Mae hi wedi bod yn fore prysur yma wrth i filoedd o bobl ifanc drwy Gymru dderbyn canlyniadau hollbwysig - hynny wedi cyfnod anodd iawn ym myd addysg yn sgil y pandemig.

Gallwch ddarllen stori'r bore'n llawn yma.

Diolch am eich cwmni, hwyl i chi!

Fe ddywedodd y Gweinidog Addysg a'r Gymraeg ei fod am longyfarch pobl ifanc Cymru am lwyddo wedi "cyfnod anodd dros y blynyddoedd diwethaf".

"Mae'n garreg filltir bwysig iawn," meddai Jeremy Miles, "yn siarad â rhai o'r dysgwyr heddiw, dw i'n cofio sut beth oedd e i fi!"

Ychwanegodd y gweinidog fod bron i 80% o ddisgyblion y DU wedi cael lle yn eu dewis cyntaf o brifysgol heddiw.

"Nid pawb sy'n cael eu canlyniadau heddiw fydd eisiau mynd i'r brifysgol fel eu cam nesaf - ond i'r rheiny sydd eisiau gwneud, mae'n opsiwn da."

Roedd 'na olwg balch iawn ar wynebau rhai o ddisgyblion Ysgol Garth Olwg heddiw.

Roedd canran y graddau A*‐C ar gyfer y cyrsiau Lefel A yn 82% - ac felly ar ei uchaf ers agor yr ysgol 3‐19 newydd yn 2019.

Ffynhonnell y llun, Ysgol Garth Olwg

Cafwyd 32,960 o geisiadau arholiad Lefel A yng Nghymru eleni - 7.2% yn is na 2022, ond yn gyson gyda 2019.

Mathemateg sy'n parhau i fod y pwnc mwyaf poblogaidd.

Yng Nghymru roedd y gyfradd basio tua'r un peth ar gyfer bechgyn a merched, gyda bechgyn yn sicrhau cyfran ychydig yn uwch o raddau A*.

BBC Radio Cymru

Fe wnaeth disgyblion barhau i dderbyn ychydig o gymorth ychwanegol eleni yn sgil y pandemig - ac un sy'n cefnogi'r penderfyniad hwnnw ydy Laurel Davies, pennaeth Ysgol Ystalyfera Bro Dur.

“Mae’n rhaid i ni gyraedd realiti y system arholiadau lle mae plant yn gorfod mynd trwy’r broses o eistedd arholiadau.

"Ond hefyd maen rhaid i ni sicrhau ein bod ni’n cydnabod yr heriau mae’r bobl ifanc yma wedi wynebu.

"Ac wrth gwrs y peth arall yw, dyma’r rhai cyntaf sydd wedi gorfod eistedd arholiadau fel rhan o arholiadau BTEC. Felly mae hwnna hefyd yn effeithio ar y graddau terfynol.”

Nid prifysgol yw'r unig lwybr posib i'r bobl ifanc sy'n derbyn eu canlyniadau heddiw wrth gwrs - dyma gyngor i'r rheiny sy'n ystyried dilyn prentisiaeth.

I'r rheiny sydd heb cweit gael y canlyniadau roedden nhw wedi ei obeithio amdano, mae dal ffyrdd o sicrhau lle yn y brifysgol gan gynnwys drwy'r system Glirio.

Mae holl brifysgolion Cymru'n cynnig llefydd ar rai cyrsiau drwy'r system honno, ac yn ôl Teleri Lewis, Rheolwr Gweithrediadau'r Adran Farchnata, Prifysgol Aberystwyth, mae 'na dipyn o "fwrlwm" wedi bod eisoes y bore 'ma.

"Yn amlwg mae yna ansicrwydd," meddai. "Maen nhw wedi derbyn eu canlyniadau a falle ddim 'di cael yr hyn ro'n nhw'n gobeithio, ond fi'n teimlo bod nhw'n ymwybodol iawn o'r opsiwn glirio.

"Ni 'di cael pobl yn holi cwestiynau da, maen nhw'n gwybod y wybodaeth ni'n holi amdano, maen nhw wedi paratoi cryn dipyn o flaen llaw.

"Ni yma i gefnogi a chynnig cymaint o gymorth â phosib. Ni hefyd yn cynnig, dros y penwythnos, cyfle i ddod i ymweld â'r brifysgol.

"So mae hynny hefyd yn gyfle bach sbesial ac extra i gadw pawb yn hapus a dangos bod 'na opsiynau arall ar gael, ac i beidio panico."

Llongyfarchiadau mawr i'r disgyblion am ennill y canran mwyaf o raddau A* ac A yn hanes yr ysgol!

Mae’r graddau Cymru-gyfan yn is na llynedd fel rhan o’r siwrne 'nôl at lefelau 2019 - y flwyddyn olaf cyn i Covid darfu ar arholiadau ac addysg pobl ifanc.

Roedd canran y graddau A ac A* yn 34% eleni, o'i gymharu gyda 40.9% yn 2022.

"Rydym yn hynod falch o gyflawniadau ein disgyblion yng nghanlyniadau Safon Uwch ac Uwch Gyfrannol eleni," meddai Rhonwen Morris, Pennaeth Ysgol Bro Preseli.

Ffynhonnell y llun, Ysgol Bro Preseli

Mae'r disgyblion wedi derbyn "canlyniadau canmoladwy ar draws yr ystod o bynciau," meddai.

"Mae eu gwaith caled, eu gwydnwch a'u dyfalbarhad wedi talu ar ei ganfed. Mae'r canlyniadau hyn yn adlewyrchiad o'u hymroddiad a'r arweiniad ragorol a ddarperir gan ein staff addysgu a chymorth."

Llongyfarchiadau mawr!

Ffynhonnell y llun, Ysgol Bro Preseli

Yng Ngholeg Gwent, mae'r staff yn dymuno dathlu llwyddiant y disgyblion wedi cyfnod anodd iawn yn sgil y pandemig.

"Ni mor falch ohonyn nhw gyd," medd Megan Melbourne o adran gofal ac iechyd y coleg.

"Ma' nhw di gweithio'n rili galed ar ôl cael blwyddyn rili anodd. Ni gyd mor browd ohonyn nhw."

Dywedodd Laura Doel, ysgrifennydd cenedlaethol undeb penaethiaid NAHT Cymru, nad oedd hi'n beth doedd gwneud cymariaethau yn dilyn "un o'r cyfnodau mwyaf heriol i addysg".

"I'r mwyafrif helaeth o ddisgyblion Lefel A yn enwedig, dyma'r canlyniadau cyntaf erioed maen nhw wedi ei gael o eistedd arholiadau ffurfiol, ar ôl methu allan ar y profiad TGAU traddodiadol oherwydd y pandemig," meddai.

"Er ein bod ni'n gweld canlyniadau gwahanol eleni, ddylai hyn ddim cymryd i ffwrdd o gwbl o lwyddiannau'r disgyblion, ac mae unrhyw un sy'n meddwl bod cymharu'r data flwyddyn i flwyddyn yn beth defnyddiol angen ailfeddwl.

"Mae'n anghynorthwyol ac yn digalonni'r myfyrwyr hynny, eu hathrawon a'u teuluoedd.

"Mae profiad ysgol y bobl ifanc yma wedi cael ei darfu, ond maen nhw wedi rhagori."

Bydd Megan Evans ac Amelia Asher yn astudio'r gyfraith ac addysg yn y brifddinas ar ôl derbyn eu canlyniadau y bore 'ma...

... tra bod Amy White, 17, am gychwyn prentisiath efo SONY ar ôl derbyn A* a B yng Ngholeg Gwent.

Y gyfradd basio cyffredinol ar gyfer Lefel A oedd 97.5%, gydag 13.5% yn llwyddo i gael gradd A*.

Roedd llai o fesurau mewn lle ers cyfnod Covid i helpu disgyblion eleni, ond cafodd rhywfaint o wybodaeth ei roi iddyn nhw cyn yr arholiadau ac roedd y graddio'n parhau i fod yn fwy hael.

Mae hyn yn wahanol i Loegr, ble maen nhw wedi dychwelyd i'r drefn o raddio disgyblion fel oedden nhw yn 2019.

Dywedodd Cymwysterau Cymru bod y canlyniadau eleni tua hanner ffordd rhwng canlyniadau 2019 a 2022.

Y bwriad yw i ddychwelyd i'r broses cyn y pandemig yn 2024.

Fe fydd Cai yn dilyn cwrs Mathemateg ym Mhrifysgol Aberystwyth, wedi iddo dderbyn D, D, C ac A.

Dyma'r olygfa yn Ysgol Morgan Llwyd yn Wrecsam bore 'ma, gyda disgyblion yn amlwg yn hapus gyda'u canlyniadau!

Bethan Lewis
Gohebydd Addysg BBC Cymru

"Dair blynedd ar ôl i arholiadau gael eu canslo am y tro cyntaf yn sgil Covid-19, mae effaith y pandemig i’w weld o hyd ar drefn canlyniadau Cymru.

"Yn ôl y disgwyl mae’r graddau Cymru-gyfan yn is na llynedd fel rhan o’r siwrne 'nôl at lefelau 2019.

"Ond mae 'na rai mesurau wedi bod mewn lle eleni eto i geisio rhoi rhywfaint o hwb i fyfyrwyr.

"Y polisi yn Lloegr oedd symud 'nôl yn gynt i’r sefyllfa cyn y pandemig.

"Ac mae 'na ddadlau dros beth sydd fwyaf "teg", yn enwedig pan mae’r graddau yma yn gallu dylanwadu ar lefydd prifysgol neu swyddi.

"Y bwriad yw gollwng y mesurau ychwanegol yng Nghymru flwyddyn nesaf, ond mae’r drafodaeth am degwch yn debygol o barhau wrth i’r to nesaf wneud eu arholiadau nhw."

Mae'r graddau uchaf ar gyfer Lefel A yng Nghymru wedi gostwng am yr ail flwyddyn yn olynol, ond mae canlyniadau'n parhau i fod yn uwch na chyn y pandemig.

Roedd canran y graddau A ac A* yn 34% eleni, o'i gymharu gyda 40.9% yn 2022.

Dywedodd Cymwysterau Cymru, sy'n goruchwylio'r arholiadau, fod rhai ffiniau graddau wedi cael eu gosod yn is nag y bydden nhw cyn 2020 er mwyn cydnabod y tarfu fuodd ar ddisgyblion yn ystod Covid.

Cafodd canlyniadau AS, a chymwysterau Lefel 3 galwedigaethol a thechnegol gan gynnwys BTEC, hefyd eu cyhoeddi.

Gallwch ddarllen y cyfan yma.

Ac wrth i'r canlyniadau ddechrau'n cyrraedd, mae newyddion da iawn draw yn Ysgol Ystalyfera, Bro Dur...

Taryn, 18, sydd wedi ennill 2A* ac un A - a lle i astudio Almaeneg a Phortiwgaleg ym Mhrifysgol Rhydychen...

... ac mae Amelia yn edrych 'mlaen yn arw at ddilyn cwrs Addysg Gynradd ym Mhrifysgol Metropolitan Caerdydd, wedi iddi dderbyn A, B, a C!