Cyngor Sir Penfro

Mae prif weithredwr Cyngor Sir Penfro wedi dweud mewn neges ar YouTube fod 20 o bobl yn y sir wedi marw o Covid-19, a 170 o achosion wedi'u cadarnhau.

Ond mewn arwydd pellach y gallai'r niferoedd sydd wedi'u heintio fod llawer yn uwch na'r ffigyrau swyddogol, dywedod Ian Westley fod bron i 390 o weithwyr yr awdurdod yn sâl o'r gwaith mewn gwirionedd.

Ychwanegodd bod 280 hefyd yn hunan ynysu.

Mae Clwb Pêl-droed Caerdydd wedi dod i gytundeb gyda'u chwaraewyr i ohirio talu rhan o'u cyflog am dri mis oherwydd yr argyfwng.

Dywedodd y clwb y bydd y cytundeb yn "sicrhau sefydlogrwydd ariannol" yn ystod cyfnod ansicr.

Roedd y rheolwr, Neil Harris, a'r prif weithredwr, Ken Choo, eisoes wedi cyhoeddi y byddan nhw'n derbyn cyflog llai yn ystod y pandemig.

Mae'r clwb wedi rhoi rhan o'i staff ar gynllun saib o'r gwaith Llywodraeth y DU.

Ffynhonnell y llun, Getty Images

Ar ddiwedd ei gynhadledd i'r wasg fe gafodd Mark Drakeford gwestiwn am sylwadau diweddaraf Donald Trump, wnaeth awgrymu y gallai hylif diheintio gael ei ddefnyddio i drin coronafeirws.

Dywedodd Mr Drakeford ei bod hi'n "eithriadol" fod Arlywydd yr UDA wedi awgrymu syniadau "heb unrhyw sail wyddonol na gwyddoniaeth feddygol y tu ôl iddynt".

"Mae pobl mas yna sydd yn mynd i ddibynnu ar air arlywydd, ac efallai am weithredu ar sail yr hyn gafodd ei ddweud," meddai.

Ffynhonnell y llun, Getty Images

Llywodraeth Cymru

Mae cynhadledd i'r wasg Mark Drakeford bellach wedi dod i ben, ond mae Llywodraeth Cymru wedi cyhoeddi'r canllawiau Covid-19 ar eu gwefan.

Gallwch weld y rheoliadau coronafeirws diweddaraf, dolen allanol a'r canllawiau ar adael y cartref i wneud ymarfer corff, dolen allanol.

Llywodraeth Cymru

Fe fydd swyddogion iechyd yn llunio cynlluniau yn y pythefnos nesaf ar gyfer sut i gynnal profion Covid-19 yn y gymuned.

Y bwriad, meddai Mark Drakeford, fydd gallu profi pobl ac yna'u hynysu os oes ganddyn nhw'r feirws, er mwyn galluogi'r cyfyngiadau presennol i gael eu llacio.

Ond dydy'r Prif Weinidog ddim wedi dweud faint o bobl fyddai angen eu recriwtio er mwyn cynnal y profion a chadw cofnod o'r data, na faint o brofion fydd eu hangen.

Ffynhonnell y llun, Getty Images

Llywodraeth Cymru

Yn y gynhadledd fe wnaeth y Prif Weinidog wadu awgrym y gallai cynllun Llywodraeth Cymru i adael y cyfyngiadau danseilio'r cynllun ar gyfer y DU cyfan.

Mae Llywodraeth Cymru wedi cyhoeddi ei strategaeth heddiw, tra bod Llywodraeth Yr Alban wedi datgelu dogfen debyg ddoe.

Dywedodd Mark Drakeford ei fod yn parhau i gydweithio â llywodraethau eraill y DU, a'i fod yn credu y bydd y fframwaith ar gyfer Cymru yn cryfhau'r ymateb ar lefel ehangach.

"Wrth rannu'n ffordd o feddwl gyda'n gilydd a bod yn agored am y materion ry'n ni'n credu fydd o bwys mewn rhannau gwahanol o'r DU, rwy'n credu y bydd yn ein helpu i ganfod y ffordd ymlaen," meddai.

"Y nod wrth gyhoeddi ein fframwaith ydy cryfhau'r ymateb ledled y DU - yn bendant nid ei danseilio."

Llywodraeth Cymru

Dywedodd Mr Drakeford y bydd yn rhaid i wleidyddion "ddyfarnu" yn y bôn pryd oedd yr adeg orau i lacio'r cyfyngiadau.

Daw hynny wedi i'r llywodraeth gyhoeddi 'saith cwestiwn' y bydd yn rhaid eu hateb cyn i hynny ddigwydd,

"Fe fydd hwnnw dal yn benderfyniad fydd yn dibynnu ar gyngor meddygol neu gyngor gwyddonol," meddai.

Llywodraeth Cymru

Dywedodd Mr Drakeford bod "ffordd hir o'n blaenau" cyn dychwelyd i fywyd arferol fel cyn y pandemig.

"Ni fydd hyn yn digwydd nes y bydd triniaeth effeithiol a brechlyn ar gael," meddai.

"Os ydyn ni'n parhau i gydweithio rwy'n gobeithio y byddwn yn gallu gwneud newidiadau i'r cyfyngiadau a gweld newid graddol i rywbeth agosach at fywyd arferol."

Llywodraeth Cymru

Pwysleisiodd y Prif Weinidog fodd bynnag nad yw'r cyfyngiadau yn cael eu codi ar hyn o bryd, gan gadarnhau bod "newidiadau bychan" yn cael eu gwneud iddynt yn dilyn arolwg.

Dywedodd Mark Drakeford bod "rhai elfennau wedi'u cryfhau ac eraill yn cael eu llacio".

"Rydw i eisiau bod yn gwbl glir fod y rheolau ar aros gartref yn parhau mewn grym, hyd yn oed wrth i ni edrych i'r dyfodol," meddai.

Llywodraeth Cymru

Mae Mark Drakeford wedi dechrau ei gynhadledd drwy drafod y camau ar gyfer llacio'r cyfyngiadau coronafeirws yn raddol.

Mae Llywodraeth Cymru bellach wedi cyhoeddi fframwaith ar gyfer arwain y wlad allan o'r pandemig.

Bydd y fframwaith yn cynnwys saith cwestiwn i benderfynu pryd yw’r amser priodol i lacio rhai o’r rheoliadau:

• A fyddai llacio’r cyfyngiadau’n cael effaith negyddol ar reoli’r feirws?
• A yw mesur penodol yn creu risg isel o haint pellach?
• Sut gellir ei fonitro a’i orfodi?
• A oes modd ei wyrdroi’n gyflym os bydd yn creu canlyniadau anfwriadol?
• A oes mantais economaidd bositif?
• A yw’n cael effaith bositif ar les pobl?
• A yw’n cael effaith bositif ar gydraddoldeb?

Llywodraeth Cymru

Cadw

Mae newyddion addawol o Sbaen, ble mae nifer y bobl sydd wedi marw â coronafeirws wedi gostwng i'w lefel isaf ers dros fis.

367 o bobl fu farw â'r feirws yn y 24 awr ddiwethaf, sy'n dod â'r cyfanswm i 22,524.

Dim ond yr Unol Daleithiau a'r Eidal sydd wedi cael mwy o farwolaethau'n ymwneud â Covid-19.

Ffynhonnell y llun, Getty Images

Cyngor Caerdydd

Mae Cyngor Caerdydd wedi cyhoeddi y bydd pedair mynwent yn y ddinas yn ailagor i'r cyhoedd o yfory ymlaen.

Cafodd y mynwentydd eu cau ddechrau mis Ebrill wedi i'r cyngor ddweud bod "nifer anarferol o uchel o ymwelwyr â'r safleoedd ac adroddiadau y bu pobl yn cynnal picnics, gemau pêl a chriwiau mawr yn ymgynnull yn gymdeithasol yn y tiroedd".

Dywedodd y cyngor y bydd "timau newydd eu hadleoli i sicrhau bod y broses o ymbellhau cymdeithasol yn cael ei chynnal ac na chaiff y gofodau eu defnyddio'n amhriodol yn ystod argyfwng Covid-19".

"Mae'r Cyngor yn galw ar y cyhoedd i ymweld â'r mynwentydd os ydynt yn ymweld â bedd neu ar gyfer angladd yn unig er mwyn parhau i arfer ymbellhau cymdeithasol," meddai llefarydd.

Y mynwentydd fydd yn ailagor ydy rhai Cathays, y Gorllewin, Draenen Pen-y-Graig a Phantmawr.

Ffynhonnell y llun, Geograph

Mae Bwrdd Criced Cymru a Lloegr wedi dweud na fydd unrhyw griced domestig y cael ei chwarae nes mis Gorffennaf ar y cynharaf.

Ym Mhencampwriaeth y Siroedd, sydd fel arfer yn dechrau fis Ebrill, bydd o leiaf naw rownd o gemau yn cael eu torri oddi ar y tymor.

Dywedodd prif weithredwr Bwrdd Criced Cymru a Lloegr, Tom Harrison: "Rydyn ni'n parhau'n obeithiol y gallwn ni gael criced dros yr haf, ond ni fydd unrhyw chwarae nes y bydd hi'n ddiogel i wneud hynny."

Ffynhonnell y llun, Getty Images

Bydd miliynau o weithwyr ledled yn DU yn derbyn eu tâl cyntaf heddiw ers i'r cyfyngiadau coronafeirws ddod i rym.

Mae nifer wedi colli eu swyddi ac yn gorfod hawlio credyd cynhwysol, ond mae llawer mwy wedi cael eu rhoi ar y cynllun saib o'r gwaith - wedi'u gyrru gartref ond yn derbyn 80% o'u tâl.

Mae'r Swyddfa Ystadegau Gwladol yn dweud bod 27% o holl weithlu'r DU wedi eu rhoi ar y cynllun.

Post Cyntaf
BBC Radio Cymru

Gyda nifer o fusnesau'n ei chael hi'n anodd goroesi yn ystod y pandemig, mae nifer o fusnesau'n troi at helpu'r gwasanaeth iechyd.

Dyna mae cwmni Brodwaith yn Llangefni wedi'i wneud, gan sicrhau cytundeb i ddarparu dillad i staff y gwasanaeth iechyd yng Nghymru.

Dywedodd y perchennog, Dafydd Roberts: "Roedd rhaid gwneud y penderfyniad anodd o stopio gwaith y ffatri am gyfnod byr.

"Yr ofn oedd bod cytundebau yn dod i ben a dim arall yn dod mewn.

"Ond yn ystod y cyfnod byr yma rydyn ni wedi bod yn gweithio ar brosiect yn gwneud scrubs ar gyfer y gwasanaeth iechyd yng Nghymru.

"Erbyn hyn rydyn ni yn cychwyn ar gynhyrchu 400 yr wythnos yn Llangefni a rhwng y tair ffatri rydyn ni'n targedu cael 2,000 yr wythnos.

"Rydyn ni wedi rhoi galwad allan ar y cyfryngau cymdeithasol am fwy o weithwyr i weld a oes yna rywun allan yna sydd wedi defnyddio'r peiriannau gwnïo yma."

Ffynhonnell y llun, Google

Cynulliad Cenedlaethol Cymru

Gyda chyfarfodydd llawn y Senedd eisoes wedi ailddechrau ar-lein, mae'r Cynulliad wedi cyhoeddi y bydd rhai pwyllgorau hefyd yn dechrau cwrdd yn yr un modd o'r wythnos nesaf ymlaen.

Dywedodd y Llywydd, Elin Jones y bydd y pwyllgorau'n gwneud “gwaith hollbwysig fydd yn sicrhau fod olwynion democratiaeth Cymru’n parhau i droi mewn cyfnod eithriadol".

Bydd y pwyllgorau cyntaf i gwrdd yn canolbwyntio ar iechyd, yr economi, plant, pobl ifanc ac addysg.

Wedi i Ŵyl y Gelli orfod cael ei chanslo yn sgil argyfwng coronafeirws, mae'r trefnwyr wedi cyhoeddi y bydd yr ŵyl yn mynd yn ei blaen ar-lein.

Bydd awduron, haneswyr a llawer mwy yn cynnal sesiynau cwestiwn ac ateb mewn darllediadau am ddim rhwng 18 a 31 Mai - yr un pryd ag yr oedd yr ŵyl i fod i gael ei chynnal yn wreiddiol.

Bydd y rhaglen lawn yn cael ei chyhoeddi ar 1 Mai.

Does yr un person wedi marw gyda Covid-19 yn y 24 awr ddiwethaf yn Ne Corea - y tro cyntaf i hynny ddigwydd ers mis.

Dywedodd llywodraeth y wlad hefyd mai dim ond chwe achos newydd gafodd ei gadarnhau ddoe - y lleiaf mewn un diwrnod yno ers 18 Chwefror.

Mae hynny'n newid sylweddol, mewn gwlad welodd nifer fawr o achosion ddiwedd Chwefror wrth i'r feirws ddechrau lledaenu ledled y byd.

Hyd yn hyn 240 o bobl sydd wedi marw yno - a dydy'r llywodraeth ddim wedi cyflwyno unrhyw gyfyngiadau ar symudiadau pobl.

Ffynhonnell y llun, Reuters