Ben Davies: 'Mae'n rhaid i ni fod ar ein gorau'

Dywed yr amddiffynnwr, Ben Davies, y bydd yn rhaid i Gymru "fod ar ein gorau" yng ngêm ragbrofol Cwpan y Byd yn erbyn Gwlad Belg nos Fawrth.

Mae Cymru'n chwarae'r tîm sydd ar frig rhestr detholion y byd gan wybod y byddai pwynt yn sicrhau - fwy neu lai - gêm gartref yn y gêm ail gyfle ym mis Mawrth.

Fe sgoriodd Davies, 28, ei gôl gyntaf dros ei wlad yn y fuddugoliaeth 5-1 yn erbyn Belarws ddydd Sadwrn.

Roedd Cymru eisoes yn sicr o le yn y gemau ail gyfle ar gyfer Qatar 2022 ar ôl ennill eu grŵp yng Nghynghrair y Cenhedloedd ac wedi i Sbaen drechu Groeg nos Iau.