Dyna ni am heddiw, ond fe fydd y llif byw yn ôl 'fory gyda'r diweddara' yn ystod y dydd.

Diolch am ddilyn a hwyl am y tro.

Cyn i ni orffen heno, rhywbeth bach i godi calon.

Mewn cyfnod lle nad oes chwaraeon, does dim bwrlwm sy’n dod law yn llaw â’r gemau mawr chwaith.

Felly mae’r dyfarnwr pêl-droed Aled Rhys Williams wedi bod yn cynnal cyngerdd i rai o drigolion Llanrug yng Ngwynedd bob nos Iau, gan chwarae rhai o anthemau sy’n aml i’w clywed mewn caeau pêl-droed a rygbi ar ei utgorn.

Clwb Pêl-droed Abertawe

Pwt o newyddion o'r byd chwaraeon, lle mae Clwb Pêl-droed Abertawe wedi cyhoeddi bod chwaraewyr ac uwch-swyddogion wedi cytuno i leihau eu cyflogau o 20% am dri mis, ar yr amod bod y clwb yn ad-dalu'r swm pan fydd y byd chwaraeon yn ôl fel yr arfer.

Mae'r ddau glaf Covid-19 cyntaf fuodd yn derbyn cymorth anadlu yn ardal Bwrdd Iechyd Bae Abertawe wedi cael gadael yr ysbyty.

Dywedodd Danny Egan, 73, (isod) mai'r peth cyntaf y byddai'n ei wneud oedd rhoi cusan i'w wraig ar ôl derbyn cymeradwyaeth staff Ysbyty Treforys.

Dywedodd y nyrs Kirsty Hopkins bod Mr Egan a chlaf arall, David Courtney-Williams, 48, wedi bod yn wael iawn ac felly ei fod yn wych gweld y ddau'n gwella.

Mae cwmni Debenhams wedi rhybuddio y bydd rhaid iddo gau ei brif siopau yng Nghymru oni bai fod y llywodraeth yn gwneud tro pedol ar ei benderfyniad i beidio lleihau cyfraddau busnes i'r busnesau mwyaf.

Mae Canghellor Llywodraeth y DU, Rishi Sunak wedi lleihau cyfraddau i bob busnes ym meysydd masnach, hamdden a lletygarwch yn Lloegr am flwyddyn.

Dywedodd Llywodraeth Cymru'n wreiddiol y bydden nhw'n defnyddio'r un cynllun, cyn penderfynu na fyddai busnesau gwerth dros £500,000 yn cael cymorth.

Mae'r BBC wedi gofyn am sylw gan Lywodraeth Cymru am bryderon Debenhams.

Heddlu Gogledd Cymru

Mae prif gwnstabl Heddlu Gogledd Cymru wedi dweud bod defnydd o ail gartrefi yn fater "cymhleth" cyn cyfarfod gyda Llywodraeth Cymru i drafod y mater.

Dywedodd Carl Foulkes bod y llu yn derbyn llawer o alwadau: "Mae ein pwerau fel yr heddlu yn glir os ydy pobl yn gyrru i ail gartrefi - gallwn ni eu troi yn ôl gan nad yw'n daith hanfodol."

"Ond os ydyn nhw yna'n barod, mae'n fwy cymhleth." Ychwanegodd bod y ffaith bod rhai ail gartrefi'n cael eu defnyddio i roi llety i weithwyr allweddol yn cymhlethu'r mater ymhellach.

"Mae angen ymdriniaeth ofalus, yn cynnwys nifer o asiantaethau."

Bwrdd Iechyd Prifysgol Betsi Cadwaladr

Mae Bwrdd Iechyd Betsi Cadwaladr yn dweud mai "problemau sydd wedi eu canfod yn ein system adrodd" ydy'r rheswm dros gynnydd sylweddol yn nifer y marwolaethau yn yr ardal yn gysylltiedig â Covid-19.

Roedd nifer y marwolaethau gafodd eu cyhoeddi heddiw yn cynnwys 84 oedd yn dyddio 'nôl rhwng 20 Mawrth a 22 Ebrill, gan ddod â'r cyfanswm yno i 88.

Dywedodd llefarydd bod diweddariad heddiw "yn cynnwys croniad o achosion ble mae claf wedi marw ac wedi cael prawf positif am Covid-19".

Ychwanegodd: "Mae'r holl ddata ar achosion Covid-19 a marwolaethau wedi ei gasglu'n gywir ac mae'r broblem yn ymwneud â'r modd mae'r data yn cael ei rannu."

Mae'r broblem wedi ei datrys yn ôl y bwrdd iechyd.

Ni chafodd system ceisio am brawf coronafeirws ar y we, sydd wedi'i ddatblygu gan Lywodraeth y DU, ei drafod "yn fanwl" dros bedair gwlad y DU.

Wrth ateb cwestiwn ar pam nad oedd Llywodraeth Cymru yn rhan o'r system, dywedodd prif swyddog meddygol Cymru bod "adegau pan hoffwn ni, yng Nghymru, fod wedi cael mwy o wybodaeth am rai manylion ymarferol".

Dywedodd Dr Frank Atherton bod y syniad wedi ei gytuno'n fras, ond bod "sawl esiampl pan mae cytundeb bras wedi golygu cymryd camau gwahanol" dros wledydd y DU.

Dywedodd Dr Atherton bod profi, rhannu offer diogelwch a gadael y cyfnod o ynysu yn esiamplau.

Mae tair o farchnadoedd ffermwyr y gorllewin wedi dod at ei gilydd i gynnig gwasanaeth 'rhith' yn ystod y cyfyngiadau coronafeirws gan nad ydy pobl yn gallu ymgynnull bellach.

Eisoes mae 25 o gynhyrchwyr lleol wedi ymuno yn yr hwb, sy'n bartneriaeth rhwng marchnadoedd Aberystwyth, Aberaeron a Hwlffordd.

Maen nhw'n cynnig gwasanaeth clicio-a-chasglu ar-lein, gyda chwsmeriaid wedyn yn cael amser penodol i ddod i 'nôl eu cynnyrch.

Ffynhonnell y llun, Getty Images

Mae Prifysgol John Hopkins, sy'n casglu data ar Covid-19 yn yr Unol Daleithiau, yn dweud bod dros 50,000 o bobl wedi marw yno bellach.

Yr Unol Daleithiau yw'r wlad sydd â'r nifer uchaf o farwolaethau o bellffordd, ac yno mae'r nifer uchaf o achosion hefyd - dros 869,000.

Ffynhonnell y llun, Getty Images

YouTube

Mae cyfansoddwr adnabyddus wedi canmol côr o Gaerdydd am eu perfformiad rhithwir nhw o un o'i ddarnau mwyaf poblogaidd.

Mae perfformiad Côr CF1 o 'Baba Yetu' gan Christopher Tin bellach wedi cael ei wylio degau o filoedd o weithiau ar y cyfryngau cymdeithasol.

Fe wnaeth y cyfansoddwr rannu'r fideo ar-lein, gan ddisgrifio'r perfformiad fel un “anhygoel".

Dywedodd arweinydd CF1, Eilir Owen Griffiths fod y darn yn "ffefryn y côr ers talwm" a bod gan y geiriau "ystyr newydd o obaith yn ystod yr amseroedd caled hyn".

Twitter

Iechyd Cyhoeddus Cymru

Dydy Iechyd Cyhoeddus Cymru ddim wedi cynnig esboniad eto ynglŷn â pham y bu oedi sylweddol cyn cadarnhau'r 84 o farwolaethau ychwanegol yn y gogledd.

Roedd y ffigyrau Covid-19 diweddaraf gafodd eu cyhoeddi'r prynhawn 'ma yn cynnwys nifer o farwolaethau ychwanegol yn ardal Bwrdd Iechyd Betsi Cadwaladr oedd heb eu cynnwys yn y ffigyrau gynt.

Wrth feio "oedi yn y broses adrodd", dywedodd llefarydd: "Mae Iechyd Cyhoeddus Cymru yn gweithio gyda phartneriaid ar hyn o bryd i sicrhau ein bod ni'n darparu'r data fwyaf cywir a diweddar â phosib i'r cyhoedd am Covid-19."

Heddlu Dyfed Powys

Mae Comisiynydd Heddlu a Throsedd Dyfed Powys wedi dweud wrth BBC Cymru y dylai'r cyfyngiadau coronafeirws aros yn eu lle nes o leiaf ar ôl penwythnos Gŵyl y Banc ym mis Mai.

Dywedodd Dafydd Llywelyn y byddai hynny'n atal pobl rhag llifo mewn i ogledd a gorllewin Cymru fel ffordd o "ddathlu" llacio'r rheolau.

Mae'r Prif Weinidog Mark Drakeford wedi awgrymu y gallai'r mesurau gael eu llacio'n raddol yng Nghymru ymhen ychydig wythnosau.

Yn ôl canllawiau diweddaraf Llywodraeth Cymru dylai pobl ymarfer corff "mor agos â phosib" at eu cartrefi.

Y canllaw i seiclwyr ydy na ddylen nhw deithio'n bellach na "phellter cerdded rhesymol o'u cartrefi".

Mae'r rheolau newydd hefyd yn ei gwneud yn glir na ddylai unrhyw un yrru i unrhyw leoliad i wneud ymarfer corff oni bai fod hynny'n hanfodol - fel pobl mewn cadair olwyn.

Mae 'na rybudd hefyd na ddylai pobl ddefnyddio ymarfer corff fel "esgus" i wneud pethau eraill fel cael picnic neu ymlacio mewn parc.

Ffynhonnell y llun, Getty Images

Mae clybiau a sefydliadau ar draws y wlad wedi bod yn codi arian tuag at y frwydr yn erbyn coronafeirws dros yr wythnosau diwethaf - gan gynnwys y rhodd hael yma o £3,100 gan Glwb Cymric i Uned Gofal Dwys Ysbyty Athrofaol Cymru.

Chwaraeon BBC Cymru

Mae ymosodwr Cymru, Natasha Harding wedi bod yn rhoi ei hymateb hi i'r newyddion fod Pencampwriaeth Euros y Menywod wedi ei symud o 2021 i 2022.

Er bod y penderfyniad yn gwneud synnwyr o ystyried y byddai fel arall yn digwydd yr un haf ag Euros y dynion a'r Gemau Olympaidd, meddai, dydy o ddim yn newyddion cystal i chwaraewyr fel hi fydd flwyddyn yn hŷn erbyn dyddiad newydd y gystadleuaeth!

Ar hyn o bryd mae Cymru'n ail yn eu grŵp rhagbrofol y tu ôl i Norwy, gyda'r enillwyr yn cyrraedd y gystadleuaeth a'r tîm sy'n ail yn cael lle yn y gemau ail gyfle o leiaf.

Heddlu Gwent

Mae Heddlu Gwent wedi rhybuddio unwaith eto am dwyll yn ymwneud â coronafeirws, gyda dros £2m wedi ei golli i sgamiau o'r fath hyd yn hyn.

Iechyd Cyhoeddus Cymru

Mae Iechyd Cyhoeddus Cymru wedi cadarnhau bod 84 o'r marwolaethau sydd wedi'u cynnwys am y tro cyntaf yn y ffigyrau heddiw yn dyddio yn ôl dros fis.

Fe ddywedon nhw eu bod nhw wedi digwydd rhwng 20 Mawrth a 22 Ebrill, a hynny ym Mwrdd Iechyd Betsi Cadwaladr, ond bod oedi wedi bod cyn adrodd hynny.

Iechyd Cyhoeddus Cymru

Mae Iechyd Cyhoeddus Cymru wedi cadarnhau 110 o farwolaethau pellach o ganlyniad i Covid-19, a 243 o achosion newydd.

Dyma'r nifer uchaf o farwolaethau i gael eu cyhoeddi mewn un diwrnod yng Nghymru o bell ffordd.

Ond mae Iechyd cyhoeddus Cymru wedi cadarnhau mai 26 marwolaeth newydd sydd wedi'u hadrodd iddyn nhw heddiw, a bod yr 84 arall yn dod o oedi yn y broses o adrodd.

Mae'n golygu bod y nifer sydd wedi marw o'r haint yng Nghymru wedi cyrraedd 751, gyda chyfanswm o 8,601 achos wedi ei gadarnhau.

Ond mae'r gwir nifer yn debygol o fod llawer yn uwch, gyda nifer y marwolaethau ddim yn cynnwys pobl sydd marw mewn cartrefi gofal.