Crynodeb

  • Perfformiad da gan Lafur wrth iddyn nhw ennill 30 sedd yn etholiad Senedd 2021

  • Y Ceidwadwyr a Phlaid Cymru'n ennill pedair sedd ranbarthol yr un fore Sadwrn

  • Cyfanswm terfynol o 16 i'r Ceidwadwyr - yr uchaf erioed iddyn nhw yn y Senedd - gyda Phlaid Cymru ar 13

  • Y Ceidwadwyr yn cipio Dyffryn Clwyd oddi ar y Blaid Lafur a Brycheiniog a Sir Faesyfed gan y Dem Rhydd

  • Jane Dodds ar ran y Democratiaid Rhyddfrydol yn cipio sedd ranbarth

Y diweddaraf yn fyw

  1. Dadansoddiad o'r etholiad hyd yma... Ceidwadwyr a'r Dem.Rhydd.

    Teleri Glyn Jones
    Gohebydd Gwleidyddol BBC Cymru

    Methodd y Ceidwadwyr a efelychu'r enillion mawr gan eu plaid yn Lloegr. Arwydd arall ein bod ni wedi gweld etholiad Cymreig - hynny ydy etholiad sydd ddim yn adlewyrchu'r cyd-destyn gwleidyddol Prydeinig. Mi fydd y Ceidwadwyr yma'n siomedig na lwyddon nhw i greu mwy o argraff. Eu strategaeth oedd perswdaio tri chwarter o'u cefnogwyr mewn etholiad cyffredinol i droi fyny i bleidleisio yn yr etholiad yma. Mae'n glir nad ydy hynny wedi gweithio. Er noson drychinebus i'r Democratiaid rhyddfrydol, mi gawn nhw gysur o'r ffaith bod Jane Dodds, yr arweinydd, wedi llwyddo i gael un sedd ar y rhestr yn y canolbarth. Er bod gan y blaid lafur ddigon o seddi i lywodraethu, efallai y bydd Mark Drakeford yn troi ati hi am gefnogaeth i ystwytho'r bum mlynedd nesaf. Wrth i mi sgwennu, mae Jane Dodds dal i ddisgwyl am y friend request ar Facebook.

  2. Dadansoddiad o'r etholiad hyd yma... Plaid Cymru

    Teleri Glyn Jones
    Gohebydd Gwleidyddol BBC Cymru

    Er i Blaid Cymru lwyddo i gryfhau eu gafael ar eu cadarnleoedd, ar y cyfan roedd hi'n ddiwrnod siomedig i Adam Price. Mae colli Rhondda yn ergyd enfawr - roedd Leanne Wood yn cynrychioli gobaith mawr y blaid i gipio seddi oddi wrth y blaid Lafur yn y cymoedd. Yr union seddi sydd angen iddyn nhw ennill os ydyn nhw am lwyddo i gael mwyafrif yn y Senedd. Roedd o'n etholiad anodd i'r blaid, sydd methu cystadlu ag isadeiledd enfawr Llafur a'r Ceidwadwyr. Maen nhw'n medru cystadlu ar lawr gwlad gyda'u byddin o wirfoddolwyr ond roedd cyfyngiadau Covid yn golygu bod dim amser i wneud y gwaith caib a rhaw o gnocio drysau a sgwrsio ar y stepen drws fel maen nhw'n llwyddo i wneud fel arfer. Ond roedd y penderfyniad i fwrw iddi gyda strategaeth arlywyddol, o roi Adam Price ben ben â Mark Drakeford yn gam gwag o ystyried proffil Mark Drakeford.

  3. Dadansoddiad o'r etholiad hyd yma... Llafur

    Teleri Glyn Jones
    Gohebydd Gwleidyddol BBC Cymru

    Etholiad covid oedd hwn- gyda proffil Mark Drakeford yn arwain at ganlyniadau sydd wedi synnu newyddiadurwyr a gwleidyddion. Ar draws Prydain, mae'r pleidiau mewn grym, sydd yn ein harwain trwy'r creisis, wedi cael cefnogaeth gan etholwyr. Does dim dwywaith bod y pandemig wedi rhoi platfform digynsail i'r Prif Weinidog a'i wneud yn ased etholiadol i'r blaid Lafur, ac yn boen yn ystlys y gwrthbleidiau.

  4. Noson chwerw-felys i arweinydd Dem.Rhydd.Cymru

    Er i Ddemocratiaid Rhyddfrydol Cymru golli eu hunig etholaeth - Brycheiniog a Sir Faesyfed - yn y Senedd, fe lwyddon nhw i gipio sedd ranbarthol yng Nghanolbarth a Gorllewin Cymru.

    Eu harweinydd, Jane Dodds, fydd yn llenwi'r sedd.

    Jane Dodds: 'Hapus iawn' i gadw sedd i'r Dem Rhydd

  5. Y map yn gyflawn

    Am tua 23:00 neithiwr fe ddaeth y canlyniad olaf o'r etholaethau - Bro Morgannwg.

    Mae'r map o'r etholaethau felly'n gyflawn - gyda thair sedd wedi newid dwylo yn yr etholiad yma.

    Y rheiny oedd Dyffryn Clwyd a Brycheiniog a Sir Faesyfed yn troi'n las i'r Ceidwadwyr, tra bod Llafur wedi cipio Rhondda gan Blaid Cymru.

    map

  6. Noson siomedig i'r Ceidwadwyr?

    Dros Frecwast
    BBC Radio Cymru

    Er iddyn nhw gipio Dyffryn Clwyd a Brycheiniog a Sir Faesyfed, doedd hi ddim y diwrnod yr oedd y Ceidwadwyr Cymreig wedi gobeithio'i chael. Er bod Glyn Davies yn cydnabod hynny i raddau ar Radio Cymru y bore 'ma, roedd hefyd yn taro nodyn gobeithiol.

    “Roedd e’n teimlo’n dipyn o siom ddoe, dwi‘n gwbod bo ni wedi gwneud yn well na beth ydyn ni wedi dod o’r blaen, ond heddiw dwi ychydig bach yn fwy realistig.

    “Rwy’n credu bod yn ganlyniad da i ni, a dwi’n credu bod mwy o bobl o fewn ein plaid ni yn teimlo fel ‘na hefyd. Ar ôl pob etholiad, dim ond y blaid sydd wedi ennill sydd yn hapus, ond dwi’n credu roedd ddoe yn well na beth oedden ni wedi ei ddisgwyl.

    “Bydd hi’n bwysig i’n plaid ni eistedd i lawr a meddwl beth digwyddodd a beth oedd y rheswm. Ond ‘y ni i gyd yn gwbod, y blaid sydd wedi rhedeg Covid yng Nghymru, Lloegr ac yn yr Alban sydd wedi gwneud yn dda. A ni’n gwbod bod pobl eisiau stability, a mae hynny’n un rheswm.

    "Ond mae ganddon ni fwy o aelodau yn y Senedd nac ydyn ni wedi eu cael erioed, mae ‘na lot o aelodau newydd gyda’r Ceidwadwyr yn y siambr, a dwi’n optimistig. Mae’n base dda i symud ymlaen nawr. “

  7. Un o wynebau newydd y Senedd nesaf....

    Bydd nifer o wynebau newydd yn y Senedd nesaf, ac un ohonyn nhw yw AS newydd Plaid Cymru yng Nghanolbarth a Gorllewin Cymru, sef Cefin Campbell.

    Cefin Campbell: 'Teimlad rhyfedd iawn' dod yn AS o'r diwedd

  8. Gormod o ganolbwyntio ar annibyniaeth?

    Dros Frecwast
    BBC Radio Cymru

    Dyma oedd y cwestiwn i Aelod Seneddol Plaid Cymru dros Geredigion, Ben Lake, ar Dros Frecwast ar Radio Cymru.

    Dywedodd: “Gynta i gyd mae ein pleidlais ni ar draws Cymru wedi bod yn sefydlog... nawr wrth gwrs bydden ni moyn gweld e’n cynyddu ond dyw e ddim wedi mynd nôl yn unrhyw le.

    "Mae hefyd yn wir i ddweud ry'n ni'n gwbod o’r arolygon barn bod dros hanner y pleidleiswyr 2019 o blaid Lafur Cymru yn gefnogol o’r syniad o annibyniaeth yng Nghymru – felly dwi credu bod ni wedi bod yn iawn i ffocysu i demptio nhw draw.

    "Mae’n edrych yn go debygol y bydd na fwyafrif yn yr Alban rhwng y Gwyrddion a’r SNP dros annibynniaeth – felly mae’r cwestiwn cyfansoddiadol ma ….. bosib iawn bydd materion cyfansoddiadol yn domiynyddu gwleidyddiaeth ynysoedd Prydain am flynyddoedd i ddod – ac ar y cwestiwn hynny felly mae’n iawn bod y Blaid gyda safbwynt eitha clir a chadarn ar rhywbeth fydd mor dyngedfennol."

  9. 'Rhy gynnar' i'r Dem.Rhydd. son am gydweithio

    Dros Frecwast
    BBC Radio Cymru

    Wrth siarad ar Dros Frecwast dywedodd arweinydd y Democratiaid Rhyddfrydol yng Nghymru, Jane Dodds ei bod hi’n rhy gynnar i ddweud a fyddai’n fodlon cydweithio gyda llywodraeth Cymru fel y gwnaeth Kirsty Williams yn ei rôl fel gweinidog addysg.

    Dywedodd: “Mae’n rhy gynnar i ddweud. Mae’n rhaid imi siarad hefo pobl eraill yn y blaid a gawn ni weld…mae na ganlyniadau yn dal i ddod.

    "Roedd canlyniadau ddoe yn chwerw felys – colli Brycehiniog a Maesyfed. Mae’n rhaid inni edrych be nath ddigwydd.”

    Ychwanegodd nad oedd unrhyw un o Lafur Cymru wedi cysylltu gyda hi hyd yma.

    jane dodds

  10. Dyma sefyllfa'r pleidiau hyd yma...

    sgorfwrdd

  11. Llafur y blaid fwyaf

    BBC Cymru Fyw

    Bydd y cyfri'n ailddechrau ddydd Sadwrn i gadarnhau canlyniadau olaf etholiad Senedd Cymru, ond mae Llafur eisoes wedi ennill digon o seddi i fod y blaid fwyaf ym Mae Caerdydd.

    Mae Llafur yn annhebygol o ennill rhagor o seddi, ac felly un sedd yn brin o fwyafrif i lywodraethu heb gymorth plaid arall.

    Ond mae sicrhau 30 o seddi'n cyfateb i'w pherfformiad orau erioed ym Mae Caerdydd, a'r un nifer o seddi ag yr enillodd Carwyn Jones yn 2011.

    arweinwyrGetty Images

  12. Bore da... unwaith eto!

    Etholiad 2021

    Croeso i'n llif byw ar ail ddiwrnod y cyfri yn Etholiad Senedd Cymru 2021.

    Fe gafodd 40 aelod etholaeth eu dewis ddydd Gwener, gyda Llafur yn cipio 27 sedd, y Ceidwadwyr 8 a Phlaid Cymru 5.

    Pan ddaeth cyhoeddiadau tair rhanbarth i mewn yn hwyr, roedd Llafur wedi ennill 3 sedd ychwanegol, y Ceidwawyr a Phlaid Cymru'n cipio 4 yr un a'r Democratiaid Rhyddfrydol yn ennill eu sedd gyntaf.

    Mae 8 sedd yn weddill i'w dewis heddiw felly gyda chanlyniadau rhanbarthau Canol De Cymru a Dwyrain De Cymru i ddod rhywbryd cyn cinio gyda lwc!