Crynodeb

  • Adolygiad o reolau coronafeirws yng Nghymru - a hynny am y 198fed tro

  • Llywodraeth Cymru yn cyhoeddi y bydd gweddill y rheolau Covid yn dod i ben ar 28 Mawrth

  • Mae hyn yn cynnwys diwedd ar y gofyniad cyfreithiol i wisgo gorchuddion wyneb ac i hunan-ynysu

  • Gweinidogion wedi cyhoeddi hefyd y bydd profi "cyffredinol" yn dod i ben yn raddol o ddiwedd Mawrth

  • Cymru fydd y wlad olaf yn y DU i ddiddymu'r holl gyfyngiadau coronafeirws

  • Nifer y profion PCR positif wedi gostwng bron i 25% yn yr wythnos ddiweddaraf - cyfradd o 158.7 achos ar gyfer pob 100,000 o bobl

Y diweddaraf yn fyw

  1. A fydd cyfyngiadau'n dod i ben i bawb?

    Dros Frecwast
    BBC Radio Cymru

    Mae yna eithriadau wrth gwrs ac wrth gwrs fe fyddwn ni yn fwy gofalus yn y sefyllfaoedd hynny fel ysbytai er enghraifft a chartrefi gofal – fe fydd yna eithriadau ond yn gyffredinol, dyna y sefyllfa fyddwn ni yn symud iddyn nhw. Fe fyddwn ni yn rhoi canllawiau mewn lle i sicrhau bod pobl yn gwybod yn union beth yw'n disgwyliadau ni fel llywodraeth.

    Eluned Morgan, Gweinidog Iechyd Cymru

  2. A fydd profion Covid am ddim yn parhau?

    Dros Frecwast
    BBC Radio Cymru

    Wrth ymateb i'r cwestiwn ar Dros Frecwast, dywedodd y Gweinidog Iechyd, Eluned Morgan:

    "Fe fydd y manylion ar hyn yn cael ei roi gerbron y cyhoedd heddiw gan y prif weinidog ond wrth gwrs fe fyddwn ni mewn sefyllfa lle byddwn ni yn symud i bwynt lle na fydd rheini yn cael eu rhoi.

    "O 28 Mawrth er enghraifft, fydd y profion sydd yn rhad ac am ddim yn y lle gwaith yn cael eu hatal – ond fe fydd y prif weinidog yn rhoi mwy o fanylion heddiw ynglŷn â pryd fydd mesurau eraill a’r profion eraill yn cael eu hatal.

    "Ar gyfer y bobl hynny y rhai mwyaf bregus... y bobl er enghraifft sydd yn immune suppressed mi fydd profion ar gael iddyn nhw wrth gwrs."

    Eluned MorganGetty Images

  3. Dileu cyfyngiadau ar 28 Mawrth

    Fe allai'r cyfyngiadau Covid sy'n parhau mewn grym yng Nghymru gael eu diddymu ar 28 Mawrth.

    Dyma'r tro cyntaf i Lywodraeth Cymru awgrymu dyddiad ynglŷn â phryd y gallai'r cyfreithiau ar wisgo mygydau a hunan-ynysu ddod i ben.

    Mae gweinidogion wedi cyhoeddi hefyd y bydd profi "cyffredinol" yn dod i ben yn raddol o ddiwedd Mawrth.

    Bydd mwy o fanylion yng nghynhadledd newyddion Llywodraeth Cymru am 12:15 heddiw.

    covidbbc

  4. Bore da a chroeso!

    BBC Cymru Fyw

    Croeso i'n llif byw o gynhadledd newyddion Covid-19 Llywodraeth Cymru.

    Dyma'r 198fed tro i'r llywodraeth gynnal cynhadledd gyda'r manylion diweddaraf am y pandemig, ac yn adolygu'r mesurau sydd mewn lle i liniaru'r effeithiau.

    Ond gan fod disgwyl cyhoeddiad y bydd yr holl gyfyngiadau'n dod i ben erbyn diwedd y mis, efallai mai hwn fydd un o'r olaf o'r cynadleddau?

    Arhoswch hefo ni.....