Heddlu Gogledd Cymru

Mae'r heddwas yma'n dweud iddo rwystro pobl o Sir Caint a oedd wedi dod am "daith bleser" yn eu car... i Eryri.

Mae Syr Bryn Terfel, Mererid Hopwood a Cherddorfa Genedlaethol Gymreig y BBC wedi recordio fersiwn newydd o un o ganeuon enwocaf Cymru er mwyn diolch i weithwyr allweddol am eu gwaith yn ystod yr argyfwng coronafeirws.

Mae'r Prifardd Mererid Hopwood wedi ysgrifennu geiriau newydd i Rhyfelgyrch Gwŷr Harlech fydd i'w clywed am y tro cyntaf ddydd Iau fel rhan o Ddiwrnod Arwyr Cymru BBC Cymru.

Y clarinetydd Lenny Sayers sydd wedi creu'r trefniant newydd o'r gân ar gyfer aelodau eraill o'r gerddorfa, sydd wedi perfformio'r darn o adref.

Mae cyfarwyddwr CBI Cymru, sy'n cynrychioli busnesau, y bydd "mwy o bobl nag erioed yn gweithio gartref" pan fydd rheolau ynysu yn cael eu llacio.

Yn siarad ar BBC Radio Wales fore Iau, dywedodd Ian Price ei fod yn hollbwysig bod holl wledydd y DU yn dilyn yr un canllawiau, ac y gallai cynlluniau gwahanol dros y DU fod yn niweidiol i fusnesau.

Ychwanegodd: "Mae'n rhaid i ni fod yn ofalus am yr hyn sy'n cael ei wneud oherwydd y peth olaf 'da ni eisiau ydy disgyn yn ôl."

Wrth i wleidyddion ddechrau edrych at y cyfnod nesaf yn yr ymateb i'r coronafeirws, mae ailagor ysgolion yn un pwnc trafod.

Mae cael plant yn ôl i'r dosbarth yn cael ei weld fel man cychwyn ar gyfer llacio rhai o'r cyfyngiadau eraill sydd mewn grym ar hyn o bryd.

Ond beth mae'n ei olygu'n ymarferol? A fydd gan ysgolion ddigon o staff? A sut mae cadw at reolau ymbellhau cymdeithasol?

Yn ôl un prifathro, mae angen mwy o wybodaeth ar ysgolion cyn gallu ailagor yn llwyr.

Pwt o newyddion o du allan i Gymru y bore 'ma, ac mae Banc Lloegr wedi rhybuddio y gallai'r coronafeirws arwain at ddirwasgiad dros y DU.

Mae rhagolygon economaidd y banc yn awgrymu y gallai Covid-19 "leihau swyddi a chyflogau yn ddramatig".

Y gred yw y bydd yr economi yn crebachu o 14% eleni.

Ffynhonnell y llun, Getty Images

Mae nifer y gwirfoddolwyr yng Nghymru wedi dyblu ers dechrau argyfwng coronafeirws gyda dros 30,000 bellach wedi cofrestru.

Yn ôl ffigyrau Gwirfoddoli Cymru mae 16,600 o'r rhain wedi cofrestru ers 1 Mawrth.

Ar hyn o bryd mae 6,862 o bobl yn gwirfoddoli, a dywedodd y grŵp bod yr ymateb wedi bod yn "rhyfeddol".

Ffynhonnell y llun, Cara Davies

Ar ddiwrnod #ArwyrCymru, mae’r artist Cara Davies wedi rhyddhau casgliad arbennig o luniau sy’n dathlu gweithwyr y rheng flaen.

"Roedd o'n hawdd i mi gael ysbrydoliaeth ar gyfer y darn yma o waith gan fod nifer o fy nheulu a ffrindiau yn gweithio ar y rheng flaen," meddai Cara, sy’n byw ym Manceinion ond s’yn dod yn wreiddiol o Ynys Môn.

"Dwi'n gweld cymaint o ddewrder ynddyn nhw ac maen nhw'n fy ysbrydoli i gael agwedd bositif mewn amser llawn ansicrwydd.

"Dwi'n gobeithio fy mod wedi llwyddo i gyfleu fy nheimlad o ddiolchgarwch i'r holl weithiwyr allweddol trwy gyfrwng y gyfres fach yma o ddarluniau," meddai.

Mae BBC Cymru yn dathlu cyfraniad gweithwyr allweddoll heddiw ar ddiwrnod Arwyr Cymru.

Un o'r rheiny ydy Jayne Evans, sy'n rheoli cartref gofal Glyn Nest yng Nghastell Newydd Emlyn, ac yn dweud bod ei byd wedi "altro yn llwyr".

"Mae bywyd wedi newid lot ac yn sydyn - ond ein blaenoriaeth yw sicrhau bod y 28 ry'n ni'n edrych ar eu hôl yn iach ond hefyd yn hapus."

Darllenwch fwy am waith Jayne yma, ac os ydych chi am rannu straeon am eich arwyr chi, defnyddiwch #ArwyrCymru.

Croeso at y llif byw ar 7 Mai, ble gewch chi'r newyddion diweddara' drwy gydol y dydd.