Naidheachdan 11:00m
Cùiltearachd Dhaoine
Foillsichidh Sir Keir Starmer taic-airgid airson dèiligeadh ri buidhnean a tha a' cùiltearachd dhaoine 's e aig àrd-sheanadh na buidhne poilis eadar-nàiseanta Interpol. Thèid tòrr den £75m a chosg air obair-faire agus luchd-sgrùdaidh sònraichte a bhios ag amas stad a chur air inimrichean bho bhith a' tighinn thar Chaolas Shasainn ann am bàtaichean beaga. Ach thuirt seann àrd-oifigear inimrich nam port, Kevin Saunders, nach obraich am plana, leis gu bheil a' chuid as motha de chùl-mhùtairean stèidhte taobh a-muigh na Rìoghachd Aonaichte.
An Spàinn
Chaidh cùirp chàraid Bhreatannaich a lorg làithean an dèidh do thuiltean sgrios a dhèanamh anns an Spàinn. Cha deach Don Turner, 78, agus a' bhean aige Terry, 74, fhaicinn bho bha tuiltean ann am Valencia aig toiseach na seachdain seo chaidh. Dhearbh an teaghlach gun deach na cuirp aca a lorg anns a' chàr aca Disathairne. Bhàsaich còrr agus 200 duine uile gu lèir anns na tuiltean.
Bholcàno
Bhàsaich co-dhiù deichnear ann an Eilean Flores an dèidh do bholcàno spreadhadh. Chaidh sgìre mu sheachd cilemeatair timcheall air Beinn Lewo-tobi Laki ann an Indonèisia a dhùnadh.
Na Stàitean Aonaichte
Tha Dòmhnall Trump agus Kamala Harris trang ag iomairt ann an stàitean far a bheil bhòt faisg là ro thaghadh Cheann-Suidhe nan Stàitean Aonaichte. Tha Ms Harris ann am Pennsylvania. Tha Mgr Trump ann an sin cuideachd agus e a' dèanamh air Carolina a Tuath agus Michigan. Dh'fhaodadh buil na bhòta anns na stàitean sin buaidh mhòr a thoirt air an taghadh.
Traoin Chanaigh
Tha buidheann ghlèidhteachais ag ràdh gu bheil àrdachadh "gealltanach" anns an àireimh de thraoin ann an Eilean Chanaigh às dèidh bhliadhnaichean de dh'àireamhan gu math ìosal. Thuirt Urras Nàiseanta na h-Alba gun deach co-dhiù eadar dusan agus 14 eun fireann a chlàradh. Bha bliadhnaichean ann far nach robh ann ach aon no dhà. Tha na t-Urras, a tha a' stiùireadh an eilein, ag ràdh gun do chuidich nithean leithid mar a tha croitearan agus tuathanaich a' seachnadh gearradh an fheòir aig amannan sònraichte.
Quincy Jones
Agus bhàsaich an ceòladair agus riochdaire ciùil Aimeireaganach Quincy Jones. Bha e 91. Thòisich e ann a còmhlain mhòra anns na 50an agus na 60an. Bha e ag obair fad 75 bliadhna còmhla ri leithid Frank Sinatra, Ella Fitzgerald agus Aretha Franklin. 'S e an riochdaire air clàr Thriller aig Michael Jackson ann an 1982.