BBC Radio Wales

Mae un rhiant wedi dweud y byddai yn hoffi i ysgolion ailagor ym mis Medi.

Er bod Clare Ferguson-Walker yn dweud bod addysgu adref yn “anodd iawn”, o safbwynt diogelwch byddai yn well ganddi aros ychydig yn hirach cyn ail agor ysgolion.

Dywedodd wrth raglen Breakfast Radio Wales: “O safbwynt sut y byddai ysgolion yn edrych, ceisio cael y plant i gadw pellter ac yn y blaen, dwi’n meddwl gallai hynny gael effaith seicolegol beth bynnag. O safbwynt diogelwch, gadewch i ni aros a pheidio cymryd risg. Ni’n siarad am ein plant fan hyn.”

Mae Rachel Meredith o Flaenau Gwent yn dweud nad oes gan ei merch unrhyw ddealltwriaeth o beth yw cadw pellter oddi wrth bobl am ei bod yn ifanc.

“Fe wnaeth fy merch bron a marw o niwmonia'r llynedd a does dim un ffordd y bydd hi yn mynd yn ôl cyn mis Medi."

Llywodraeth Cymru

Post Cyntaf
BBC Radio Cymru

Mae pennaeth ysgol gynradd wedi bod yn sôn am yr hyn mae'n disgwyl clywed yn y datganiad gan y gweinidog addysg Kirsty Williams amser cinio.

Yn ôl Sarah Oliver, Pennaeth Ysgol Gynradd Gymraeg y Fenni y gred yw y bydd "ysgolion yn agor neu'n agor i ddarparu addysg i flynyddoedd 6, 10 a 12 erbyn 29 o'r mis yma. Ond dydw i ddim yn rhagweld y bydd yr holl flynyddoedd yn dychwelyd.

"Does dim siawns yn y byd y gallwn ni ddarparu addysg i drwch o ddisgyblion cynradd yn arbennig. Mae'r heriau sydd o'n blaenau i ddarparu'r cynnig i flwyddyn 6, 10 a 12 yn ddigon," meddai ar raglen y Post Cyntaf.

Ychwanegodd bod athrawon heb fod yn segur yn yr wythnosau diwethaf a bod addysg wedi ei ddarparu i ddisgyblion er nad ydyn nhw wedi bod yn mynychu ysgolion.

Fe gawn ni wybod beth yn union fydd Kirsty Williams yn ei gyhoeddi am 12.30.

Ffynhonnell y llun, Thinkstock

Mae coronafeirws wedi achosi problemau lu i fyd amaeth, ond mae rhai'n gweld cyfle i arallgyfeirio.

Bydd ceisiadau ar gyfer y cynllun newydd i roi cymorth i’r diwydiant llaeth yng Nghymru yn agor ar 18 Mehefin.

Dywed Llywodraeth Cymru mae bwriad y cynllun yw i gefnogi’r ffermwyr yr "effeithiwyd fwyaf arnynt gan yr amodau eithriadol diweddar o fewn y farchnad oherwydd Covid-19."

Mae’r cynllun wedi ei gynllunio i gefnogi cynhyrchwyr llaeth i gynnal eu capasiti cynhyrchu yn ystod y cyfnod heriol hwn medd swyddogion.

Bydd y cyfnod y gellir gwneud cais am y cynllun ar agor tan 14 Awst 2020.

Trwy’r gronfa, bydd angen i ffermwyr llaeth cymwys ddangos eu bod wedi dioddef gostyngiad o 25% neu fwy yn y pris a dalwyd ar gyfartaledd am eu llaeth ym mis Ebrill ac yn dilyn hynny ym mis Mai, o gymharu â mis Chwefror 2020.

Bydd gan ffermwyr cymwys hawl i hyd at £10,000, i gynnwys oddeutu 70% o’r incwm a gollwyd ganddynt i helpu iddynt barhau i allu talu costau sefydlog a chynnal eu capasiti cynhyrchu heb iddo gael effaith ar les anifeiliaid a’r amgylchedd.

Twitter

Mae'r gweinidog addysg wedi rhannu neges ar Twitter i atgoffa pawb mai am 12.30 y bydd yn gwneud datganiad am y camau nesaf i ailagor ysgolion Cymru.

Fe fyddwn yn dod a'r diweddaraf o'r gynhadledd i'r wasg lle bydd y cyhoeddiad yn cael ei wneud yma ar y llif byw.

golwg360

Mae Golwg360 yn adrodd fod gwyddonwyr yn cynnal gwaith ymchwil i edrych ar effaith Ibuprofen ar gleifion, dolen allanol sydd yn dioddef o coronafeirws.

Fe fydd yr ymchwil yn edrych ar effeithiolrwydd y cyffur wrth geisio atal problemau anadlu difrifol ymysg y cleifion hyn.

Gwyddonwyr yn King's College Llundain sydd yn cynnal y gwaith ymchwil.

Twitter

Mae Heddlu'r De wedi bod yn rhybuddio pobl ifanc rhag ymgynnull mewn niferoedd mawr yn ystod y cyfnod yma.

Cafodd swyddogion y llu eu galw i Barc Gwledig Ystâd y Gnoll yng Nghastell-nedd ddoe, lle'r oedd tua 100 o bobl ifanc wedi dod at ei gilydd - gyda rhai'n ymddwyn yn wrthgymdeithasol.

Cyn i'r gweinidog addysg gyhoeddi sut y bydd ysgolion Cymru'n ailagor yn raddol mewn cynhadledd i'r wasg yn ddiweddarach heddiw, mae undeb addysg arall wedi bod yn lleisio barn am yr hyn sydd ei angen cyn i blant ddychwelyd i'r dosbarthiadau.

Dywedodd llefarydd ar ran undeb NEU Cymru wrth BBC Cymru Fyw:

"Rydym yn gobeithio bo’r Gweinidog Addysg am wneud penderfyniad synhwyrol sy’n ystyried iechyd a diogelwch dysgwyr a staff, a bo hi am ddilyn y cyngor meddygol a gwyddonol wrth wneud ei phenderfyniad.

"Mae NEU Cymru wedi datgan bo angen ystyried y canlynol cyn bo ysgolion/colegau yn ddiogel i’w hailagor i fwy o ddysgwyr:

• Argaeledd cyngor gwyddonol a meddygol clir yn cadarnhau y gellir gwneud newid mewn cyd-destun iechyd.

• Argaeledd OAP (PPE).

• Penderfyniadau clir yn cael eu gwneud ar grwpiau blwyddyn / cyflwyno'r lefel weithredu fwyaf priodol a hyfyw yn raddol.

• System bellhau cymdeithasol ymarferol ac yn ystyried lles emosiynol a chorfforol staff a disgyblion.

• Cadarnhad bod y cynigion yn gynaliadwy.

• Rhoddir sylw llawn i'n profion.

• Cyfranogiad llawn gan yr undebau llafur wrth gynllunio a modelu'r cynnig ar gyfer dychwelyd.

"Os ydy’r uchod wedi cael eu cyfarfod yna ystyriwn bo ailagor ysgolion a cholegau yn saff.

"Fodd bynnag, mae’n bwysig fod y Gweinidog Addysg yn tynnu’n ôl y penderfyniad i ailagor ysgolion/colegau i fwy o ddysgwyr os bydd unrhyw newid er y gwaethaf, gan gynnwys Cyfradd ‘R’ yn codi yn yr amser cyn bo ysgolion/colegau yn ailagor."

Twitter

Cadw pellter cymdeithasol ac yswiriant yw prif bryderon y diwydiant wrth geisio ailddechrau.

Twitter

Fe fydd cyhoeddiad yn cael ei wneud amser cinio gan y gweinidog addysg am yr amserlen o ailagor ysgolion yma yng Nghymru.

Mae'r ysgolion wedi bod ar gau ers 20 Mawrth.

Y bore ma mae undebau athrawon wedi bod yn lleisio eu barn am y camau posib fydd yn dod i rym.

Dywedodd Dilwyn Roberts-Young, Ysgrifennydd Cyffredinol UCAC: "Mae greddf athrawon o blaid dychwelyd i'r ysgol ac at eu disgyblion - maent wedi gweld eisiau eu cwmni ac yn pryderu am eu lles yn ogystal â'u datblygiad addysgol.

"Hyn a hyn mae modd darparu o bell - nid yw’n addysg gyflawn yn ei ystyr ehangaf.

"Ond yn ogystal, mae athrawon yn ymwybodol iawn o'r risgiau o ail-ymgynnull yn rhy fuan. Mae iechyd holl gymuned yr ysgol yn bwysicach nag unrhyw beth arall.

"Am y rheswm hynny, mae UCAC yn ffafrio dychweliad graddol a phwyllog, gyda niferoedd bychan o ddisgyblion i ddechrau.

"Hyd yn oed dan yr amgylchiadau hynny, mae llu o faterion ymarferol heriol yn codi y bydd angen mynd i'r afael â nhw cyn i'r drysau ail-agor.

"Byddwn am weld canllawiau cenedlaethol clir a manwl iawn i sicrhau cysondeb ledled Cymru ac i sicrhau bod pob amgylchedd ysgol mor ddiogel â phosib er lles yr holl staff a disgyblion ac er mwyn sicrhau tawlewch meddwl teuluoedd."

Mae disgwyl i'r Gweinidog Addysg gyhoeddi'r cynlluniau diweddaraf ar gyfer ailagor ysgolion yng Nghymru yn ddiweddarach ddydd Mercher.

Y gred ydy bod Kirsty Williams wedi ystyried amryw o opsiynau ynglŷn â dychwelyd disgyblion i'r ysgol gydag arweinwyr undebau, awdurdodau lleol a gwyddonwyr.

Fe gafodd y syniad o ddod â gwyliau haf yr ysgol ymlaen ei ddiystyru gan y gweinidog yr wythnos diwethaf,yn ôl yr Undeb Addysg Cenedlaethol.

Mae ysgolion yng Nghymru wedi bod ar gau ers 20 Mawrth.

Ffynhonnell y llun, Getty Images

BBC Cymru Fyw

Bore da a chroeso i lif byw dyddiol BBC Cymru Fyw ar ddydd Mercher 3 Mehefin.

Fe fyddwn yn dod a'r diweddaraf chi am ymateb Cymru i bandemig coronafeirws drwy gydol y dydd.

Amser cinio fe fyddwn yn troi ein sylw at ddiweddariad dyddiol Llywodraeth Cymru am sefyllfa'r pandemig.

Mae disgwyl y bydd y gweinidog addysg Kirsty Williams yn cyhoeddi'r camau nesaf am agor ysgolion i rai disgyblion - fe ddown ni a'r manylion i gyd i chi am y cyhoeddiad.

Yn fuan wedyn fe fyddwn yn cyhoeddi nifer yr achosion a marwolaethau Covid-19 yma yng Nghymru wrth i Iechyd Cyhoeddus Cymru ryddhau eu hystadegau am 14:00.

Fe fydd y penawdau perthnasol a straeon o bob cwr o'r wlad am sefyllfa Covid-19 i gyd yma ar y llif byw i chi.

Arhoswch gyda ni am y datblygiadau diweddaraf.