Mae Sophie a Frankie wedi teithio'r holl ffordd o Shropshire er mwyn gwylio'r farchogwraig Harlow White - sydd efo nifer o ddilynwyr ar y platfformau digidol - yn gwneud arddangosiad yn hwyrach heddiw.

Mae'r Dywysoges Anne yn ymweld â'r Sioe Fawr heddiw am y tro cyntaf ers 2022.

Dyma'r seithfed tro iddi fynd i'r Sioe - y tro cyntaf oedd yn 1981.

BBC Radio Cymru

Mae rhaglen Bore Cothi yn darlledu’n fyw o’r Sioe ar hyn o bryd ac un o westeion Shân Cothi ydi arweinydd y Gymanfa gafodd ei chynnal neithiwr.

Meddai Elin Angharad Davies: “Aeth hi’n wych - gawson ni noson fendigedig. Ro’n i’n teimlo’n reit nerfus ond wnaethon ni godi’r to.

"Wnaeth y côr godi’r achlysur, yr unawdydd a’r deuawdau ac wrth gwrs roedd y gynulleidfa yn morio canu.”

Fe fydd Marc Griffiths, y Post Prynhawn a Troi’r Tir hefyd yn darlledu o’r Maes heddiw.

Mae 'na ddigon o bobl yn cael rhuban coch yn y Sioe... ond tlws Uwch Gynghrair Lloegr?

Roedd Guto o Benmachno, sy'n bêl-droediwr o fri ac yn chwarae i Glwb Ieuenctid Llanrwst, wrth ei fodd yn cael cip olwg ar dlws pencampwyr Uwch Gynghrair Lloegr ar stondin Barclays.

Gwledd i unrhyw gefnogwr Lerpwl!

Mae nifer o bynciau llosg yn y byd amaeth ar hyn o bryd - yn enwedig y dreth etifeddiaeth - felly doedd syndod efallai nad oedd sedd wag ym mhabell NFU Cymru ar gyfer sesiwn holi ag ateb gyda’r Prif Weinidog, Eluned Morgan.

Mae'r cefndryd a'r cyfnitherod yma wedi dod o hyd i ffordd wych o deithio o gwmpas maes y Sioe... ond dim ond gyda thechnoleg rithwir (virtual reality).

Ewch draw i stondin Undeb Amaethwyr Cymru i roi cynnig arni. O'r chwith i'r dde yn y llun mae William, o Gaerfyrddin, Dot a Nansi, o Drefynwy, ac Alys o Gaerfyrddin.

Mae'r cyn-ddyfarnwr rygbi rhyngwladol, Nigel Owens wedi dweud ar 'X' ei fod yn gyffrous ond yn nerfus cyn arddangos da byw am y tro cyntaf erioed yn y Sioe.

Bydd Nigel yn arddangos Mairwen 1 Maggie Moultan yn Llanelwedd eleni.

Ffynhonnell y llun, Nigel Owens

Mae'r Ganolan Gneifio - un o atyniadau mwyaf poblogaidd y Sioe - ar agor a'r cystadlu wedi dechrau!

Dyma Hunter a'i fam Hollie o Gaerdydd. Mae hon yn sioe arbennig i'r ddau gan mai dyma'r tro cyntaf i Hunter fod ar y Maes yn Llanelwedd.

Ar faes y Sioe brynhawn Sul bu Cymru Fyw yn siarad â John Astley, uwch stiward yn adran y gwartheg.

Fy rannodd bod llai o wartheg mewn rhai dosbarthiadau oherwydd clefyd y tafod glas ond “mae rhai wedi eu temtio i gystadlu am y tro cyntaf sydd yn beth braf iawn”.

Mae tua 40% yn llai o wartheg gan fod arddangoswyr o Loegr a’r Alban wedi eu gwahardd rhag cystadlu.

Y darlledwr Dei Tomos agorodd y Sioe yn swyddogol fore Llun.

Soniodd Dei am yr heriau niferus sy’n wynebu’r diwydiant ac yn awgrymu nad ydi pawb sydd yn llywodraethu yn poeni iot am gynhyrchu bwyd yn ddiogel.

Mi soniodd hefyd am gyfraniad anfesuradwy ffermwyr i gefn gwlad a diwylliant Cymru.

Ac mae'r cystadlu wedi dechrau yn y Brif Gylch hefyd yn yr adran geffylau

Mae'r cystadlu wedi dechrau ar Faes y Sioe ac ar ôl yr holl waith caled yn paratoi mae'r diwrnod mawr wedi cyrraedd.

Mae'n fore braf yn Llanelwedd, a'r hetiau haul allan gan Luned a Dewi, o Lanpumsaint.

Mae'r ddau wedi dod am yr wythnos - Luned yn edrych ymlaen at weld y da byw, a Dewi at y teganau!

Mae sawl ffordd o fwynhau'r Sioe eleni. Mae S4C yn darlledu'n fyw rhwng 09:00 a 17:00, a bydd rhaglen uchafbwyntiau heno am 21:00.

Dyma raglenni'r dydd ar Radio Cymru o'r maes:

11:00 - Bore Cothi

14:00 - Marc Griffith

17:00 - Post Prynhawn

18:00 - Troi'r Tir

Fe fydd lluniau a fideos i'w gweld ar gyfrifon S4C, Radio Cymru a Cymru Fyw hefyd yn ystod yr wythnos.

Mae gohebwyr Cymru Fyw yn crwydro'r maes a'n edrych ymlaen at ddiwrnod agoriadol Sioe Frenhinol 2025.

Dilynwch y llif byw yma a chyfrifon Cymru Fyw ar Instagram, Facebook a TikTok yn ystod y dydd.

Dyma un o uchafbwyntiau y calendr amaethyddol. Fe wnaeth dros 200,000 ymweld yn 2024, gyda phobl wedi teithio o 29 gwlad.