Maes Awyr Caerdydd

Mae degau o deithwyr wedi cyrraedd Maes Awyr Caerdydd ar gyfer hediad gan Ryanair i Malaga.

Daw hynny er bod Llywodraeth Cymru wedi gofyn i'r cwmni ganslo'r hediad gan fod y canllawiau 'aros yn lleol' dal mewn grym - cais gafodd ei anwybyddu.

Dywedodd Paul, un o'r teithwyr sydd wedi cyrraedd y maes awyr, wrth y BBC fod angen i Lywodraeth Cymru "ailasesu beth maen nhw'n ei wneud" gan mai "prin yw'r bobl sy'n cadw i'r rheol pum milltir" bellach.

Dywedodd cwpl arall oedd ddim am gael eu henwi eu bod yn hedfan i Malaga "am resymau busnes" a bod ganddyn nhw fenyg a mygydau i'w cadw nhw'n saff.

Mae disgwyl i'r hediad o Malaga gyrraedd Caerdydd am 09:55, a gadael am 10:20.

Post Cyntaf
BBC Radio Cymru

Mae arweinydd Cyngor Môn, Llinos Medi wedi diolch i gwmni 2 Sisters am wneud y penderfyniad hwnnw i gau'r safle pan doedd "dim gorfodaeth i wneud hynny".

"Rydan ni wedi bod mewn cysylltiad dim ond er mwyn rhannu pryderon lleol a gofyn am sicrwydd bod pob dim yn ei le i ddiogelu'r gweithwyr ac Ynys Môn yn ehangach," meddai ar raglen Post Cyntaf BBC Radio Cymru.

"Mae'r rhain wedi bod yn drafodaethau agored iawn ac mae'r cwmni wedi gweithredu ar ei gofynion ac wedi rhoi sesiynau hyfforddi a chamau eraill ar waith er mwyn cefnogi'r gweithwyr.

"Rydw i wedi cael sicrwydd bod y cyfan wedi ei gymryd o ddifrif a'i bod nhw eisiau gweld y ffatri yma fel esiampl i gwmnïau eraill ddysgu sut i weithredu yn y cyfnod anodd yma."

Ychwanegodd fod "dim tystiolaeth" ar hyn o bryd fod coronafeirws wedi ymledu i'r gymuned o ganlyniad i'r clwstwr o achosion yn y ffatri yn Llangefni.

"Ond mae'r penderfyniad fel awdurdod i beidio agor ysgolion tan yr wythnos nesa yn rhoi wythnos ychwanegol i ni fod 100% sicr o fod yn hyderus," meddai.

"Rydan ni eisiau'r hyder hwnnw yn y risg nad oes yna ymlediad cymunedol wedi bod oherwydd yr achosion hyn."

Mae 2 Sisters wedi dweud y bore 'ma ei bod hi dal yn "llawer rhy gynnar" i wybod beth oedd achos ymlediad yr haint yn y ffatri.

Ond mewn datganiad dywedodd y cwmni nad oedd ganddyn nhw ddewis ond cau'r safle "yn sydyn" ar ôl i'r achosion ddod i'r amlwg.

Ers hynny, medden nhw, maen nhw wedi gweithio'n agos gyda'r awdurdod lleol, Llywodraeth Cymru, Iechyd Cyhoeddus Cymru, awdurdodau iechyd a diogelwch a safonau bwyd, ac undebau i ddatblygu mesurau diogelwch newydd.

Ychwanegodd y cwmni eu bod yn disgwyl i'r holl weithwyr ddilyn y canllawiau newydd, hyd yn oed y rheiny sydd wedi cael y feirws, gan "nad ydyn ni'n gwybod eto" a yw hynny'n golygu fod ganddyn nhw imiwnedd.

Ffynhonnell y llun, Google

Yn y cyfamser mae ffatri prosesu bwyd 2 Sisters ar Ynys Môn yn ailagor heddiw, a hynny yn dilyn clwstwr o achosion Covid-19 yno fis diwethaf.

Fe wnaeth rheolwyr y ffatri benderfynu cau'r safle yn Llangefni yn llwyr am bythefnos wrth i nifer yr achosion ymysg y gweithlu gynyddu.

Cafodd 217 o weithwyr brawf positif am Covid-19, allan o'r gweithlu o 560.

Dywedodd y cwmni y bydd y safle yn cael ei ailagor yn raddol dros yr wythnos nesaf.

Nid dyna'r unig newid mawr sydd eisoes wedi'i gyhoeddi'r wythnos hon chwaith.

Ddoe cafwyd cadarnhad y bydd hawl gan dafarndai a bwytai i ailagor tu allan o 13 Gorffennaf.

Bydd modd i atyniadau twristiaid hefyd ailagor o 6 Gorffennaf - ar yr amod achosion o coronafeirws yn parhau i ostwng.

Ffynhonnell y llun, PA Media

Rydyn ni eisoes yn gwybod beth fydd un o brif bwyntiau trafod y gynhadledd i'r wasg heddiw - cadarnhad gan Lywodraeth Cymru fod y cyfyngiadau teithio'n cael eu codi o ddydd Llun ymlaen.

Mae disgwyl i Mark Drakeford fynd i fwy o fanylion ynghylch hynny amser cinio.

Er hynny, mae'r llywodraeth wedi pwysleisio fodd bynnag fod angen i bawb barhau i gadw pellter cymdeithasol, a pharchu'r lleoedd a'r cymunedau y maen nhw'n ymweld â nhw.

Bydd y newid sy'n golygu fod dau gartref yng Nghymru yn cael ffurfio "un cartref estynedig"a chwrdd â'i gilydd yn eu cartrefi hefyd yn dod i rym o ddydd Llun ymlaen.

Ffynhonnell y llun, Llywodraeth Cymru

BBC Cymru Fyw

Bore da, a chroeso i'r llif byw heddiw ble byddwn ni'n dod â'r diweddaraf i chi unwaith eto ar sefyllfa'r coronafeirws o Gymru a thu hwnt.

Yn gyntaf, dyma rai o benawdau'r bore.