Fore Gwener dywedodd Mr Drakeford ei fod wedi ystyried llacio pellach ddydd Llun, ond bod ei lywodraeth yn aros am y cyngor diweddara' ynghylch amrywiolyn India o'r feirws.

Mae 26 achos o'r amrywiolyn yng Nghymru yn ôl ffigyrau dydd Gwener, ond dywedodd Mr Drakeford bod cynnydd sylweddol mewn achosion yng ngogledd orllewin Lloegr yn bryder oherwydd yr agosatrwydd at ffin Cymru.

Ychwanegodd y byddai'n oedi camau nesaf y broses o lacio cyfyngiadau "os ydy'r risg o wneud yn rhy fawr".

"Os mai'r cyngor ar amrywiolyn India ydy ei fod yn ddiogel i symud ymlaen, yna ni fydd angen aros tan ddiwedd y tair wythnos i wneud hynny, ond mae'r amrywiolyn yn achos pryder i ni."

Ffynhonnell y llun, Getty Images

Mae disgwyl cadarnhad y bydd Cymru'n defnyddio system oleuadau traffig fel yn Lloegr a'r Alban.

Mae'n golygu y bydd modd teithio i rai gwledydd heb orfod hunan-ynysu pan yn cyrraedd adref.

O 24 Mai, bydd tystysgrif papur ar gael i bobl sydd wedi cael dau ddos o frechlyn ac sydd angen profi hynny wrth deithio.

Ond mae'r llywodraeth yn dweud na fydd yn annog teithio heb ei fod yn angenrheidiol.

Ffynhonnell y llun, Getty Images

Un sydd wedi bod yn aros yn eiddgar i agor y tu mewn yw Rhian Davies, perchennog tafarn y Crown and Sceptre yn Llangatwg.

"Mae agor tu fas wedi bod yn dda - fi wedi cael lot o gefnogaeth y gymuned ond ddydd Llun nesaf bydd dim rhaid i ni edrych ar y tywydd.

"Bydd pawb yn cael croeso mawr - eisoes mae'r lle yn llawn ddydd Llun a'r wythnos hon hefyd fi wedi cael booking am barti Nadolig!

"Mae'r dyfodol yn mynd i fod yn well - mae hi wedi bod yn galed."

Mae disgwyl i Mark Drakeford gyhoeddi hefyd bod Cymru'n symud i Lefel 2 y cynllun rheoli Covid-19 o ddydd Llun.

Mae hynny'n golygu bod busnesau lletygarwch a lleoliadau adloniant dan do yn cael ailagor.

Fe fydd mwy o bobl yn cael mynychu digwyddiadau wedi eu trefnu yn yr awyr agored a dan do.

Ffynhonnell y llun, Getty Images

Mae disgwyl i'r Prif Weinidog Mark Drakeford roi cyngor i bobl beidio teithio dramor am dair wythnos arall oni bai bod rhesymau "hanfodol" - er bod y rheolau yn wahanol yn Lloegr.

Cyngor Llywodraeth y DU ydy bod pobl yn Lloegr yn cael teithio i rai gwledydd tramor o ddydd Llun.

Mae Portiwgal ac Israel ar y rhestr 'werdd' o leoliadau o'r DU, ond mae Llywodraeth Cymru'n dweud y dylid ond teithio dramor am resymau hanfodol o 17 Mai.

Dywedodd Mark Drakeford mai hon yw'r flwyddyn i fanteisio ar y "cyfleoedd ffantastig" am wyliau yng Nghymru.

Mae'n ddiwrnod cyhoeddi canfyddiadau adolygiad diweddaraf Llywodraeth Cymru ar sefyllfa Covid-19.

Dyma'r gynhadledd gyntaf ers yr etholiad wythnos diwethaf ac fe fydd yn cael ei harwain gan y Prif Weinidog, Mark Drakeford, am 12.15.

Bydd y diweddaraf a'r ymateb i hynny i'w weld yma.