BBC Cymru Fyw

Mae panel arbennig wedi bod yn trafod rôl merched o fewn chwaraeon draw ym mhabell Plaid Cymru.

Pwysleisiodd y panel, oedd yn cynnwys y chwaraewr rhyngwladol Gwenllian Pyrs, bod y sefyllfa yn gwella yng Nghymru ond bod dal mwy o waith angen ei wneud yn y maes.

Dywedodd Ceri Meirion (ail o'r chwith) bod llawer mwy o gyfleoedd i ferched ifanc bellach a bod modelau rôl heddiw yn dangos fod modd i ferched lwyddo yn y byd chwaraeon.

Eisteddfod Genedlaethol Cymru

Er yr holl bryderon am y tywydd a'r meysydd parcio mae'r Steddfod wedi cyhoeddi bod "popeth yn gweithio'n dda" fore Iau.

Mewn cynhadledd i'r wasg dywedodd llefarydd ar ran yr Eisteddfod Genedlaethol nad oes unrhyw newid wedi bod i'r cynlluniau gwreiddiol eto.

Wrth ymateb i gwestiwn am baratoadau yn sgil rhagolygon tywydd anffafriol, ychwanegodd y llefarydd eu bod nhw mewn cysylltiad cyson gyda'r partneriaid allweddol a'r holl stondinwyr er mwyn sicrhau bod trefniadau yn eu lle.

BBC Cymru Fyw

Trafodaeth arbennig draw yn y Sinemaes yn dathlu gyrfa Heulwen Haf.

Bu farw'r actores a'r gyflwynwraig ym mis Rhagfyr y llynedd.

Angharad Mair oedd yn cadeirio'r panel, oedd hefyd yn cynnwys Stifyn Parri a Branwen Cennard.

Eisteddfod Genedlaethol Cymru

Mae digon yn digwydd draw yng nghaffi Maes B drwy gydol y prynhawn.

Roedd y babell yn orlawn ar gyfer y perfformiad o'r ddrama 'Bachu'.

BBC Cymru Fyw

Mae sioe Cyw wastad yn llawn dop ym mhabell S4C ar y Maes.

Eisteddfod Genedlaethol Cymru

Ym Mhabell y Cymdeithasau mae ‘na drafodaeth yn holi ‘a ydy celf yn talu?’

Un peth mae’r artist ifanc Lisa Eurgain yn ei ddweud yw ei bod hi dal yn dod ar draws pobl sy’n cwestiynu a ydy o’n yrfa go iawn sy’n gallu cynnal rhywun - er ei bod hi wedi bod yn gwneud ei chelf yn llawn amser bellach.

Yn ôl Catrin Bala fe ddylai sefydliadau fel yr Amgueddfa Genedlaethol fod yn prynu mwy o waith artistiaid, nid dim ond eu harddangos bob hyn a hyn.

Mae Carwyn Evans o Gastellnewydd Emlyn yn cytuno, gan ddweud bod darnau celf yn “cyfrannu at ein diwylliant a’n hanes”, gan wneud cymhariaeth â’r byd llyfrau ble mae copi o bob un sy’n cael ei gyhoeddi yng Nghymru yn cael ei chadw yn y Llyfrgell Genedlaethol.

BBC Cymru Fyw

Celt, 2 oed o Aberystwyth yn eistedd mewn Ambiwlans o’r 30au.

BBC Cymru Fyw

Mae hi'n amser cinio ar y Maes yn Llanrwst ac mae'r ciwiau'n tyfu ar gyfer y llefydd bwyd.

Urdd Gobaith Cymru

Mae'r Urdd wedi lansio ymgyrch newydd gyda'r nod o gynnig "cyfleoedd amhrisiadwy i blant a phobl ifanc difreintiedig".

Yn ystod cynhadledd ar faes y Steddfod fore Iau dywedodd Prif Weithredwr yr Urdd, Siân Lewis, ei bod hi'n "gyfrifoldeb arnom i wneud ein rhan i geisio mynd i'r afael ag effaith tlodi ar blant".

"Fel mudiad sydd â phlant a phobl ifanc wrth wraidd ein holl weithgareddau, dyma un ffordd o sicrhau bod modd i bawb, beth bynnag fo'u cefndir, gael y profiad o aros yn un o'n gwersylloedd."

Llwyddodd y gronfa i gynnig lle i 100 o blant yn 2019, ond mae'r Urdd yn dyblu'r targed eleni gan obeithio cynnig profiad gwersyll haf i 200 o bobl ifanc Cymru.

Traffig Cymru

Eisteddfod Genedlaethol Cymru

Y naturiaethwr Twm Elias yn derbyn y Fedal Wyddoniaeth ar lwyfan y Pafiliwn.

Yn y gynhadledd i'r wasg y bore 'ma fe ddywedodd pa mor falch yr oedd o fod wedi gallu cyfrannu at gynyddu'r defnydd o dermau Cymraeg wrth drafod y byd natur.

"Os ydy'r hen iaith 'ma yn mynd i barhau a datblygu, mae'n rhaid mynd a hi i lot o gyfeiriadau gwahanol," meddai.

BBC Cymru Fyw

Digonedd o bobl yn manteisio ar y cyfle i glywed mwy am gystadleuaeth y Fedal Ryddiaith eleni yng nghwmni'r enillydd Rhiannon Ifans.

Testun y gystadleuaeth eleni oedd cyfrol o ryddiaith greadigol heb fod dros 40,000 o eiriau ar y testun 'Cylchoedd'.

Mae'r nofel fuddugol, Ingrid, yn cael ei thrafod ar Lwyfan y Llannerch ar hyn o bryd.

BBC Radio Cymru

BBC Cymru Fyw

Ewch draw i babell Sain er mwyn gweld murlun arbennig sy'n cynnwys rhai o'r artistiaid pwysicaf yn hanes y label recordiau enwog.

BBC Cymru Fyw

Ciw awyddus i weld y gystadleuaeth drama fer, Dan y Wenallt

Cylchgrawn, Cymru Fyw

Mae gwraig dyn sydd ar cyflwr Alzheimer's yn gobeithio y bydd bws Dementia ynyr Eisteddfod flwyddyn nesaf.

Cafodd Rob Beattie ddiagnosis o’r cyflwr yn 2017 ac fe fuodd y cwpl yn trafod eu profiad o fyw gyda Dementia mewn digwyddiad ar faes yr Eisteddfod gyda Merched y Wawr.

Dywedodd Karen fod angen i’r Eisteddfod wneud mwy a bod angen “llefydd i fod yn ddistaw bach”.

BBC Radio Cymru

Eisteddfod Genedlaethol Cymru

Mae lliwiau'r blowsiau yn cyd fynd yn berffaith gyda lliwiau'r fflagiau!

Eisteddfod Genedlaethol Cymru

Tri pheth i’w gwneud ar y Maes heddiw:

-Yn y Babell Lên 12:00. Cyfle am stori cyn cinio- Llyn yr Afanc, cyflwyniad arbennig gan Mair Tomos Ifans.

-Bar Syched 12.00, 14.00, 16.00. Theatr Stryd- Rygbi: Annwyl I mi. Perfformiad sy’n cysylltu dawns ag angerdd Cymru at rygbi. Cwmni Dawns Genedlaethol Cymru yn perfformio. Bydd y perfformiad yn cynnwys cyfansoddiad newydd a dyluniad sain gan enillydd gwobr BAFTA Cymru, Tic Ashfield.

-Tŷ Gwerin, 17.30. Y Stomp Fawr Werin. Unigolion yn cystadlu am Dlws Stomp Tŷ Gwerin gyda rowndiau fel cerdd dant, canu baled a dweud stori. (efallai’n anaddas i blant)

Eisteddfod Genedlaethol Cymru

Siôn Jenkins sydd gyntaf ar y llwyfan yng nghystadleuaeth Llefaru Unigol Agored. Efallai bod ei wyneb yn gyfarwydd i rai ohonoch chi. Mae'n cyflwyno rhaglen Ein Byd ar S4C.