Iolo Cheung
Gohebydd Cymru Fyw ym Mae Caerdydd

Byswn i'n amcangyfrif bod tua 3-4,000 o bobl y tu allan i'r Senedd yn barod - dydi'r tywydd glawog heb eu cadw nhw i ffwrdd.

Rydan ni wedi siarad efo pobl o bob cwr o Gymru sydd wedi dod yma, a llawer eisiau dangos eu presenoldeb er mwyn pwysleisio i Lywodraeth Cymru gymaint sy'n anhapus gyda'u polisïau amaeth.

Mae 'na lawer o arwyddion efo sloganau fel "Dim ffermwyr, dim bwyd", ac mae 'na ambell un yn fwy uniongyrchol feirniadol o'r Prif Weinidog Mark Drakeford a'i lywodraeth Lafur hefyd.

Mae'r areithiau ar fin dechrau, fydd yn cynnwys cymysgedd o wleidyddion, undebau amaeth, a'r ffermwyr eu hunain.

"Ni'n edrych ar ôl y ffermydd i'r plant iddyn nhw gael ffarmo," meddai Teleri Jenkins, o Abergwaun, sy'n fam i Megan a Hari.

"Mae'r diwydiant ffarmo yn hollol bwysig i bawb sy'n byta ac yfed."

Ychwanegodd ei bod yn anhapus gyda'r pwysau ar amaethwyr i leihau allyriadau carbon.

"Mae ffermwyr yn easy target," meddai.

Heddlu De Cymru

Dywedodd Heddlu'r De eu bod yn gwybod bod bwriad i gynnal protest ym Mae Caerdydd ddydd Mercher ac y gallai hynny gynnwys traffig yn teithio'n araf ar draws ffyrdd y rhanbarth.

Does dim bwriad, medd y llu, i gau ffyrdd ond fe fydd yna gyfyngu ar fynediad i rai ffyrdd o amgylch y Senedd.

Mae'r A48 o Sain Nicolas i gyfeiriad Caerdydd yng Nghroes Cwrlwys yn brysur iawn ar hyn o bryd, meddai Cyngor Caerdydd.

"Ystyriwch ffordd arall," meddai neges ar X, dolen allanol.

Mae rhai o ffyrdd Caerdydd yn edrych yn wahanol iawn heddiw wrth i nifer o ffermwyr deithio i'r brifddinas yn eu tractorau.

Ffynhonnell y llun, Jacob Anthony

Ffynhonnell y llun, Jacob Anthony

Mae Gareth Wyn Jones, un o ffermwyr amlycaf Cymru, wedi beirniadu'r llywodraeth droeon yn y gorffennol.

Yn siarad gyda Cymru Fyw ar risiau'r Senedd heddiw, dywedodd fod rhaid delio gyda phroblem TB, neu'r diciâu.

"Mae o'n lladd ein hanifeiliaid ni, mae o'n lladd ein ffarmwrs ni, ac mae o'n lladd ein busnesau ni," meddai.

"Mae'n amser i ni gal newid yn y deddfa' a polisïa' a symud petha' yn eu blaena'."

"Ni gyd 'ma i ddangos i'r leaders bod ni ddim yn pushover," meddai Reian Jenkins o Ffostrasol, Ceredigion.

Ychwanegodd Rhiannon Phillips o ardal Glynarthen yng Ngheredigion: "Ni eisiau sicrhau dyfodol amaethyddiaeth yng Nghymru.

"Mae TB yn broblem fawr i ni, ni wedi bod yn delio gyda fe ers dros wyth mlynedd.

"Mae dros 20 o wartheg yn mynd gyda ni nawr."

Yn gyson mae Llywodraeth Cymru wedi dweud bod y cynllun ar hyn o bryd mewn cyfnod ymgynghori.

Maen nhw'n dweud eu bod yn gwrando ar ffermwyr ac wedi cydweithio gyda ffermwyr ar y cynllun.

"Rydw i wastad wedi ceisio gwneud yn siŵr ein bod ni'n cyfathrebu â chymaint o ffermwyr â phosib," meddai Lesley Griffiths, y gweinidog sy'n gyfrifol am faterion gwledig yng Nghymru.

"Mae gennym ni dros 24,000 o ffermwyr yma yng Nghymru – alla i ddim siarad â phawb yn unigol," ychwanegodd.

Mae'r ymgynghoriad ar agor tan 7 Mawrth.

Ar draws Ewrop yn ddiweddar mae golygfeydd o ffermwyr yn eu tractors yn protestio wedi hawlio'r penawdau.

O wlad i wlad mae'r rheswm pam fod amaethwyr yn anniddig yn amrywio - ond mae costau cynyddol, rheoliadau llymach a newidiadau polisi yn gwynion cyffredin.

Mae ffermwyr Cymru yn honni bod gwleidyddion ym Mae Caerdydd wedi troi cefn ar gefn gwlad.

Daeth tua 3,000 o ffermwyr a phobl sydd ynghlwm â'r byd amaeth i gyfarfod tanllyd ym mart Caerfyrddin ar 8 Chwefror.

Mae Llywodraeth Cymru yn mynnu bod eu hymrwymiad i'r sector amaeth "ar yr adeg heriol hon yn glir iawn".

Ffynhonnell y llun, Getty Images

"Mwy na'm byd, 'dan ni yma i ddangos i Lywodraeth Cymru bod 'na lais gan bobl cefn gwlad Cymru," meddai Richard Jones o Frynsiencyn ym Môn (chwith yn y llun).

"'Dan ni 'di trio siarad drwy'r undebau, ond 'dan ni rwan yn gorfod dod i galon Llywodraeth Cymru i brofi pwynt, bod y polisi ddim yn mynd i weithio - dydi o ddim yn one-size fits all."

Rheolau plannu coed ydy pryder mwya' William Bown o Lannerchymedd (nesa i Richard), yn enwedig ar dir ffrwythlon Ynys Môn.

"Bysa fo'n golygu 10% o dy dir yn goed, a 10% arall yn habitat," meddai.

"Ti'n colli tir ffarmio, a 'dan ni ddim yn siwr faint o arian gawn ni am blannu coed chwaith."

Steffan Messenger
Gohebydd Amgylchedd BBC Cymru

Mae ffermwyr Cymru yn protestio ers wythnosau bellach, gan honni bod gwleidyddion ym Mae Caerdydd wedi troi cefn ar gefn gwlad.

Mae Llywodraeth Cymru yn mynnu bod eu hymrwymiad i'r sector amaeth "ar yr adeg heriol hon yn glir iawn".

Ond beth yw'r materion sy'n achosi'r drwgdeimlad?

Darllenwch erthygl fer ein gohebydd amgylchedd, Steffan Messenger i wneud synnwyr o'r cyfan.

Diolch am ymuno efo ni ar gyfer digwyddiad a allai fod yn bennod arwyddocaol iawn yn stori'r gwrthdaro parhaus rhwng amaethwyr a Llywodraeth Cymru.

Mae disgwyl i filoedd o bobl fynd i Fae Caerdydd i wrthwynebu newidiadau sylweddol i gymorthdaliadau amaeth, sy'n "anymarferol" ym marn yr undebau.

Dywedodd Heddlu De Cymru eu bod yn helpu hwyluso'r brotest - sydd i fod i ddechrau'n swyddogol am 12:30 y tu allan i adeilad y Senedd - ond maen nhw'n annog pobl i beidio â mynd yno mewn tractorau.

Dywed llywodraeth Lafur Cymru eu bod yn gwrando ar bryderon y sector.

Bydd Cymru Fyw yn dod â'r diweddaraf i chi o Fae Caerdydd am yr oriau nesa felly arhoswch efo ni.