Iechyd Cyhoeddus Cymru

Mae 18 yn fwy o bobl wedi marw wedi iddyn nhw gael Covid-19, yn ôl ffigyrau diweddaraf Iechyd Cyhoeddus Cymru.

Golygai hynny fod 1,062 bellach wedi marw ar ôl cael yr haint.

Mae 'na 87 o achosion newydd hefyd, gan fynd â'r cyfanswm i 10,851.

Dywed Iechyd Cyhoeddus Cymru fod y ffigwr yn debygol o fod yn uwch mewn gwirionedd am nad ydy pawb yn cael eu profi.

O gyhoeddwyr i fecanics a pherfformwyr - y frwydr i barhau â'u gwaith ynghanol yr argyfwng.

Awdurdod Parc Cenedlaethol Eryri

Mae hi'n ŵyl y banc 'fory, ac unwaith eto mae negeseuon clir gan y parciau cenedlaethol a'r heddlu.

Ffynhonnell y llun, @WmPowell2016

Mae’r cyn-Aelod Cynulliad, William Powell wedi gadael yr ysbyty ar ôl cael ei heintio gyda coronafeirws.

Cafodd ei gyflwr ei ddisgrifio fel "sefydlog ond yn ddifrifol wael” ym mis Mawrth.

Ond mae bellach wedi gadael Ysbyty Nevill Hall yn y Fenni ac wedi diolch i'r staff yno am ei drin.

Roedd yn Aelod Cynulliad Canolbarth a Gorllewin Cymru rhwng 2011 a 2016 ac yn Llywydd y Democratiaid Rhyddfrydol yng Nghymru yn 2019.

Dywedodd Dr Goodall y byddai cyfyngiadau ar symudiadau pobl oherwydd y coronafeirws yn parhau dros benwythnos gŵyl y banc.

Dywedodd: "Dwi'n meddwl bod rhaid i'r neges ar gyfer y penwythnos yma fod yr un fath - mae'r cyfyngiadau yn parhau mewn grym ar hyn o bryd."

Daw yn sgil dyfalu y gallai'r cyfyngiadau gael eu llacio rhywfaint yn fuan.

Ychwanegodd y byddai Prif Weinidog Cymru, Mark Drakeford, yn gwneud datganiad ar y cyfyngiadau pan fo hynny'n briodol.

Ychwanegodd Dr Goodall fod tua 40% o welyau ysbyty yn wag, gyda 677 o achosion wedi'u cadarnhau yn ysbytai Cymru a 343 o achosion dan amheuaeth.

Dywedodd fod un o bob pum gwely gofal dwys yn cael ei feddiannu gan bobl sydd â coronafeirws - mae hynny yn 50% yn is na'r brig, meddai.

Mae 2,800 o bobl sydd wedi derbyn triniaeth ysbyty am Covid-19 wedi gwella ac wedi cael eu rhyddhau yn ôl prif weithredwr y GIG yng Nghymru.

Dywedodd Andrew Goodall bod y nifer sy'n cael eu trin am y feirws gan y GIG yma yn gostwng.

Wrth siarad yng nghynhadledd ddyddiol Llywodraeth Cymru, dywedodd Dr Goodall fod yr ymateb gan y GIG a gofal cymdeithasol wedi bod yn “rhyfeddol” a’u bod wedi dechrau paratoi gwasanaethau ar gyfer y dyfodol.

Ond fe gododd bryderon unwaith eto bod yna ffigyrau isel o bobl sy'n mynd i unedau gofal brys, gan rybuddio y gall y GIG wynebu cynydd syweddol petai yna lacio ar y cyfyngiadau presennol.

Llywodraeth Cymru

Mae modd gwylio'n fyw ar BBC1 ac S4C hefyd.

Llywodraeth Cymru

Mae Llywodraeth Cymru wedi cyhoeddi datganiad yn sgil yr hyn maen nhw'n ei alw'n adroddiadau "dryslyd" yn y papurau newydd heddiw.

Daw yn dilyn adroddiadau y bydd Prif Weinidog y DU, Boris Johnson, yn llacio rhai o'r cyfyngiadau Covid-19 dros y penwythnos.

Ond Llywodraeth Cymru sy'n penderfynu ar hynny yma.

Dywedodd datganiad Llywodraeth Cymru bod "peth o'r adroddiadau yn y papurau heddiw yn ddryslyd ac yn creu risg o anfon negeseuon cymysg i bobl dros y DU".

Dywedodd Llywodraeth Cymru bod y cabinet Cymreig wedi cyfarfod i drafod y cyfyngiadau y bore 'ma, ac y byddant yn trafod eto yn ddiweddarach.

"Bydd Prif Weinidog Cymru yn cyhoeddi penderfyniad y cabinet pan fo'n briodol."

Ar ddiwrnod Arwyr Cymru ar BBC Cymru, mae disgyblion un o ysgolion Caerdydd wedi paratoi fideo i ddiolch i rai o'r gweithwyr allweddol mewn gwahanol feysydd yn ystod cyfnod y pandemig.

BBC Sport Wales

Mae cyn-chwaraewr rygbi Cymru wedi dweud y dylid ystyried blaenoriaethu clybiau Cymru dros y rhanbarthau wrth i'r byd chwaraeon ail-ddechrau yn sgil y coronafeirws.

Dywedodd Jonathan Davies y gallai'r Pro14 - y gynghrair mae pedwar rhanbarth rygbi Cymru yn rhan ohoni - fod yn un o'r olaf i ddechrau eto oherwydd yr holl deithio rhyngwladol sydd ynghlwm.

Awgrymodd y gallai rhai o chwaraewyr y rhanbarthau fod yn well yn chwarae i glybiau Cymru - sy'n is yn y pyramid o gynghreiriau - yn y cyfamser.

Ffynhonnell y llun, Cara Davies

Ar ddiwrnod #ArwyrCymru y BBC, yr arlunydd Cara Davies, dolen allanol sy'n dathlu ein gweithwyr allweddol yn ei dull annwyl ac unigryw ei hun.

Gallwch weld fwy o'r lluniau arbennig yma.

Iechyd Cyhoeddus Cymru

Mae 'na fwy o'r pwyllgor iechyd yn y Senedd yn ein cyrraedd, ble mae Iechyd Cyhoeddus Cymru (ICC) yn rhoi tystiolaeth.

Mynnodd Dr Tracey Cooper bod ICC wedi bod mewn trafodaethau gyda'r cwmni fferyllol Roche yn gynharach eleni, gyda'r bwriad o ddarparu 5,000 o brofion Covid-19 i Gymru bob dydd.

Roedd y cytundeb yn destun ffrae ar ôl i'r cwmni ddatgan nad oedden nhw wedi dod i gytundeb gyda Llywodraeth Cymru, yn groes i'r hyn oedd gweinidogion yn ei ddweud.

Gofynnodd Rhun ap Iorwerth AS os oedd y cytundeb wedi methu "ar ôl i Lywodraeth y DU gamu mewn?".

Fe wnaeth Dr Cooper gytuno mai dyna oedd wedi digwydd.

Ychwanegodd bod Cymru yn derbyn tua 19% o gapasiti profion Roche dros y DU erbyn hyn - tua 900 y dydd.

Oriel luniau o'r arwyddion creadigol mae pobl Cymru wedi eu creu i ddiolch i weithwyr allweddol

Iechyd Cyhoeddus Cymru

Yn rhoi mwy o wybodaeth i bwyllgor yn y Senedd ym Mae Caerdydd, dywedodd Dr Quentin Sandifer bod Iechyd Cyhoeddus Cymru wedi rhoi cyngor i'r llywodraeth ar dri phwynt penodol: chwilio am achosion a phobl oedd wedi bod mewn cysylltiad â nhw, monitro effaith y feirws yng Nghymru a phrofi.

Dywedodd mai dyma oedd yr "elfennau hanfodol".

Iechyd Cyhoeddus Cymru

Mae prif weithredwr Iechyd Cyhoeddus Cymru wedi dweud nad ydy hi'n "gyfarwydd" ag uchelgais wreiddiol Llywodraeth Cymru i gynnal 9,000 o brofion Covid-19 erbyn diwedd mis Ebrill.

Wrth gael ei holi am bwy oedd yn cynghori gweinidogion ar yr hyn oedd yn ymarferol erbyn diwedd y mis diwethaf, dywedodd Tracey Cooper: "Dydyn ni ddim yn gyfarwydd â'r ffigwr 9,000."

Cafodd Ms Cooper ei holi dro ar ôl tro am hyn gan aelodau Plaid Cymru a'r Ceidwadwyr.

Dywedodd y Ceidwadwr Angela Burns ei bod hi "mewn sioc" nad oedd y ffigwr hwnnw wedi'i gyrraedd.

Swyddfa Ystadegau Gwladol

Roedd dros 80% o fusnesau yn y sectorau llety, bwyd ac adloniant wedi cau neu atal eu gwaith ym mhythefnos cyntaf Ebrill oherwydd y coronafeirws, yn ôl y Swyddfa Ystadegau Gwladol.

Mae'r ffigyrau diweddaraf yr ONS yn dangos effaith economaidd y feirws, gyda bron i chwarter holl fusnesau'r DU wedi cau yn llwyr.

O'r rhai sy'n parhau mewn rhyw ffurf, mae 58% wedi gweld llai o drosiant.

Cyngor Caerdydd

Llyfrgell Genedlaethol Cymru

Mae Llyfrgell Genedlaethol Cymru wedi lansio ymgyrch i gasglu profiadau'r Cymry o’r pandemig er mwyn "creu cofnod hanesyddol parhaol o effaith yr argyfwng Covid-19 ar eu bywydau".

Eu bwriad yw casglu amrywiaeth o eitemau "o bapurau newydd i gyhoeddiadau swyddogol ac archifo cynnwys gwefannau" ac i gael profiadau personol pobl hefyd.

"Rydym yn gofyn felly i’r cyhoedd rannu eu profiad trwy gyfrwng o’u dewis – yn llythyrau, dyddiaduron, fideos, recordiadau llais neu luniau," meddai datganiad.

Am fwy o wybodaeth, cliciwch yma., dolen allanol

Mae dros 100 o wirfoddolwyr wedi bod yn cynhyrchu gwisgoedd 'sgrybs' meddygol ar gyfer y gwasanaethau gofal iechyd yng Nghymru.

Ar draws cymunedau Cymru, mae miloedd o setiau o sgrybs yn cael eu gwneud gan bobl sy'n gweithio mewn canolfannau cynhyrchu.

Yn eu plith mae grŵp o drigolion ym Mae Penrhyn, Llandudno sydd wedi bod yn cyflenwi'r offer gwarchod personol (PPE) ar gyfer gweithwyr allweddol.