Crynodeb

  • Gosod cyfyngiadau lleol mewn grym ym Mlaenau Gwent, Casnewydd, Merthyr Tudful a Phen-y-bont ar Ogwr

  • Y Gweinidog Iechyd Vaughan Gething fu'n cynnal cynhadledd Llywodraeth Cymru

  • Gwyddonwyr Llywodraeth y DU yn rhybuddio y gallwn weld 50,000 o achosion y dydd erbyn canol Hydref

Y diweddaraf yn fyw

  1. Brechlyn i rai erbyn diwedd y flwyddyn?

    Llywodraeth y DU

    Dywedodd Syr Patrick Vallance yn ystod y gynhadledd yn Lloegr fod y gwaith o ddod o hyd i frechlyn yn mynd yn dda.

    Ychwanegodd fod y "DU mewn safle da" a'i bod yn bosib y byddai brechlyn ar gael erbyn diwedd y flwyddyn mewn niferoedd bychain ar gyfer rhai grwpiau.

    "Yn y cyfamser, mae'n rhaid i ni gael rheolaeth ar y sefyllfa," meddai.

  2. '6,000 yn cael eu heintio yn ddyddiol'

    Llywodraeth y DU

    Wrth gyfeirio at ffigyrau gwledydd Prydain dywedodd Syr Patrick Vallance fod yna gynnydd o ran pob oedran.

    Fe gafodd prif ymgynghorydd gwyddonol Llywodraeth San Steffan ei holi a oedd y cynnydd yn adlewyrchiad syml bod yna fwy o brofion yn cael eu cynnal.

    "Na," meddai yn syml, gan ddweud fod ffigyrau'r Swyddfa Ystadegau ac astudiaethau eraill yn dangos hynny.

    "Mae yna amcangyfrif fod tua 70,000 o bobl yn y DU ar hyn o bryd wedi eu heintio, a bod tua 6,000 yn cael eu heintio yn ddyddiol," meddai

    prawfGetty Images

  3. Ail gyfnod clo cenedlaethol 'ddim ar fin digwydd'

    Nid yw cyfnod clo cenedlaethol arall ar hyd Cymru "ar fin digwydd, ond mae o hyd yn bosib," meddai'r Gweinidog Iechyd Vaughan Gething.

    Daw ei sylwadau yn dilyn rhybudd gan Lywodraeth y DU am gyfyngiadau llymach i ddod yn dilyn cynnydd yn nifer yr achosion o Covid-19 ym mhedair cenedl y DU.

    Mae dwy sir yng Nghymru - Caerffili a Rhondda Cynon Taf - yn destun cyfyngiadau lleol ar y funud.

    Ychwanegodd Mr Gething y gellid ystyried camau rhanbarthol.

    Wrth siarad ar BBC Radio Wales fore dydd Llun, dywedodd: "Nid ydw i'n credu fod [cyfnod clo cenedlaethol] ar fin digwydd, ond mae o hyd yn bosib."

    Mae rhagor ar y stori yma ar ein hafan.

    CaerffiliGetty Images

  4. Lleiafrif o'r boblogaeth â gwrthgyrff

    Llywodraeth y DU

    Yn ôl Syr Patrick Vallance - prif ymgynghorydd meddygol Lloegr - mae tua thair miliwn o bobl ym Mhrydain - neu 8% o'r boblogaeth - â gwrthgyrff i'r haint, sy'n golygu bod y mwyafrif helaeth ohonom heb amddiffyniad i'r feirws.

    Pe bai rhywun â gwrthgyrff, mae'n awgrymu eu bod eisoes wedi cael y feirws.

    Mae nifer y bobl sydd â gwrthgyrff ychydig yn uwch yn y dinasoedd mawrion - a gall fod mor uchel â 17% yn Llundain.

  5. Coronafeirws yn 'broblem am chwe mis arall'

    Llywodraeth y DU

    Dywedodd yr Athro Chris Whitty wrth y gynhadledd deledu y bydd coronafeirws yn "broblem am chwe mis arall".

    "Mae'r tymhorau yn ein herbyn ni. Rydyn ni nawr yn mynd i'r tymhorau y mae feirysau resbiradol yn ffynnu ynddynt," meddai Prif Swyddog Meddygol Lloegr.

    Ychwanegodd ei bod yn debygol y bydd coronafeirws yn fwy o broblem yn yr hydref a'r gaeaf.

    "Mae'r cyfnod nesaf yma o chwe mis yn un sydd angen ei gymryd o ddifrif," meddai.

  6. Cadarnhau achos o Covid-19 yn Ysgol Aberconwy

    Cyngor Sir Conwy

    Mae achos o Covid-19 wedi cael ei gadarnhau yn chweched dosbarth Ysgol Aberconwy yng Nghonwy.

    Dywedodd datganiad ar wefan yr ysgol ddoe bod yr ysgol wedi gwneud cais i bob disgybl chweched dosbarth hunan-ynysu a pharhau gyda'u haddysg o adref.

    Bydd pob blwyddyn arall yn parhau i fynychu'r ysgol.

    Dywedodd y pennaeth, Ian Gerrard: "Mae'r mesurau rydyn ni wedi'u rhoi mewn lle yn golygu bod grwpiau yn cael eu cadw ar wahân, a bod unrhyw ardaloedd sydd wedi'u heffeithio ar y safle yn cael eu glanhau yn drwyadl."

  7. 'Cyfle olaf' i osgoi cyfyngiadau ym Mhen-y-bont

    Cyngor Pen-y-bont ar Ogwr

    Mae arweinydd Cyngor Pen-y-bont ar Ogwr wedi rhybuddio trigolion eu bod yn wynebu eu "cyfle olaf" er mwyn osgoi cyfyngiadau llymach yn y sir er mwyn atal lledaeniad Covid-19.

    Dywedodd y Cynghorydd Huw David bod achosion wedi cynyddu'n sydyn dros yr wythnos ddiwethaf, a hynny "heb unrhyw ffynonellau amlwg allai egluro pam fod hyn wedi digwydd".

    "Mewn ardaloedd ble mae cyfnod clo lleol eisoes mewn lle fel Caerffili a Rhondda Cynon Taf roedd mwyafrif yr achosion yn gallu cael eu cysylltu â digwyddiadau penodol, ond nid hynny sy'n digwydd yn Sir Pen-y-bont ar Ogwr," meddai.

    "Mae'r cynnydd sydyn mewn achosion positif yn bryder enfawr.

    "Mae'r data yn cael ei ystyried yn ofalus iawn, a dylai pobl ddeall ei bod yn bosib iawn y bydd angen gweithredu pellach ym Mhen-y-bont i gadw pobl yn ddiogel a dadwneud y cynnydd mewn achosion."

  8. 'Y DU yn mynd i'r cyfeiriad anghywir'

    Mae Prif Swyddog Meddygol Lloegr ar fin dechrau ei ddatganiad teledu, a ddaw yn sgil cyfarfod â Phrif Weinidog y DU Boris Johnson a gweinidogion eraill ddoe.

    Bydd yr Athro Chris Whitty yn dweud bod "y duedd yn y DU yn mynd i'r cyfeiriad anghywir, ac rydyn ni ar bwynt allweddol yn y pandemig".

    Ddoe cafodd 3,899 o achosion eu cofnodi yn y DU - 199 o'r rheiny yng Nghymru.

    Mae adroddiadau bod Mr Johnson yn ystyried cyfnod clo o bythefnos yn Lloegr er mwyn ceisio rheoli'r cynnydd mewn achosion.

    WhittyPA Media

  9. Croeso i'r llif byw

    Bore da a chroeso i'n llif byw ar ddydd Llun, 21 Medi.

    Byddwn yn dod â'r diweddaraf o gynhadledd Prif Swyddog Meddygol Lloegr, Chris Whitty i chi o 11:00, ac yna bydd y Gweinidog Iechyd Vaughan Gething yn annerch cynhadledd Llywodraeth Cymru o 12:30.

    Arhoswch gyda ni am y diweddaraf.