Arestio merch ar ôl i ddau athro a disgybl gael eu trywanu - dilynwch yn fyw
Dau athro a disgybl yn yr ysbyty - yr heddlu'n dweud nad yw eu hanafiadau yn ddifrifol
Bu'n rhaid cloi disgyblion yn eu hystafelloedd dosbarth wedi'r digwyddiad am 11:20 - fe gafon nhw adael am 15:20
Cyllell wedi'i chanfod a bydd yn cael ei defnyddio fel rhan o'r dystiolaeth
Prif Weinidog Cymru, Vaughan Gething a Phrif Weinidog y DU, Rishi Sunak, yn dweud eu bod wedi'u synnu gan y digwyddiad
Yr ysgol yn gweithio gydag asiantaethau i sicrhau cefnogaeth briodol a chyhoeddiad y bydd yr ysgol ar gau ddydd Iau
Cyngor Sir Gaerfyrddin
"Mae aelodau teulu yr holl unigolion a gafodd eu hanafu wedi cael gwybod," meddai llefarydd ar ran Cyngor Sir Gaerfyrddin.
"Rydym am sicrhau rhieni a’r cyhoedd fod y digwyddiad dan reolaeth."
PA Media
Mae asiantaeth newyddion PA yn adrodd fod un o lywodraethwyr yr ysgol wedi cael gwybod mai achos o drywanu oedd y digwyddiad, a bod aelodau o staff wedi'u hanafu.
Mae Prif Weinidog y DU, Rishi Sunak, wedi datgan ei sioc am y newyddion sy’n dod o Rydaman ac wedi diolch i’r gwasanaethau brys.
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
Mae'r gwleidydd Adam Price yn gyn-ddisgybl Ysgol Dyffryn Aman ac yn cynrychioli Rhydaman yn y Senedd.
Dywedodd yn siambr y Senedd ddydd Mercher, yn fuan wedi i'r adroddiadau ddod i'r amlwg, bod "ein meddyliau gyda'r rhai sydd wedi eu heffeithio gan y digwyddiad yma".
Meleri Williams
Gohebydd BBC Cymru
Mae merch Justin Williams yn ddisgybl ym Mlwyddyn 7 yn yr ysgol.
"Halodd hi text i 'weud ma' nhw ar lockdown," meddai.
"Ma' hi’n iawn ond just becso nawr am y bobl sy' 'di cal damwain.
"Ma' hi’n shocking be sy' 'di digwydd.
"Chi byth yn disgwyl rhywbeth fel hyn yn Rhydaman."
Mae gan Ysgol Dyffryn Aman tua 1,500 o ddisgyblion, yn cynnwys y chweched dosbarth.
Mae'n ysgol ddwyieithog wedi ei lleoli yn Rhydaman, Sir Gaerfyrddin, i’r gogledd o Lanelli ac Abertawe.
Yn ôl adroddiad Estyn yn 2019, roedd hanner y disgyblion yn dod o'r dref a'r hanner arall o'r pentrefi a'r ardaloedd gwledig cyfagos.
Mae tua hanner y disgyblion yn siarad Cymraeg.
Andrew RT Davies
Arweinydd y Ceidwadwyr Cymreig
"Mae’r adroddiadau o Ysgol Dyffryn Aman yn rhai pryderus iawn," meddai Andrew RT Davies, arweinydd y Ceidwadwyr Cymreig.
"Fe ddylai ysgolion fod yn lefydd diogel, llefydd i ddysgu a darganfod.
"Mae’n drist ac yn ofidus iawn bod digwyddiad treisgar wedi chwalu’r diogelwch hwnnw i athrawon a disgyblion heddiw.
"Mae fy meddyliau i gyda’r holl staff a disgyblion yn yr ysgol, ac rydym yn diolch i’r gwasanaethau brys am eu gwaith."
Tomos Morgan
Gohebydd BBC
Cannoedd o rieni y tu allan i Ysgol Dyffryn Aman ar ôl y digwyddiad.
Mae rhieni wedi dweud wrtha'i fod eu plant mewn "lockdown" yn eu hystafelloedd dosbarth.
Ffynhonnell y llun, Disgyblion y tu allan i'r ysgolMae'r Prif Weinidog, Vaughan Gething wedi datgan ei sioc o glywed y "newyddion ofnadwy".
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
Mae'n gohebydd Meleri Williams ar y safle
Heddlu Dyfed Powys
"Mae Heddlu Dyfed Powys yn delio gyda digwyddiad yn Ysgol Dyffryn Aman.
"Mae tri pherson wedi cael eu hanafu ac yn derbyn triniaeth. Mae un person wedi ei arestio ac nid ydym yn chwilio am unrhywun arall mewn cysylltiad gyda’r digwyddiad.
"Mae’r gwasanaethau brys ar leoliad ac mae’r ysgol wedi ei gloi tra mae ymchwiliadau yn parhau. Rydym yn gweithio’n agos gyda’r ysgol a Chyngor Sir Caerfyrddin.
"Rydym yn ymwybodol bod fideo o’r digwyddiad ar y cyfryngau cymdeithasol. Rydym yn gofyn i hwn gael ei dynnu i lawr er mwyn osgoi dirmyg llys a gofid i unigolion.
"Gofynnwn i bobl beidio damcaniaethu tra mae ymchwiliad yr heddlu yn mynd yn ei flaen."
Ffynhonnell y llun, Newyddion S4CHeddlu Dyfed Powys
Mae'r heddlu wedi cadarnhau fod tri o bobl wedi'u hanafu ac un wedi'i arestio yn dilyn adroddiadau o drywanu.
Mae BBC Cymru wedi siarad gyda mam un o ddisgyblion Ysgol Dyffryn Aman.
Dywedodd Lisa Barrett bod ei merch wedi gyrru neges destun iddi gan ddweud bod yr ysgol dan glo.
Ychwanegodd bod adroddiadau bod sawl person wedi eu trywanu.
"Rwy'n pryderu’n fawr," meddai. "Wnaeth fy merch yrru fideo o rywun yn cael eu cludo ar stretcher.
"Os chi’n clywed am eich plentyn yn dweud bod rhywun wedi eu trywanu chi ddim yn gwybod beth yw'r peth gorau i’w wneud.
"Dyw hyn ddim yn rhywbeth chi’n ddisgwyl - chi’n gyrru eich plentyn i’r ysgol ac yn meddwl y bydde nhw’n ddiogel. Mae’n dda gwybod bod y plant wedi eu cloi yn y dosbarthiadau."
Dywedodd Mrs Barrett, sy’n byw yng Ngwau-Cae-Gurwen, nad oedd hi wedi clywed unrhyw beth gan yr ysgol. "Ni jest yn disgwyl. Dwi ddim yn gwybod os ddylen i fynd lawr yno neu peidio."
Ambiwlans Awyr Cymru uwchben Rhydaman
Mae Ysgol Dyffryn Aman yn ysgol ddwyieithog yn ardal Sir Gaerfyrddin.
O adroddiad Estyn yn 2019, mae 1,436 o ddisgyblion ar y gofrestr, gyda 267 ohonynt yn y chweched dosbarth.
Mae'r gwasanaeth ambiwlans wedi cadarnhau fod dau o hofrenyddion yr Ambiwlans Awyr wedi ymateb i'r digwyddiad.
Mae un wedi gadael cae'r ysgol ac yn hedfan tuag at gyfeiriad Caerdydd ac i'r Ysbyty Athrofaol. Mae'r ail yn parhau ar y safle.
Mae 'na adroddiadau fod digwyddiad difrifol wedi bod yn Ysgol Dyffryn Aman yn Rhydaman, Sir Gaerfyrddin.
Arhoswch gyda ni am y newyddion diweddaraf am y digwyddiad.