Ar eu cyfrifon cyfryngau cymdeithasol mae'r Urdd wedi atgoffa bod tocynnau i'r maes am ddim ar gael i deuluoedd incwm is eleni, gyda chymorth Llywodraeth Cymru.

Mae mwy o wybodaeth ar wefan yr Urdd., dolen allanol

Beth ydych chi'n ei wybod am ardal Parc Margam a'r Fro?

Rhowch gynnig ar gwis BBC Cymru Fyw!

Ffynhonnell y llun, Urdd

Dyma rai o ddawnswyr gwerin Plant Ysgol Gynradd Glyncorrwg, sy'n barod am y gystadleuaeth bore 'ma...

...tra bod Isobelle o Ysgol Lôn Las, Abertawe ar fin mynd i gystadlu efo’r côr.

Mae Mimi a Dad cu wedi cyrraedd i gefnogi Greta o Gaerfyrddin...

... ac Esyllt, Mari a Lois yma i gefnogi Ysgol Dyffryn Cledlyn ac Ysgol Talgarreg...

... a chiw o bobl yn aros i fynd i mewn i'r Pafiliwn Gwyn i wylio'r dawnsio gwerin.

Un sy'n byw yn ardal yr Eisteddfod yw'r awdur Bragitta Ozgha, sydd wedi ymgartrefu ym Mhort Talbot.

A hithau'n awtistig, gydag ADHD ac anabledd cronig, mae hi eisiau gwell cynrychiolaeth o anableddau ac anghenion gwahanol o fewn y diwydiant cyhoeddi ac mewn llyfrau.

Ffynhonnell y llun, Bragitta Ozhga

Mae ei llyfrau hefyd yn dilyn cymeriadau wrth iddyn nhw grwydro Cymru a gweld rhyfeddodau'r wlad - rhywbeth oedd yn bwysig iddi, meddai, oherwydd ei bod wrth ei bodd â'i gwlad mabwysiedig ac eisiau i eraill deimlo'r un fath:

"O'n i eisiau i bobl fod yn falch a syrthio mewn cariad gyda'r lle eto, fel 'nes i, ac i atgoffa pobl faint o hud a hanes sydd yma."

Darllenwch fwy yma.

Mae ychydig o gawodydd wedi bod bore 'ma, ond mae'n ddigon sych ar y maes ar hyn o bryd.

Ond wrth gwrs mae hi wastad yn dywydd hufen iâ yn yr Eisteddfod!

Llongyfarchiadau mawr i Leusa Miriam Gruffudd o Ysgol Gymraeg Aberystwyth a ddaeth yn fuddugol yn y Llefaru Unigol bl. 5 a 6.

Enfys Davey Jones ddaeth yn ail, a Harri Richard Wynne ddaeth yn drydydd. Da iawn bawb!

Bydd holl ganlyniadau'r cystadlu i'w gweld ar wefan Yr Urdd., dolen allanol

Cafodd Llywyddion Anrhydeddus yr ŵyl eleni eu croesawu mewn seremoni arbennig ar Lwyfan y Cyfrwy: Wayne Pedrick, Menna Bennett Joynson, Janet Jones, Davida Lewis.

Hefyd yn cael eu hanrhydeddu ar y llwyfan, oedd enillwyr Tlws John a Ceridwen Hughes 2025, David Gwyn a Pamela John o Dreforys, Abertawe.

Rhyngddyn mae ganddyn nhw 220 o flynyddoedd o wirfoddoli dros blant a ieuenctid Cymru.

Huw Chiswell, Bronwen Lewis a rhai o bobl ifanc yr ardal sydd wedi cyd-gyfansoddi'r gân i groesawu pawb i Eisteddfod Parc Margam a'r Fro eleni.

Yn ôl ym mis Tachwedd, bu Huw a Bronwen yn perfformio mewn gig arbennig yn Ysgol Ystalyfera ynghyd â nifer o ddisgyblion a chyn-ddisgyblion eraill.

Gallwch wylio'r fideo ar gyfrifon cyfryngau cymdeithasol S4C a'r Urdd.

Cystadlu neu beidio, mae digon i'ch diddanu ar y maes. Cafodd Dewi gyfle i gwrdd â neidr filtroed Affricanaidd fawr!

Mae sawl ffordd o ddilyn yr Eisteddfod yn ystod yr wythnos.

Bydd Trystan Ellis Morris ac Heledd Cynwal yn darlledu pob dydd ar S4C rhwng 10:30 a 18:30, gyda rhaglen uchafbwyntiau pob nos am 20:00. Ar wasanaeth S4C Clic, gallwch hefyd wylio holl gystadlu’r dydd o’r pafiliwn Coch, Gwyn a Gwyrdd.

Am y tro cyntaf eleni, bydd modd ail-wylio cystadlaethau ar S4C Clic am dri diwrnod wedi'r cystadlu.

Ffynhonnell y llun, S4C

Bydd Ifan Evans yn darlledu’n fyw o’r maes ar BBC Radio Cymru pob dydd rhwng 14:00 a 17:00, gyda Jac Northfield yn ymuno yn yr hwyl. Bydd holl enillwyr yr Eisteddfod i’w clywed ar draws yr orsaf yn ystod yr wythnos.

Mae cyfarwyddwr celfyddydau yr Urdd - Llio Maddocks - hefyd yn fardd, ac wedi ysgrifennu englyn i nodi'r Eisteddfod:

Y dur yma yw’n drymiau - ein ffwrnes

Yw’n ffyrnig symbalau

Er pylu gwres bass y bae

Ni rydir ein curiadau

Mae hi hefyd wedi ateb cwestiynau busneslyd Cymru Fyw - darllenwch Ateb y Galw yma.

Roedd Ysgol Treganna, Caerdydd wedi picio i babell Prifysgol Caerdydd i ymarfer ar gyfer y gystadleuaeth Cân Actol Bl. 5 a 6.

Ond cafodd y plant sypreis o weld fod un o wynebau'r Eisteddfod - y ferch leol a chyd-gyfansoddwyr Cân y Croeso - y gantores Bronwen Lewis, wedi dod i fusnesu.

Mae'n siŵr fod hynny wedi rhoi hwb ychwanegol i'r plant!

Jeremy Miles yw Llywydd yr Ŵyl eleni, un a fu'n cystadlu'n yr Eisteddfod pan yn blentyn.

Yng nghynhadledd y wasg fore Llun, dywedodd ei bod "wir yn anrhydedd cael fy ngwahodd i fod yn Llywydd yr Ŵyl".

"Mae'r Eisteddfod wastad wedi bod yn rhan bwysig iawn o fy magwraeth a'r cyfleoedd di-ri ddaeth yn sgil perfformio, cystadlu a mwynhau'r ŵyl, a dwi'n credu fod hynny yn rhywbeth sy'n siapio cwrs eich bywyd.

Cafodd Mr Miles ei synnu wrth weld fideo ohono'n canu mewn côr pan oedd yn blentyn, a dywedodd ei fod "dal yn cofio pob gair o'r gân!"

Dywedodd fod angen edrych "ar yr hyn sydd o'n hamgylch ni... ein dyfodol ni. Gŵyl yw hi i bobl ifanc Cymru a ni'n cael syniad clir o ddyfodol ein cenedl, iaith a diwylliant o grwydro'r maes.

"Mae'n bwysig gallu edrych i'r dyfodol gyda gobaith," ychwanegodd.

Wrth annerch y wasg fore Llun, dywedodd Prif Weithredwr yr Urdd, Sian Lewis mai dyma drydedd flwyddyn y mudiad yn gwireddu eu strategaeth 'Urdd i Bawb'.

Dywedodd ei bod yn "hynod o falch o'r gwaith mae'r Eisteddfod yn ei wneud" a bod yr Urdd yn "cydnabod ein hangen i estyn allan i'r cymunedau sydd wedi eu tangynrychioli yn y gorffennol".

"Rydym wedi gweld cynnydd aruthrol yn nifer y plant sy'n cystadlu," meddai, gyda "chynnydd o 42% yn y dysgwyr".

Dywedodd bod y "neges yn glir; mae'r Urdd yma heddiw i bawb".

Mae prif seremonïau yr Eisteddfod yn cael eu cynnal yn ddyddiol am 14:00. Dyma fydd y drefn fesul diwrnod:

Dydd Llun – Y Fedal Gelf

Dydd Mawrth – Y Fedal Ddrama

Dydd Mercher – Medal y Dysgwyr a Medal Bobi Jones

Dydd Iau – Y Cadeirio

Dydd Gwener – Y Coroni

Dydd Sadwrn – Y Fedal Gyfansoddi

Yn mynd i'r Eisteddfod yr wythnos yma, ond ddim yn hollol siŵr beth ydi beth?

Dyma bopeth rydych chi angen ei wybod...

Ar y trên...

Er mwyn cyrraedd ar drên, bydd angen teithio i orsaf drenau Parcffordd Port Talbot.

Bydd gwasanaeth bws wennol yn rhedeg o’r orsaf i Faes yr Eisteddfod drwy gydol yr wythnos.

Mae’r gwasanaeth bws am ddim, ac yn rhedeg rhwng 06:30 – 21:56 ddydd Llun i Iau, ac o 06:30 – 23:26 ddydd Gwener a Sadwrn.

Mewn car...

Mae canllaw ar wefan yr Urdd, dolen allanol yn egluro sut i gyrraedd y maes o bob cyfeiriad.

Mae'r Urdd yn atgoffa fod digwyddiad mawr arall yn cael ei gynnal yn yr ardal heddiw, felly cofiwch roi digon o amser i’ch hunain.

Darllenwch fwy fan yma.

Wedi'r holl baratoi ac edrych ymlaen, mae plant a phobl ifanc wedi heidio i'r maes ym Mharc Margam, Castell-nedd Port Talbot.

Mae gohebwyr Cymru Fyw yno hefyd - arhoswch gyda ni i ddilyn y straeon mawr a'r cyffro.