Trelái: Fideo i'w weld yn dangos fan heddlu'n dilyn beic

Dyma'r lluniau CCTV sydd i'w gweld yn dangos fan plismon yn dilyn dau berson ar foped neu feic trydan, funudau cyn gwrthdrawiad angheuol yng Nghaerdydd nos Lun.

Mae BBC Verify wedi bod yn edrych ar fideo teledu cylch cyfyng o Ffordd Frank yn Nhrelái ac ar y ffilm mae'r amser dangos 17:59, 22 Mai 2023.

Mae'r lleoliad 900m o bellter o safle lle y credir i'r gwrthdrawiad ddigwydd.

Yn gynharach ddydd Mawrth cafwyd ar ddeall mai Kyrees Sullivan, 16, a Harvey Evans, 15, oedd y ddau berson ifanc fu farw yn y gwrthdrawiad - a ddigwyddodd cyn yr anhrefn yng Nghaerdydd nos Lun.

Cafodd y fideo, a ddaeth i law drwy asiantaeth newyddion Wales News, ei ryddhau wedi i Gomisiynydd Heddlu De Cymru Alun Michael ddweud wrth y BBC nad oedd swyddogion wedi erlid y ddau fachgen.