bod y sdctor manwerthu wedi gwneud "ymdrech aruthrol i gyflwyno mesurau i gadw pellter cymdeithasol, gan gynnwys sustemau un-ffordd, cyfyngu ar nifer y bobl sydd yn y siop ar yr un pryd a gosod sgriniau".

Ond dywedodd: "Ar hyn o bryd pan mae coronafeirws yn llai amlwg, nid ydym yn gorfodi mygydau mewn mannau cyhoeddus eraill er y gallai pobl ddewis eu gwisgo.

"Gallai'r cyngor newid os fydd coronafeirws yn dechrau cynyddu eto."

Ffynhonnell y llun, bbc

Llywodraeth Cymru

Ychwanegodd Mr Drakeford bod y ffaith fod gwisgo mwgwd yn orfodol ar drafnidiaeth gyhoeddus yn Lloegr wedi cyfrannu at y penderfyniad yng Nghymru gan bod nifer yn teithio dros y ffin ar fysus a threnau.

Llywodraeth Cymru

Mae'r prif weinidog Mark Drakeford wedi cyhoeddi y bydd rhaid i unrhyw un sy'n teithio ar drafnidiaeth gyhoeddus yng Nghymru wisgo mwgwd o 27 Gorffennaf.

Dywedodd Mark Drakeford y byddai'n berthnasol hefyd i bobl sy'n teithio mewn tacsis ac mewn unrhyw sefyllfa lle nad oes modd cadw pellter o 2m.

Mae mygydau wedi bod yn orfodol ar drafinidiaeth gyhoeddus yn Lloegr a'r Alban ers mis Mehefin.

Llywodraeth Cymru

Bydd y prif weinidog Mark Drakeford yn arwain y gynhadledd ddyddiol am 12:30, ac mae'n bosib y bydd cyhoeddiad o bwys i'w wneud...

Mae cartrefi gofal yng Nghymru yn dweud nad ydi Llywodraeth Cymru ddim wedi "trin a thrafod o gwbl" y strategaeth profi coronafeirws newydd gyda nhw.

Erbyn hyn mae'r polisi i gynnig prawf wythnosol am bedair wythnos i'r holl weithwyr gofal wedi dod i ben - polisi ddaeth i rym ar 15 Mehefin.

Yn ôl Fforwm Gofal Cymru mae cartrefi gofal "yn gyffredinol yn gallu cael mynediad i brofi" ond mae yna "oedi sylweddol" i brosesu profion Covid-19.

Dywedodd Llywodraeth Cymru ei bod yn dal i adolygu'r strategaeth ac y byddan nhw nawr yn "asesu'r effaith ac yn ystyried y camau nesaf er mwyn sicrhau ein bod yn diogelu ein cartrefi gofal".

Ffynhonnell y llun, gett

Wedi misoedd o fethu mynd i gael torri'u gwalltiau, mae'r bobl yma yng Nghasnewydd yn gorfod aros mymryn yn hirach heddiw!

Mae CPD Y Seintiau Newydd wedi colli achos llys yn erbyn Cymdeithas Bêl-droed Cymru pan wnaethon nhw geisio gwyrdroi'r penderfyniad i ddod â thymor Uwch Gynghrair Cymru i ben yn gynnar.

Mae dyfarniad y llys yn golygu fod Cei Connah'n cael eu cadarnhau fel pencampwyr Cymru.

Wrth ymateb, dywedodd y Gymdeithas: "Mae Cymdeithas Bêl-droed Cymru yn croesawu penderfyniad cadarnhaol yr Uchel Lys heddiw ynglŷn â’r achos a gafodd ei ddwyn yn erbyn y gymdeithas gan CPD Y Seintiau Newydd, yn sgil cwtogi tymor 2019/20 o gynghrair Cymru Premier oherwydd pandemig COVID-19.

"Mae CBDC yn falch o’r dyfarniad heddiw ac o’r gydnabyddiaeth fod Bwrdd Cyfarwyddwyr CBDC wedi gweithredu’n briodol yn y cyfnod digynsail hwn er mwyn gwarchod buddion pêl-droed yng Nghymru."

Ni fydd Canolfan Gweilch Dyfi yn agor o gwbl eleni oherwydd pandemig Covid-19.

Mae hawl i fusnesau ymwelwyr awyr agored agor bellach, ond mae'r ganolfan yn dweud y byddan nhw'n aros tan y flwyddyn nesaf.

Reuters

Mae llywodraethwr dinas Tokyo, Yuriko Koike, wedi dweud bod rhaid i'r Gemau Olympaidd gael eu cynnal y flwyddyn nesaf fel "symbol o undod y byd" yn wyneb y pandemig coronafeirws, medd asiantaeth newyddion Reuters.

Mae Japan wedi osgoi niferoedd anferth o'r feirws, ond mae nifer o begynnau o achosion wedi bod yn Tokyo ei hun, sydd â mwy na thraean o'r 20,000 o achosion yn y wlad gyfan.

Ni wnaeth fanylu ar pryd y byddai penderfyniad terfynol ar y Gemau yn cael ei wneud.

Mae cwmniau gwyliau wedi bod yn derbyn archebion di-ri am fythynnod, meysydd carafannau a pharciau gwyliau ers i'r cyfyngiadau lacio ddydd Sadwrn.

Mae pobl nawr yn cael aros mewn llety hunan-gynhaliol am y tro cyntaf ers mis Mawrth.

Dywedodd Andrew Campbell, cadeirydd Cyngres Twristiaeth Cymru: "Roedd hi'n hyfryd gweld llu o alwadau i eiddo twristiaeth ac asiantaethau gwahanol.

"Mae pobl jyst eisiau dod allan a dod i Gymru. Gallwch chi deimlo'r mwynhad ymhlith y bobl sydd am ddod yma."

Ffynhonnell y llun, Getty Images

BBC Radio Cymru

Ar raglen Dewi Llwyd ar Radio Cymru fore ddoe, dywedodd Comisinwyr Heddlu a Throsedd Cymru na fyddan nhw'n plismona cadw pellter cymdeithasol rhwng unigolion.

Gallwch wrando eto ar y drafodaeth trwy glicio ar y linc isod.

Dewi Voyle o Ynysybwl oedd un o'r bobl cyntaf yng Nghymru i gael torri'i wallt pan agorodd salon ym Mhontypridd am 06:30 heddiw.

Chwarae teg, mae'r gwahaniaeth yn amlwg ond dyw e!

Un arall sydd wedi agor ei salon trin gwallt yw Wendie Williams, Gwallt Wendigedig yng Nghaerfyrddin: "Un peth na fyddwn ni’n gallu gwneud oherwydd y rheole yw torri ffrinj o’r blaen, gan y bydden ni’n rhy agos i’r wyneb.

"Felly bydd angen gwneud hynny o’r cefn."

Prif Weithredwr Mudiad Meithrin yn disgwyl bydd mwyafrif y cylchoedd meithrin ar agor erbyn diwedd Medi.

BBC Radio Wales

Owain Wyn yw cadeirydd Awdurdod Parc Cenedlaethol Eryri, a bu'n siarad ar Radio Wales y bore 'ma ar ddiwedd y penwythnos cyntaf llawn ers i'r cyfyngiadau gael eu llacio.

Dywedodd: "Roedden ni'n bryderus o flaen llaw oherwydd yr hyn ddigwyddodd yn Lloegr, ond hyd yma yr ymateb dwi'n ei gael yw na fuodd hi'n brysurach nag unrhyw benwythnos ym mis Gorffennaf yn y blynyddoedd blaenorol.

"Oes, mae yna drafferthion gyda sbwriel mewn rhai mannau, ond mae hynny i'w ddisgwyl efallai. Ar y cyfan mae pobl wedi parchu cadw pellter.

"Fe fyddwn ni'n dal i fonitro wrth symud ymlaen, ac mae llawer yn dibynnu ar y tywydd wrth gwrs."

BBC Radio Wales

Tanya Clement yw perchennog salon gwallt TC ym Mhontypridd. Dywedodd wrth Radio Wales y bore 'ma: "Fedrai ddim disgwyl i weld fy nghwsmeriaid a rhoi gwasanaeth iddyn nhw.

"Mae hyn wedi bod yn hunllef. Dyma fy mywyd i, ac rwy'n falch iawn o fod nol yn gweithio.

"Fe fydd hi'n wallgo heddiw oherwydd dyw rhai o 'nghwsmeriaid i ddim ar Facebook ac fe fydd rhaid iddyn nhw ffonio'r salon."

I'r rhai sydd ddim yn medru mynd i'r ysgol yr wythnos yma, dyma amserlen y gwersi ar y BBC....

Mae siopau trin gwallt a barbwyr yn ailagor o heddiw ymlaen ar ôl bod ar gau am fisoedd yn sgil y pandemig coronafeirws.

Ond rhaid i'r cwsmeriaid wneud apwyntiad cyn dod i gael eu gwallt wedi torri ac fe fydd mesurau glendid a diogelwch yn eu lle.

Yn ogystal mae trinwyr gwallt symudol hefyd yn gallu dechrau gweithio o hyn ymlaen.

Ffynhonnell y llun, gett