Wrth i ddiwrnod cynta'r Sioe Frenhinol ddirwyn i ben, diolch i chi am ddilyn ein llif byw.

Fe fydd BBC Radio Cymru yn parhau i ddarlledu o Faes y Sioe gyda'r Post Prynhawn am 17:00 a Troi'r Tir am 18:00, a chofiwch am raglen uchafbwyntiau S4C heno am 21:00.

Cliciwch yma am fwy o gynnwys o'r Sioe Frenhinol drwy'r wythnos ar wefan BBC Cymru Fyw ac ymunwch gyda Dros Frecwast yn fyw o'r Maes bore fory am 07:00.

Hwyl fawr!

I weld lluniau o ddiwrnod agoriadol y Sioe Frenhinol ewch draw i weld yr oriel yn adran cylchgrawn Cymru Fyw.

Mae cystadlu'n waith blinedig...

Dyma enillwyr y categori Dafad Fynydd eleni yn cael saib haeddianol yn y sied.

Emrys Roberts wnaeth eu harddangos nhw'n gynharach heddiw.

Yn ogystal â bod yn arddwr penigamp mae Adam Jones - neu Adam yn yr Ardd - hefyd yn arddangos tractor y teulu yn y Sioe eleni.

Mae'r David Brown Cropmaster wedi bod yn y teulu ers 1948 ac fe gostiodd £333 i'w brynu.

Llongyfarchiadau mawr iawn i Ieuan o Abergele sydd wedi cipio'r drydedd wobr gyda Annie y fuwch.

Mae'r dreth etifeddiaeth yn un o bynciau mwyaf llosg y byd amaethyddol ar hyn o bryd, ac felly does syndod bod sawl un ar Faes y Sioe gyda barn gref ar y pwnc.

Mae llywodraeth y DU wedi pwysleisio yn y gorffennol, o dan ei newidiadau, y byddai tri chwarter o ystadau yn parhau i beidio â thalu unrhyw dreth etifeddiaeth o gwbl, tra byddai'r chwarter sy'n weddill yn talu hanner y dreth etifeddiaeth y mae'r rhan fwyaf o bobl yn ei thalu.

Ffynhonnell y llun, Jacob King/PA Wire

Arweinydd y Ceidwadwyr Kemi Badenoch yn cyfarfod yr amaethwr a'r cyflwynydd teledu Gareth Wyn Jones, sy'n ffermio ar y Carneddau ger Llanfairfechan.

Mae Ian, sy'n bump oed, wedi dod i'r Sioe am y dydd o Bontsenni gyda’i fam.

Ar ôl gweld y peiriannau, mae'n edrych ymlaen at gael mynd i’r parc chwarae.

Dyma'r olygfa yn y sied ddefaid heddiw. Mae disgwyl i tua 700 o ddefaid gystadlu yn y Sioe Frenhinol eleni.

Mae Cai Morgan-Gervis wedi cael diwrnod cyntaf prysur yn y sioe, ac yn hapus iawn o’i holl lwyddiant.

Fel enillydd yr adran Defaid Mynydd Duon Cymreig, fe fydd yn ei ôl ar gyfer y rowndiau terfynol dydd Iau.

Y band Taran o Gaerdydd oedd yn diddanu'r dorf ar lwyfan Gwledd pnawn 'ma.

Mae'n bwysig magu profiad arddangos yn ifanc, a lle gwell i ddechrau na'r adran ddefaid yn y Sioe Frenhinol?

Ffynhonnell y llun, Jacob King/PA Wire

BBC Radio Cymru

Cofiwch am y Post Prynhawn am 17:00 heddiw ar BBC Radio Cymru pan fydd Nia Thomas yn darlledu'n fyw o Faes y Sioe.

Wrth i Aled Jones baratoi ar gyfer ei Sioe Fawr olaf fel llywydd NFU Cymru, bu'n son wrth Cymru Fyw am y nifer o bynciau heriol ddaeth i'r amlwg yn ystod ei dymor wrth y llyw.

Yn eu plith mae Brexit, y tafod glas a'r Cynllun Ffermio Cynaliadwy ond mae'n dweud mai'r un sydd wedi bod yn fwyaf o siom iddo yn ddiweddar yw'r dreth etifeddiaeth.

"Ma' be' sy' 'di digwydd ers yr Etholiad Cyffredinol yn San Steffan wedi fy suro i.

"Yr holl eiriau da a'r addewidion am bwysigrwydd amaeth a diogelwch bwyd... ac wedyn mor fuan ar ôl hynny troi sawdl a chyflwyno newidiadau i'r dreth etifeddiaeth," meddai.

Darllenwch y cyfweliad yn llawn yma.

Mewn cynhadledd i'r wasg ar faes y Sioe brynhawn Sul, fe ategodd ei bryder gan ddweud: “Mae hyn yn poeni fi fwy na dim” a bod y gallu i dalu'r dreth “ddim yno” ymysg cymunedau amaethyddol."

Mae pob math o gystadlaethau yn y Sioe - gan gynnwys am yr wyau gorau.

Dyma'r beirniaid yn ceisio dewis pwy fydd ar y brig - a phwy fydd y 'pen wy' eleni!

Does dim llawer o ffermwyr yng Nghymru sy'n cael eu hadnabod ar y stryd ac yn gwerthu nwyddau gyda'u henw arnyn nhw.

Mae gan Oshi G 43,000 o ddilynwyr TikTok ac mae'n debygol y bydd llawer yn gobeithio tynnu llun gydag o yn ystod y Sioe Fawr eleni.

Meddai wrth Cymru Fyw: "Os ti'n edrych ar rywun sydd ddim yn involved mewn ffarmio a gofyn be' ti'n feddwl am ffarmwrs ma' siwr bod nhw'n meddwl bod ffarmwrs yn hen ddynion boring sy' mond yn ffarmio ond ella bod nhw'n gweld hwn a meddwl ella bod nhw efo personoliaeth.

"Pan neshi ddechrau 'neud y fideos do'n i ddim yn disgwyl iddo fo fynd fel yma..."

Dewch i'w adnabod yn well yma.

Mae pob bandstand angen band - ac mae Band y Ffiwsilwyr Brenhinol Cymreig ar Faes y Sioe heddiw yn diddanu'r dorf.

Does 'na byth ddiffyg bwyd mewn sioe amaethyddol, ac mae'n prysuro yn y pentref bwyd amser cinio yn Llanelwedd.

BBC Radio Cymru

Llysgennad newydd cig oen Cymreig ydi’r cyn seren rygbi rhyngwladol Jonathan Davies.

Mae’n edrych ymlaen meddai at gael hyrwyddo’r brand a thanlinellu pa mor iach a blasus ydi’r cig.

Gallwch chi ei glywed yn trafod ei rôl newydd ar Post Prynhawn ar Radio Cymru, fydd yn cael ei darlledu yn fyw o'r Sioe am 1700.

Ffynhonnell y llun, Getty Images

Oherwydd clefyd y tafod glas ni fydd arddangoswyr o'r Alban na Lloegr yn cael dod â'u da byw i'r Sioe Fawr eleni.

Mae'r feirws yn gallu achosi briwiau o amgylch ceg ac wyneb yr anifail, trafferthion llyncu ac anadlu, twymyn a chloffni.

Defaid sy'n cael eu heffeithio waethaf gan y straen diweddaraf - sy'n cael ei adnabod fel BTV-3 - er bod effaith y clefyd fel petai'n amrywio yn sylweddol ar draws rhanbarthau gwahanol, gyda rhai anifeiliaid yn dangos ychydig iawn o arwyddion eu bod wedi’u heintio.

Wythnos diwethaf, fe wnaeth prif weithredwr y Sioe, Aled Rhys Jones, atgoffa am bwysigrwydd fod pawb yn wyliadwrus o'r clefyd yn ystod y dathliadau eleni:

"Mae'n bwysig iawn edrych yn fanwl ar eich stoc cyn dod â nhw i'r sioe a byddwch yn wyliadwrus iawn am unrhyw arwyddion o'r clefyd".

Mae adroddiad arbennig Garry Owen yma yn cynnwys rhestr o symptomau y dylid bod yn wyliadwrus ohonynt.