Dyna'r cyfan gan ein tîm ar y llif byw am heddiw.

Mae crynodeb o'r hyn a gyhoeddwyd yn y gynhadledd ar gael yn yr erthygl ar ein hafan.

Bydd y llif byw yn dychwelyd yr wythnos nesaf, ond yn y cyfamser, diolch am ddilyn ac arhoswch yn ddiogel.

Mae prif weithredwr clwb rygbi Gleision Caerdydd wedi galw ar Lywodraeth Cymru i ailystyried maint y cymorth ariannol mae'n ei gynnig yn ystod y pandemig.

Fe ddefnyddiodd Richard Holland yr enghraifft o £20m o fenthyciadau a grantiau sydd ar gael i brif glybiau rygbi'r Alban, tra bydd clybiau haen uchaf y gamp yn Lloegr yn derbyn £44m, yn bennaf ar ffurf benthyciadau.

"Mae nawr yn frwydr i oroesi," meddai Holland mewn datganiad.

Mae gan Lywodraeth Cymru gronfa adfer chwaraeon a hamdden gwerth £14m, ond nid yw'n cynnwys benthyciadau i'w talu'n ôl.

Ond mae cybiau rhanbarthol y Gleision, y Gweilch, y Scarlets a'r Dreigiau wedi manteisio ar fenthyciadau gwerth £20m oedd wedi eu trefnu gan Undeb Rygbi Cymru.

Ffynhonnell y llun, Huw Evans Picture Agency

Iechyd Cyhoeddus Cymru

Mae Iechyd Cyhoeddus Cymru wedi cyhoeddi bod 29 o farwolaethau Covid-19 wedi cael eu cofnodi yng Nghymru dros y 24 awr ddiwethaf.

Cafodd 2,234 o achosion positif newydd eu cadarnhau dros yr un cyfnod.

O'r achosion newydd, roedd 254 yng Nghaerdydd, 243 yn Abertawe, 219 yng Nghaerffili a 218 yn Rhondda Cynon Taf.

Cafodd llai na 10 achos eu cofnodi mewn tair sir - Conwy, Gwynedd ac Ynys Môn.

Fe gafodd 17,313 o brofion eu prosesu yng Nghymru ddydd Iau.

Mae 98,232 o bobl wedi derbyn prawf positif am Covid-19 yng Nghymru ers dechrau'r pandemig bellach, a 2,818 o'r rheiny wedi marw.

Swyddfa Ystadegau Gwladol

Ffynhonnell y llun, Getty Images

Mae cyfran y bobl sy'n profi'n bositif wedi cynyddu yn ystod yr wythnosau diwethaf yng Nghymru, yn ôl amcangyfrif arolwg heintiau diweddaraf y Swyddfa Ystadegau Gwladol.

Cafodd profion swab gwddf a thrwyn eu cymryd ar hap gan fwy na 19,400 o bobl yng Nghymru dros chwe wythnos.

O edrych ar y canlyniadau, mae yna amcangyfrif bod gan 25,600 o bobl yng Nghymru Covid-19 yn yr wythnos hyd at 4 Rhagfyr - sydd 7,500 yn fwy na'r wythnos flaenorol.

Mae hynny'n un o bob 120 o bobl, neu 0.84% ​​o'r boblogaeth.

Dywedodd y Swyddfa Ystadegau: "Mae ein modelu yn awgrymu bod canran y rhai sy'n profi'n bositif wedi cynyddu yn ystod yr wythnosau diwethaf yng Nghymru."

Daeth yr arolwg o hyd i gyfanswm o 142 o brofion positif, mewn 122 o bobl o 99 o aelwydydd dros chwe wythnos.

Mae'r cyfraddau'n parhau i fod ar eu huchaf ymhlith plant oed ysgol uwchradd.

Bwrdd Iechyd Prifysgol Betsi Cadwaladr

Bydd y ganolfan brofi symudol sydd wedi bod yn Nolgellau dros yr wythnosau diwethaf yn symud i Dywyn ar ddydd Mercher, 16 Rhagfyr.

Yn ôl Bwrdd Iechyd Betsi Cadwaladr, bwriad y ganolfan ydy "sicrhau fod trigolion ardal Meirionnydd y sir yn cael mynediad at brawf Covid-19 mor agos â phosib i gartref".

Bydd y ganolfan yn Nolgellau yn parhau ar agor tan ddydd Mawrth, 15 Rhagfyr. Bydd y cyfleuster profi wedi'i leoli ym maes parcio Rheilffordd Talyllyn ar Ffordd Cambrian yn Nhywyn, a bydd yn weithredol am bythefnos.

Yn ôl y bwrdd iechyd mae cynlluniau ar waith i symud yr uned symudol i leoliadau eraill yn ardal Meirionnydd hefyd "i helpu i sicrhau bod mynediad at brofion ar gael cyn agosed i gartref â phosibl".

Cyngor Caerdydd

Llywodraeth Cymru

Dywedodd Mark Drakeford wrth y gynhadledd ei fod wedi newid ei gynlluniau ar gyfer y Nadolig, a'i fod bellach yn bwriadu aros yng Nghaerdydd.

Roedd wedi dweud yn flaenorol ei fod yn bwriadu mynd i weld teulu dros yr ŵyl, ond dywedodd heddiw nad yw'n bwriadu teithio a'i fod yn ceisio cael cyswllt gyda llai o bobl dros y Nadolig.

"Fe fydda i yn aros yng Nghaerdydd, yn cyfyngu ar y bobl rwyn eu gweld," meddai'r Prif Weinidog.

Plaid Cymru

Dywedodd llefarydd iechyd Plaid Cymru, Rhun ap Iorwerth: “Nid oes ond rhaid i chi edrych ar y llwybr yr ydym arni i weld os na fydd pethau'n gwella, mae'n debygol iawn y bydd angen cyfyngiadau llymach.

“Mae gen i ddiddordeb gwirioneddol yn y syniad serch hynny o weithredu mewn ffordd ranbarthol sensitif; Rwy'n credu bod hynny'n rhywbeth y mae llawer o bobl yn meddwl sy'n rhesymol."

Dywedodd fod gan ei etholaeth ei hun - Ynys Môn - niferoedd achosion isel ar hyn o bryd, ond ei fod wedi gweld niferoedd uwch yn gynharach yn y flwyddyn.

Ychwanegodd: “Y broblem gyda system gwbl genedlaethol yw eich bod efallai’n ceisio cydbwyso’r hyn sy’n effeithiol mewn meysydd sydd â lefelau uchel gyda’r hyn sy’n dderbyniol mewn ardaloedd lle mae'r niferoedd yn isel iawn.”

Llywodraeth Cymru

Cadarnhaodd y Prif Weinidog bod y mesurau newydd yn golygu y gall lefelau gwahanol fod mewn grym mewn rhannau gwahanol o Gymru yn y dyfodol, ac na fyddai cyfyngiad o ran amser ar unrhyw gyfnod clo arall yn y dyfodol.

Dywedodd Mark Drakeford y byddai cyfyngiadau yn cael eu hadolygu yn gyson yn hytrach na gosod dyddiad am pryd fyddai'n dod i ben.

Eglurodd na fyddai cyfnodau clo yn y dyfodol yn debyg i'r "clo tân" ym mis Tachwedd oherwydd hynny.

Ychwanegodd mai'r bwriad gyda'r lefelau newydd ydy bod yn fwy eglur am ba gyfyngiadau sydd eu hangen.

Llywodraeth Cymru

Dywedodd Mark Drakeford bod Llywodraeth Cymru wedi sylweddoli'n gynyddol ar "sibrydion a newyddion ffug" am ba fesurau Covid-19 fydd yn dod i rym.

Ychwanegodd ei fod eisiau cadarnhau na fydd unrhyw gyfyngiadau ar bobl yn gadael eu cartrefi gyda'r nos, ac nad oes bwriad i wahardd gwerthiant alcohol yn llwyr.

"Fe fyddwch chi wastad yn clywed am newidiadau yn uniongyrchol gennyf fi a fy ngweinidogion, ac fe fyddwn ni wastad yn egluro pam fod yn rhaid gwneud unrhyw newidiadau," meddai.

Llywodraeth Cymru

Dywedodd y Prif Weinidog ei bod wastad yn anodd canfod y cydbwysedd cywir o ran cyfyngiadau.

"Fe wnes i gynnal y gynhadledd yma ddwywaith yr wythnos ddiwethaf a'r cwestiwn i mi dro ar ôl tro oedd 'ydyn ni'n gwneud gormod?'," meddai Mark Drakeford.

"Yr wythnos yma y cwestiwn ydy 'a ydyn ni'n mynd yn ddigon pell?'

Ychwanegodd ei fod yn credu bod y mesurau a gyhoeddwyd dros y pythefnos diwethaf yn ddigon i gael effaith ar lefelau'r feirws, ond bod angen rhoi amser i hynny gael effaith.

Llywodraeth Cymru

Ffynhonnell y llun, Llywodraeth Cymru

Mae'r Prif Weinidog Mark Drakeford wedi disgrifio'r sefyllfa coronafeirws yng Nghymru fel un "ddifrifol iawn".

Dywedodd Mr Drakeford fod y cyfnod clo ym mis Tachwedd wedi llwyddo i ostwng cyfraddau Covid-19 ond bod y rhain bellach wedi codi “yn gyflymach nag y mae ein modelau wedi rhagweld”, gan ychwanegu ei fod “wedi ei wreiddio’n gadarn mewn cymaint o rannau o Gymru”.

"Mewn rhai rhannau o Gymru, fel Castell-nedd Port Talbot, Blaenau Gwent a Rhondda Cynon Taf, mae'r cyfraddau bellach yn anhygoel o uchel," meddai Mr Drakeford wrth y gynhadledd i'r wasg yng Nghaerdydd.

"Mae'r lefelau uchel iawn hyn o coronafeirws yn trosi'n anochel i bwysau sylweddol a pharhaus ar ein GIG.

"Yr wythnos hon pasiodd nifer y cleifion sy'n gysylltiedig â coronafeirws yn yr ysbyty 1,900 am y tro cyntaf ac mae'n parhau i gynyddu.

"Os bydd y cynnydd hwn yn parhau ar y gyfradd hon, gallem weld 2,500 o bobl â coronafeirws yn yr ysbyty erbyn Dydd Nadolig."

Llywodraeth Cymru

Bydd cynllun newydd ar safbwynt Llywodraeth Cymru ar unrhyw gyfnodau clo pellach yn cael ei gyhoeddi ddydd Llun, a'n destun dadl yn y Senedd ddydd Mawrth, meddai Mark Drakeford.

Dywedodd y byddai Lefel 4 "gam yn uwch" na'r safle presennol, gan ychwanegu y byddai'n golygu "mwy o gyfyngiadau ar y rhyddid ry'n ni'n gallu eu cynnig i bobl os na allwn ddod â'r niferoedd yn is na'r hyn ydyn nhw heddiw".

Ychwanegodd ei bod yn bosib yn y dyfodol y byddai cyfyngiadau gwahanol mewn gwahanol rannau o Gymru.

Ond dywedodd ar hyn o bryd bod achosion o'r feirws yn cynyddu ym mhobman.

Llywodraeth Cymru

Mae'r graff yma a ddefnyddiodd Mark Drakeford yn y gynhadledd yn dangos y gyfradd Covid-19 mewn gwahanol siroedd, gyda bron pob un ar gynnydd dros yr wythnosau diwethaf.

Ffynhonnell y llun, Iechyd Cyhoeddus Cymru

Llywodraeth Cymru

Bydd cyfnod clo arall ar ôl y Nadolig os nad ydy nifer yr achosion Covid-19 yn gostwng, meddai'r Prif Weinidog.

Bydd rhai rheolau'n cael eu llacio rhwng 23 a 27 Rhagfyr, ond gyda 1,900 o gleifion Covid yn ysbytai Cymru, mae pwysau i roi rheolau llymach mewn grym wedi hynny.

Dywedodd Mark Drakeford nad yw hi'n bendant y bydd angen cyfnod clo arall, ond na fydd y gwasanaeth iechyd yn gallu ymdopi os ydy'r lefelau yn parhau i gynyddu.

Bydd cyhoeddiad hefyd heddiw bod yn rhaid i atyniadau yn yr awyr agored gau.

"Mae'n rhaid i mi fod yn glir - os nad yw'r mesurau a gyflwynwyd yr wythnos ddiwethaf a'r wythnos yma, ac ymdrechion pob un ohonom yn ddigon i droi'r llanw ar y feirws, yna bydd hi'n anochel y bydd angen i ni symud i lefel 4 ar ôl y Nadolig."

Lefel 4 ydy'r lefel uchaf o gyfyngiadau o dan system Llywodraeth Cymru.

Llywodraeth Cymru

Mae galwad am eglurder gan Lywodraeth Cymru yn sgil adroddiadau yn y wasg bod cyfyngiadau Covid llym yn cael eu hystyried o 28 Rhagfyr.

Mae gorsaf radio LBC yn dyfynnu ffynhonnell wrth ddweud bod cyfnod clo arall yn cael ei ystyried ar ôl y Nadolig.

Dywedodd y Ceidwadwr Andrew RT Davies bod angen i'r prif weinidog wneud "datganiad brys" ar y mater.

Ar y Post Cyntaf heddiw dywedodd Arweinydd Plaid Cymru, Adam Price, bod "gwneud dim, ddim yn opsiwn", gan alw am "ddatganiad clir a chynhwysfawr" gan y llywodraeth.

Yn ôl Llywodraeth Cymru mae gweinidogion yn adolygu'r cyfyngiadau yn gyson, gan gynnwys edrych ar fesurau pellach.

Llywodraeth Cymru

Mae pandemig Covid-19 wedi dangos bod 'na fwy o angen nag erioed am ysgol feddygol lawn yn y gogledd, yn ôl un meddyg teulu.

Tra bod nifer cyfyngedig yn gallu astudio rhan o'u cwrs meddygaeth ym Mhrifysgol Bangor drwy gynllun â Phrifysgol Caerdydd, does dim modd gwneud y cwrs cyfan yno.

Yn ôl Dr Esyllt Llwyd o feddygfeydd Waunfawr a Llanrug mae'r pandemig wedi golygu bod 'na "bwysau mawr" ar y sector, a byddai'r drefn wedi bod yn "fwy effeithiol" pe bai mwy o feddygon.

Dywedodd Llywodraeth Cymru ei bod yn ystyried achos busnes dros sefydlu ysgol feddygol lawn, a bod niferoedd recriwtio yn cynyddu.

Mae rhagor ar y stori hon ar ein hafan.