Cyngor Torfaen

Mae Cyngor Torfaen wedi gwneud apêl wrth i bobl wneud ymarfer corff yn ystod yr argyfwng presennol i gymryd unrhyw sbwriel adref.

Dywedodd y Cynghorydd Mandy Owen, yr aelod gweithredol dros yr amgylchedd: "Rydym yn ceisio cynnal gwasanaethau hanfodol cystal medrwn ni, gan edrych ar yr un pryd ar ôl iechyd a diogelwch ein staff.

"Trwy fynd â sbwriel adref gyda chi a defnyddio'ch gwasanaeth ailgylchu ymyl y ffordd cymaint ag y medrwch chi, rydych yn rhyddhau staff fel y gallan nhw sicrhau fod gwasanaethau hanfodol yn parhau."

Iechyd Cyhoeddus Cymru

Mae ffigyrau diweddaraf Iechyd Cyhoeddus Cymru yn dangos fod 25 yn rhagor o bobl wedi marw wedi iddyn nhw gael Covid-19.

Golygai hyn fod 609 bellach wedi marw yng Nghymru ar ôl cael yr haint.

Mae 304 yn rhagor o bobl wedi cael prawf positif, sy'n golygu bod 7,850 o achosion o coronafeirws bellach wedi'u cofnodi yma.

Cyngor Pen-y-bont ar Ogwr

Mae Cyngor Pen-y-bont ar Ogwr wedi penderfynu y bydd parciau a mynwentydd y sir yn parhau ar gau am y tro.

Dywed y cyngor y byddan nhw'n adolygu'r sefyllfa yn gyson.

Mae'r mynwentydd yn cynnwys mynwent amlosgfa Llangrallo.

Golygai'r penderfyniad y bydd parc y Welfare, Maesteg, a Pharc Griffin, Porthcawl, hefyd yn parhau ar gau.

Llywodraeth Cymru

Yn ôl Mr Gething roedd sicrhau PPE yn "fwy o flaenoriaeth" nawr na'r heriau sy'n wynebu'r llywodraeth wrth gynnal profion ar gyfer Covid-19.

Dywedodd fod digon o stoc i bara am "ychydig ddyddiau".

"Ond jest oherwydd nad ydym yn yr un sefyllfa ag oedd yn bodoli yn Lloegr dros y penwythnos, dyw hynny ddim yn golygu nad oes yna bryderon yma - ac mae yna bryderon o fewn y llywodraeth.

"Dyna pam i fi gyfeirio yn benodol at fasgiau a gynau fel eitemau rydym yn ceisio ei sicrhau, ac i sicrhau stoc er mwyn bod gan ein staff ddigon o gyflenwadau i barhau i wneud eu gwaith."

Llywodraeth Cymru

Dywed y gweinidog iechyd fod Llywodraeth Cymru yn gweithio gyda chwmni Amazon ar wefan newydd i brofi coronafeirws.

Byddai gweithwyr iechyd a gofal cymdeithasol, meddai, yn gallu archebu slot ar-lein a'i fod yn gobeithio y byddai opsiwn i'w brofi mewn canolfan brawf gyrru i mewn neu becyn prawf cartref.

Dywedodd y gweinidog fod "gwiriadau terfynol yn cael eu gwneud" ond "dylai fod ar gael yr wythnos nesaf".

Dywedodd Mr Gething y byddai'n rhoi diweddariad pellach yn ddiweddarach yr wythnos hon.

Llywodraeth Cymru

Wrth gyfeirio at offer diogelu PPE ar gyfer gweithwyr rheng flaen dywedodd Mr Gething fod yna ddigon o'r rhain ar gael am y tro.

Ond ychwanegodd fod hyn yn ddibynnol ar "waith caled nifer o bobl er mwyn sicrhau fod cyflenwadau yn parhau, ac wrth gwrs mae llinellau cyflenwi dan fygythiad".

"Y ddwy eitem sydd dan fwyaf o fygythiad yw masgiau a gynau sy'n atal hylifoedd, ond rydym yn hyderus fod gennym ddigon o'r rhain ar hyn o bryd," meddai.

Ychwanegodd nad oedd y gwasanaeth iechyd yng Nghymru yn wynebu'r un problemau ag sy'n bodoli mewn rhannau o Loegr ar hyn o bryd.

Llywodraeth Cymru

Dywedodd y gweinidog iechyd fod dros draean o gleifion yn ysbytai'r DU o gefndiroedd du, Asiaidd neu leiafrifol o'i gymharu â 18% o boblogaeth y DU.

Dywedodd Mr Gething y byddai tîm o Lywodraeth Cymru yn gweithio gydag Iechyd Cyhoeddus Cymru i gasglu tystiolaeth a data er mwyn canfod unrhyw ffeithiau neu risg posib.

Llywodraeth Cymru

Mae Llywodraeth Cymru yn cynnal ymchwiliad ar frys i'r niferoedd uchel o bobl o gefndiroedd ethnig lleiafrifol sy'n cael eu heffeithio gan Covid-19.

Wrth siarad yn ystod cynhadledd ddyddiol Llywodraeth Cymru, dywedodd y gweinidog iechyd Vaughan Gething fod yna "dystiolaeth gynyddol" fod pobl o gefndiroedd ethnig lleiafrifol yn cael eu heffeithio yn anghyfartal.

Cyngor Powys

Mae Cyngor Powys wedi atgoffa pobl i ddal gafael ar wastraff ailgylchu tra bod y cyfyngiadau presennol yn parhau mewn grym.

Dywed y cyngor eu bod yn parhau i gasglu sbwriel o garreg y drws ond fod canolfannau ailgylchu wedi cau am y tro.

Mae trigolion yn cael eu hannog i beidio â theithio i safleoedd ailgylchu cymunedol oherwydd "nid yw hyn yn deithio angenrheidiol".

Mae'r cyngor yn rhybuddio pobl rhag gadael gwastraff ar y llawr pe bai biniau yn y safleoedd hyn yn llawn.

Dywedodd llefarydd: "Nid oes esgus dros achosi'r fath llanast a thipio ar y slei mewn safleoedd ailgylchu cymunedol.

"Ar adeg pan mae pawb yn gwneud eu gorau glas i gadw'n ddiogel a pheidio ymledu'r coronafeirws, mae ymddygiad gwrthgymdeithasol fel hyn yn annerbyniol."

Ffynhonnell y llun, Cyngor Powys

Dyma grynodeb o'r rheolau sydd mewn grym yng Nghymru a'r cyngor i'r cyhoedd er mwyn helpu i fynd i'r afael â'r argyfwng coronafeirws.

Cliciwch yma i ddarllen mwy.

Mae'r canwr West End adnabyddus John Owen Jones o Borth Tywyn yn Sir Gâr wedi rhyddhau deuawd arbennig gyda'r diddanwr Matt Lucas er mwyn codi arian i'r gwasanaeth iechyd.

Mae'r cwmni yswiriant Cymreig, Admiral wedi cyhoeddi eu bod nhw'n ad-dalu £110 miliwn i gydnabod bod cwsmeriaid yswiriant car a fan wedi bod yn gyrru llai yn ddiweddar i helpu i arafu lledaeniad coronafeirws.

Bydd pob cwsmer modur yn derbyn ad-daliad o £25 cyn diwedd mis Mai.

Mae mudiad Urdd Sant Ioan wedi bod yn rhoi teyrnged i Gerallt Davies, y parafeddyg o Abertawe.

Roedd Mr Davies yn aelod o Wasanaeth Ambiwlans Cymru ond hefyd yn wirfoddolwr gyda Gwasanaeth Ambiwlans Sant Ioan.

Bu farw'r parafeddyg, a oedd yn gweithio yng ngorsaf Cwmbwrla yn Abertawe, wedi iddo brofi'n positif i Covid-19.

Yn aelod o Urdd Sant Ioan ers 40 mlynedd fe dderbyniodd MBE am ei waith gyda'r mudiad.

"Roedd yn un o arwyr Cymdeithas Ambiwlans Sant Ioan Cymru ac Ymddiriedolaeth Gwasanaeth Ambiwlans Cymru. Bydd o byth yn angof," meddai teyrnged ar safle we'r mudiad.

"Rydym yn estyn ein cydymdeimlad i deulu Gerallt, ei gyfeillion agos a'i gyd wirfoddolwyr yn ystod yr amser anodd yma."

Ffynhonnell y llun, Gwasanaeth Ambiwlans Cymru

Mae Dylan Jones-Evans, Athro Busnes ym Mhrifysgol De Cymru, wedi rhybuddio y gall economi Cymru gael ei daro'n waeth na gweddill y DU yn sgil y pandemig.

Wrth edrych ar ffigyrau canolfan ymchwil ERC, mae'n pryderu am dynged busnesau yma, ac yn benodol y rhai newydd.

Heddlu De Cymru

Mae dyn o Aberdâr wnaeth beswch yn wynebau dau blismon wedi ei garcharu am wyth mis.

Wrth gael ei arestio roedd Christopher Davies, 40 oed, wedi troi at y ddau swyddog a dweud "bydd yn rhaid i chi fy nghymryd i'r ysbyty oherwydd bod gennyf-" ac yna peswch arnyn nhw.

Plediodd yn euog i gyhuddiadau o ymosod, torri gorchymyn llys a chyfathrebu maleisus.

Dywedodd llefarydd ar ran Heddlu'r De fod y weithred yn un gywilyddus gan achosi pryder mawr i'r swyddogion.

Ffynhonnell y llun, Heddlu De Cymru

(Nid Bruce) Wayne a Ceri yn dod â gwên i wynebau pobl Y Bala...

Plaid Cymru

Mae Plaid Cymru wedi galw am ymchwiliad “heb anwybyddu dim” i’r ymateb i bandemig Covid-19 yng Nghymru.

Dywedodd arweinydd Plaid, Adam Price, y dylai ymchwiliad Cymreig gael ei gynnal dan arweiniad barnwr gydag adroddiad interim erbyn diwedd yr haf.

Byddai’r ymchwiliad barnwrol yn rhedeg ar y cyd ag ymchwiliad gan farnwr yn y DU, meddai'r blaid.

Dywedodd Mr Price: "Mae dysgu gwersi i fod â gwybodaeth well er mwyn ymateb yn y dyfodol a gwneud penderfyniadau gwell yn bwysicach na dweud pwy sydd ar fai.

“Fe all Covid-19 fod gyda ni am beth amser – felly gall aros nes bydd yr argyfwng ar ben nes i ni ddysgu gwersi wthio’r adroddiad terfynol ymlaen lawer blwyddyn i’r dyfodol.

“Mae angen i ni ddysgu gwersi nawr."

Mae bragdy ym Magwyr Sir Fynwy wedi newid cyfeiriad dros dro gan gynhyrchu nwyddau hylendid yn lle alcohol ar gyfer gweithwyr y rhengflaen.

Yr wythnos hon fe wnaeth Magor Brewery roi 1,000 litr o hylif golchi dwylo i dimau gofal cymdeithasol y cyngor sir lleol.

Ffynhonnell y llun, Magor Brewery