Yr ymladdwr MMA, Brett Johns yn cystadlu i ennill $1m

Eleni, bydd yr ymladdwr MMA, Brett Johns, yn cystadlu yng Nghyngrair yr Ymladdwyr Proffesiynol - sy'n rhoi'r cyfle iddo ennill $1m (£790,000).

Mi fydd y Cymro yn cystadlu yn adran pwysau plu y gystadleuaeth, ac mi fydd ei ornest gyntaf yn erbyn Timur Khizriev o Rwsia yn Chicago ar 19 Ebrill.

Mae Johns wedi ennill ei dair ornest broffesiynol ddiwethaf, gyda'i fuddugoliaeth ddiweddaraf yn dod yn erbyn David Tonatiuh Crol fis Rhagfyr.

Wrth edrych ymlaen at y gystadleuaeth, fe ddisgrifiodd y cyfnod hwn fel un "cyffrous".

"Ma' fe'n mynd i fod yn galed ofnadwy ond dwi'n gyffrous ac yn edrych ymlaen am y dasg sydd o flaen fi a fi methu aros."