Mae'r criw yma o Ysgol y Dderwen yn dathlu ar ôl dod yn drydydd yn côr cerdd dant - llongyfarchiadau i bawb sydd wedi cystadlu heddiw!

Dyna'r cyfan o'n llif byw heddiw, diolch am ddilyn.

Fe fydd straeon o'r Eisteddfod ar wefan a chyfrifon cymdeithasol Cymru Fyw am weddill yr wythnos.

Ac os ydych chi'n bwriadu ymweld â'r Eisteddfod a'n pendroni os mai welis 'ta sbectol haul fydd ei angen, gall Alex eich cynghori ar gyfrif X S4C., dolen allanol

Mae'r celfyddydau yn wynebu sefyllfa "hollol drasig", yn ôl y gantores a'r cyflwynydd Caryl Parry Jones.

Yn siarad ar faes Eisteddfod yr Urdd, dywedodd ein bod mewn "cyfnod lle mae'r celfyddydau yn dioddef".

"Maen nhw'n diodde' yn ariannol, maen nhw'n diodde' o ran yr agwedd tuag at y celfyddydau," meddai.

"Mae'r celfyddydau wastad yn rhywbeth maen nhw'n meddwl allan nhw dorri lawr arna fo; gwersi cerddoriaeth, dim ots am hynna; theatrau'n cau.

"Mae o'n drasig. Mae o'n hollol drasig."

Ond dywedodd ei bod yn falch o weld menywod yn amlygu eu hunain "yn fwy ac yn fwy" yn y celfyddydau, er gwaethaf yr heriau sy'n wynebu'r diwydiant.

Mae prif ddramodydd Eisteddfod Genedlaethol Dur a Môr 2025 - Elin Undeg Williams - wedi sôn wrth Cymru Fyw am y ddrama yr enillodd y wobr iddi.

Yn ei deialog, mae Elin yn portreadu perthynas hen ffermwr sydd yn anghofus gyda'i fab.

Roedd hi wedi mwynhau'r seremoni yn fawr, gan ei alw'n "brofiad cwbl anhygoel".

Dyma Eluned, Joseff, Llywelyn a Eseia Grandis. Mae Eseia yn wreiddiol o Drefelin ym Mhatagonia, ac roedd o ac Eluned wedi cwrdd pan oedd hi draw yn y Wladfa yn gweithio fel athrawes Gymraeg.

Mae'r teulu bach wedi ymgartrefu yn Llanddarog ers wyth mlynedd bellach, ac Eseia yn weinidog yn Llanelli.

Roedd Eseia wedi manteisio ar y cysgod rhag y glaw er mwyn cael llymaid bach o mate - diod traddodiadol o'r Ariannin.

Yn ôl Ifan Evans ar Radio Cymru, mae'r tywydd wedi gwella ar y maes erbyn hyn.

Mae nifer o stondinau ar hyd a lled y maes, a sawl un yn dathlu hanes yr ardal.

Ym mhabell Cytûn/Ysgolion Sul mae hen faner wreiddiol yr Urdd o Adran Carmel, Clydach yn dyddio o gyfnod sefydlu'r mudiad.

Mae logo gwreiddiol yr Urdd, sef y ddraig goch, ar ganol y faner.

Mae'n debyg mai yn 1976 y cafodd Mr Urdd ei benodi i'r swydd bwysig yma.

Mae'r ardal ger Llwyfan y Cyfrwy dan ei sang gyda phobl yn aros yn eiddgar am fwy o ganlyniadau.

O Lanelli mae'r criw cyffrous, tamp yma, sydd yn aros am ganlyniad y côr cerdd dant - tybed pwy fydd yn fuddugol?

Dyma griw Aelwyd Ffynnonddrain o Gaerfyrddin yn barod i gystadlu yn y gân actol.

Cafodd y bedair sgwrs gydag Ifan Jones ar Radio Cymru - gallwch wrando'n fyw ar frig y dudalen yma.

Mae'r glaw yn dal i dywallt ar faes yr Eisteddfod, ond mae digon o gystadlu i ddiddanu pawb yn y pafiliwn coch, gwyn a gwyrdd.

Mae gan ohebydd Cymru Fyw, Bethan Bushell gyngor doeth i ymwelwyr...

Tra'n cyflwyno o faes yr Eisteddfod ar ran BBC Radio Wales heddiw, fe ddaeth Dot Davies wyneb yn wyneb ag ymwelwyr go annisgwyl...

Llongyfarchiadau i Elin Undeg Williams o o Betws Gwerful Goch, Sir Ddinbych. Hi yw enillydd Medal Ddrama Eisteddfod yr Urdd Dur a Môr, 2025.

Dewch i adnabod Elin yn well fan yma.

Ffynhonnell y llun, Eisteddfod yr Urdd

Wyddoch chi mai llun o Gastell Margam yw'r ffotograff hynaf o bosib a gafodd ei dynnu yng Nghymru?

Mae'r llun yn dyddio o 1841. Bron i 200 mlynedd yn ddiweddarach, mae llun o'r un castell ychydig mwy lliwgar ond dal yr un mor arbennig!

A hithau'n ddiwrnod seremoni'r Fedal Ddrama, mae Elen Wyn - un o gystadleuwyr The Traitors ac aelod o dîm cyflwyno S4C eleni - wedi dod â 'chydig o ddrama gyda hi i'r maes.

Welwn ni ti yn y Pafiliwn Gwyn am 2:00, Awen Drama!

Bydd y seremoni'n dechrau yn fuan a gallwch wylio'n fyw ar iPlayer.

Mae Richard a’i deulu wedi teithio o Abercraf i ymweld â'r Eisteddfod heddiw. Bu'n sôn wrth Cymru Fyw am ei brofiad o deithio o amgylch y maes:

“Mae 'na fryn bach ar ôl y maes parcio ac roedd hynny’n anodd i gael dros - dydy’r tywydd ddim yn helpu chwaith.

"Ond mae’r staff i gyd 'di bod yn grêt ac mae 'na ramps i 'neud hi’n haws i symud o gwmpas.”

Mae gwybodaeth am hygyrchedd a chymorth wrth ymweld â maes yr Eisteddfod ar wefan yr Urdd, dolen allanol.

Wrth siarad â Cymru Fyw, dywedodd Llywydd y Dydd, Lowri Morgan: "Dyw'r ŵyl ddim just yn wythnos, ond yn feithrinfa am fywyd."

"Nes i ddysgu yn yr Urdd i ennill, nes i ddysgu hefyd sut i golli ac os o ni wir eisiau dod yn ôl i'r Eisteddfod i ganu eto, roedd rhaid i fi fynd nôl ati a dechrau eto, a dyna'r wers bwysica' dwi wedi cael yn fy mywyd i."

Dywedodd mai ei chyngor yw i "fyth rhoi lan".

"Os oes da chi freuddwyd peidiwch byth rhoi lan."

"I fod yn ddewr, i beidio dilyn llwybr rhywun arall... dilynwch breuddwyd eich hunain".

Does dim rhaid bod yn llwyd a llwm yn y glaw fel y gwelwn o ymbarèls yr eisteddfotwyr!

Mae sioeau Cyw yn boblogaidd eto heddiw, gyda'r Adlen dan ei sang o Steddfodwyr bach a mawr.

Yn ogystal â pherfformio yn y sioe ar lwyfan yr Adlen, bydd Daf, Cati, Griff, Ben Dant a Melys hefyd i'w gweld yn canu o amgylch y maes yn ystod yr wythnos.

Ffynhonnell y llun, Cyngor Llyfrau Cymru

Ar raglen S4C bu Alun Williams yn sgwrsio gyda enillwyr gwobrau Tir na n-Og 2025.

Dywedodd Angie Roberts ei bod hi, ei gŵr Dyfan a'u merch Efa 'ar ben eu digon' ar ôl derbyn gwobr y categori cynradd am eu cyfrol Arwana Swtan a'r Sgodyn Od.

Fe wnaeth y tri gydweithio ar y gyfrol, gyda Angie a Dyfan yn gyfrifol am y gwaith ysgrifennu ac Efa yng ngofal y dylunio.

Gallwch ddarllen mwy am y cyfrolau buddugol fan yma.

Roedd perfformiad o sioe newydd 'Dal dy Ddur' ar faes yr Eisteddfod neithiwr.

Roedd 80 o bobl ifanc lleol yn rhan o'r cynhyrchiad.

Disgyblion o ysgolion uwchradd rhanbarth Gorllewin Morgannwg wnaeth ysgrifennu'r sgript, gyda Nicola Hemsley-Cole a thîm Organised Kaos yn cydweithio ar yr ysgrifennu, coreograffi a chyfarwyddo.

Roedd y sioe yn cyfuno sgiliau syrcas, actio, canu a dawnsio gyda cherddoriaeth wedi ei gyd-gyfansoddi â Tara Bethan.

Dyma rai lluniau o'r noson.

Ffynhonnell y llun, Urdd

Ffynhonnell y llun, Urdd

Ffynhonnell y llun, Urdd

Cofiwch fod modd gwylio cystadlaethau'r pafiliynau yn ddi-dor ar wasanaeth S4C Clic, dolen allanol.

Am y tro cyntaf eleni mae hefyd modd ail-wylio am dri diwrnod ar ôl pob cystadleuaeth.

Mae holl ganlyniadau'r dydd i'w gweld yma, dolen allanol, neu ar ap Eisteddfod yr Urdd.

Does dim rhaid canu, llefaru neu ddawnsio er mwyn cystadlu yn yr Eisteddfod. Mae ystod eang o gystadlaethau amrywiol yn cael eu cynnal, gan gynnwys y cystadlaethau coginio ym mhabell CogUrdd.

Dyma Belle o Ysgol y Strade a Daisy o Ysgol Llanhari, sy'n brwydro am deitl Pobydd CogUrdd 2025.

A thra fo'r cystadlu yn mynd rhagddo, mae bwyd ar feddyliau nifer o Eisteddfodwyr eraill hefyd...