Crynodeb

  • Rhagor o gyfyngiadau i ddod i rym yng Nghymru o 26 Rhagfyr yn sgil amrywiolyn Omicron

  • Gwasanaeth bwrdd yn unig mewn tafarndai a bwytai, a dim ond chwech i gael eistedd gyda'i gilydd

  • Dim cyfyngiad cyfreithiol ar gymysgu rhwng aelwydydd a chwrdd mewn tai pobl eraill

  • Ond cyngor i bobl gyfyngu ar eu cysylltiadau, profi eu hunain yn gyson ac awyru os yn cwrdd dan do

  • Rhaid cadw pellter cymdeithasol o ddau fetr mewn mannau cyhoeddus

Y diweddaraf yn fyw

  1. 'Bydd sefyllfa Omicron ond yn gwaethygu'

    Llywodraeth Cymru

    Gan agor y gynhadledd dywedodd y Prif Weinidog fod y sefyllfa gydag amrywiolyn Omicron yn symud yn gyflym iawn yng Nghymru, a "hyd yn oed ers i mi siarad gyda chi ddydd Gwener, mae nifer yr achosion wedi cynyddu'n sydyn".

    "Rydyn ni'n disgwyl i'r duedd yma barhau a chyflymu. Mae Omicron yma yng Nghymru ac mae'n lledaenu'n sydyn," meddai Mark Drakeford.

    Ychwanegodd mai'r amrywiolyn newydd fydd yr un mwyaf amlwg yng Nghymru cyn hir, fel sydd eisoes yn wir yn Lloegr a'r Alban.

    "Erbyn Gŵyl San Steffan fe fyddwn ni'n gweld nifer o filoedd o achosion newydd ledled Cymru yn ddyddiol," meddai.

    "Mae pobl eisoes i ffwrdd o'r gwaith yn sâl, yn rhoi gwasanaethau allweddol dan straen. Fe fydd y sefyllfa yma yn gwaethygu."

    Dywedodd mai dyma'r rheswm pam fod yn rhaid cyflwyno rhagor o gyfyngiadau wedi'r Nadolig.

  2. Gwyliwch y gynhadledd yn fyw

    Llywodraeth Cymru

    Nid yw’r post yma ar Twitter yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar Twitter.
    Nid yw'r BBC yn gyfrifol am gynnwys safleoedd allanol
    I osgoi neges twitter

    Caniatáu cynnwys Twitter?

    Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter a pholisi preifatrwydd cyn derbyn. Er mwyn gweld y cynnwys dewiswch ‘derbyn a pharhau’.

    Nid yw'r BBC yn gyfrifol am gynnwys safleoedd allanol

  3. Rhagor o gyfyngiadau 'ychydig yn ddigalon'

    BBC Radio Wales

    Roedd rhagor o ymateb i'r cyfyngiadau posib ar Radio Wales y bore 'ma, gyda busnesau yn Llŷn a Rhondda Cynon Taf yn galw am gyhoeddiadau cynt, a ffordd fwy eglur o godi'r cyfyngiadau.

    Heidi Bakewell

    Dywedodd Heidi Bakewell, rheolwr Tafarn a Bwyty Bryncynan ger Nefyn: "Dydyn ni erioed wedi stopio efo'r table service beth bynnag - 'dan ni'n gweld bod ein cwsmeriaid ni yn licio'r profiad hynny, a 'dan ni'n deall bod angen mwy o gyfyngiadau mewn lle.

    "Ond fe fyddai'n haws i ni fel tafarndai pe bai'r canllawiau yn dod allan yn gynt yn hytrach na'n hwyrach fel nad ydyn ni'n gor-archebu a chael amser i argraffu taflenni a ballu efo'r canllawiau newydd arnyn nhw."

    Ychwanegodd Sara Bailey, sy'n rhedeg caffi Hot Gossip yn Nhreorci, ei bod yn "ychydig yn ddigalon meddwl ein bod o bosib am fynd 'nôl i'r rule of six a chyfyngiadau eraill".

    "Mae hi ychydig yn haws ymdopi wedi'r Nadolig ac ym mis Ionawr, ond y broblem yw, pan maen nhw'n cyflwyno'r cyfyngiadau yma, maen nhw'n ymddangos yn gyndyn iawn i'w codi nhw eto, dim ots os ydy'r sefyllfa yn gwella," meddai.

    Sera BaileySera Bailey

  4. Cofnodi tair marwolaeth a 4,662 achos newydd
    Newydd dorri

    Iechyd Cyhoeddus Cymru

    Mae tair marwolaeth bellach yn gysylltiedig â Covid-19 wedi eu cofnodi gan Iechyd Cyhoeddus Cymru heddiw.

    Mae'n golygu bod 6,525 o farwolaethau wedi eu cofnodi ers dechrau'r pandemig.

    Cafodd 4,662 o achosion ychwanegol eu cofnodi hefyd yn y 24 awr hyd at 09:00 fore Mawrth, gan ddod â'r cyfanswm i 566,995 yn ôl dull ICC o gofnodi.

    Mae'r gyfradd saith diwrnod am bob 100,000 o bobl wedi codi yn sylweddol eto, o 575 i 609.7.

    Mae 1,406,629 o bobl bellach wedi cael eu brechlyn atgyfnerthu, o'i gymharu â 2,292,930 sydd wedi cael dau ddos.

  5. Y gynhadledd i ddechrau am 12:15

    Nid yw’r post yma ar Twitter yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar Twitter.
    Nid yw'r BBC yn gyfrifol am gynnwys safleoedd allanol
    I osgoi neges twitter

    Caniatáu cynnwys Twitter?

    Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter a pholisi preifatrwydd cyn derbyn. Er mwyn gweld y cynnwys dewiswch ‘derbyn a pharhau’.

    Nid yw'r BBC yn gyfrifol am gynnwys safleoedd allanol

  6. 'Ni ffaelu 'neud e eto - colli shwd gymaint o arian'

    Dros Frecwast
    BBC Radio Cymru

    Dywedodd dau o berchnogion busnesau ar benrhyn Gwŷr ger Abertawe wrth Dros Frecwast y bore 'ma fod angen cefnogaeth ac eglurder at y dyfodol i fusnesau.

    Dywedodd Debbie Durham o gwmni priodasau Oldwalls, pe bai priodasau yn cael eu cyfyngu i 30 o westeion fel oedd yr achos cyn yr haf, y byddai hynny "mor siomedig".

    Ychwanegodd fod gan y busnes 25 o briodasau wedi'u trefnu dros yr wythnosau nesaf, a bod dros 100 o staff wedi'u cyflogi i weithio arnynt.

    "Ni 'di prynu'r bwyd, ni 'di paratoi popeth yn barod, a byddai'n shwd gymaint o arian i ni golli eto fel cwmni," meddai.

    "Ni ffaelu 'neud e eto - colli shwd gymaint o arian."

    Ychwanegodd ei bod yn deall yr angen am ragor o gyfyngiadau, ond fod angen rhagor o gymorth ar y busnesau hynny sy'n cael eu heffeithio.

    Hywel GriffithS4C

    Dywedodd Hywel Griffith o fwyty The Beach House eu bod eisoes wedi cael pobl yn canslo oherwydd eu bod yn gorfod ynysu, ond hefyd oherwydd pryder am unrhyw reolau newydd.

    "Yr ansicrwydd ydy'r peth mwyaf i ni - iawn, ella ein bod ni'n mynd i lefel 2 rŵan, ond be sy'n digwydd yn Ionawr?" meddai ar Dros Frecwast.

    "Mae o'n amser cymhleth tu hwnt."

  7. Galw am ragor o gymorth i fusnesau

    Mae busnesau lletygarwch wedi bod yn gofyn am fwy o gefnogaeth ariannol gan y llywodraeth ers i fusnes arafu dros yr wythnosau diwethaf.

    Yn ôl David Chapman, cyfarwyddwr Hospitality UK Cymru, mae angen eglurder ynglŷn ag unrhyw gyfyngiadau a chefnogaeth ariannol, ac mae'n gobeithio y bydd unrhyw gyfyngiadau yn caniatáu busnesau i barhau ar agor.

    "Bydd hi'n dipyn anos gyda mesurau yn eu lle - fe fydd hynny'n achosi colledion hyd yn oed os ydyn nhw'n cael parhau ar agor," meddai.

    Ddoe dywedodd Canghellor y DU y byddai mesurau i gefnogi'r sector lletygarwch yn Lloegr, gan gynnwys grantiau ariannol o hyd at £6,000 i bob busnes cymwys.

    Dywedodd Mr Chapman ei fod yn croesawu'r cyhoeddiad ac er na fyddai'n arbed busnesau, fe fyddai yn sicrhau na fydd rhai yn mynd i'r wal y gaeaf hwn. Fe alwodd am gyhoeddiad tebyg yng Nghymru.

    Busnes ar gauGetty Images

  8. Beth sydd eisoes wedi'i gyhoeddi wedi'r 25ain?

    Mae rhai cyfyngiadau eisoes wedi cael eu cyhoeddi ar gyfer y dyddiau wedi'r Nadolig, gan gynnwys atal cefnogwyr rhag mynd i wylio gemau chwaraeon, ar lefel broffesiynol a chymunedol, o Ŵyl San Steffan ymlaen.

    O 27 Rhagfyr fe fydd clybiau nos Cymru yn gorfod cau a rheolau ymbellhau cymdeithasol o ddwy fetr yn cael eu hailgyflwyno mewn gweithleoedd a siopau.

    Gallai gweithwyr hefyd wynebu £60 o ddirwy os ydyn nhw'n mynd mewn i'r gweithle heb reswm da.

    Clwb nosGetty Images

  9. Beth fydd yn cael ei gyhoeddi heddiw?

    Yn wahanol i'r arfer, dydy Llywodraeth Cymru ddim wedi awgrymu beth fydd y newidiadau fydd yn cael eu cyhoeddi yn y gynhadledd heddiw, ond y disgwyl yw y bydd y Prif Weinidog yn cyhoeddi rheolau coronafeirws newydd ar gyfer y cyfnod wedi'r Nadolig.

    Mae wedi dweud na fydd rhagor o gyfyngiadau cyn y Nadolig, ond y disgwyl yw y bydd mwy yn cael eu cyflwyno yn fuan wedi hynny.

    Gallai mesurau newydd gynnwys gwasanaeth bwrdd, ymbellhau cymdeithasol ac uchafswm o chwech yn cael ymgynnull wrth fwrdd mewn bwytai a thafarndai.

    Fe allai cyfyngiadau ar faint sy'n cael cwrdd mewn cartrefi preifat hefyd gael eu cyhoeddi.

    Ond dyw hi ddim yn glir a fydd cymysgu mewn cartrefi preifat yn destun rheolau newydd neu yn gyngor cryf.

    TafarnGetty Images

  10. Croeso i'r llif byw

    Bore da a chroeso i'n llif byw o gynhadledd Llywodraeth Cymru ar 22 Rhagfyr 2021.

    Y Prif Weinidog, Mark Drakeford fydd yn cynnal y gynhadledd - fydd yn dechrau am 12:15 - ble mae disgwyl penderfyniad terfynol ar beth fydd y cyfyngiadau Covid yng Nghymru wedi'r Nadolig.

    Mae Llywodraeth Cymru yn disgwyl y bydd miloedd o achosion o Omicron yng Nghymru erbyn Gŵyl San Steffan, ac yn dweud bod angen mwy o gyfyngiadau er mwyn atal y gwasanaeth iechyd rhag cael ei lethu.

    Does dim disgwyl cyhoeddiad am glo mawr arall fel Nadolig y llynedd, er i nifer yr achosion o Omicron a gadarnhawyd yng Nghymru gynyddu 204 i 640 ddoe.

    Mark DrakefordGetty Images