Naidheachdan 11:00m

CBI

Tha tè de na buidhnean gnothachais as motha sa Rìoghachd Aonaichte ag ràdh gu bheil buidseat an t-Seansalair air cuid de ghnothachasan a chur ann an staing èiginneach. Tha Caidreachas Ghnothachasan Bhreatainn ag ràdh gum bi leisg air companaidhean daoine fhastadh air tàilleibh an àrdachaidh air an àrachas nàiseanta - rud a tha a' dèanamh dìmeas air oidhirpean an riaghaltais a rèirsan gus barrachd dhaoine a thàladh gu obair. Thuirt Riaghaltas na Rìoghachd Aonaichte gu bheil aca ri co-dhùnaidhean doirbh a dhèanamh gus piseach a thoirt air suidheachadh ionmhais na dùthcha.

Àrachas Nàiseanta

Aig a' cheart àm, tha am BBC a' tuigsinn gum faigh Riaghaltas na h-Alba mu £300m airson dèiligeadh ris an àrdachadh san àrachas nàiseanta sa roinn phoblaich. Tha ministearan an Riaghaltais Albannaich ag ràdh ge-tà gun cosg an t-àrdachadh a tha seo mu £500m dhaibhsan. Thuirt Riaghaltas na h-Alba gu bheil na còmhraidhean a' leantainn le Roinn an Ionmhais agus nach eil sgath cinnt aca air thoiseach air a' bhuidseat Albannach a thèid fhoillseachadh air an ath-sheachdain.

Rabhaidhean thuiltean

Tha cha mhòr 200 rabhadh an sàs an-dràsta an Sasainn, an Alba agus anns a' Chuimrigh mu thuiltean, le trì dhiubh aig ìre fìor dhona. Tha iad seo an sàs às dèidh an uisge thruim a bha an cois Stoirm Bert thar an deireadh-seachdain. Chaidh milleadh mòr a dhèanamh air ceann a deas na Cuimrigh gu seachd àraid far an deach mòr-thachartas a ghairm tàilleibh an t-suidheachaidh a bh' ann.

Aleksandr Benga

Tha oifigearan poilis ann an Steòrnabhagh air a bhith a' cur stad air càraichean air Rathad a' Ghlinne nan iomairt gus lorg fhaighinn air deugaire a th' air a bhith dhìth fad seachdain. Chunnacas Aleksandr Benga - a tha sia bliadhna deug - mu dheireadh seachdain bhon diugh aig mu 08.45 sa mhadainn. Tha na poilis a' cur ìmpidh orrasan aig a bheil fiosrachadh air neo dealbhan dashcam a dhol thuca.

Tubaist air an A82

Tha na poilis a' sireadh fiosrachaidh mu thubaist rathaid air a' Ghàidhealtachd às dèidh do dh'aona charbad teicheadh às dèidh làimhe. Thachair an tubaist eadar bhana dubh Mercedes agus càr Volkswagen glas aig mu 5.00 feasgar an-dè air an A82 faisg air Obair Itheachan. Chaidh dràibhear a' chàir, boireannach, 49, a thoirt don ospadal far a bheil i an-dràsta ann an staid ìosal. Bha dràibhear a' bhana iar stad beagan astair air falbh mus do theich iad.

Inimrich air am bàthadh sa Ghrèig

Thuirt sgioba mhaor-cladaich na Grèige gun deach ochdnar inimreach a mharbhadh às dèidh mar a chaidh an sgoth san robh iad fodha sa Mhuir Aegean. Bha sianair chloinne nam measg. Chaidh cobhair a dhèanamh air 40 duine eile, 's tha an iomairt teasairginn an-dràsta a' leantainn.