Llywodraeth Cymru

Dywedodd Mr Drakeford fod Cymru "wedi goroesi'r storm gyda'n gilydd trwy ddilyn y rheolau a'r holl fesurau sydd wedi'n cadw'n ddiogel dros y ddwy flynedd ddiwethaf".

"Yn anffodus dyw'r pandemig yma ddim wedi dod i ben eto. Mae coronafeirws 'da ni o hyd. Ond fe allwn edrych i'r dyfodol gyda gobaith o'r newydd fod dyddiau gwell i ddod," meddai.

Dywedodd y Prif Weinidog ei fod eisiau diolch i bawb am eu hymdrechion dros yr wythnosau diwethaf, yn enwedig y rheiny fu'n rhan o'r rhaglen frechu.

Ychwanegodd nad yw hi "fyth yn rhy hwyr i gael eich brechu yng Nghymru - boed hynny'n ddos cyntaf, ail, neu'n frechlyn atgyfnerthu".

Dywedodd y bydd y Gweinidog Addysg, Jeremy Miles yn cynnal y gynhadledd yr wythnos nesaf i fanylu ar y camau nesaf i ysgolion.

Llywodraeth Cymru

Cadarnhaodd Mark Drakeford fod Cymru'n symud i lefel rhybudd sero ar gyfer holl ddigwyddiadau awyr agored o heddiw ymlaen.

Mae hynny'n cynnwys y bydd torfeydd yn cael dychwelyd i ddigwyddiadau chwaraeon ac ni fydd yn rhaid i letygarwch gadw at reolau fel y rheol chwech o bobl tu fas.

Dywedodd fod £1m wedi'i roi i glybiau chwaraeon gafodd eu taro gan y cyfyngiadau diweddaraf, a bod £2m arall i ddilyn.

Cadarnhaodd y Prif Weinidog hefyd y bydd Cymru'n symud i lefel rhybudd sero ym mhob sefyllfa ddydd Gwener nesaf.

"Bydd y rheolau hunan-ynysu ar gyfer pawb sy'n profi'n bositif am Covid yn parhau mewn lle, a'r rheolau ar fygydau mewn mannau cyhoeddus dan do," meddai Mr Drakeford.

Fe fydd y rheolau yn cael eu hadolygu nesaf mewn tair wythnos.

Llywodraeth Cymru

"Er ein bod wedi pasio brig y don, mae Iechyd Cyhoeddus Cymru yn parhau i gofnodi nifer o farwolaethau yn sgil yr haint.

"Yr wythnos hon yn unig fe wnaeth 50 o bobl farw oherwydd Covid-19.

"Mae hyn yn rhoi darlun i ni o effaith dynol y pandemig," meddai Mr Drakeford.

Dywedodd bod llawer o siarad yr wythnos hon wedi bod am "fyw gyda'r feirws".

"Ond rhaid cofio bod y 50 yma a mwy na 9,000 o deuluoedd eraill ar draws Cymru wedi colli un annwyl.

"Iddyn nhw dyw'r llwybr ymlaen ddim yn un hawdd.

"Yma yng Nghymru wnawn ni ddim anghofio yr hyn sydd wedi digwydd iddyn nhw."

Llywodraeth Cymru

"Mae yna rywfaint o newyddion da am effaith omicron ar y gwasanaeth iechyd hefyd," meddai'r Prif Weinidog.

Dywed bod llai o bobl angen triniaeth ysbyty yn sgil Covid-19 a bod llai o gleifion yn gyffredinol gyda'r haint ond mae'n rhybuddio bod pwysau o hyd ar y GIG.

"Mae dros 1,000 o bobl yn yr ysbyty gyda Covid-19 ac er bod cyfraddau absenoldeb staff ac hunan-ynysu wedi gostwng mae nhw yn parhau i fod yn uchel ar 7.3%," ychwanegodd.

Llywodraeth Cymru

Ychwanegodd y Prif Weinidog fod angen cymryd gofal gyda ffigyrau Iechyd Cyhoeddus Cymru gan eu bod yn dangos profion PCR positif yn unig, ond fod ffigyrau'r Swyddfa Ystadegau Gwladol hefyd yn dangos yr un duedd.

Yn ôl y Swyddfa Ystadegau roedd cyfraddau'n gostwng yng Nghymru, Lloegr a'r Alban yn yr wythnos hyd at 15 Ionawr, a Chymru oedd â'r gyfradd isaf o wledydd y DU.

Yr amcangyfrif oedd bod tua un ym mhob 25 person yng Nghymru â Covid-19 yr wythnos honno.

"Rydych chi'n gweld yn amlwg y bwlch rhwng Cymru a'r Alban - ble roedd lefelau diogelu uwch - a Lloegr," meddai.

Llywodraeth Cymru

Wrth agor y gynhadledd dywedodd y Prif Weinidog, Mark Drakeford, ei fod yn hyderus fod brig ton Omicron wedi pasio a hynny wedi i ni weld cyfraddau uchel iawn o'r haint yng Nghymru.

"Ymdrechion pawb a llwyddiant y rhaglen frechu sy'n gyfrifol am hynny," meddai.

Yn fuan wedi'r Nadolig ac yn nechrau Ionawr roedd nifer yr achosion fesul 100,000 o bobl yn 2,300.

500 yw'r nifer bellach.

"Mae'r lefelau yma yn debyg i'r rhai a welwyd cyn i Omicron gyrraedd Cymru.

"Ond rhaid cofio bod lefelau uchel o'r haint yn parhau yn ein cymunedau," ychwanegodd.

Llywodraeth Cymru

Dros Frecwast
BBC Radio Cymru

Wrth siarad ar Dros Frecwast fore Gwener, dywedodd Ruth Crump o Glwb Pêl-droed Y Bala y bydd hi'n braf bod nôl ddydd Sadwrn.

"'Dan ni wrth ein boddau wedi mis ansicr - doedden ni ddim yn gwybod pryd y caem ni fynd yn ôl ac yn meddwl sut oedd chwaraewyr yn mynd i allu cadw'n heini," meddai.

"Roedden yn parchu y penderfyniad, wrth gwrs, ond ddim yn deall pam fod pobl yn gallu mynd i dafarn a methu cerdded mewn i Faes Tegid - lle dwi'n gweld yn saffach."

Ar ran Clwb Rygbi Aberystwyth dywedodd Wyn Morgan eu bod nhw yn "edrych ymlaen yn fawr i groesawu Bethesda yfory ac yn disgwyl torf sylweddol".

Ffynhonnell y llun, Clwb Pêl-droed Y Bala

Mae cyfradd achosion Covid yng Nghymru wedi gostwng 66% mewn wythnos gyda'r nifer bellach yn 500.8 achos ym mhob 100,000 o bobl - yr isaf ers 9 Rhagfyr.

Mae nifer y cleifion mewn ysbytai sydd â Covid yn parhau i fod yn 757 - 11% yn is na'r wythnos ddiwethaf ac mae 25 o bobl angen gofal dwys - y niferoedd isaf ers 11 Awst.

Mae'r Ceidwadwyr Cymreig wedi galw ar y Llywodraeth i osod dyddiad pendant ar gyfer codi pob cyfyngiad - gan gynnwys gwisgo gorchuddion wyneb a hunan-ynysu.

Ffynhonnell y llun, PA Media

Llywodraeth Cymru

"Dwi ddim yn credu bod amheuaeth fod Llywodraeth y DU wedi rhoi'r gorau i ddilyn y wyddoniaeth ers tro," meddai Mr Drakeford wrth ymateb i'r gymhariaeth rhwng mesurau yng Nghymru a Lloegr ar raglen Breakfast y BBC fore heddiw.

"Mae'n lywodraeth sydd mewn trafferthion mawr o'i gwneuthuriad ei hun, a wastad yn chwilio am bennawd fydd yn tynnu sylw o'r llanast y mae ynddo."

Ychwanegodd nad ydy Llywodraeth Cymru "angen creu penawdau i dynnu sylw oddi ar drafferthion fel y mae'r llywodraeth yn Lloegr".

Ffynhonnell y llun, Getty Images

Ddydd Gwener nesaf bydd Cymru yn symud yn llawn i lefel rhybudd sero.

Mae hyn yn golygu'r canlynol:

• Bydd clybiau nos yn ailagor;
• Rhaid i fusnesau, cyflogwyr a sefydliadau eraill barhau i gynnal asesiad risg penodol ar gyfer coronafeirws a chymryd camau rhesymol i leihau'r perygl o'i ledaenu;
• Bydd y gofyniad cyffredinol i gadw pellter cymdeithasol o 2m ym mhob safle sydd ar agor i'r cyhoedd a gweithleoedd yn dod i ben;
• Ni fydd y rheol chwech o bobl mewn grym mwyach ar gyfer ymgynnull mewn safleoedd fel lletygarwch, sinemâu a theatrau;
• Ni fydd angen i safleoedd trwyddedig ddarparu gwasanaeth bwrdd yn unig na chasglu manylion cyswllt;
• Bydd Llywodraeth Cymru yn parhau i gynghori gweithio gartref ond ni fydd hyn yn ofyniad cyfreithiol.

Ffynhonnell y llun, Getty Images

Llywodraeth Cymru

Dywedodd y Prif Weinidog nos Iau: "Mae'r ffigyrau diweddaraf yn dangos ein bod wedi pasio brig y don Omicron.

"Gallwn felly lacio'r mesurau lefel rhybudd dau fel rhan o'n cynllun gofalus a graddol.

"Mae angen gofal o hyd, ond rydym yn parhau i fod yn hyderus bod y sefyllfa iechyd cyhoeddus yn mynd i'r cyfeiriad cywir ac y gallwn, wythnos nesaf, symud yn llawn i lefel rhybudd sero, oni bai bod y sefyllfa'n newid er gwaeth.

"Mae'n bwysig bod pawb yn parhau i ddilyn y rheolau a'r canllawiau i ddiogelu eu hunain a'u hanwyliaid. Mae hyn yn cynnwys manteisio ar y cynnig o bigiad atgyfnerthu os nad ydyn nhw eisoes wedi gwneud hynny."

Ffynhonnell y llun, Getty Images

Bydd y Pàs Covid yn ofynnol o hyd i fynd i ddigwyddiadau mawr awyr agored sydd â mwy na 4,000 o bobl ynddynt os nad yw pobl yn eistedd, neu 10,000 o bobl os ydynt yn eistedd.

Bydd rhaid parhau i ddangos Pàs Covid ym mhob sinema, theatr a neuadd gyngerdd hefyd.

Ffynhonnell y llun, Getty Images

Llywodraeth Cymru

Daeth cadarnhad gan y Prif Weinidog nos Iau y bydd Cymru yn symud yn llawn i lefel rhybudd sero ar 28 Ionawr, oni bai fod y sefyllfa iechyd cyhoeddus yn gwaethygu.

O heddiw ymlaen bydd Cymru yn symud i lefel rhybudd sero ar gyfer pob gweithgaredd awyr agored.

Mae hyn yn golygu'r canlynol:

• Bydd torfeydd yn cael dychwelyd i ddigwyddiadau chwaraeon awyr agored;
• Ni fydd unrhyw gyfyngiadau ar nifer y bobl fydd yn cael cymryd rhan mewn gweithgareddau a digwyddiadau awyr agored;
• Bydd lletygarwch awyr agored yn cael gweithredu heb y mesurau ychwanegol a gyflwynwyd ym mis Rhagfyr, fel y rheol chwech o bobl a chadw pellter cymdeithasol o 2m.

Ffynhonnell y llun, Getty Images

Croeso unwaith eto.

Am 12:15 fe fydd y Prif Weinidog, Mark Drakeford, yn cyhoeddi y diweddaraf ar lacio rheolau coronafeirws yng Nghymru.

Bydd y newyddion diweddaraf ac atebion y Prif Weinidog i gwestiynau'r wasg i'w gweld yma ynghyd â'r ymateb.

Ffynhonnell y llun, Getty Images

Y Gweinidog Economi, Vaughan Gething, yn dweud bod budd wedi dod o gyflwyno'r cyfyngiadau ym mis Rhagfyr.

Nifer y dysgwyr Cymraeg a gweithgareddau dysgu wedi cynyddu yn ystod y pandemig, yn ôl Gweinidog y Gymraeg ac Addysg.

Cyn-ymgynghorydd 'I'm a Celebrity' yn dweud bod trafodaethau ar gynnal y gyfres yng Nghastell Gwrych eto.

Dywed Mark Drakeford mai'r amser anoddaf ar lefel bersonol oedd pan cafodd ei wraig a'i fam yr haint.

Pryderon Band Pres Pontarddulais na fydd hi'n ddiogel cyd-chwarae offerynnau pres rhag lledu'r feirws.