BBC Radio Wales

Mae un o brif swyddogion undeb athrawon wedi dweud wrth BBC Cymru ei fod "wedi ei synnu'n llwyr" gan gyhoeddiad y gweinidog addysg Kirsty Williams am ailagor ysgolion ar 29 Mehefin.

Wrth siarad ar raglen Claire Summers ar BBC Radio Wales y bore 'ma, dywedodd David Evans, ysgrifennydd Cymru ar ran Undeb NEU Cymru: "Yn ystod ein trafodaethau gyda Llywodraeth Cymru'r wythnos ddiwethaf, roedd nifer o ddewisiadau ar y bwrdd.

"Un o'r rhain oedd i oedi tan fis Medi, ac roedd yn un nad oedd y llywodraeth am fynd ymlaen ag o. Dewis arall oedd gadael grwpiau blwyddyn penodol i mewn.

"Petai hyn wedi ei gyhoeddi ddoe, fe fydde ni wedi bod yn gweithio mor galed ag unrhyw un i sicrhau dychwelyd i'r ysgol. Fe fydd ein haelodau wrth gwrs yn sicrhau y bydd y cynllun o ddychwelyd i'r ysgol yn gweithio nawr, ond gydag o bosib traean o'r ysgol i mewn ar unrhyw adeg, mae hynny'n gosod risg yna."

Ychwanegodd Mr Evans: "Fe garem ni weld y plant yn dychwelyd i'r ysgol a'r ysgol yn ailagor a dychwelyd i'r normal newydd fydd yn gynt yn hytrach na hwyrach.

"Ond mae'n rhaid i'r amser fod yn gywir...ar hyn o bryd nid yw'r cyngor gwyddonol a meddygol yn dweud hyn.

"Dyna pan ei fod yn ormod ac yn rhy fuan", ychwanegodd.

Twitter

Mae'n ymddangos nad yw'r neges am aros yn lleol wedi cyrraedd pawb - hyd yn oed gweithwyr yn y byd meddygol.

A rheswm digon tila oedd gan y meddyg hwn am ei daith yn ôl swyddogion ardal Aberhonddu.

Twitter

Post Cyntaf
BBC Radio Cymru

Mae mwy o ymateb wedi dod i gyhoeddiad y gweinidog addysg ddoe am ailagor ysgolion ar 29 Mehefin.

Wrth siarad ar raglen y Post Cyntaf ar BBC Radio Cymru fore dydd Iau, dywedodd John Pockett o Gyd-Ffederasiwn Cludiant Teithwyr Cymru, y corff sy'n cynrychioli'r cwmnïau teithio:

"O ran agor ysgolion does dim un gair am unrhyw drafodaethau rhwng y llywodraeth a'r cwmnïau ynglŷn â'r cynlluniau, ar wahân i wybodaeth anghywir nos Fawrth nad oedd yr ysgolion yn mynd i ail-agor.

"Ond dyma'r newyddion yn dod ddoe eu bod nhw yn mynd i ail-agor ar raddfa fwy nag y byddai rhywun yn disgwyl fel cam cyntaf, felly ru'n ni yn siomedig iawn gyda'r Llywodraeth, nad ydyn nhw wedi ystyried hyd yn oed sôn bod hyn yn mynd i ddigwydd cyn y cyhoeddiad.

"Pan ddechreuodd hyn fe roddwyd nifer o fysiau o'r neilltu gyda chwmnïau yn dod ag yswiriant i ben, cael arian yn ôl am redeg gwasanaethau ac felly mae'n rhaid ystyried profion diogelwch ar fysiau. Mae 'na reolau llym mewn grym a bydd yn rhaid i bobl gael eu harchwilio cyn gallu mynd yn ôl ar y ffyrdd.

"Rwyf ar ddeall na fydd yna ganllawiau yn cael eu cyhoeddi tan yr wythnos nesa'. Mae pobl wedi cael galwadau ac e-bost di-rif a lot o sylwadau ar y cyfryngau cymdeithasol am nad oes unrhyw un yn gwybod beth i ddarparu pan fydd yr ysgolion yn ail-agor.

Ychwanegodd: "Does neb yn gwybod faint yn union o blant fydd yn mynd yn ôl i'r ysgol ac a'r ba drefn. Er enghraifft y sefyllfa ble rydw i yn Rhondda Cynon Taf, mae yna 180 o fysiau yn cael ei defnyddio bob dydd i gludo plant i'r ysgol a llawer dan ei sang. Ond o dan reolau pellter cymdeithasol does dim sôn bod yna 180 o fysiau sbâr yn y cyffiniau felly maen benbleth i'r cwmnïau.

"Er fy mod yn hyderus y bydda'n nhw'n ymdopi dydy hyn ddim yn help o gwbl i ddarparu ar gyfer dychwelyd i'r ysgol yn esmwyth."

Trefi'r Cymoedd a threfi arfordirol y gogledd fydd yn dioddef fwyaf yn economaidd oherwydd y pandemig coronafeirws, yn ôl grŵp ymchwil.

Dywed y Centre for Towns fod yr ardaloedd hynny yn barod yn dioddef, a'u bod yn fwy bregus i effeithiau economaidd Covid-19.

Mae ei gwaith ymchwil yn rhoi 10 tref yng Nghymru yn yr 20 mwyaf bregus yn economaidd yng Nghymru a Lloegr gyda Thredegar a Bae Cinmel yn y tri uchaf.

Edrychodd yr ymchwil ar ystod eang o ffactorau gan gynnwys cyfran y bobl sy'n gweithio mewn busnesau sydd wedi'u cau; cyfran y preswylwyr hŷn; lles cymdeithasol ac economaidd cyn y pandemig.

Mae hefyd wedi edrych a yw'r ardal wedi dioddef o newid diwydiannol yn ystod y 30 mlynedd diwethaf.

BBC Cymru Fyw

Bore da a chroeso i lif byw dyddiol BBC Cymru Fyw ar ddydd Iau 4 Mehefin.

Fe fyddwn yn dod a'r diweddaraf chi am ymateb Cymru i bandemig coronafeirws drwy gydol y dydd.

Amser cinio fe fyddwn yn troi ein sylw at ddiweddariad dyddiol Llywodraeth Cymru am sefyllfa'r pandemig.

Yn fuan wedyn fe fyddwn yn cyhoeddi nifer yr achosion a marwolaethau Covid-19 yma yng Nghymru wrth i Iechyd Cyhoeddus Cymru ryddhau eu hystadegau am 14:00.

Fe fydd y penawdau perthnasol a straeon o bob cwr o'r wlad am sefyllfa Covid-19 i gyd yma ar y llif byw i chi.

Arhoswch gyda ni am y datblygiadau diweddaraf.