Wrth drafod y cyfyngiadau ymhellach, dywedodd Dr Goodall fod y penderfyniad i'w llacio yn fater o gydbwyso cymhleth.

Dywedodd nad y ffactor 'R' oedd yr unig ffactor oedd angen ystyried wrth adolygu'r cyfyngiadau.

"O ystyried ein bod yn gweld llai o gleifion yn yr ysbytai, mae hi dal yn drawiadol fod hyn sy'n gyfystyr â thri ysbyty yn llawn cleifion Covid ledled Cymru, ac mae angen i ni gydnabod y pwysau mae hyn yn ei roi ar y system.

"Mae'r rhain yn gleifion nad oedd yn y gwlâu hynny dri mis yn ôl. Rwyf yn cadw llygad yn benodol ar y patrwm mewn gofal dwys.

"Felly rwy'n meddwl ei fod yn arwydd calonogol ar hyn o bryd ein bod wedi gweld y pwysau yn y maes yma yn lleihau tua 80% o'r brig yn nhermau cleifion Covid."

Dywedodd fod cael cydbwysedd o ran llacio a diogelu yn fater cymhleth.

Ychwanegodd y bydd y prif weinidog yn gorfod cydbwyso'r peryg o niwed i'r boblogaeth ehangach gyda sicrhau fod y gwasanaeth iechyd yn ddiogel.

Dywed pennaeth GIG Cymru ei fod yn dal i boeni am y posibilrwydd y bydd ail don o achosion coronafeirws yng Nghymru.

Ond dywedodd Dr Andrew Goodall wrth y wasg bod y gwasanaeth iechyd yn "barod" a'i fod am sicrhau bod y system ofal "yn dal i fod yn wydn i ymateb i beth bynnag sy'n digwydd".

"Rwy'n poeni am y posibilrwydd o weld ail 'peak' yn dod i'r amlwg, pryd bynnag y gallai hynny fod. A yw hynny yn yr haf, yn gysylltiedig â'r cyfyngiadau? A yw o hynny yn y gaeaf, pan fydd y feirws o fod yn fwy tebygol o drosglwyddo bryd hynny?"

Ychwanegodd: "Rydyn ni'n barod oherwydd rydyn ni wedi cadw trefniadau wrth gefn rydyn ni'n eu rhoi ar waith ond hefyd oherwydd ein bod ni wedi dysgu llawer mwy am y feirws."

Fe wnaeth Dr Goodall, pennaeth y gwasanaeth iechyd yng Nghymru, ddweud wrth y gynhadledd fod angen parhau i gymryd camau gofalus wrth lacio'r cyfyngiadau ar fywyd pob dydd.

Roedd hyn, meddai, fel bod y gwasanaeth iechyd yn gallu parhau i ddarparu'r gwasanaethau sydd eu hangen.

Wrth ateb i gwestiynau gan y wasg dywedodd "y bydd y normal newydd yn teimlo'n wahanol" a hyn oherwydd "bydd yna lai o weithgarwch" o fewn y gwasanaeth.

Wrth ymateb i gwestiwn a fyddai "swigod cymdeithasol", neu 'social bubbles', a fydd yn cael eu cyflwyno yn Lloegr, yn rhan o'r adolygiad clo nesaf yma yng Nghymru, dywedodd Dr Goodall mai "proses wleidyddol" fyddai'n dod i benderfyniad ar y cyfyngiadau erbyn wythnos i heddiw.

Yn ôl Dr Goodall er ei bod hi'n ymddangos ar y wyneb fod yna gapasiti ar gael o fewn y gwasanaeth iechyd, bydd hyn yn cael ei effeithio gan y mesurau diogelwch newydd fydd eu hangen.

Dywedodd y byddai'r newidiadau yn y modd mae'r gwasanaeth iechyd yn gweithio yn cynnwys:

• angen am fwy o ofod mewn rhai ardaloedd clinigol;
• galw am broses glanhau mwy dwys;
• gorsafoedd hylendid;
• ailgynllunio'r system apwyntiadau er mwyn cyfyngu ar nifer y bobl sy'n mynd i mewn ac allan o glinigau ar yr un pryd.

Dywed Dr Goodall fod angen adfer gwasanaethau deintyddol yn "raddol i barhau i amddiffyn staff a chleifion deintyddol".

Dywedodd y dylai'r cam nesaf o "ddad-ddwysáu" ddod i rym o 1 Gorffennaf pan fydd deintyddion yn gallu cynnig mwy o driniaethau yn eu meddygfeydd.

"Bydd ystod eang o ofal ar gael yn y mwyafrif o bractisau deintyddol lleol ar gyfer cleifion sydd eu hangen ar frys," meddai.

"Bydd y grŵp o bobl sydd wedi profi problemau yn ystod y cyfnod clo yn cael cynnig asesiad a gofal yn gyntaf.

"Byddwn yn symud ymlaen yn seiliedig ar frys ac angen cleifion nes adfer archwiliadau arferol yn y cam olaf."

Ychwanegodd: "Mae llawer o driniaethau deintyddol yn defnyddio driliau cyflym ac offer eraill sy'n cynhyrchu aerosol - mae hyn yn golygu eu bod yn creu chwistrell ac yn cynrychioli risg uwch o drosglwyddo coronafeirws."

Ffynhonnell y llun, Getty Images

Dywedodd Dr Goodall ar hyn o bryd fod yna 885 o gleifion Covid mewn gwlâu ysbytai yng Nghymru.

Ychwanegodd fod hyn yn is na'r wythnos diwethaf, a bod y nifer wedi gostwng dros y pythefnos diwethaf.

"Er bod y nifer yn is mae dal yn gyfystyr a thri ysbyty mawr yn llawn cleifion Covid," meddai.

Dywedodd Dr Goodall fod 335 o wlâu gofal dwys ar gael yng Nghymru, gan gynnwys capasiti ychwanegol.

Dywedodd fod tua 60% yn wag ac ar gael i'w defnyddio. "Mae 32 o bobl yn cael eu trin mewn gofal dwys ar gyfer coronafeirws - mae hyn eto'n is na'r wythnos ddiwethaf a'r isaf ers 25 Mawrth.

"Erbyn hyn nid oes gan y mwyafrif o bobl sy'n cael eu trin mewn gofal dwys coronafeirws, sy'n bwysig wrth ddangos bod mwy o waith y gwasanaeth iechyd yn digwydd," ychwanegodd Dr Goodall.

Mae bron pob ardal awdurdod lleol yng Nghymru bellach yn adrodd niferoedd bach o achosion coronafeirws positif gyda llawer bellach heb achosion o gwbl, meddai pennaeth GIG Cymru.

Wrth siarad yng nghynhadledd ddyddiol coronafeirws Llywodraeth Cymru, dywedodd Dr Andrew Goodall: "Mae nifer yr achosion newydd wedi bod yn gostwng yn gyson ers mis Ebrill, er ein bod ni'n gwneud llawer mwy o brofion. Mae cyfradd positifrwydd y prawf wedi gostwng i lai na 2%.

"Ar hyn o bryd mae'r achosion dyddiol ar eu huchaf yng ngogledd Cymru."

Ychwanegodd: "Mae nifer y bobl sy'n marw o coronafeirws wedi bod yn gostwng ers canol mis Ebrill. Nid yw'r mwyafrif o bobl sydd wedi cael coronafeirws wedi bod angen triniaeth ysbyty."

Mae grŵp sy'n cynrychioli perchnogion dros 70 o dai bwyta yng Nghymru wedi ysgrifennu at y prif weinidog yn galw am becyn cymorth "er mwyn i'r diwydiant oroesi".

Dywed y llythyr at Mark Drakeford eu bod am i'r llywodraeth weithio gyda busnesau annibynnol wrth lunio amserlen, cynlluniau a chanllawiau er mwyn llacio'r cyfyngiadau.

Mae'r grŵp, Tai Bwyta Annibynnol Cymru, yn gofyn am bendantrwydd, gan ddweud bod busnesau yn yr Alban wedi cael rhybudd i baratoi ar gyfer ailagor ar 15 Gorffennaf.

Maen nhw hefyd am weld mesurau ymbellhau yn cael eu gostwng i un metr mewn tai bwyta, ac am gymorth ariannol.

Ffynhonnell y llun, Getty Images

Dywedodd Simon Wright o Wright's Food Emporium yng Nghaerfyrddin: "Os nad ydym yn gweithredu nawr, rydym yn poeni am ddyfodol ein busnesau.

"Fel casgliad o fusnesau rydym yn cyflogi miloedd o bobl mewn trefi pentrefi a dinasoedd yng Nghymru.

"Mae'r diwydiant tai bwyta yng Nghymru yn rhoi cyflogaeth i tua 135,000 o bobl yn uniongyrchol neu'n anuniongyrchol, y aml mewn cymunedau lle nad oes dewis arall o waith."

Post Cyntaf
BBC Radio Cymru

Parhau mae'r galwadau gan y rhai sy'n gweithio yn y sector twristiaeth am fwy o eglurdeb gan Lywodraeth Cymru ynglŷn â phryd bydd busnesau yn gallu ailagor.

Ddoe dywedodd gweinidog yr economi, Ken Skates ei fod yn gobeithio "gallu dweud rhywbeth positif" wrth y diwydiant twristiaeth pan fydd cyfyngiadau'n cael eu llacio ym mis Gorffennaf.

Ond yn ôl Huw Tudur, perchennog llety gwely a brecwast ym Mhen-y-bont ar Ogwr, mae angen dyddiadau pendant.

"Rydan ni yn dechrau gweld y llif yn dychwelyd, nifer fawr o alwadau yn y pythefnos diwethaf gan bobl fusnes yn bennaf sy'n aros gyda ni yn ystod yr wythnos.

"Gan ein bod ni wedi colli gwerth wythnosau o ddigwyddiadau fel priodasau ac angladdau er enghraifft ryda'n ni yn gweld bod pobl eisiau dod 'nôl nawr i letya ac i weithio," meddai.

"Mae hi yn cymryd amser i ailagor," ychwanegodd Mr Tudur.

"Bydden i yn sicr am fynd yn ôl mewn i'r adeilad o leiaf wythnos cyn gallu ailagor er mwyn ail-stocio, rhoi dillad gwely a'r system olch yn ei lle, bod yr asiantaethau eraill sy'n ein cyflenwi yn barod i ailagor.

"Felly'r cynharaf y gorau er mwyn i ni allu cael rhyw fath o haf. Mae angen pendantrwydd."

Twitter

...ac awgrym hefyd pryd y dylid ei wisgo.

Senedd Cymru

Bydd Cadeirydd Undeb Rygbi Cymru, Gareth Davies a phrif weithredwr Cymdeithas Bêl-droed Cymru, Jonathan Ford yn ymddangos ger bron un o bwyllgorau'r Senedd yn ddiweddarach er mwyn trafod effaith coronafeirws ar chwaraeon.

Mae Mr Davies eisoes wedi rhybuddio y bydd rygbi Cymru yn dioddef yn ariannol pe bai gemau yn ailddechrau y tu ôl i ddrysau caeedig, heb unrhyw arian o werthiant tocynnau a'r maes lletygarwch.

Fe fydd Pwyllgor Diwylliant, y Gymraeg a Chyfathrebu yn cwrdd am 14:45.

Ffynhonnell y llun, Huw Evans Picture Agency

Mae ffigyrau newydd gan y Trysorlys yn dangos bod bron i draean o weithwyr Cymru wedi cael eu rhoi ar gynllun 'furlough' Llywodraeth y DU ers dechrau'r pandemig.

Mae cyfanswm o 316,500 o weithwyr wedi cael eu talu 80% o'u cyflog yn y cyfnod yna.

Mae'r ffigyrau hefyd yn dangos bod bron i hanner (49% neu 102,000) o weithwyr hunangyflogedig wedi elwa o'r cynllun SEISS.

Dyma'r ardaloedd yng Nghymru gyda'r nifer fwyaf o weithwyr sydd wedi derbyn 'furlough':

1. Caerdydd: 36,000
2. Rhondda Cynon Taf: 23,400
3. Abertawe: 23,000
4. Sir y Fflint: 18,800
5. Sir Gaerfyrddin: 18,000

Merthyr Tudful oedd yr ardal gyda'r nifer lleiaf o weithwyr ar 'furlough' gyda 6,000.

Rydych chi wedi clywed am y rhif 'R', ond beth mae'n ei olygu?

Dyma nifer y bobl ar gyfartaledd y gall person sydd yn sâl basio'r feirws ymlaen atyn nhw.

Felly os ydy'r rhif R yn 1, ar gyfartaledd fe fyddai 10 person sy'n dioddef o Covid-19 yn heintio 10 person arall.

Ond os yw R yn 0.8 yna byddai 10 person sy'n sâl efo'r haint yn heintio wyth arall.

Cliciwch yma i ddarllen mwy.

Twitter

Dyma rai o awgrymiadau Iechyd Cyhoeddus Cymru...

Mae 316,500 o weithwyr yng Nghymru wedi cael eu rhoi ar gynllun 'furlough' Llywodraeth y DU ers dechrau pandemig coronafeirws.

Mae'r cynllun, a gyflwynwyd i liniaru effeithiau'r pandemig, yn caniatáu i weithwyr dderbyn 80% o'u cyflog misol hyd at £2,500.

Mae 102,00 o weithwyr hunangyflogedig yng Nghymru hefyd wedi cael cefnogaeth Llywodraeth y DU, gan dderbyn cyfanswm o £273m.

Mae'r Cynllun Cymorth Incwm Hunangyflogedig (SEISS) yn wahanol i'r cynllun 'furlough' oherwydd ei fod yn grant sy'n cael ei roi i gwmpasu tri mis ac sy'n cyfateb i 80% o'r elw cyfartalog.

Post Cyntaf
BBC Radio Cymru

Yn ôl elusen Prosiect Kaleidoscope, mae cwymp o 57% yn nifer y bobl sy'n gaeth i alcohol neu gyffuriau sydd wedi dod atyn nhw am gymorth ers i'w canolfannau gau ddiwedd mis Mawrth.

Carol Hardy ydy rheolwr gwasanaethau elusen Y Stafell Fyw yng Nghaerdydd, elusen sy'n helpu pobl sy'n gaeth i gyffuriau ac alcohol.

Dywedodd wrth Post Cyntaf nad oedd y ffigyrau yn ei "synnu o gwbl".

"Pan rydan ni'n cwrdd gyda phobl am y tro cyntaf rydan ni'n ceisio pwysleisio pa mor bwysig ydy cyfathrebu er mwyn dod allan o'r stad ddyddiol yna o fod ar eich pen eich hun, felly fe rwygodd fy nghalon yn ddwy pan ddaeth y cyfnod clo ym mis Mawrth achos mae hyn yn mynd i fod yn anodd iawn ar bobl a dyna sydd wedi digwydd," meddai.

"O ran y 'Stafell Fyw' roedd yn rhaid i ni weithio yn galed am bythefnos, oriau di-ben-draw er mwyn cysylltu â phawb i wneud yn siŵr eu bod nhw'n eithaf cyfredol ar ein llyfrau er mwyn esbonio ein bod ni yn parhau â'n grwpiau therapi ar-lein a chwnsela un i un drwy gyfrwng y ffôn neu ar-lein.

"Ond beth sydd wedi digwydd, fel y mae Kaleidoscope wedi tanlinellu yn y niferoedd hyn, ydy bod y rhai sydd ddim wedi troi a chael y dewrder i ofyn am help, y bobl newydd, dydy hynny ddim yn digwydd fawr ddim."

Ffynhonnell y llun, Getty Images

Prosiect yn cynnig cyfle i gleifion canser gymryd rhan mewn sesiynau therapi heb adael eu cartrefi.

Post Cyntaf
BBC Radio Cymru

Dywed Anna Brychan, cyfarwyddwr Canolfan Dysgu ac Arweiyddiaeth Drindod Dewi Sant, ei bod hi'n "iawn fod plant yn cael cyfle i fynd 'nôl" i'r ysgol, ond bod "darllen y canllawiau yn fanwl yn datgelu maint yr heriau".

Ddoe fe gyhoeddodd Llywodraeth Cymru restr o ganllawiau gyda'r nod o gynorthwyo ysgolion cyn i ddisgyblion ddychwelyd ar 29 Mehefin.

"Mae'n golygu newid popeth," meddai Anna Brychan ar Post Cyntaf, "nifer y disgyblion sy'n mynd i'r ysgol, sut maen nhw'n cael eu dysgu, beth maen nhw'n dysgu, y defnydd o'r adeilad, sut maen nhw'n cael bwyd, sut y maen nhw'n cyrraedd yr ysgol a phryd ac am ba hyd y maen nhw yno.

"Mae heriau pob ysgol yn wahanol a'i gallu i ymateb yn amrywio ac mae'r her yn aruthrol ac fe fyddai hon yn her i'w wynebu hyd yn oed ym mis Medi."

Mae canolfannau gwyddoniaeth yng Nghymru yn galw ar Lywodraeth y DU i sefydlu cronfa argyfwng gwerth £25m er mwyn sicrhau y byddan nhw'n goroesi cyfnod y pandemig.

Mae'r Gymdeithas ar Gyfer Canolfannau Darganfod Gwyddoniaeth (ASDC) yn dweud bod sefydliadau o'r fath yng Nghymru wedi cael cymorth gan Lywodraeth Cymru, ond bod angen cefnogaeth pellach er mwyn sicrhau eu dyfodol hir dymor.

Mae miloedd o ymwelwyr yn mynd i ganolfannau fel Canolfan Technoleg Amgen Machynlleth ym Mhowys bob blwyddyn.

Roedd Xplore! yn Wrecsam - Techniquest Glyndŵr gynt - i fod i ailagor yn ei lleoliad newydd yng nghanol y dref fis diwethaf, cyn i'r gwaith ar y ganolfan ddod i stop oherwydd coronafeirws.

Hyd yma does dim awgrym wedi bod ynglŷn â phryd y bydd modd ailagor.