Crynodeb

  • Dilynwch y llif byw am y newyddion, lluniau a chlipiau diweddara' o'r Maes

  • Y Fedal Ddrama ydy'r prif seremoni yn y pafiliwn ddydd Iau

  • Nid yw'r BBC yn gyfrifol am y dewis o ddarnau sy'n cael eu perfformio ar y llwyfan. O bryd i'w gilydd fe allant gynnwys iaith gref a/neu themâu sydd ddim yn addas i blant

Y diweddaraf yn fyw

  1. Rhieni angen 'eglurder' ar addysg Gymraeg

    BBC Cymru Fyw

    Mae Comisiynydd y Gymraeg wedi awgrymu bod rhieni'n cael eu camarwain ynghylch faint o addysg Gymraeg mae eu plant yn ei dderbyn mewn rhai ysgolion.

    Yn ôl Aled Roberts dyw’r ddarpariaeth ddim yn gyson mewn rhai ysgolion dwyieithog.

    Dywedodd hefyd ar y maes ei fod wedi cyfarfod teuluoedd Cymraeg iaith gyntaf sy’n credu bod astudio pynciau fel gwyddoniaeth drwy'r Gymraeg yn rhy "anodd".

  2. Cabarela'n codi'r to

    Eisteddfod Genedlaethol Cymru

    Bu'r maes yn brysur nes yn hwyr neithiwr, gyda chystadlu yn y Pafiliwn a digwyddiadau ar rai o'r llwyfannau eraill.

    Un o'r rheiny oedd sioe Cabarela, a ddenodd dorf lawn i'r Babell Len ar gyfer noson o hwyl, canu a hiwmor coch.

    Dan arweiniad triawd chwiorydd Sorela, mae'r digwyddiad a ymddangosodd ar arlwy'r Eisteddfod am y tro cyntaf yn 2017 bellach yn mynd o nerth i nerth.

    Ac fel y gwelwch chi, roedd sawl wyneb cyfarwydd o'r sgrin a'r llwyfan yno i ddiddanu'r gynulleidfa!

    cabarela

  3. Un newid i'r drefn i deithwyr

    Eisteddfod Genedlaethol Cymru

    Mae'r trefniadau teithio i faes yr Eisteddfod heddiw yn parhau fel oedden nhw ddoe, oni bai am un newid.

    I deithwyr sy'n dod i mewn i Lanrwst ar yr A548 o gyfeiriad Abergele, mae'r Eisteddfod wedi dweud y byddan nhw nawr yn cael eu cyfeirio at faes parcio gwahanol.

    Hyd yma mae llawer o geir sydd wedi bod yn dod o'r cyfeiriad yma wedi bod yn parcio ger Maes B yn y dref.

    Fe allai pethau newid eto i deithwyr os yw'r tywydd neu gyflwr rhai o'r caeau parcio'n gwaethygu rhagor - ond ar hyn o bryd mae'r haul yn tywynnu.

  4. Rhaid dilyn yr arwyddion

    Post Cyntaf
    BBC Radio Cymru

    Hefyd ar y Post Cyntaf, pwysleisiodd Betsan Moses y pwysigrwydd o ddilyn yr arwyddion wrth gyrraedd y Maes.

    Gwrandewch ar y sgwrs yn llawn isod.

    Betsan Moses yw Prif Weithredwr yr Eisteddfod

  5. 'Yr Eisteddfod yn parhau'

    Post Cyntaf
    BBC Radio Cymru

    Mae'r tywydd yn dipyn o destun trafod ar y Maes, gyda rhybudd am law trwm a gwyntoedd cryf dros y dyddiau nesaf.

    Mae Betsan Moses, Prif Weithredwr yr Eisteddfod, wedi dweud y bore 'ma nad ydyn nhw'n gweld yr angen i gwtogi ar ddigwyddiadau'r wyl ar hyn o bryd.

    Ar y Post Cyntaf, dywedodd: "Mae yna asesiad risg wedi cael ei 'neud ar gyfer pob un o'n strwythura' ni, felly ni'n ymwybodol iawn o beth alle nhw gymryd.

    "Mae gynnon ni gynlluniau wrth gefn, ond ar hyn o bryd y'n ni'n parhau."

    Maes

    Roedd gwaharddiad ar symud cerbydau ar y Maes Carafanau am gyfnod

  6. Bore da a chroeso

    BBC Cymru Fyw

    Bore da a chroeso i'r llif byw ar ddydd Iau yr Eisteddfod Genedlaethol yn Llanrwst.

    Yma fe gewch chi'r newyddion diweddara' o'r pafiliwn ac o'r maes yn ystod y dydd.

    Eisteddfod