Dyna'r cyfan gan griw y llif byw am heddiw wrth i filoedd o bobl ifanc yng Nghymru gael eu canlyniadau TGAU.

Eleni roedd 62.5% o raddau dysgwyr rhwng A* ac C - 0.3% o gynnydd ar ganlyniadau y llynedd.

Roedd y disgyblion eleni - a aeth i'r ysgol uwchradd ynghanol pandemig - yn derbyn eu canlyniadau ar drothwy newidiadau mawr i'r drefn gymwysterau.

Darllenwch ein stori i gael y darlun cyflawn ond tan y tro nesa, diolch yn fawr am ddilyn, a phob lwc i'r disgyblion gyda'u camau nesaf.

Ffynhonnell y llun, bbc

Os wyt ti'n awyddus i gario 'mlaen ym myd addysg, fe allai disgyblion dderbyn arian drwy Cyllid Myfyrwyr Cymru, dolen allanol.

Mae Lwfans Cynhaliaeth Addysg ar gyfer pobl ifanc 16-18 oed yng Nghymru, sydd am barhau gyda’u haddysg.

Os yn gymwys, fe allai disgyblion dderbyn £40 yr wythnos.

Cwrs galwedigaethol yw'r cam nesaf i Dafydd o Ysgol y Strade, meddai, ag yntau wedi derbyn mwy nag un gradd D yn ei arholiadau.

"Rwy’n mynd i astudio bricklaying yn y coleg y blwyddyn nesaf ac yn bwriadu dechrau yn y byd gwaith hefyd."

Cafodd Erin raddau A* ac A heddiw, felly mae hi'n "rili hapus" meddai. Flwyddyn nesaf, mae hi am fod yn astudio Ffiseg, Mathemateg, Technoleg Gwybodaeth a Hanes yn y Chweched Dosbarth cyn mentro am y brifysgol.

Roedd Harri yr un mor bles gyda'i ganlyniadau gan ei fod wedi pasio pob pwnc, ac hefyd am aros i'r Chweched i astudio Daearyddiaeth, Technoleg Gwybodaeth a Throseddeg.

BBC Bitesize

Mae help wrth law ar wefan BBC Bitesize - yno mae digon o gyngor am beth i'w wneud nesaf.

Cofia hefyd am adran Gyrfaoedd BBC Bitesize, a all dy helpu i benderfynu pa lwybr sydd orau i ti eu ddilyn.

Gwna gwis am dy swydd ddelfrydol, darllena straeon am brofiadau pobl ifanc fel ti, dysga sut i ysgrifennu CV neu ddysgu mwy am y prentisiaethau sydd ar gael.

Yn ôl pennaeth Ysgol Pen y Dre, Merthyr Tudful, Huw Richards, mae'n teimlo'n falch iawn o'r disgyblion, o ystyried yr heriau maen nhw wedi gorfod eu hwynebu o ganlyniad i'r pandemig.

"Mae'r plant wedi mynd drwy lawer dros y bum mlynedd diwethaf; roedd 'na lawer o newidiadau i ni fel oedolion, heb sôn am i'r plant.

"Mae 'na aeddfedrwydd wedi bod, wrth iddyn nhw ledaenu eu disgwyliadau, uchelgeisiau a'u gorwelion."

Wrth i'r myfyrwyr nawr ystyried y camau nesaf, mae llawer o newid ar droed yn ardal Merthyr, meddai Mr Richards, gan gynnwys "llawer o fuddsoddiad gan gyflogwyr a phrosiectau isadeiledd".

"Mae hi'n bleser gweld y cyfleoedd yna nawr yn mynd i mewn i addysg uwch o fewn prifysgolion a chyflogaeth. Mae yna nifer o gyfleoedd."

Eleni mae Ysgol y Strade wedi gwneud pethau ychydig yn wahanol i'r arfer wrth gyflwyno'r canlyniadau TGAU i'r disgyblion.

Yn hytrach na dosbarthu amlenni, mae'r myfyrwyr yn ciwio er mwyn derbyn eu canlyniadau gan athro, ac yn cael cyngor ynglŷn â'r camau nesaf yr un pryd.

Eglurodd y pennaeth, Geoff Evans, fod hyn oherwydd fod y disgyblion yn aml wedi newid eu meddyliau ynglŷn â beth yw'r cam nesaf iddyn nhw.

"Mae rhai sydd wedi dweud eu bod nhw am ddod nôl i wneud Lefel A wedi newid pa gyrsiau maen nhw'n meddwl gwneud," meddai.

"Mae rhai eraill oedd wedi dweud eu bod nhw eisiau mynd i'r coleg, wedi penderfynu aros yn yr ysgol. Mae rhai yn penderfynu mynd i'r coleg.

"'Da ni'n eu gweld nhw ac yn siarad efo nhw fel unigolion, wedyn maen nhw'n siarad efo staff hŷn yr ysgol er mwyn rhoi cyngor go iawn iddyn nhw un-i-un, i weld beth sydd orau iddyn nhw ei wneud flwyddyn nesaf."

Mynd i weithio mewn ysbyty plant yw uchelgais un o'r myfyrwyr sy'n derbyn ei chanlyniadau heddiw, a hynny ar ôl derbyn gofal yn ystod ei hastudiaethau TGAU.

Mae Ruby Jones, sy'n ddisgybl yn Ysgol Pen y Dre, Merthyr, wedi dioddef â nifer o gyflyrau iechyd dros y blynyddoedd diwethaf, a olygodd iddi fethu llawer o'r ysgol.

Cafodd hi hyd yn oed ei chludo i'r ysbyty yn ystod un o'i harholiadau.

"Mae e wedi amharu ar lawer o bethau," eglurodd. "Roedd fy mhresenoldeb i lawr i 40% ac roedd yr ysgol yn poeni amdana i. Ar un adeg, ro'n i'n cael fy anfon adref bob dydd. Mae wedi effeithio llawer ar fy iechyd i dros y flwyddyn ddiwethaf.

"Mae'n golygu llawer i mi a fy nheulu mod i wedi llwyddo i basio'r arholiad, ac maen nhw wrth eu boddau, a dwi mor falch o fy hun. Dwi mor ddiolchgar i'r holl athrawon sydd wedi fy helpu."

Y cam nesaf i Ruby fydd mynd i'r coleg i wneud cwrs gofal plant, gyda'r gobaith o weithio yn yr ysbyty plant sydd wedi gofalu gymaint amdani dros y flwyddyn ddiwethaf.

Dywedodd Ian Morgan, prif weithredwr bwrdd arholi CBAC: "Hoffwn longyfarch pob myfyriwr TGAU a galwedigaethol ar yr hyn a gyflawnwyd ganddynt heddiw.

"Mae'r canlyniadau hyn yn dystiolaeth o'u gwaith caled a dyfalbarhad drwy gydol eu hastudiaethau, a hoffem ddymuno'r gorau iddynt wrth iddynt symud ymlaen i addysg bellach, hyfforddiant, neu gyflogaeth.

"Mae ein diolch yn ddidwyll hefyd i'r athrawon, tiwtoriaid, a swyddogion arholiadau mewn ysgolion a cholegau ar draws y wlad am yr ymrwymiad ac ymroddiad ganddynt o ran sicrhau gweithrediad cyfres arholiadau eleni.

"Yn olaf, nid ydym wedi anghofio pa mor hanfodol yw rôl rhieni a gofalwyr wrth iddynt gefnogi dysgwyr i gyrraedd y garreg filltir hon."

Lloegr yw'r unig wlad sydd wedi gweld gostyngiad yng nghyfradd basio TGAU.

Mae'r gyfradd basio wedi codi yng Nghymru a Gogledd Iwerddon.

I'ch hatgoffa, mae Lloegr yn defnyddio system rhifau 9 i 1.

Eleni, cyfran y TGAU a gafodd eu marcio yn 4/C ac uwch ydy:

• 83.5% yng Ngogledd Iwerddon, i fyny o 82.7% yn 2024
• 67.1% yn Lloegr, i lawr o 67.4%
• 62.5% yng Nghymru, i fyny o 62.2%

Mae'r system arholiadau a chanlyniadau yn wahanol yn Yr Alban.

Gyrfa Cymru

Mae digon o opsiynau i fyfyrwyr sydd newydd dderbyn canlyniadau heddiw, yn ôl Emma Williams o Gyrfa Cymru.

Mae Cymru'n Gweithio yn gynllun ar y cyd gyda Llywodraeth Cymru i roi cymorth i bobl ifanc 16-24 oed.

"Prentisiaeth, gwirfoddoli, dechrau gweithio, dechrau busnes eu hun... Byswn ni yn gallu rhoi cymorth iddyn nhw i wneud cais, i chwilio am waith neu drafod syniadau am ddechrau busnes. Mae 'na lot o opsiynau."

Ewch i dudalen Cymru'n Gweithio am gyngor am y camau nesaf., dolen allanol

Ben Price
Gohebydd BBC Cymru

Ymysg y pynciau sydd wedi gweld llai yn sefyll arholiadau eleni mae Astudiaethau Crefyddol ac Addysg Gorfforol.

Ar y pen arall, mae'r nifer fu'n astudio ieithoedd tramor fel Ffrangeg a Sbaeneg wedi cynyddu.

NEU Cymru

Mae undeb addysg NEU Cymru yn dweud fod cyflawniadau disgyblion eleni yn "anhygoel" o ystyried "aflonyddwch digynsail" y pandemig.

Dywedodd Nicola Fitzpatrick, ysgrifennydd dros dro yr undeb, nad oes budd mewn cymharu canlyniadau o un flwyddyn i'r llall.

"Mae arholiadau diwedd cwrs ymhell o fod y ffordd orau a thecaf o asesu sgiliau myfyrwyr," meddai.

"Mae ailadrodd gwybodaeth ar un diwrnod yn dod yn llai a llai perthnasol.

"Mae ffenestr chwe wythnos o straen yn ddiangen ac yn methu â pharatoi myfyrwyr ar gyfer y byd y maen nhw ar fin mynd iddo."

Ychwanegodd fod yn rhaid i'r cwricwlwm newydd "ddefnyddio ystod o ddulliau asesu".

Mae'r canlyniadau heddiw yn dod cyn newid mawr i gymwysterau yng Nghymru.

Bydd y ffordd mae TGAU yn gweithio yn newid o fis Medi i gydfynd gyda'r cwricwlwm newydd sydd wedi cael ei gyflwyno mewn ysgolion ers tair blynedd.

Ymhlith y don gyntaf o ddiwygiadau o fis Medi mae TGAU newydd sydd yn cyfuno Cymraeg iaith a llenyddiaeth a Cymraeg Craidd - cymhwyster newydd ail iaith.

Mae'r newidiadau wedi cael ymateb cymysg, gyda rhai yn honni na fydd disgyblion yn cael dysgu digon am hanes Cymru.

Mae hi wedi bod yn fore emosiynol i Gracie Owens o Ysgol Pen y Dre, Merthyr, ar ôl iddi ddysgu ei bod wedi ennill graddau A* ac A.

"O'n i yn fy nagrau, os dwi'n onest. O'dd e jyst yn dod mas, o'n i o'r diwedd yn gallu rhyddhau'r emosiynau 'na.

"O'dd e gymaint o ryddhad, achos ma'r gwaith caled wedi bod werth e."

A hithau eisiau astudio gofal plant yn y coleg a chael swydd fel cymhorthydd dosbarth, roedd Kyla yn poeni nad oedd am gael y graddau wrth iddi fynd i gasglu ei chanlyniadau.

Ond doedd 'na ddim rhaid iddi boeni, a hithau wedi cael siom ar yr ochr orau o weld ei graddau.

"Ges i fy synnu gyda'r Bac, achos o'n i ddim yn disgwyl pasio hwnna, a Mathemateg, oherwydd mod i ofn y rhifau! Dwi wedi cael sioc o ryddhad."

Ben Price
Gohebydd BBC Cymru

A* i G – 96.9%

A* i C – 62.5%

A* i A – 19.5%

Roedd 22,695 o geisiadau ar gyfer y Dystysgrif Her Sgiliau Cenedlaethol/Sylfaenol (Bagloriaeth Cymru) gyda 98% o ddisgyblion yn cyflawni'r cymhwyster.

Cyflawnodd 87.2% o'r rheini raddau A* i C.

Mae'r Ysgrifennydd dros Addysg, Lynne Neagle, hefyd yn Ysgol Y Strade yn Llanelli bore 'ma.

Wrth longyfarch disgyblion, dywedodd: "Rydym wedi gweld rhai canlyniadau cryf yn ein graddau uchaf ac ar draws ystod o bynciau gan gynnwys Mathemateg a Saesneg.

"Arwydd cadarnhaol ein bod yn symud i’r cyfeiriad cywir gyda chyrhaeddiad yn ein hysgolion.

"Hoffwn hefyd dalu teyrnged i’n hathrawon a’n gweithlu addysg y mae eu cefnogaeth a’u gwaith caled wedi helpu ein dysgwyr i ffynnu."

Ben Price
Gohebydd BBC Cymru

Mae nifer y dysgwyr yng Nghymru sydd wedi cael y canlyniadau TGAU gorau wedi cynyddu ychydig ers y llynedd.

Eleni roedd 62.5% o raddau dysgwyr rhwng A* ac C - 0.3% o gynnydd ar ganlyniadau 2024.

Ar draws Cymru gyfan roedd llai o arholiadau wedi cael eu sefyll yn 2025 o'i gymharu â 2024.

Ar gyfer pwnc Cymraeg iaith gyntaf, fe wnaeth llai o ddisgyblion sicrhau gradd A*-C eleni, ond roedd cynnydd bychan o ran Cymraeg ail iaith.

Roedd gwelliant bychan hefyd o ran pwnc Saesneg, tra bod Mathemateg a Rhifedd wedi aros ar lefel debyg i 2024.

"Rwy’n hapus iawn gyda’r canlyniadau," meddai Cameron o Ysgol Gyfun y Strade, "cefais gymysgedd o A*-B.

"Dwi’n mynd i’r chweched i astudio Gwyddoniaeth a Mathemateg."

Deuddeg A* oedd ar bapur canlyniadau Mali y bore 'ma, sydd wrth ei bodd bod ei gwaith caled wedi talu ei ffordd.

"Rwy’n bwriadu astudio Cemeg, Bioleg a Mathemateg Bellach yn y chweched dosbarth, gyda’r gobaith o fynd i’r brifysgol i astudio naill ai Meddygaeth neu Beirianneg."

A hithau wedi profi'r fath lwyddiant, beth yw ei chyngor hi i blant iau, sydd â'u harholiadau TGAU o'u blaenau?

"Gwneud yr holl waith cartref yn ei dro a bydd popeth yn adeiladu i fyny yn y diwedd."

Dros Frecwast
BBC Radio Cymru

Roedd Emma Williams, sy'n ymgynghorydd gyda Gyrfa Cymru, yn siarad ar Dros Frecwast ar BBC Radio Cymru bore 'ma, ac yn pwysleisio bod digon o gyngor ar gael i'r "bobl ifanc sy'n camu mewn i fyd sy'n wahanol cyn y cyfnod clo".

"Mae'r ffordd 'da ni yn gallu ac yn dewis dysgu a datblygu sgiliau yn fwy eang nag erioed.

"Mae'r farchnhad gwaith a'r gweithle i raddau wedi newid; mwy ohonon ni yn gweithio ychydig bach o adre a phethau fel'na, felly mae sut 'da ni yn gallu ac isho gweithio ac addysgu wedi newid.

"Mae 'na ddrysau wedi agor i bobl, a mwy o opsiynau i ffordd 'da ni yn dewis dysgu a 'da ni yma yn gweithio i gefnogi pobl i drafod yr holl opsiynau yna hefyd."