Dywed Chris Seager, sy'n berchen ar dri bwyty yn Abertawe a Sir Gaerfyrddin bod pobl yn dechrau canslo byrddau.

"Dyw canslo bwrdd i nifer fach ddim yn broblem ond mae rhai partïon mawr wedi dechrau canslo ac mae hynna'n broblem pan nad oes llawer o rybudd.

"Fe wnaeth un parti o 20 ganslo ddoe - mae'r amrywiolyn newydd yn newid pethau - mae pobl hŷn yn dymuno bod yn fwy gofalus.

"Ni ddim yn anghytuno - ar ddiwedd y dydd mae'n rhaid i bobl wneud be sy'n iawn iddyn nhw.

"Ar hyn o bryd ry'n yn cadw at y canllawiau ac ry'n yn gobeithio na fydd yna fwy o ganllawiau gan bod gallu gwneud elw yn anodd.

"Rwy'n credu bydd hyn yn taro busnesau - yn enwedig lletygarwch."

Ffynhonnell y llun, Getty Images

Ceidwadwyr Cymreig

Cyn y gynhadledd fe ddywedodd y Ceidwadwyr Cymreig eu bod yn dymuno i'r llywodraeth:

• Benodi gweinidog brechu;
• Sicrhau canolfannau 'cerdded i mewn' i gael y brechlyn atgyfnerthu;
• Ailofyn i wirfoddolwyr am gymorth er mwyn sicrhau 'y fyddin frechu'
• Sefydlu canolfannau llawfeddygol rhanbarthol i ostwng rhestrau aros'
• Ymrwymo i gadw ysgolion ar agor;
• Ymrwymo i lacio cyfyngiadau fel cael gwared ar basborts frechu - os nad yw amrywiolyn Omicron yn fwy peryglus na Delta.

Ffynhonnell y llun, PA Media

Llywodraeth Cymru

Dywedodd y prif weinidog ddydd Llun nad oes cynlluniau ar hyn o bryd i gau busnesau - er bod llythyr wedi cael ei anfon i'r Trysorlys yn gofyn am gymorth petai Llywodraeth Cymru yn dewis cymryd mesurau pellach.

"Pwynt y llythyr yw sicrhau na fydd Llywodraeth y DU yn gwneud yr hyn a wnaethant y llynedd," meddai Mark Drakeford.

"Pan ro'n i angen help, fe ddywedodd y Trysorlys 'na dyw hynna ddim yn bosib'.

"Ond bythefnos wedyn pan roedd pethau wedi newid yn Lloegr fe ddywedon nhw 'iawn', doedd hynna ddim yn deg i neb a dyna ddiben y llythyr," ychwanegodd.

Ffynhonnell y llun, Getty Images

Mae'r Cyd-bwyllgor ar Imiwneiddio a Brechu (JCVI) wedi argymell y dylai brechlynnau atgyfnerthu gael eu cynnig i bawb dros 18 er mwyn atal ton newydd o achosion yn sgil Omicron.

Mae argymhellion newydd y JCVI yn nodi hefyd y dylid cwtogi'r bwlch rhwng cael yr ail frechlyn a'r brechlyn atgyfnerthu i dri mis.

Nodwyd yn ogystal y dylai plant oed 12 i 15 gael eu gwahodd am ail ddos dri mis wedi cael y cyntaf.

Dywedodd yr Athro Wei Shen Lim, cadeirydd y JCVI, nad yw'n rhagweld y bydd yr amrywiolyn newydd yn gafael yn y DU ond bod arbenigwyr eisiau bod yn y lle gorau posib petai mwy o achosion.

Mae'r JCVI yn rhoi cyngor i weinidogion ar draws y DU ond gwleidyddion sy'n dewis gweithredu'r argymhellion ai peidio.

Ffynhonnell y llun, Getty Images

Nos Lun fe wnaeth Llywodraeth Cymru ddweud ei bod hi'n ofynnol i bawb wisgo mygydau mewn dosbarthiadau ysgol uwchradd, colegau a phrifysgolion ac ardaloedd cymunedol.

Dywedodd y Gweinidog Addysg, Jeremy Miles: "Mae ymddangosiad yr amrywiad newydd hwn yn ddatblygiad difrifol yn y pandemig parhaus.

"Rydym eisoes wedi cymryd camau cyflym ar deithio rhyngwladol, ochr yn ochr â llywodraethau eraill y DU.

"Rydym nawr yn cyflwyno mesur ychwanegol, tra ein bod ni yn dod i ddeall mwy am y straen newydd hwn.

"Dylai holl staff a dysgwyr yn ein hysgolion uwchradd, colegau a phrifysgolion nawr wisgo gorchuddion wyneb dan do lle nad oes modd cynnal pellter corfforol.

"Mae nifer o leoliadau eisoes yn gweithredu ar y sail hon, wedi llywio gan eu hasesiadau risg, ond bydd hwn nawr yn drefniant cenedlaethol.

"Mesur rhagofalus dros dro yw hwn a fydd ar waith ar gyfer yr wythnosau o'r tymor sy'n weddill ac ar yr adeg honno bydd y sefyllfa'n cael ei hadolygu. Dylai hyn ddod i rym ym mhob lleoliad cyn gynted â phosibl."

Llywodraeth Cymru

Mewn cyfweliad radio dywedodd y Prif Weinidog Mark Drakeford mai nawr yw'r amser i gyflwyno mesurau diogelwch pellach mewn ysgolion.

"Mae yna dair wythnos yn weddill o'r tymor ac mae'n ddyletswydd arnom i gadw'r plant a staff yn ddiogel," meddai.

Dywedodd hefyd bod gweinidogion yn parhau i drafod yr awgrym o gau ysgolion yn gynt dros y Nadolig - mae'r trafodaethau hynny yn cael eu cynnal gydag undebau ac awdurdodau lleol.

Ffynhonnell y llun, PA Media

Llywodraeth Cymru

Mae angen i bobl fod yn ofalus wrth wneud eu cynlluniau Nadolig eleni, medd y Prif Weinidog.

Ychwanegodd: "Rhaid i bobl baratoi at y Nadolig yn y modd ry'n wedi'u cynghori gydol yr amser.

"Fe ddylai'r Nadolig fod yn wahanol eleni. Fe ddylai'r Nadolig fod yn well eleni.

"Ond dyw hynna ddim yn golygu y dylai pobl ddiystyru y pethau syml yna sy'n ein diogelu ni ac eraill.

"Meddyliwch am bobl fregus - os oes pobl yn eich teulu yn debygol o ddioddef o coronafeirws - ystyriwch yn ofalus a ydych yn ymweld â nhw ac yn eu cynnwys yn eich cynlluniau.

"Gwnewch brawf llif unffordd os ydych yn mynd i rywle all fod yn risg i chi ac eraill a gwisgwch fwgwd mewn llefydd poblog cyhoeddus."

Ffynhonnell y llun, Getty Images

Yr wythnos diwethaf dywedodd Dr Eilir Hughes, sy'n feddyg teulu yn Nefyn, y dylai holl ysgolion Cymru gau o leiaf wythnos cyn y Nadolig er mwyn lleihau'r risg fod plant yn heintio perthnasau dros y gwyliau.

Dywedodd y byddai torri'n gynt ar gyfer y gwyliau yn golygu mwy o siawns o ddod i wybod os oedd plentyn wedi dal Covid cyn iddyn nhw gymysgu gyda mwy o bobl.

Ar hyn o bryd mae ysgolion yn 12 o'r 22 sir yng Nghymru - pob un yn y de - yn gorffen tymor yr hydref ar 17 Rhagfyr, tra bod y gweddill yn gorffen ar 21 neu 22 Rhagfyr.

"Y rheswm mwyaf amlwg [dros gau yn gynt] yw ei fod yn helpu i atal 'chwaneg o heintiadau ddigwydd ymysg y plant yn ystod y wythnos olaf sy'n arwain at y Nadolig - llai o gymysgu, llai o heintiadau.

"Mae llawer o bobl yn aros i gael eu hyblyn, sef y brechiad booster, felly byddai dal y feirws dros y Nadolig, o bosib gan blentyn, yn golygu gohirio ei chael hi ymhellach i'r gaeaf," meddai.

Am 12:15 fe fydd y Gweinidog Iechyd, Eluned Morgan, yn rhoi gwybodaeth i'r wasg a'r cyfryngau am sut mae Cymru yn paratoi ar gyfer yr amrywiolyn newydd Omicron.

Yn ymuno â hi fe fydd Dr Gillian Richardson - yr un sy'n gyfrifol am y rhaglen frechu yng Nghymru.

Bydd y wybodaeth ddiweddaraf yma.

Croeso aton ni.

Ffynhonnell y llun, Getty Images