An cluba ainmeil à Baile mòr nan Gàidheal a bha an-uiridh a’ comharrachadh 100 bliadhna bho ghabh iad an t-ainm sin – clach-mhìle a thug sinn fhin aig BBC Naidheachdan am follais.

‘S ioma là sònraichte a bh’ aca bhon uairsin agus am fear as motha ann an 1973 nuair a bhuannaich iad Cupa na Camanachd sa Ghearasdan leis a’ chùis a dhèanamh 4-2 air Ceann a’ Ghiùthsaich. Seo na seòid a rinn a' chùis an là sin.

Tha an cluba à Caol an t-Snàimh is Gleann Da-Ruail air adhartas mòr a dhèanamh anns na bliadhnaichean mu dheireadh is iad a-nise air an stèidheachadh san Lìog Nàiseanta.

Cha do bhuannaich iad fhèin Cupa na Camanachd ach ‘s ann glè thric a tha an cupa air tadhal air Comhghall sìos an rathad ann an Taigh na Bruaich. Agus coltach ri Eilean Bhòid, tha grunn chluicheadairean à Caol-Gleann air an cupa a thogail le lèine Kyles Athletic air an druim.

Gu sònraichte làidir aig an taigh, cha bhi duine an-diugh 'son a bhith air an taghadh air falbh ann an Clachan àlainn Ghlinn da Ruaidheil.

Tùs an deilbh, Camanachd Bhòid

‘S iomadh oidhirp a bh’ aig Eilean Bhòid air Cupa na Camanachd ged nach tàinig iad faisg air a thogail – ach tha gu leòr às an eilean air an cupa ainmeil a bhuannachadh ann an dathan nan nàbaidhean aca Caol Bhòid.

Ràinig iad an dàrna cuairt an-uiridh far an robh geama cho doirbh ‘s a ghabhas aca – Ceann a’ Ghiùthsaich aig an Dell. Ach ged a chaill iad 8-1, bha na cluicheadairean òga à Bòd a’ faireachdainn gun do dh’ionnsaich iad na h-uidhir is bidh iad an dòchas gun dèan sin feum dhaibh am-bliadhna.

Cluba eile a tha an ìre mhath òg is iad air an stèidheachadh ann an 2005. Bidh iad ann an Lìog Deas 1 am-bliadhna às dèidh dhaibh crìochnachadh sa 5mh àite san lìog ud an-uiridh.

Coltach ri Obar Dobhair cha do rinn iad cus adhartais ann an Cupa na Camanachd – gu seo.

Tha an cluba à Fìobha air fàs gu mòr bho chaidh an stèidheachadh ann an 2001 is ràinig iad an Lìog Nàiseanta ann an 2022. Tha iad a-nise air ais ann an Lìog Deas 1 is iad sa 4mh àite an-uiridh.

Cha do bhuannaich iad Cupa na Camanachd – fhathast!

Tha trì sgiobaidhean deug san taghadh madainn an-diugh: ochd bhon Lìog Nàiseanta agus còig bho Lìog Deas 1 is Lìog Tuath 1.

Bidh aona gheama san ro-chuairt agus sia geamaichean an uairsin sa chiad chuairt.

Thèid na sia sgiobaidhean a thig às air a' cheann thall dhan dàrna chuairt còmhla ris na deich sgiobaidhean bhon Phrìomh Lìog.

Sin 'son là eile ge-tà. An-dràsta tha sinn a' dol a choimhead air na trì sgiobaidhean deug a tha san ad an-diugh. Eil an sgioba agaibhse nam measg?

Tha am fear-naidheachd againn Doneil MacLeòid aig Drummond Hill cuideachd is bidh e a' cumail an fhiosrachaidh rinn nuair a thòisicheas an taghadh.

Cha do bhuannaich Doneil Cupa na Camanachd ach tha e mion-eòlach air iomain is e air bliadhnaichean mòra a chur seachad a' cluich do dh'Inbhir Nis, Both Fhleisginn, Ceiltich an Òbain, Srath Ghlais, Oilthigh Obar Dheathain agus Sgioba Gàidhlig na h-Alba.

Chan eil feum againn air Rod Stiùbhart - cumaidh Doneil ceart sinn.

Nise fhad 's a tha sinn an seo, tha BBC Naidheachdan air a bhith a' bruidhinn ri Ruari Davidson air thoiseach air an t-seusan ùr a thòisicheas Disathairne.

Cùmaibh sùil air BBC Naidheachdan tron t-seachdain airson barrachd mu phlanaichean Mhgr Davidson.

Tùs an deilbh, SNS

Gu fortanach do Chomann na Camanachd agus gu mì-fhortanach do dhuine sam bith a chunnaic an taghadh 'son Cupa na h-Alba bho chionn beagan bhliadhnaichean, chan eil Rod Stiùbhart an làthair aig Drummond Hill ann an Inbhir Nis an-diugh.

A' tarraing nan sgiobaidhean às an ad bidh àrd-oifigear ùr Chomann na Camanachd, Ruari Davidson, agus àrd-stiùiriche Tulloch Homes, Kieran Graham.

Tha Tulloch a' cumail taic ris an fharpais a-rithist am-bliadhna is an taghadh aig fear de na leasachaidhean aca ann an Inbhir Nis.

Tha an rathad gu cuairt dheireannach Chupa na Camanachd san t-Sultain a' tòiseachadh an seo is an taghadh gus a bhith ann madainn an-diugh airson na ro-chuairt agus na ciad cuairt.

Tha sinn an dùil gun tòisich an taghadh fhèin goirid às dèidh 11:00m is eadar seo is an uairsin bidh sinn a' cluinntinn bhon fhear-naidheachd againn fhìn aig an taghadh agus a' coimhead air na sgiobaidhean uile ann am beagan a bharrachd doimhneachd.

Siuthad ma-thà - Lean gu dlùth sinn!